1. Anong mga kadipisilan an kaipuhan niyatong atubangon, pero taano ta nauugma si Jehova sa saiyang maimbod na mga lingkod? (Hilingon an ritrato sa itaas.)

MANTANG nabubuhay pa kita sa sistemang ini nin mga bagay, aram tang makakaeksperyensiya kita nin mga kasakitan. An dakul sa namumutan niyatong mga kapagtubod nakikipaglaban sa malalang hilang. An iba dawa ngani nagkakaedad na man pero may inaataman na gurang nang mga kapamilya. An iba man nasasakitan nang maitao dawa an panginot na mga pangangaipo pa sana kan saindang pamilya. Asin aram niyato na dakul an napapaatubang bako sana sa saro kundi sa nagkapira sa mga problemang iyan nin sabay-sabay! Nakakaubos iyan nin dakul na panahon asin kusog—apuwera pa sa gastos. Minsan siring, lubos nanggad an pagtitiwala mo sa mga panuga nin Diyos; dai nagluluya an saimong paglaom para sa mas marahay na puturo. Siguradong nauugma nanggad sa saimo si Jehova!

2. Paano makakapakusog sa sato an Isaias 40:29, pero anong salang desisyon an puwede tang magibo?

² Pero kun minsan daw namamatian mong dai mo na kaya an mga problema sa buhay? Kun iyo, dai ka nagsosolo. Sinasabi kan Bibliya na may maimbod na mga lingkod kaidto na nakamati man na garo dai na ninda kaya. (1 Ha. 19:4; Job 7:7) Alagad imbes na sumuko, nagsarig sinda ki Jehova para sa kusog. Asin dai nanggad sinda nasudya huling an  satong Diyos ‘nagtatao nin kusog sa napapagal.’ (Isa. 40:29) Makamumundo, may mga lingkod nin Diyos ngunyan na nagkokongklusyon na an pinakamarahay na paagi tanganing makayanan an mga kadipisilan sa buhay iyo na ‘magpahingalo nguna sa paglilingkod,’ na garo baga pagabat an Kristiyanong mga aktibidad imbes na sarong bendisyon. Kaya minapundo na sinda sa pagbasa kan Tataramon nin Diyos, pag-atender sa mga pagtiripon, asin sa pakikikabtang sa ministeryo—an eksaktong gusto ni Satanas na gibuhon ninda.

3. (a) Paano ta mauulang an kamawutan ni Satanas na paluyahon kita? (b) Ano an pag-uulayan niyato sa artikulong ini?

³ Aram na marhay kan Diyablo na an lubos na pakikikabtang sa Kristiyanong mga aktibidad makakapakusog sa sato, asin habo niyang magin makusog kita. Kun pagmati mo mayo ka nang kusog na atubangon an mga problema, dai ka magrayo ki Jehova. Imbes, mas rumani ka pa ngani sa saiya huling ‘papakusugon ka niya, ibubugtak ka niya sa masarig na pundasyon.’ (1 Ped. 5:10; Sant. 4:8) Sa artikulong ini, pag-uulayan niyato an duwang sitwasyon na puwedeng magin dahilan na mabawasan an kaigutan ta sa paglilingkod sa Diyos asin tutukaron niyato kun paano makakatabang sa sato an pag-aplikar sa mga prinsipyo sa Bibliya na makayanan iyan. Pero, inuton ta nguna an dapit sa kakayahan ni Jehova na pakusugon kita, arog kan ipinapahiling sa Isaias 40:26-31.

