Binasa mo daw na marhay an mga isyu kan An Torrengbantayan sa taon na ini? Kun iyo, hilinga kun masisimbag mo an minasunod na mga hapot:

Paano niyato dapat trataron an linahidan na mga Kristiyano?

Pinapahalagahan ta an saindang pagtubod pero dai ta sinda tinatawan nin sobra-sobrang atensiyon. Linilikayan niyato an sobrang ‘pag-umaw sa mga tawo.’ (Jud. 16, nota sa ibaba) Dai ta sinda pagparahaputon nin personal na mga hapot manungod sa saindang paglaom.—w20.01, p. 29.

Ano an dapat makakumbinsir sa saimo na riniriparo ka mismo ni Jehova?

Ipinapahiling kan Bibliya na nariparo ka na niya bago ka pa ipangaki. Asin dinadangog niya an saimong mga pamibi. Aram niya kun ano an iniisip mo asin an nasa puso mo, asin may epekto sa saiya an saimong paggawi. (1 Cron. 28:9; Tal. 27:11) Irinani ka niya sa saiya.—w20.02, p. 12.

Ano an mga halimbawa kun nuarin mataram asin kun nuarin dai mataram?

Maugma tang ipinapakipag-ulay sa iba an manungod ki Jehova. Sinasabihan ta man an saro pag nahiling ta na may ginigibo siya na puwedeng sumagkod sa seryosong pagkakasala. Nagtatao nin sadol an mga elder pag kinakaipuhan. Dai kita nagpaparahapot o nagtatao nin mga detalye manungod sa kun paano ginigibo an satong mga aktibidad sa mga nasyon na ipinagbabawal iyan. Dai ta sinasabi sa iba an manungod sa kumpidensiyal na mga bagay.—w20.03, p. 20-21.

Paano magkalain an mga duron sa Joel kapitulo 2 asin an mga duron sa Kapahayagan kapitulo 9?

Sinasabi sa Joel 2:20-29 na inalaw nin Diyos an mga duron asin nanunuga siya na ibabalik niya an mga nawara huli sa mga duron. Pagkatapos, ibububo nin Diyos an saiyang espiritu. Nautob an mga aspektong iyan kan sakyadahon kan mga Babilonyo an Israel asin kan Pentecostes 33 C.E. Ilinaladawan kan Kapahayagan 9:1-11 an garo duron na mga linahidan sa satong panahon mantang ibinabalangibog ninda an mga paghukom nin Diyos laban sa maraot na sistemang ini, asin dai iyan nagin marahay sa pagmati kan mga parasuportar kan sistemang ini.—w20.04, p. 3-6.

Siisay an hadi kan norte ngunyan?

An Russia asin an mga kaalyado kaiyan. Igwa sinda nin direktang epekto sa banwaan nin Diyos. Ipinagbawal ninda an gibuhon na paghuhulit asin ikinakaungis an mga Saksi. Nakikikumpetensiya an hadi kan norte sa hadi kan timog.—w20.05, p. 13.

An siyam na kuwalidad daw na sinambit sa Galacia 5:22, 23 iyo sana an kaiba sa mga aspekto kan “bunga kan espiritu”?

Dai. An banal na espiritu nagtatabang sa sato na mapatalubo an iba pang marahayon na kuwalidad, arog nin katanusan. (Efe. 5:8, 9)—w20.06, p. 17.

Ano an sarong peligro nin pag-post online nin mga bagay manungod sa sadiri mo?

An mga pino-post online tibaad magtao nin impresyon na mapagpasikat ka asin na bako kang mapakumbaba.—w20.07, p. 6-7.

Ano an manunudan kan Kristiyanong mga ministro sa ekspertong mga parasira?

Naninira sinda sa oras asin lugar na posibleng marhay na may sira. Sinanay sinda sa paggamit kan tamang kasangkapan. Asin may kusog nin buot sindang nagtatrabaho sa pabago-bagong mga kamugtakan. Puwede ta man gibuhon iyan sa satong ministeryo.—w20.09, p. 5.

Paano ta matatabangan an mga tinutukduan sa Bibliya na kumusog an pagkamuot ki Jehova?

Dagkahon sinda na basahon an Bibliya aroaldaw asin hurop-hurupon an mga nabasa ninda. Asin tukduan sinda na mamibi.—w20.11, p. 4.

Sairisay an pinanunungdan kan “gabos” sa mga tataramon na: ‘Dahil sa Cristo an gabos bubuhayon’?—1 Cor. 15:22.

Dai man sinasabi ni apostol Pablo na bubuhayon liwat an gabos na tawo. An pinanunungdan niya iyo an linahidan na mga Kristiyano na “pinabanal bilang kasaro ni Cristo Jesus.” (1 Cor. 1:2; 15:18)—w20.12, p. 5-6.

Ano an gigibuhon kan mga linahidan pagkatapos nindang ‘magkabarago sa pagpirok nin mata, sa panahon kan huring trumpeta’?—1 Cor. 15:51-53.

Makakaibanan sinda ni Cristo sa pagpastor sa mga tawo paagi sa sugkod na lansang. (Kap. 2:26, 27)—w20.12, p. 12-13.