1, 2. Pag nagpipili nin magigin mga pasuhan sa buhay, taano ta madunong na maghinanyog sa satong Kaglalang? (Hilingon an mga ritrato sa kapinunan kan artikulo.)

KUN saro kang hoben, posibleng marhay na dakul an nagtatao sa saimo nin suhestiyon dapit sa puturo mo. Tibaad dagkahon ka kan mga maestra, guidance counselor, asin kan iba na kumua nin halangkaw na edukasyon asin magkaigwa nin trabahong halangkaw an suweldo. Pero sinasadol ka ni Jehova na iba an pilion. Siyempre, gusto niya na maghigos ka sa pag-eskuwela tanganing magkaigwa ka nin hanapbuhay pakagradwar mo. (Col. 3:23) Pero kun dapit sa pagdedesisyon sa magigin mga priyoridad mo sa buhay, dinadagka ka niya na magpagiya sa madunong na mga prinsipyo na kauyon kan saiyang katuyuhan asin kabutan para sa sato sa panahon na ini kan katapusan.—Mat. 24:14.

² Tandaan man na aram ni Jehova kun ano an mangyayari sa presenteng kinaban na ini asin kun gurano na karani an katapusan kaiyan. (Isa. 46:10; Mat. 24:3, 36) Midbid niya man kitang marhay—kun ano an nagtatao sa sato nin tunay na satispaksiyon asin kaugmahan pati kun ano an makakapadisganar sa sato asin makakawara kan satong kaugmahan. Kaya dawa garo baga rasonable an sadol nin tawo, kun bako iyan kauyon kan  sinasabi kan Tataramon nin Diyos, dai nanggad iyan masasabing kadunungan.—Tal. 19:21.

3, 4. Huli sa pagsunod sa salang sadol, ano an nangyari ki Adan asin Eva saka sa mga gikan ninda?

³ Igwa na nin salang sadol sa kapinunan pa sana kan kasaysayan nin tawo kan maglaog sa eksena si Satanas. An pangahas asin sagin man ngayang nagtatao nin marahay na sadol na si Satanas nagsabi ki Eva na magigin mas maugma siya asin an agom niya kun sinda an mapili kan gusto ninda sa buhay. (Gen. 3:1-6) Pero an totoo, makasadiri an mga motibo ni Satanas. Gusto niya na si Adan asin Eva—asin an saindang magigin mga gikan—magpasakop sa saiya asin sambahon siya imbes na si Jehova. Pero ano man an naitao sa sainda ni Satanas? Si Jehova an nagtao kan gabos na bagay na igwa sinda—an lambang saro, an saindang magayon na istaran na hardin, asin an saindang perpektong hawak na may potensiyal na mabuhay sagkod lamang.

⁴ Nakakamundo, sinuway ni Adan asin Eva an Diyos, tapos tinalikdan ninda siya. Arog kan aram mo na, kapaha-pahamak an nagin mga resulta. Arog sa mga burak na pinutol hali sa puon, luway-luway sindang naluyos asin nagadan. Pati an mga aki ninda nagsakit huli sa sumpa nin kasalan. (Roma 5:12) Sa ibong kaiyan, pinipili pa man giraray kan kadaklan na tawo na dai magpasakop sa Diyos. Gusto nindang mamuhay sa paaging gusto ninda. (Efe. 2:1-3) Malinaw na mahihiling sa mga resulta na ‘mayo nin kadunungan na tumang ki Jehova.’—Tal. 21:30.