4. Ano an mga manunudan niyato sa Isaias 40:26?

⁴ Basahon an Isaias 40:26. Mayo nin siisay man na makakabilang kan gabos na bituon sa bilog na uniberso. Naniniwala an mga siyentista na sa sato pa sanang galaksiyang Milky Way, posibleng may 400 na bilyon nang mga bituon. Pero kada saro sa mga bituon na iyan tinatawan ni Jehova nin pangaran o apod. Ano an manunudan niyato diyan? Kun interesado si Jehova dawa sa saiyang mga linalang na mayong buhay, gurano pa daw sa saimo na naglilingkod sa saiya, bako huling dinisenyo kang gibuhon iyan, kundi huling namumutan mo siya! (Sal. 19:1, 3, 14) Midbid kang marhay kan satong namumutan na Ama. “Maski an mga buhok sa [saimong] payo bilang [niya] gabos.” (Mat. 10:30) Asin sinisigurado sa sato kan salmista: “Aram ni Jehova an inaagihan kan mga daing katuyawan.” (Sal. 37:18, NW) Iyo, aram niya an inaatubang mong mga problema, asin kaya niyang tawan ka nin kusog tanganing matagalan mo an kada saro kaiyan.

5. Taano ta sigurado kita na kaya kitang pakusugon ni Jehova?

⁵ Basahon an Isaias 40:28. Si Jehova an Gikanan nin gabos na enerhiya. Halimbawa, pag-isipan an enerhiyang itinatao niya sa satong saldang. Si David Bodanis na sarong parasurat dapit sa siyensiya, nagsabi na kada segundo, an saldang nagpoprodusir nin enerhiya na katumbas nin pagsabog nin binilyon na bomba atomika. Kinarkulo man nin saro pang parasiyasat na an enerhiyang ilinuluwas ngunyan kan saldang sa laog nin sarong segundo kayang susteniran an enerhiyang kaipuhan kan mga tawo sa laog nin 200,000 na taon! Kaya magdududa daw kita kun baga kaya kan Saro na “naggagatong” sa saldang na tawan kita kan kusog na kaipuhan tanganing makayanan ta an ano man na problema?

6. Taano ta masasabing komportable an sakal ni Jesus, asin ano an epekto kaiyan sa saimo?

⁶ Basahon an Isaias 40:29. Nagtatao nin dakulang kaugmahan an paglilingkod ki Jehova. Sinabi ni Jesus sa saiyang mga disipulo: “Pasanon nindo an sakuyang sakal.” Asin sinabi pa niya: “Magiginhawahan kamo. Huli ta an sakuyang sakal komportable, asin an sakuyang pasan magian.” (Mat. 11:28-30) Totoong-totoo nanggad an mga tataramon na iyan! Kun minsan, tibaad pagal-pagal kita paghali ta sa harong tanganing umatender sa pagtiripon sa kongregasyon, o tanganing maghulit. Pero kumusta pag nakapuli na kita? May panibago nang kusog asin mas andam nang atubangon an mga kadipisilan sa buhay. Komportable nanggad an sakal ni Jesus!

7. Iistorya an sarong eksperyensiya na nagpapahiling na totoong-totoo an sinasabi sa Mateo 11:28-30.

 ⁷ Sarong sister na aapudon niyatong Kayla an may tinatagalan na chronic fatigue syndrome, migraine, saka depresyon. Iyan an dahilan kaya kun minsan nasasakitan siyang makaatender sa mga pagtiripon. Pero pagkatapos niyang maghinguwang makaatender sa sarong pampublikong pagtiripon, isinurat niya: “Mapadapit sa pangluluya nin buot an pahayag. Ipinahayag iyan sa paaging mamamatian an empatiya saka pagmalasakit kaya talagang napaluha ako. Naipagirumdom kaiyan sako na kaipuhan ko talaga an mga pagtiripon.” Ugmahon nanggad siya huling hininguwa niyang makaatender!

8, 9. Ano an buot sabihon ni Pablo kan isurat niya: “Pag ako maluya, saka man ako makusog”?

⁸ Basahon an Isaias 40:30. Gurano man kita katibay, limitado sana an magigibo niyato sa sadiri tang kusog. Sarong katunayan ini na dapat tang akuon. Si apostol Pablo, dawa may kakayahan na lalaki, may mga kaluyahan na nakaulang sa saiya na magibo an gabos niyang gustong gibuhon. Kan sabihon niya sa Diyos an mga ikinakahadit niya, sinabi nin Diyos sa saiya: “Paagi sa kaluyahan mas lubos na nahihiling an sakuyang kapangyarihan.” Nakua ni Pablo an punto. Kaya sinabi niya: “Pag ako maluya, saka man ako makusog.” (2 Cor. 12:7-10) Ano an buot niyang sabihon?

