1, 2. Anong okasyon sa 2018 an makakapasararo sa sato sa kahanga-hangang paagi, asin taano? (Hilingon an ritrato sa itaas.)

SA Marso 31, 2018, mantang pasulnop an saldang, an mga lingkod nin Diyos asin an dakul na interesado magtitiripon para sa taunan na paggirumdom sa Pamanggihan kan Kagurangnan. Kasabay kan pag-itok kan daga, minilyon an matiripon tanganing iselebrar an Memoryal kan kagadanan ni Cristo. Mayo nang ibang okasyon sa planetang Daga an pinagkakasararo an mga tawo kada taon sa arog kaiyan na kahanga-hangang paagi!

² Siguradong ugmahon nanggad si Jehova asin si Jesus mantang pinagmamasdan ninda an minilyon na tawo sa daga na nag-aatender sa espesyal na okasyon na ini. Ihinula kan Bibliya na “sarong dakulang kadaklan, na dai kayang bilangon nin siisay man, hali sa gabos na nasyon asin tribo asin banwaan saka lengguwahe” an masabi sa makusog na boses: “Utang niyato an satong kaligtasan sa satuyang Diyos, na nakatukaw sa trono, asin sa Kordero.” (Kap. 7:9, 10) Nakakaugma nanggad na kada taon sa Memoryal, natatawan nin onra si Jehova asin si Jesus sa arog kaining paagi huli sa pambihirang mga bagay na ginibo ninda!

3. Anong mga hapot an sisimbagon sa artikulong ini?

 ³ Sa artikulong ini, may apat na hapot kitang sisimbagon. (1) Paano an lambang saro sa sato maandam asin makikinabang sa pag-atender sa Memoryal? (2) Sa anong mga paagi nakakatabang an Memoryal tanganing magkasararo an mga lingkod nin Diyos? (3) Paano kita personal na makakakontribwir sa pagkasararong iyan? (4) Magkakaigwa daw nin pangultimong Memoryal? Kun iyo, nuarin?

4. Sagkod na posible, taano ta mahalaga na presente kita sa Memoryal?

⁴ Hurop-hurupon an kahalagahan kan pag-atender sa Memoryal. Girumdumon na an mga pagtiripon kan kongregasyon kabtang kan satong pagsamba. Makakasigurado kita na naririsa ni Jehova asin ni Jesus kun siisay an mga naghihinguwang makaatender sa pinakaimportanteng pagtiripon na ini kan taon. Gusto tang mahiling ninda na presente kita sa Memoryal apuwera na sana kun talagang dai iyan posible huli sa kamugtakan niyato. Kun ipinapahiling ta paagi sa gibo na mahalaga sa sato an mga pagtiripon para sa pagsamba, tinatawan niyato si Jehova nin dagdag na dahilan tanganing pagdanayon niya an satong pangaran sa saiyang ‘libro nin girumduman’—an “libro nin buhay”—na diyan nakasurat an mga pangaran kan mga mag-aako kan buhay na daing katapusan.—Mal. 3:16; Kap. 20:15.

5. Sa mga aldaw bago an Memoryal, paano niyato ‘masisiyasat an satong sadiri kun baga nangangapot kita sa pagtubod’?

⁵ Sa mga aldaw bago an Memoryal, puwede kitang magtagama nin panahon para isip-isipon na may kaibang pagpamibi kun gurano kakusog an satong relasyon ki Jehova. (Basahon an 2 Corinto 13:5.) Paano niyato iyan magigibo? Paagi sa ‘pagsiyasat sa satong sadiri kun baga nangangapot kita sa pagtubod.’ Tanganing magibo iyan, marahay na ihapot niyato sa satong sadiri: ‘Talaga daw na naniniwala ako na an organisasyon na kinabibilangan ko iyo an solamenteng pinili ni Jehova na magsagibo kan saiyang kabutan? Ginigibo ko daw an pinakamakakaya ko tanganing ihulit asin itukdo an maugmang bareta kan Kahadian? Nahihiling daw sa mga ginigibo ko na talagang naniniwala ako na iyo na ini an huring mga aldaw asin na harani na an katapusan kan pamamahala ni Satanas? An pagtitiwala ko daw ngunyan ki Jehova asin ki Jesus arog pa man giraray kakusog kaidtong idusay ko an sakuyang buhay sa Diyos na Jehova?’ (Mat. 24:14; 2 Tim. 3:1; Heb. 3:14) An pag-isip-isip sa simbag sa mga hapot na iyan makakatabang sa sato na padagos na baluon an satong sadiri para mapatunayan kun anong klaseng tawo kita.

6. (a) Ano an solamenteng paagi tanganing makamtan niyato an buhay na daing katapusan? (b) Ano an ginigibo nin sarong elder bilang pag-andam para sa Memoryal kada taon, asin ano man an puwede mong gibuhon?

