Binasa mo daw na marhay an mga isyu kan An Torrengbantayan sa taon na ini? Kun iyo, hilinga kun masisimbag mo an minasunod na mga hapot:

Anong asigurasyon an itinatao sa sato kan Santiago 5:11 sa sinasabi kaiyan na si Jehova “mamumuton nanggad” asin “mahihirakon”?

Aram ta na si Jehova pinapahiro kan saiyang pagkahirak na patawadon an satong mga pagkakasala. Inaasigurar kita kan Santiago 5:11 na mapagpadangat siyang nag-aalok nin tabang. Marahay na arugon ta siya.—w21.01, p. 21.

Taano ta inestablisar ni Jehova an pagkapayo?

Ginibo niya iyan huli sa pagkamuot. Dahil sa areglong ini nagin posible na magin matuninong asin organisado an saiyang maimbod na pamilya. An lambang miyembro kan pamilya na nagsusunod sa areglong ini aram kun siisay an dapat na gumibo nin pinal na desisyon asin kun siisay an manginginot sa pagpautob kan mga desisyon na iyan.—w21.02, p. 3.

Taano ta dapat na mag-ingat an mga Kristiyano sa paggamit nin mga electronic messaging application?

Kun an saro maggamit nin arog kaiyan na mga application, kaipuhan niyang magin mapamili sa kun sairisay an mga magigin kaiba niya diyan. Mas dipisil iyan gibuhon sa darakulang messaging group. (1 Tim. 5:13) Yaon man diyan an peligro na makapalakop nin mga impormasyon na dai pa napatunayan na totoo asin gamiton an mga tugang para makaganar nin kuwarta.—w21.03, p. 31.

Ano an nagkapirang dahilan kun taano ta tinugutan nin Diyos na magsakit asin magadan si Jesus?

An sarong dahilan iyo na paagi sa pagbitay ki Jesus sa harigi, nagin posible na mapatalingkas an mga Judio sa sarong sumpa. (Gal. 3:10, 13) An ikaduwa iyo na sinasanay ni Jehova si Jesus sa papel kaini bilang Halangkaw na Saserdote. Asin an ikatulo, paagi sa kaimbudan ni Jesus sagkod sa kagadanan napatunayan na an mga tawo puwedeng magin maimbod dawa mag-agi nin grabeng mga pagbalo. (Job 1:9-11)—w21.04, p. 16-17.

Ano an puwede mong gibuhon kun dipisil maabutan asin makaulay an mga tawo sa ministeryo?

Puwede mong purbaran na dumanan an mga tawo sa oras na posibleng marhay na nasa harong sinda. Puwede mo man purbaran na maghulit sa ibang lokasyon. Asin puwede mo man purbaran an ibang pamamaagi, arog kan paggibo nin surat.—w21.05, p. 15-16.

Ano an buot sabihon ni apostol Pablo kan sabihon niya: “An katugunan mismo an dahilan kaya ako nagin gadan kun mapadapit sa katugunan”? (Gal. 2:19)

Ipinahiling kan Katugunan ni Moises an pagigin bakong perpekto kan mga tawo asin giniyahan an Israel pasiring sa Cristo. (Gal. 3:19, 24) Naggiya iyan ki Pablo para akuon an Cristo. Huli kaiyan, si Pablo “nagin gadan kun mapadapit sa katugunan”; dai na siya nakagakod diyan.—w21.06, p. 31.

Paano si Jehova nagpahiling sa sato nin halimbawa nin pakatagal?

Tinagalan ni Jehova an katuyawan na dinara sa pangaran niya, an pagkontra sa saiyang soberaniya, an pagrebelde kan nagkapira sa mga aki niya, an daing pundong pagputik ni Satanas, an pagsakit kan saiyang mga lingkod, an pagkagadan kan saiyang mga amigo, an pang-aapi kan maraot na mga tawo sa saindang kapwa, asin an pagraot sa mga linalang niya.—w21.07, p. 9-12.

Anong marahayon na halimbawa nin pagigin mapasensiya an ipinahiling ni Jose?

Tinagalan niya an inhustisya sa kamot kan saiyang mga tugang. Naeksperyensiyahan niyang putik na akusaran asin dakul na taon na mapreso sa Ehipto.—w21.08, p. 12.

Anong simbolikong pagyugyog an ihinula sa Hageo 2:6-9, 20-22?

Nagin negatibo an reaksiyon kan mga nasyon sa paghuhulit kan Kahadian, pero dakul na tawo an nag-ako kan katotoohan. Dai na mahahaloy, an mga nasyon yuyugyugon sa pangultimong pagkakataon pag linaglag na sinda.—w21.09, p. 15-19.

Taano ta dai kita dapat magpundo sa satong ministeryo?

Nahihiling ni Jehova an satong mga paghihinguwa, asin nakakapaugma iyan sa saiya. Kun dai kita mapapagal o dai mapundo, magkakamit kita nin buhay na daing katapusan.—w21.10, p. 25-26.

Paano makakatabang sato an Levitico kapitulo 19 para maiaplikar an sadol na “Magin man kamong banal sa gabos nindong paggawi”? (1 Ped. 1:15)

An bersikulong iyan posibleng marhay na kinotar sa Levitico 19:2. An kapitulo 19 nagtatao sato nin dakul na halimbawa kun paano ta maiaaplikar sa satong pang-aroaldaw na buhay an 1 Pedro 1:15.—w21.12, p. 3-4.