⁹ Narealisar ni Pablo na limitado sana an magigibo niya kun mayo an tabang hali sa mas makusog na gikanan. Maitatao kan banal na espiritu nin Diyos an kusog na kaipuhan ni Pablo. Apuwera kaiyan, kaya man kan banal na espiritu nin Diyos na tawan nin kusog si Pablo para magibo an mga bagay na nungka niyang mahahaman kun sa sadiri sana niyang kusog. Totoo man iyan sa sato. Kun an kusog na yaon sa sato hali ki Jehova, talagang magigin makusog kita!

10. Paano tinabangan ni Jehova si David na makayanan an mga kadipisilan?

¹⁰ Parating naeksperyensiyahan kan salmistang si David an kusog na itinatao kan banal na espiritu nin Diyos. Siya nagkanta: “Sa tabang mo malalabanan ko an mga tulisan; paagi sa kapangyarihan nin Diyos makakasakat ako sa lanob.” (Sal. 18:29, NW) May mga lanob, o problema, na dai niyato “masasakat” sa sadiri sana niyatong kusog; kaipuhan niyato an tabang ni Jehova.

11. Ipaliwanag an papel kan banal na espiritu sa pagtabang sa sato na makayanan an mga problema.

¹¹ Basahon an Isaias 40:31. An agila dai sana minadepende sa sadiri kaining kusog tanganing magdanay sa aire asin makalayog nin halawig na distansiya. Nagpapadara an agila sa nag-iitaas na mainit na aire kaya nakakatipid ini sa enerhiya. Kaya kun mapaatubang ka sa problemang garo dai mo kaya, girumdumon an agila. Makimahirak ki Jehova na “iitaas” ka paagi sa “paratabang, an banal na espiritu.” (Juan 14:26) Marahay na sana ta puwede kitang maghagad kaiyan ano man na oras sa bilog na aldaw. Asin tibaad lalo niyatong kaipuhan an tabang nin Diyos kun kita asin an satong kakongregasyon igwa nin dai pagkasinabutan. Pero taano ta nangyayari iyan?

12, 13. (a) Taano ta nagkakaigwa kun minsan nin mga dai pagkasinabutan an mga Kristiyano? (b) Ano an itinutukdo sa sato dapit ki Jehova kan mga pangyayari sa buhay ni Jose?

¹² Nagkakaigwa nin mga dai pagkasinabutan huling gabos kita bakong perpekto. Kun minsan, tibaad mauyam kita sa sinasabi o ginigibo kan mga kapagtubod niyato—o na sinda man an mauyam sa sato. Puwede ining magin dipisil na pagbalo. Pero arog kan ibang pagbalo, oportunidad iyan tanganing maipahiling niyato ki Jehova na maimbod kita paagi sa pakanuod na maglingkod na nagkakauruyon kaiba kan satong mga tugang na saiyang namumutan sa ibong kan saindang mga kaluyahan.

¹³ Tinutugutan ni Jehova na mag-agi nin pagbalo an saiyang mga lingkod arog kan ipinapahiling kan istorya ni Jose. Kan hoben pa si Jose, nauri sa saiya an mga tugang niya sa ama kaya ipinabakal ninda siya bilang uripon tapos dinara siya sa Ehipto. (Gen. 37:28) Aram ni Jehova an mga nangyayari asin siguradong ikinamundo niyang mahiling kun paano tinatrato an saiyang matanos na  amigong si Jose. Pero, dai pa siya naghiro para pugulan an mga pangyayari. Pag-abot nin panahon, inakusaran si Jose nin purbar na panglulupig sa agom ni Potifar kaya prineso siya, alagad dai pa man giraray tinabangan ni Jehova si Jose. Pinabayaan daw nin Diyos si Jose? Dai. Sabi kan Bibliya: “An ano man na gibuhon [ni Jose] pinangyari ni Jehova na magin mapanggana.”—Gen. 39:21-23, NW.