⁶ Basahon asin hurop-hurupon an mga artikulo na nagpapaliwanag kan kahalagahan kan Memoryal. (Basahon an Juan 3:16; 17:3.) Kaipuhan niyatong “mamidbid” si Jehova asin magpahiling nin ‘pagtubod’ ki Jesus, an Saiyang bugtong na Aki, huling iyan an solamenteng paagi tanganing makamtan ta an buhay na daing katapusan. Tanganing makaandam para sa Memoryal, puwede kang pumili nin proyekto sa pag-adal na makakatabang sa saimo na mas maparani ki Jehova asin ki Jesus. Pag-isipan an ginigibo nin sarong brother na haloy nang elder. Sa nakalihis na mga taon, nakatipon siya nin mga artikulo sa Torrengbantayan na partikular nang mapadapit sa Memoryal asin sa pagkamuot na ipinahiling sa sato ni Jehova asin ni Jesus. Pirang semana bago an Memoryal, binabasa niya giraray an mga artikulong ini asin hinuhurop-hurop an kahalagahan kan pagselebrar kaiyan. Sa pana-panahon, dinadagdagan niya nin saro o duwang artikulo an saiyang koleksiyon. Nahiling kan elder na paagi sa pagbasa giraray kan mga artikulong ini saka sa pagbasa asin paghurop-hurop sa babasahon sa Bibliya para sa Memoryal, may mga nanunudan siyang bago kada taon. Urog sa gabos, namamatian niyang nagkukusog an saiyang pagkamuot ki Jehova asin ki Jesus. An arog kaiyan na proyekto sa pag-adal makakatabang sa saimo na mapararom an saimong pagkamuot asin pagpapahalaga ki Jehova asin ki  Jesus, saka makakatabang iyan para makinabang ka nin lubos sa Memoryal.

7. (a) Ano an ipinamibi ni Jesus kan banggi na inot na ginibo an Pamanggihan kan Kagurangnan? (b) Ano an nagpapahiling na sinimbag ni Jehova an pamibi ni Jesus?

⁷ Kan bangging inot na ginibo an Pamanggihan kan Kagurangnan, ipinamibi ni Jesus na magkakasararo an saiyang mga parasunod kun paanong siya asin an saiyang Ama nagkakasaro. (Basahon an Juan 17:20, 21.) Asin talagang sinimbag ni Jehova an pamibing iyan kan saiyang namumutan na Aki—minilyon na ngunyan an nagtutubod na isinugo ni Jehova an saiyang Aki. Kumpara sa iba pang pagtiripon kan banwaan nin Diyos, an Memoryal an nagtatao nin pinakamalinaw na patunay na nagkakasararo an Mga Saksi ni Jehova. Sa bilog na kinaban, minilyon na tawo sa iba-ibang nasyon asin rasa an nagtitiripon tanganing magselebrar kan Memoryal. Sa ibang kadagaan, tibaad kakaiba para sa mga tawo an arog kaining pagtiripon o tibaad dai ninda iyan magustuhan. Pero an arog kaining pagkasararo magayunon nanggad sa paghiling ni Jehova asin ni Jesus!

8. Anong mensahe dapit sa pagkasararo an itinao ni Jehova ki Ezequiel?

⁸ Bilang banwaan ni Jehova, dai kita nagngangalas sa satong pagkasararo. Sa katunayan, ihinula iyan ni Jehova. Pag-isipan an mensahe na itinao niya ki propeta Ezequiel mapadapit sa pinagtaid na duwang kahoy, an kahoy na para ‘ki Juda’ asin an kahoy para “ki Jose.” (Basahon an Ezequiel 37:15-17.) An “Hapot Hali sa mga Parabasa” sa An Torrengbantayan na Hulyo 2016 nagsabi: “Tinawan ni Jehova si Ezequiel nin sarong mensahe nin paglaom na magkakasararo giraray bilang sarong nasyon an saiyang banwaan asin mabalik sinda sa Dagang Panuga. Ihinula man kan mensaheng iyan na sa huring mga aldaw, magkakasararo bilang sarong banwaan an mga lingkod nin Diyos.”

9. Paano nahihiling sa Memoryal kada taon an kautuban kan hula ni Ezequiel?

⁹ Puon kan taon 1919, luway-luway ngunang inorganisar ni Jehova an mga linahidan, na simbolikong irinerepresentar kan kahoy na para ‘ki Juda.’ Dangan mantang nagdadakul an mga may daganon na paglaom—irinerepresentar kan kahoy para “ki Jose”—na nakikisumaro sa mga linahidan, an duwang grupo nagin “sarong aripumpon.” (Juan 10:16; Zac. 8:23) Nanuga si Jehova na pagtataidon niya an duwang kahoy na ini asin pagsasaruon iyan sa saiyang kamot. (Ezeq. 37:19) An duwang grupong iyan nagkakasararo ngunyan na naglilingkod sa pamamahala kan sarong Hadi—an pinamuraway na si Jesu-Cristo, na sinabi sa hula bilang an ‘uripon nin Diyos na si David.’ (Ezeq. 37:24, 25) An kahanga-hangang pagkasararo na sinambit sa Ezequiel malinaw na nahihiling kada taon mantang an linahidan na mga natatada asin an “ibang mga karnero” nagtitiripon tanganing isagibo an Memoryal kan kagadanan ni Cristo! Pero bilang indibidwal, paano kita makakakontribwir para mapagdanay an pagkasararong iyan?