5. Igwa nin anong pagtitiwala an Diyos sa saiyang linalang na mga tawo, asin napasala daw siya sa pagtitiwalang iyan?

⁵ Dawa arog kaiyan, aram ni Jehova na may mga tawo, kaiba an dakul na hoben, na mahanap sa saiya asin maglilingkod sa saiya. (Sal. 103:17, 18; 110:3) Pinapahalagahan nanggad niya sinda! Ibinibilang mo daw an sadiri mo na kaiba sa sainda? Kun iyo, siguradong nag-aako ka nin dakul na “marahay na mga bagay” hali sa Diyos na nakakatabang na marhay na magin maugma ka. (Basahon an Salmo 103:5; * Tal. 10:22) Arog kan maaaraman ta ngunyan, kaiba sa “marahay na mga bagay” na ini an abunda asin masustansiyang espirituwal na kakanon, an pinakamarahay na klase nin mga amigo, kapaki-pakinabang na mga pasuhan, asin tunay na katalingkasan.

6. Taano ta dapat na tawan mo nin atensiyon an saimong espirituwal na pangangaipo, asin paano iyan itinatao ni Jehova?

⁶ Bakong arog kan mga hayop, kaipuhan mo nin espirituwal na mga bagay, na an saimong Kaglalang sana an makakatao. (Mat. 4:4) Kun may pagpapasalamat kang magdadangog sa saiya, magkakamit ka nin pakasabot, kadunungan, asin kaugmahan. “Maugma an mga nakakamating kaipuhan ninda nin espirituwal na mga bagay,” an sabi ni Jesus. (Mat. 5:3) Itinatao nin Diyos an saimong espirituwal na mga pangangaipo paagi kan saiyang Tataramon asin kan abundang espirituwal na kakanon na hali sa “maimbod asin mapagmansay na uripon.” (Mat. 24:45) Asin manlain-lain saka abunda nanggad an kakanon na iyan!—Isa. 65:13, 14.

7. Ano an pirang pakinabang kun kakakanon mo an espirituwal na pagkakan na itinatao nin Diyos?

⁷ An espirituwal na kakanon na itinatao nin Diyos tatawan ka nin kadunungan asin kakayahan sa pag-iisip, na makakaprotektar sa saimo sa dakul na paagi. (Basahon an Talinhaga 2:10-14.) Halimbawa, an mga kuwalidad na iyan makakaprotektar sa saimo sa salang mga katukduan, arog kan ideya na mayo nin Kaglalang. Pinoprotektaran ka kaiyan sa kaputikan na an kuwarta asin mga pagsadiri an pinakakaipuhan tanganing magin maugma. Asin nakakatabang iyan sa saimo na maaraman asin malabanan an salang mga pagmawot asin mga paggawi na makakaraot sa saimo. Kaya padagos na hanapon an kadunungan nin Diyos asin an kakayahan sa pag-iisip nin siring sa kayamanan! Mantang nagkakaigwa ka kan mahalagang marhay na mga kuwalidad na  ini, maaaraman mo sa sadiri mong eksperyensiya na namumutan ka ni Jehova asin gusto niya an pinakamarahay para sa saimo.—Sal. 34:8; Isa. 48:17, 18.

8. Taano ta dapat ka nang rumani sa Diyos ngunyan, asin paano ka makikinabang diyan pag-abot nin panahon?

⁸ Dai na mahahaloy, gabos na kabtang kan kinaban ni Satanas malalaglag, asin si Jehova sana an satong madadalaganan. Sa katunayan, puwedeng mag-abot an panahon na sa saiya kita madepende para sa mismong sunod na kakakanon ta! (Hab. 3:2, 12-19) Iyo, ngunyan na an panahon na rumani ka sa saimong Ama sa langit asin pakusugon an pagtitiwala mo sa saiya. (2 Ped. 2:9) Kun gigibuhon mo iyan, ano man an nangyayari sa palibot mo, mamamatian mo an arog kan namati kan salmistang si David na nagsurat: “Pirmi kong pinagdadanay si Jehova sa sakuyang atubangan. Huling yaon siya sa sakuyang tuo, dai ako matatanyog nuarin man.”—Sal. 16:8, NW.

9. (a) Sigun sa Juan 6:44, ano an ginigibo ni Jehova? (b) Ano an pambihira pag inot mong mabisto an ibang mga Saksi?

