MASASABI mo daw na mapagpasalamat ka? Dapat na pag-isipan kan kada saro sa sato an hapot na iyan. Ihinula kan Bibliya na sa panahon niyato, dakul na tawo an magigin “dai tataong magpasalamat.” (2 Tim. 3:2) Tibaad ngani may mga bisto ka na sa pagmati ninda maninigo sana sinda sa gabos na bagay na igwa sinda, na garo baga an kadaklan na bagay obligasyon kan iba na itao sa sainda. Para sainda garo baga dai ninda kaipuhan magin mapagpasalamat sa mga bagay na inaako ninda. Posibleng marhay na mauyon ka na dai nakakaugmang makaibanan an siring na mga tawo?

Sa kabaliktaran, sinabi sa mga lingkod ni Jehova: “Ipahiling nindo na mapagpasalamat kamo.” Dapat kitang “magpasalamat . . . sa gabos na bagay.” (Col. 3:15; 1 Tes. 5:18) Sa katunayan, marahay na magkaigwa kita nin mapagpasalamat na sabuot. May nagkapirang dahilan.

An sarong makusog na dahilan kun taano ta dapat kitang magkaigwa nin mapagpasalamat na sabuot iyo na makakatabang iyan para magkaigwa kita nin positibong paghiling sa sadiri. Marahay sa pagmati pag nagpapasalamat, asin marahay man iyan sa pagmati kan pinapasalamatan. Taano ta arog kaiyan an epekto kan pagigin mapagpasalamat? Buweno, pag-isipan ini: Pag nahihiling mo na gusto kan iba na gumibo nin sarong bagay para sa saimo, bako daw na buot sabihon kaiyan mahalaga ka para sa sainda? Nagmamakulog sinda sa saimo. Asin pag namamatian mo an pagmakulog na iyan, marahayon nanggad iyan sa pagmati. Totoo nanggad iyan ki Ruth. Nagpahiling si Boaz nin pagkabukas-palad ki Ruth. Mayong duda na naugmang marhay si Ruth na igwang nagmamakulog saiya.—Rut 2:10-13.

Lalo nang dapat kitang magin mapagpasalamat sa Diyos. Siguradong iniisip mo kun minsan an dakul na espirituwal asin materyal na regalong itinao niya asin padagos na itinatao. (Deut. 8:17, 18; Gibo 14:17) Pero imbes na isipon sana sa halipot na panahon an karahayan na iyan nin Diyos, puwede ka daw magtao nin panahon para hurop-hurupon an dakul na bendisyon na itinao niya sa saimo asin sa saimong mga namumutan? An paghurop-hurop sa pagkabukas-palad kan Kaglalang mapakusog kan saimong pagpapahalaga sa saiya asin makakatabang na urog mong mamatian kun gurano ka niya kanamumutan saka pinapahalagahan.—1 Juan 4:9.

Pero bako lang paghurop-hurop sa pagkabukas-palad asin sa mga bendisyon ni Jehova an dapat niyatong gibuhon; dapat man niyato siyang pasalamatan sa karahayan niya. (Sal. 100:4, 5) Sinasabi na “an pagpahayag nin pasasalamat nakakatabang na marhay para magin maugma an tawo.”

An saro pang dahilan kaya dapat kitang magin mapagpasalamat iyo na nakakapakusog iyan sa relasyon nin mag-amigo. Kaipuhan niyato gabos na mamatian na pinapahalagahan kita. Pag sinsero mong pinapasalamatan an sarong tawo sa ginibo niyang kabuutan, nagigin mas harani kamo sa lambang saro. (Roma 16:3, 4) Saro pa, posibleng marhay na an mga tawong mapagpasalamat mga matinabang man. Naririsa ninda an ginigibong mga kabuutan sa sainda kaya napapahiro sinda na magin mabuot man. Iyo, nakakapaugma an pagtabang sa iba. Arog mismo iyan kan sinabi ni Jesus: “Igwang urog na kaugmahan sa pagtao kisa sa pag-ako.”—Gibo 20:35.

