Minalataw na dai. Mayong sinabi an Diyablo ki Eva na kun kakakanon ni Eva an bunga na ipinagbawal nin Diyos, magagadan lang an hawak niya pero igwa siya nin dai nahihiling na parte (an inaapod ngunyan nin nagkapira na imortal na kalag) na padagos na mabubuhay sa ibang lugar. Gamit an halas para magtaram, sinabi ni Satanas na kun kakakanon ni Eva an bunga kan kahoy na iyan, ‘siguradong dai siya magagadan.’ Gusto niyang paluwason na padagos na mabubuhay si Eva na may mas marahay na buhay digdi sa daga, sarong buhay na dai nakadepende sa Diyos.—Gen. 2:17; 3:3-5, NW.

Kun an itinutukdo ngunyan na palsong doktrina na imortalidad kan kalag dai nagpuon sa Eden, kasuarin iyan nagpuon? Dai niyato sigurado. An aram ta iyo na pinara kan Baha kan panahon ni Noe an gabos na palsong pagsamba. Mayong palsong relihiyosong ideya an natada pagkatapos kan Baha huling si Noe asin an pamilya niya sana—na mga tunay na parasamba—an nakaligtas.

Kaya an katukduan ngunyan na imortalidad kan kalag nin tawo, siguradong nagpuon pagkatapos kan Baha. Kan rinibaraw nin Diyos an mga tawo sa Babel paagi sa pagliwat kan saindang lengguwahe dangan nagkawararak “sa bilog na daga,” siguradong nadara ninda an ideya na an mga tawo igwa nin imortal na kalag. (Gen. 11:8, 9, NW) Dawa kun kasuarin pa nagpuon an palsong ideyang iyan, nakakasigurado kita na an “ama kan kaputikan,” si Satanas na Diyablo, iyo an nasa likod kaiyan asin ikinaugma niyang naglakop iyan na marhay.—Juan 8:44.