Dai, mayo kitang mababasa sa Bibliya o sa mga libro sa kasaysayan na nagpaparisa na may mga Kristiyano kaidto na binawtismuhan para sa mga tawong gadan na.

Dahil sa pagkatradusir kan dakul na Bibliya sa tekstong iyan, may mga nag-isip na isinasagibo kaidto kan panahon ni Pablo an pagbawtismo sa tubig para sa iba na gadan na. Halimbawa: “Kun an mga gadan dai binubuhay liwat, tadaw ta an mga tawo nagpapabunyag [o, “binabawtismuhan”] para sa mga gadan?”—An Marahay na Bareta Biblia.

Pero mangnuhon an komento nin duwang iskolar sa Bibliya. Sinabi ni Dr. Gregory Lockwood na an ideya na pagbawtismo “para sa mga tawong gadan na . . . sarong klase nin pagbawtismo na, sigun sa pagsiyasat, mayong patunay sa kasaysayan o sa Bibliya na isinasagibo kaidto.” Kaagid kaiyan, isinurat ni Professor Gordon D. Fee: “Mayong basehan sa kasaysayan o sa Bibliya an siring na bawtismo. Mayo lamang sinambit an Bagong Tipan manungod diyan. Mayong patunay na isinagibo iyan sa ano man na iba pang mga simbahan o sa ano man na ortodoksong Kristiyanong komunidad sa mga siglong kasunod mismo kaiyan.”

Sinasabi kan Bibliya na an mga parasunod ni Jesus dapat na “gumibo . . . nin mga disipulo sa mga tawo kan gabos na nasyon na binabawtismuhan sinda . . . , na tinutukduan sinda na utubon an gabos na bagay” na ipinagbuot niya. (Mat. 28:19, 20) Bago magin bawtisadong disipulo an saro, kaipuhan niyang makanuod manungod ki Jehova asin sa Saiyang Aki, magtubod, asin magsunod sa sainda. Dai iyan magigibo nin saro na gadan na; dai man iyan magigibo para saiya nin sarong buhay na Kristiyano.—Par. 9:5, 10; Juan 4:1; 1 Cor. 1:14-16.

Kun siring ano an buot sabihon ni Pablo?

May mga taga Corinto na nagsasabing mayong pagkabuhay liwat nin mga gadan. (1 Cor. 15:12) Ipinahiling ni Pablo na sala an pagmansay na iyan. Sinabi niya na ‘aroaldaw siyang napaatubang sa kagadanan.’ Siyempre, buhay pa man siya. Pero sa ibong kan naeksperyensiyahan niyang mga peligro, nagtitiwala siya na pagkagadan niya bubuhayon siya liwat bilang sarong makapangyarihan na espiritu, arog ni Jesus.—1 Cor. 15:30-32, 42-44.

Kaipuhan man masabutan kan mga taga Corinto na an pagigin linahidan na Kristiyano nangangahulugan na aroaldaw sindang mapapaatubang sa mga problema asin magagadan bago sinda buhayon liwat. Kan sinda “binawtismuhan ki Cristo Jesus binawtismuhan man [sinda] sa saiyang kagadanan.” (Roma 6:3) An saindang piguratibong bawtismong iyan maresulta sa pamumuhay na masagkod sa saindang literal na kagadanan asin pagkabuhay liwat pasiring sa langit.

Labing duwang taon pagkatapos kan bawtismo ni Jesus sa tubig, sinabi niya sa duwa sa saiyang mga apostol: “An bawtismong ibinabawtismo sa sako, ibabawtismo sa saindo.” (Mar. 10:38, 39) Sa pagkakataon na iyan, dai siya binabawtismuhan sa tubig. An buot niyang sabihon, an saiyang pagdadanay na maimbod sa Diyos maresulta sa saiyang kagadanan. Isinurat ni Pablo na an mga linahidan “iribanan na magsasakit tanganing sinda iribanan man na pamurawayon.” (Roma 8:16, 17; 2 Cor. 4:17) Kaya kaipuhan man nindang magadan para buhayon liwat tanganing mag-istar sa langit.

Kun siring, ini an tamang pagkatradusir sa sinabi ni Pablo: “Ta kun bakong siring, ano an gigibuhon kan mga binabawtismuhan para sa kagadanan? Kun an mga gadan dai man palan talaga ibabangon, taano ta binabawtismuhan pa sinda para sa kagadanan?”