Sa 2 Corinto 12:2, 3, sinambit ni Pablo an sarong tawo na “inagaw asin dinara sa ikatulong langit.” Siisay an tawong iyan? Sa surat niya sa kongregasyon sa Corinto, idinuon ni Pablo na ginagamit siya nin Diyos bilang sarong apostol. (2 Cor. 11:5, 23) Dangan nagsambit siya nin “mga bisyon asin mga kapahayagan kan Kagurangnan.” Sa konteksto, mayong sinambit si Pablo na iba pang Kristiyano. Huli kaini, lohikal sanang isipon na siya man sana an sinambit niyang tawo na tinawan nin mga bisyon asin mga kapahayagan.—2 Cor. 12:1, 5.

Kaya si Pablo an tawong “inagaw asin dinara sa ikatulong langit” saka “inagaw asin dinara sa paraiso.” (2 Cor. 12:2-4) Ginamit niya an tataramon na “mga kapahayagan,” na nagpaparisa na iyan paghahayag nin sarong bagay na mangyayari sa maabot na panahon.

Ano an “ikatulong langit” na nahiling ni Pablo?

Sa Bibliya, an “langit” puwedeng nanunungod sa pisikal na kalangitan. (Gen. 11:4; 27:28; Mat. 6:26) Pero ginagamit man an “langit” sa ibang mga paagi. Kun minsan, nanunungod iyan sa pamamahala nin tawo. (Dan. 4:20-22) O puwede man na nanunungod iyan sa pamamahala nin Diyos, paagi halimbawa kan saiyang Kahadian.—Kap. 21:1.

Nahiling ni Pablo an “ikatulong langit.” Ano an buot niyang sabihon? Sa Bibliya, inuutro kun minsan nin tulong beses an sarong bagay tanganing iduon iyan. (Isa. 6:3; Ezeq. 21:27; Kap. 4:8) Minalataw na sa pagsambit ni Pablo kan “ikatulong langit,” idinuduon niya an sarong nakakalabi asin halangkaw sa gabos na pamamahala—an Mesiyanikong Kahadian na pamamahalaan ni Jesu-Cristo asin kan 144,000 na kairiba niyang tagapamahala. Arog kan isinurat ni apostol Pedro, hinahalat niyato an “bagong mga langit” uyon sa panuga nin Diyos.—2 Ped. 3:13.

Ano man an “paraiso” na sinambit ni Pablo?

Manlain-lain man an puwedeng kahulugan kan tataramon na “paraiso”: (1) Huli sa orihinal na istaran nin tawo, lohikal sanang isipon na an “paraiso” puwedeng nanunungod sa maabot na literal na Paraiso digdi sa daga. (2) Puwedeng nanunungod iyan sa kamugtakan sa espirituwal na maeeksperyensiyahan kan banwaan nin Diyos sa bagong kinaban. (3) Saro pa, puwedeng nanunungod iyan sa marahayon na kamugtakan sa langit, an “paraiso nin Diyos” na sinambit sa Kapahayagan 2:7.—Hilingon an Torrengbantayan na Hulyo 15, 2015, p. 8. par. 8.

Posibleng an tulong aspektong iyan an pinapanungdan ni Pablo sa 2 Corinto 12:4 kan iniistorya niya an saiyang eksperyensiya.

Bilang sumaryo:

An “ikatulong langit” na sinambit sa 2 Corinto 12:2 posibleng marhay na nanunungod sa Mesiyanikong Kahadian sa pamamahala ni Jesu-Cristo asin kan 144,000, an “bagong mga langit.”—2 Ped. 3:13.

Iyan “ikatulong langit” huling an Kahadian sarong nakakalabi asin halangkaw sa gabos na pamamahala.

An “paraiso” sa bisyon kun sain “inagaw asin dinara” si Pablo posibleng marhay na nanunungod sa (1) maabot na literal na Paraiso digdi sa daga, (2) espirituwal na paraiso na maeeksperyensiyahan sa panahon na iyan, na magigin urog nanggad kisa sa espirituwal na paraiso ngunyan, asin sa (3) “paraiso nin Diyos” sa langit. An mga ini sarabay na maeksister sa bagong kinaban.

Kun siring, an bagong kinaban magigin kumbinasyon kan bagong mga langit asin kan bagong daga. Iyan magigin bagong areglo na kompuwesto kan langitnon na gobyernong Kahadian asin kan katawuhan na naglilingkod ki Jehova sa paraisong daga.