⁹ Irinarani ni Jehova an mga tinutugutan niyang magin miyembro kan saiyang espirituwal na pamilya, asin mabuot niyang dinadara sa tunay na pagsamba an mga tawong sadiyosan an puso. (Basahon an Juan 6:44.) Pag may nabisto kang bakong Saksi, ano an aram mo dapit sa saiya? Apuwera sa saiyang pangaran asin itsura, tibaad dikiton sana an aram mo sa saiya. Bakong arog kaiyan an sitwasyon pag may nabisto kang midbid si Jehova asin namumutan Siya. Dawa kun iba an saiyang pinaghalian, nasyon, tribo, o kultura, dakul na an aram mo dapit sa saiya—asin dakul man an aram niya dapit sa saimo!

10, 11. Ano an pagkakapare-pareho kan mga lingkod ni Jehova, asin paano kita nakikinabang diyan?

¹⁰ Halimbawa, aram nindo tulos an “lengguwahe” kan lambang saro—an “dalisay na lengguwahe” nin katotoohan. (Sof. 3:9, NW) Kaya aram na nindong duwa an mga tinutubod kan lambang saro dapit sa Diyos, pamantayan sa moral, asin paglaom sa maabot na panahon, asin dakul pang iba. Dugang pa, iyan an mga bagay na pinakamahalagang maaraman dapit sa sarong tawo; mga bagay na nagpapakusog nin kumpiyansa asin pagtitiwala. Iyan man an nagigin pundasyon nin marahay asin nagdadanay na pakikiamigo.

¹¹ Bako nanggad sobra kun sasabihon na bilang parasamba ni Jehova, igwa ka kan pinakamarahay na klase nin mga amigo sa manlain-lain na parte  kan kinaban. Dai mo pa lang kaya nabibisto an kadaklan sa sainda! Apuwera sa mga lingkod ni Jehova, sairisay pa man an igwa kan mahalagang marhay na regalong ini?

12. Anong marahayon na espirituwal na mga pasuhan an puwede mong abuton?

¹² Basahon an Parahulit 11:9–12:1. Igwa ka daw nin saro o labi pang espirituwal na pasuhan na pinagmamaigutan mong abuton? Tibaad hinihinguwa mong makabasa nin kabtang kan Bibliya aroaldaw. O tibaad hinihinguwa mong magin mas mahusay sa pagtaram asin pagtukdo. Ano man iyan, pag nahihiling mo an magayon na mga resulta—o pag nahihiling iyan kan iba asin kinokomendaran ka—ano an namamatian mo? Siguradong namamatian mong may marahay kang naisagibo saka nauugma ka. Asin tama lang na makamati ka kaiyan huling iniinot mo an kabutan nin Diyos kisa sa sadiri mo, bilang pag-arog ki Jesus.—Sal. 40:8; Tal. 27:11.

13. Kumpara sa sekular na mga pasuhan, taano ta espesyal asin pambihira an paglilingkod sa Diyos?

¹³ Pag nagpopokus ka sa espirituwal na mga pasuhan, tunay na nakakaugma iyan huling an paggibo kaiyan bako nanggad sayang. Si apostol Pablo nagsurat: “Magin marigon kamo, dai natatanyog, asin pirming dakul an ginigibo sa gibuhon kan Kagurangnan, huling aram nindo na an saindong pagpapagal sa paglilingkod sa Kagurangnan bakong sayang.” (1 Cor. 15:58) Sa kabaliktaran, an buhay na nakapokus sa pagpursigi sa sekular na mga ambisyon asin pasuhan—dawa garo baga mapangganang marhay—sayang sana pag-abot nin panahon. (Luc. 9:25) Napatunayan iyan ni Hading Solomon sa saiyang sadiri—asin sa sato.—Roma 15:4.

