Masisimbag mo daw an mga hapot na ini na base sa An Torrengbantayan na 2019?

Ano an kahulugan kan panugang ini nin Diyos: “Mayong armas na gigibuhon laban sa saimo an magkakaepekto”? (Isa. 54:17, NW)

Makakapagtiwala kita na poprotektaran kita ni Jehova laban sa mapandestrosong mga puwersa na siring sa ‘kabagsikan kan mga pangahas.’ (Isa. 25:4, 5) Dai kita magigibuhan nin permanenteng danyos kan satong mga kaiwal.—w19.01, p. 6-7.

Paano an hustisya ni Jehova ipinapahiling kan paagi nin pagtrato niya sa mga Canaanita asin sa matagas an payo na mga Israelita?

Hinukuman ni Jehova an mga nagkokomiter nin maating seksuwal na mga gibo o an nambibiktima nin mga babayi asin mga aki. Binendisyunan niya an mga tawo na masinunod sa saiya asin tinatrato nin makatanusan an iba.—w19.02, p. 22-23.

Ano an dapat niyatong gibuhon kun may namimibing bakong kapagtubod tapos yaon kita?

Puwedeng magdanay na lang kitang silensiyo asin magalang pero dai kita puwedeng magsabi nin “amen” o makikaputan nin kamot sa ibang yaon. Puwede kitang personal na mamibi nin silensiyo.—w19.03, p. 31.

Gurano kaseryoso an pang-aabuso sa aki?

An pang-aabuso sa aki kasalan sa biktima, sa kongregasyon, sa sekular na awtoridad, asin sa Diyos. Kun kahagadan sa sekular na ley na isumbong an mga alegasyon nin pang-aabuso, masunod an mga elder.—w19.05, p. 9-10.

Paano mo babaguhon o papauswagon an saimong paagi nin pag-iisip?

Panginot na mga lakdang: Makipag-ulay ki Jehova paagi sa pamibi. Maghurop-hurop na an katuyuhan analisaron an sadiri. Madunong na pilion an saimong mga kaiba-iba.—w19.06, p. 11.

Ano an puwede niyatong gibuhon ngunyan bilang pag-andam sa persekusyon?

Kaipuhan niyatong pakusugon an satong relasyon ki Jehova. Magtiwala na namumutan niya kita asin na nungka niya kitang babayaan. Basahon aroaldaw an Bibliya, asin regular na mamibi. Magin kumbinsido na magkakatotoo an mga bendisyon kan Kahadian. Magtuom nin paboritong mga teksto asin mga kanta nin pag-umaw.—w19.07, p. 3-5.

Ano an puwede niyatong gibuhon tanganing tabangan an satong mga kapamilya na maligtas?

Mahalaga na magpahiling kita nin empatiya. An marahay na paggawi puwedeng magin marahay na patotoo. Magin mapasensiya asin mataktika.—w19.08, p. 15-17.

Ano an mga nakakapaginhawa sa sato, arog kan panuga ni Jesus na mababasa sa Mateo 11:28?

Igwa kita nin mamumuton na Kristiyanong mga paraataman, pinakamarahay na mga amigo, asin pinakamarahay na gibuhon.—w19.09, p. 23.

Paano kita puwedeng tawan ni Jehova kan pagmawot asin kan kakayahan na gumibo? (Fil. 2:13)

Mantang binabasa niyato an Tataramon nin Diyos asin hinuhurop-hurop iyan, puwede kitang pakusugon nin Diyos, na tinatawan kita kan pagmawot na gibuhon an saiyang kabutan asin kan kakayahan na gumibo. Kayang pauswagon kan saiyang espiritu an satong mga kakayahan.—w19.10, p. 21.

Anong madunong na mga lakdang an dapat niyatong gibuhon bago kita gumibo nin seryosong desisyon?

An limang lakdang: Mag-research na marhay. Mamibi na tawan ka nin kadunungan. Siyasaton an saimong mga motibo. Magin espesipiko. Magin realistiko.—w19.11, p. 27-29.

An ideya daw na imortalidad kan kalag nagpuon sa sinabi kaidto ni Satanas ki Eva?

Minalataw na dai. An sinabi ni Satanas ki Eva dai siya magagadan, bakong magagadan lang an hawak niya. An ano man na palsong relihiyosong ideya napara huli sa Baha. An paniniwala dapit sa imortal na kalag posibleng marhay na nagpuon bago pagsuruway-suwayon nin Diyos an mga tawong nagtutugdok kan tore nin Babel.—w19.12, p. 15.