14. Paano kita makikinabang sa espirituwal asin sa pisikal kun ‘hahalion’ ta sa satong sadiri an kaanggutan?

¹⁴ An saro pang halimbawa iyo si David. Pipira lang sato an nakaeksperyensiya nin pagtratar na arog kagrabe kan mga inagihan ni David. Pero, dai tinugutan kan amigong ini nin Diyos na maghinanakit siya asin maanggot ki Jehova. Imbes, isinurat niya: “Halia an kaanggutan asin bayai an pagkaanggot; dai ka maanggot na huli kaiyan makakagibo ka nin maraot.” (Sal. 37:8, NW) An pinakaimportanteng dahilan na ‘halion’ an kaanggutan iyo na gusto niyatong arugon si Jehova, na ‘dai kita pinapadusahan susog sa satong mga kasalan.’ (Sal. 103:10, An Marahay na Bareta Biblia) Pero igwa man nin praktikal na mga kapakinabangan an ‘paghali’ sa kaanggutan. An kaanggutan nagkakawsa nin mga problema sa pisikal arog nin alta presyon asin hilang sa sistema nin paghangos. Puwede iyan makaapektar sa katoy saka sa lapay (pancreas), asin magkawsa nin mga problema sa satong sistema nin panunaw. Sa parati, dai kita nakakaisip nin malinaw pag kita anggot. Asin kun beses, an pagputok nin kaanggutan puwedeng masundan nin halawig na depresyon. Sa kabaliktaran, an sabi kan Bibliya: ‘An pusong [kalmado nagtataong] buhay sa laman.’ (Tal. 14:30) Pero, ano an gigibuhon ta kun nakulgan nin iba an satong buot, asin paano kita makikipagkatuninungan sa satong tugang? Magigibo ta iyan kun iaaplikar ta an madunong na sadol kan Bibliya.

15, 16. Paano niyato dapat dulukon an saro na nakakulog sa sato?

¹⁵ Basahon an Efeso 4:26. Dai na kita mangalas kun magin maraot an pagtrato sa sato kan mga dai naglilingkod sa Diyos. Pero kun sarong kapagtubod niyato o kapamilya an makapagsabi o makagibo nin sarong bagay na nakakulog sa sato, tibaad madisganar kitang marhay. Kun halimbawang dai ta talaga kayang palampason na sana iyan, tutugutan ta daw na magdanay kitang anggot sa laog nin haloy na panahon? O susunudon ta daw an madunong na sadol kan Bibliya na husayon tulos an mga bagay-bagay? Mantang mas pinapahaloy tang dai rineresolberan an sitwasyon, mas masasakitan kitang makipagkatuninungan sa satong tugang.

¹⁶ Ipamugtak na nakulgan ka nin sarong tugang asin dai iyan mahali sa isip mo. Ano an puwede mong gibuhon tanganing makipagkatuninungan? Inot, udok na mamibi ki Jehova na tabangan kang magin marahay an pag-uulay nindo. Tandaan, amigo man siya ni Jehova. (Sal. 25:14) Namumutan  siya nin Diyos. Mabuot si Jehova sa saiyang mga katuod, asin inaasahan niya na iyan man an gigibuhon ta. (Tal. 15:23; Mat. 7:12; Col. 4:6) Sunod, repasuhon sa isip an mga sasabihon mo. Dai pag-isipon na tinuyo kan saimong tugang na kulgan ka. Tibaad napasala lang siya o namis-interpretar mo sana an nangyari. Saka magin andam na admitiron na posibleng may nagibo ka man kaya nagkaigwa kamo nin problema. Puwede mong punan an pag-uulay paagi sa pagsabi nin arog kaini, “Tibaad sobra man ako kasensitibo, pero kasuudma kaya kan makipag-ulay ka sako, pagmati ko . . . ” Kun iba sa inaasahan mo an kaluwasan kan pag-uulay nindo, maghanap nin ibang pagkakataon na makipagkatuninungan. Miyentras tanto, ipamibi an saimong tugang; hagadon ki Jehova na bendisyunan siya. Hagadon sa Diyos na tabangan kang magpokus sa marahay na mga kuwalidad kan saimong tugang. Ano man an magin resulta, makakasigurado ka na mauugma si Jehova sa sinsero mong paghihinguwa na makipagkatuninungan sa saimong tugang na katuod man nin Diyos.