14. Ano an manunudan mo sa ginibo ni Solomon may koneksiyon sa kaugmahan?

¹⁴ Huling mayamanon asin makapangyarihan, pinurbaran ni Solomon na ‘paugmahon an saiyang sadiri asin aramon kun ano an [karahayan na dara kaiyan].’ (Par. 2:1-10, An Marahay na Bareta Biblia) Naggibo siya nin mga harong, nagdisenyo nin mga hardin asin parke, saka ginibo an ano man na mawot niya. Ano an namatian niya pagkatapos? Kontento daw siya? Namatian daw niyang may marahay siyang naisagibo? Dai na kita marambang huling sinabi mismo ni Solomon sa sato an simbag: ‘Kan hiniling ko an gabos na mga gibo na hinaman kan sakuyang mga kamot, an gabos mayong kamanungdanan asin mayong pakinabang.’ (Par. 2:11) Mapuwersang leksiyon nanggad! Isasapuso mo daw iyan?

15. Taano ta mahalaga an pagtubod, asin ano an mga pakinabang kaiyan sigun sa Salmo 32:8?

¹⁵ Habo ni Jehova na manudan mo sa makulog na paagi an mahalagang mga leksiyon sa buhay. Siyempre, kaipuhan mo nin pagtubod tanganing masunod an Diyos asin mainot sa saimong buhay an kabutan niya. Mahalagang marhay an siring na pagtubod, asin nungka iyan na masusudya. Iyo, nungkang lilingawan ni Jehova “an pagkamuot [na ipinahiling mo] para sa saiyang ngaran.” (Heb. 6:10) Kaya hinguwahon na magkaigwa nin makusog na pagtubod, asin mahihiling mo mismo na an gusto kan saimong Ama sa langit iyo an pinakamarahay para sa saimo.—Basahon an Salmo 32:8.

16. Taano ta dapat niyatong pahalagahan an satong katalingkasan asin gamiton iyan sa madunong na paagi?

¹⁶ Si Pablo nagsurat: “Kun sain yaon an espiritu ni Jehova, yaon an katalingkasan.” (2 Cor. 3:17) Iyo, mahalagang marhay ki Jehova an katalingkasan, asin ilinaag niya sa satong puso an pagpapahalagang iyan. Pero kasabay kaiyan, gusto niya na gamiton mo sa responsableng paagi an saimong katalingkasan, na proteksiyon sa saimo. Tibaad may bisto kang mga hoben na naghihiling nin pornograpiya o naggigibo nin seksuwal na imoralidad, nagkakawat nin peligrosong isport, o nagdodroga asin nagpapasobra sa inumon na de-alkohol. Iyo, tibaad nakakamati sinda nin temporaryong kaugmahan. Pero sa parati dakula an karibay kaiyan, tibaad magkahilang sinda, magin adikto, o magadan  pa ngani. (Gal. 6:7, 8) Malinaw na an saindang “katalingkasan” sarong daing hirak na pagdaya sa sadiri.—Tito 3:3.

17, 18. (a) Taano ta nakakapatalingkas an pagkuyog sa Diyos? (b) Pagkumpararon an katalingkasan na igwa si Adan saka Eva kaidto asin an katalingkasan na igwa an mga tawo ngunyan.

¹⁷ Bilang pagkumparar, pirang tawo an bisto mo na nagkahilang huli ta nagsunod sinda sa mga pamantayan kan Bibliya? Malinaw, an pagkuyog ki Jehova parehong kapaki-pakinabang sa salud asin nakakapatalingkas. (Sal. 19:7-11) Dugang pa, pag ginagamit mo an saimong katalingkasan sa madunong na paagi—na dai minalampas sa mga limitasyon kan perpektong mga pagbuot asin prinsipyo nin Diyos—ipinapahiling mo sa Diyos, siring man sa saimong mga magurang, na puwede kang tawan nin dugang na katalingkasan. Sa katunayan, katuyuhan nin Diyos na, pag-abot nin panahon, tawan an saiyang maimbod na mga lingkod nin perpektong katalingkasan, na sinambit sa Bibliya na “mamuraway na katalingkasan bilang mga aki nin Diyos.”—Roma 8:21.