Si Robert Emmons, codirector kan sarong pag-adal na ginibo kan University of California manungod sa pagigin mapagpasalamat, nagsabi: “Para magin mapagpasalamat, kaipuhan niyatong masabutan na nagdedepende kita sa lambang saro. Kun minsan kita an nagtatao asin kun minsan kita an nag-aako.” An totoo, para padagos kitang mabuhay asin magin maugma nagdedepende kita sa iba sa  dakul na paagi. Halimbawa, puwedeng sa sainda hali an satong kakanon o tabangan ninda kita sa medikal na paagi. (1 Cor. 12:21) Naaapresyar na marhay kan tawong mapagpasalamat an mga ginigibo kan iba para sa saiya. Kaya, inuugali mo daw na magpahayag nin pasasalamat sa mga ginigibo kan iba para sa saimo?

An saro pang dahilan kaya dapat kitang magin mapagpasalamat iyo na nakakatabang iyan para magpokus kita sa positibo imbes na sa negatibo. An satong isip garo saraan. Pinapangyari kaiyan na makapokus kita sa partikular na mga bagay sa palibot niyato pero inuulang kaiyan an ibang bagay. Mas nahihiling mo an positibong mga bagay kisa sa mga problema. Mantang nagigin mas mapagpasalamat ka, mas dakul man na marahay na bagay an mahihiling mo, kaya lalo ka pang nagigin mapagpasalamat. An pagkaigwa nin mapagpasalamat na pananaw sa buhay makakatabang saimo na magibo an sadol ni apostol Pablo: “Danay kamong mag-ugma nin dahil sa Kagurangnan.”—Fil. 4:4.

An pagigin mapagpasalamat makakatabang sa sato na dai mag-isip nin negatibo. Bako daw na kun pasasalamat an nasa puso ta, harayong mangyari na makamati kita nin pagkauri, kamunduan, o paghinanakit? An mga tawong mapagpasalamat mas dikit an tendensiyang magin materyalistiko. Inaapresyar ninda an mga bagay na igwa sinda asin dai nagpopokus sa pagkua nin mas dakul.—Fil. 4:12.

Bilang Kristiyano, aram mo na gusto ni Satanas na madisganar ka asin pangluyahan nin buot huli sa mga problema na inaagihan mo sa huring mga aldaw na ini. Gustong-gusto niya kun negatibo ka asin mapagreklamo. Puwedeng maapektaran kan arog kaiyan na sabuot an pagigin epektibo mo sa pagdara kan maugmang bareta. Sa katunayan, magkakonektar na marhay an pagigin mapagpasalamat saka an bunga kan espiritu nin Diyos, kaiba diyan an kagaya-gayahan huli sa marahay na mga bagay na itinao nin Diyos sa saimo asin an pagtubod sa gabos niyang panuga.—Gal. 5:22, 23.

Bilang lingkod ni Jehova, posibleng mauyon ka sa sinabi kan artikulong ini manungod sa pagigin mapagpasalamat. Minsan siring, aram mo man na dai kita awtomatikong nagkakaigwa nin mapagpasalamat asin positibong pananaw. Dai madisganar. Kaya mong magkaigwa asin padagos na magpahiling kaiyan. Paano? Magtao nin panahon kada aldaw para pag-isipan an mga bagay sa buhay mo na maipagpapasalamat mo. Mantang mas ginigibo mo iyan, magigin mas natural man sa saimo na magin mapagpasalamat. Huli kaiyan, magigin mas maugma ka kisa sa mga tawong an pigpaparaisip iyo an saindang mga problema sa buhay. Isip-isipon an marahay na mga bagay na ginigibo nin Diyos asin kan iba na nakakapakusog saka nakakapaugma sa saimo. Puwede ka pa nganing maggibo nin journal. Puwede mong isurat diyan an duwa o tulong bagay na ipinagpapasalamat mo sa kada aldaw.

Sinasabi kan nagkapirang mga nag-research manungod sa pagigin mapagpasalamat na “pag pirmi kitang nagpapasalamat, puwede kaiyan baguhon an paggana kan mga neuron sa satong hutok para magin mas madali para sa sato na magin positibo.” An tawong mapagpasalamat mas maugma. Kaya isipon an gabos na bendisyon na inaako mo, ikaugma an magagayon na eksperyensiya mo, pirming magin mapagpasalamat! Imbes na ipasipara sana an marahay na mga bagay, ‘magpasalamat ki Jehova, huli ta siya marahay.’ Iyo, “magpasalamat . . . sa gabos na bagay.”—1 Cron. 16:34; 1 Tes. 5:18.