17. Ano an puwedeng gamiton ni Jehova tanganing tabangan kitang makabangon kun makagibo kita nin kasalan, asin taano ta dapat niyatong aprobetsaran an probisyon na iyan?

¹⁷ May mga nakakamati na bako sindang maninigo na maglingkod ki Jehova huli sa magabat na kasalan na nagibo ninda kaidto. Grabe kun magpasakit an konsiyensiya. Si Hading David, na nakipaglaban sa grabeng pagkakonsiyensiya, nagsabi: “Kan ako dai naggigirong, an sakuyang mga tulang nangluya huli sa sakuyang pag-agrangay sa bilog na aldaw. Huli ta aldaw asin banggi an saimong kamot magabat sa sako.” Marahay na sana ta inatubang ni David an problema arog kan aasahan tang gigibuhon nin sarong tawong espirituwal. “Sa katapos-tapusi itinuga ko sa saimo an sakuyang kasalan,” an isinurat niya, “asin pinatawad mo an sakuyang mga kasalan.” (Sal. 32:3-5, NW) Kun nakagibo ka nin magabat na kasalan, andam si Jehova na tabangan kang makabangon giraray. Pero kaipuhan mong akuon an tabang na itinatao niya paagi sa kongregasyon. (Tal. 24:16; Sant. 5:13-15) Dai ka mag-atraso—nakataya diyan an pagkamit mo kan daing sagkod na puturo! Pero paano kun haloy na panahon nang napatawad an kasalan mo pero nakokonsiyensiya ka pa man giraray?

18. Paano makakatabang an halimbawa ni Pablo sa mga nakakamati na bako sindang maninigo na maglingkod ki Jehova?

¹⁸ Minalataw na may mga panahon na napurisaw na marhay si apostol Pablo sa mga nagibo niyang kasalan kaidto. Inako niya: “Ako an pinakahababa an kamugtakan sa mga apostol, asin dai ako angay na apudon na apostol, dahil pinersegir ko an kongregasyon nin Diyos.” Pero sinabi ni Pablo: “Alagad huli sa daing kapantay na kabuutan nin Diyos, yaon sa sako an katungdan na ini.” (1 Cor. 15:9, 10) Inako ni Jehova si Pablo sa ibong kan mga salang nagibo niya kaidto, asin gusto nin Diyos na iyan man an magin paghiling ni Pablo sa sadiri niya. Kun talagang pinagsusulsulan mo an mga nagibo mong kasalan asin ipinakipag-ulay mo na iyan ki Jehova asin sa mga elder kun kaipuhan, makakasigurado kang papahilingan ka nin pagkahirak ni Jehova. Kaya maniwala ka na pinatawad ka na ni Jehova, asin akuon mo an pagpapatawad niya!—Isa. 55:6, 7.

19. Ano an satuyang teksto para sa taon 2018, asin taano ta angay iyan?

¹⁹ Mantang parani na an katapusan kan sistemang ini, asahan niyato na magrabe pa an mga kadipisilan. Pero makakasigurado ka na an Saro na ‘nagtatao nin kusog sa napapagal asin nin [abundang] kusog sa mga mayo kaiyan’ kaya kang tawan kan ano man na kaipuhan mo tanganing makatagal. (Isa. 40:29; Sal. 55:22; 68:19) Sa taon 2018, ipapagirumdom sa sato an mahalagang katotoohan na ini sa kada pag-atender ta sa mga pagtiripon sa Kingdom Hall. Mahihiling iyan sa mga tataramon sa satong teksto kan taon: ‘An mga nananarig ki Jehova magkakaigwa nin panibagong kusog.’—Isa. 40:31.