¹⁸ Naeksperyensiyahan ni Adan asin Eva an katalingkasan na iyan. Sa hardin nin Eden, pirang naglilimitar na pagbuot an itinao nin Diyos sa sainda? Saro sana. Dai ninda dapat kakanon an bunga nin sarong kahoy. (Gen. 2:9, 17) Para sa saimo, an kasaro-saruing restriksiyon daw na iyan maringis o nagin pasakit sa sainda? Dai nanggad! Ikumparar iyan sa dakulon na gibo nin tawong mga ley na napiritan an mga tawo na manudan asin sunudon.

19. Sa anong mga paagi kita tinutukduan na magin talingkas?

¹⁹ Talagang madunong an pamamaagi na ginamit ni Jehova sa saiyang mga lingkod. Imbes na tawan kita nin kadakul-dakul na pagbuot, mapasensiya niya kitang tinutukduan na sunudon an pagbuot na pagkamuot. Gusto niya na mamuhay kita kauyon kan mga prinsipyo nin Diyos asin ikaungis an maraot. (Roma 12:9) Marahayon na halimbawa kan pagtutukdong iyan an Sermon ni Jesus sa Bukid, huling ipinapahiling kaiyan an mga dahilan nin maraot na gibo. (Mat. 5:27, 28) Bilang Hadi kan Kahadian nin Diyos, padagos kitang tutukduan ni Cristo sa bagong kinaban tanganing lubos niyatong maarog an pagmansay niya sa katanusan asin karatan. (Heb. 1:9) Gigibuhon niya man na perpekto an satong hawak asin kaisipan. Isipa iyan, dai mo na mamamatian an makusog na pagmawot na gumibo nin sala o maeeksperyensiyahan an marauton na mga epekto nin kasalan. Dangan sa katapos-tapusi, maeeksperyensiyahan mo na an “mamuraway na katalingkasan” na ipinanuga sa saimo ni Jehova.

20. (a) Paano ginagamit ni Jehova an saiyang katalingkasan? (b) Paano ka makikinabang sa halimbawa nin Diyos?

²⁰ Siyempre, nungkang magigin lubos an satong katalingkasan. Gigiyahan iyan kan pagkamuot sa Diyos asin sa kapwa. Sa katunayan, an hinahagad sana sa sato ni Jehova iyo na arugon ta siya. Igwa siya nin daing limitasyon na katalingkasan; pero pinili niyang giyahan nin pagkamuot an pagtratar niya sa mga tawo asin mga anghel. (1 Juan 4:7, 8) Kaya tama lang na isipon na lubos sana niyatong maeeksperyensiyahan an katalingkasan kun ginigiyahan iyan nin pagkamuot na arog kan ipinapahiling nin Diyos.

21. (a) Ano an namatian ni David dapit ki Jehova? (b) Ano an pag-uulayan niyato sa sunod na artikulo?

²¹ Pinapahalagahan mo daw an dakul na “marahay na mga bagay” na itinao sa saimo ni Jehova, arog kan abundang espirituwal na kakanon, marahay na mga amigo, kapaki-pakinabang na mga pasuhan, asin paglaom na makamtan an perpektong katalingkasan? (Sal. 103:5) Kun iyo, lugod na magkaigwa ka kan kaisipan na siring kan nasa Salmo 16:11: “Ipinaaram mo sa sako an dalan nin buhay. Sa saimong atubangan may abundang kagaya-gayahan; sa saimong tuong kamot, sagkod lamang na may kaugmahan.” (NW) Pag-uulayan niyato sa sunod na artikulo an dugang pang espirituwal na mga kayamanan na mahihiling sa Salmo 16. Magtatao ini nin mahalagang mga punto kun paano magkakaigwa nin tunay na nakakakontentong buhay.