10. Paano kita makakakontribwir sa pagkasararo kan banwaan nin Diyos?

¹⁰ An sarong paagi para makakontribwir kita sa pagkasararo kan banwaan nin Diyos iyo an paghihinguwang magin mapakumbaba. Kan si Jesus yaon sa daga, sinabi niya sa saiyang mga disipulo na magi sindang mapakumbaba. (Mat. 23:12) Kun igwa kita nin mapakumbabang puso, dai kita magpapaimpluwensiya sa mapalangkaw na ugali na lakop sa kinaban. Makakatabang man an kapakumbabaan na magin mapagpasakop kita sa mga nanginginot, asin an pagigin masinunod niyato mahalagang marhay sa pagkasararo kan kongregasyon. Urog sa gabos, mauugma si Jehova kun mapakumbaba kita huling “habo nin Diyos sa mga mapalangkaw, alagad nagpapahiling siya nin daing kapantay na kabuutan sa mga mapakumbaba.”—1 Ped. 5:5.

11. Paano makakatabang an paghurop-hurop sa kahulugan kan mga emblema sa Memoryal tanganing makakontribwir kita sa pagkasararo?

¹¹ An ikaduwang paagi para makakontribwir kita  sa pagkasararo iyo an paghurop-hurop sa kahulugan kan mga emblemang ginagamit sa Memoryal. Bago an espesyal na bangging iyan—asin lalo na sa mismong bangging iyan—hurop-hurupon na marhay an kahulugan kan tinapay na daing lebadura asin kan mapulang arak. (1 Cor. 11:23-25) An tinapay nagrerepresentar sa daing kasalan na hawak ni Jesus na idinulot bilang atang, asin an arak nagrerepresentar sa saiyang pinabulos na dugo. Pero urog pa an kaipuhan niyato kisa sa basta masabutan an kahulugan kan mga emblema. Girumdumon na kalabot sa atang na pantubos ni Jesus an duwang pinakadakulang kapahayagan nin pagkamuot—an pagkamuot na ipinahiling ni Jehova sa pagtao niya kan saiyang aki para sa kapakanan niyato, asin an pagkamuot na ipinahiling ni Jesus paagi sa gikan sa buot na pagtao kan saiyang buhay para sa sato. An paghurop-hurop sa saindang pagkamuot siguradong makakapahiro sa sato na kamutan man sinda. An satong pagkamuot ki Jehova garo lubid na nagbubugkos sa sato asin nakakapauswag sa satong pagkasararo.

12. Sa ilustrasyon ni Jesus dapit sa sarong hadi asin sa saiyang mga uripon, paano malinaw na ipinahiling ni Jesus na inaasahan ni Jehova na magi kitang mapagpatawad?

¹² An ikatulong paagi para makakontribwir kita sa pagkasararo iyo an pagigin mapagpatawad. Pag pinapatawad ta an mga nakakakulog sa sato, ipinapahiling niyato na nagpapasalamat kita sa kapatawadan kan satong mga kasalan na nagin posible huli sa atang na pantubos ni Cristo. Pag-isipan an ilustrasyon ni Jesus na nasa Mateo 18:23-34. Haputon an sadiri: ‘Napapahiro daw ako na isabuhay an itinukdo ni Jesus? Mapasensiya asin mapagsabot daw ako sa mga kapwa ko lingkod? Andam daw akong magpatawad sa mga nagkakasala sa sako?’ Siyempre, iba-iba an lebel nin kasalan; may mga kasalan na masakiton para sa bakong perpektong mga tawo na mapatawad. Pero itinutukdo kan ilustrasyon ni Jesus kun ano an inaasahan ni Jehova sa sato. (Basahon an Mateo 18:35.) Malinaw na ipinahiling ni Jesus na dai kita papatawadon ni Jehova kun dai niyato pinapatawad an satong mga tugang pag may marahay man na dahilan na gibuhon iyan. Marahayon nanggad na pag-isipan iyan! Naiingatan asin napagdadanay niyato an satong mahalagang marhay na pagkasararo kun pinapatawad niyato an iba arog kan itinukdo ni Jesus na gibuhon ta.

13. Paano nakakakontribwir sa pagkasararo kun kita mapagpatuninong?

¹³ Kun pinapatawad niyato an iba, pinapatunayan ta na kita mapagpatuninong. Girumdumon an sadol ni apostol Pablo na dapat na “maigot  [kitang] naghihinguwang mapagdanay an pagkasararong itinatao kan espiritu sa irarom nin katuninungan na nagbubugkos sa [sato].” (Efe. 4:3) Sa panahon kan Memoryal asin lalo na sa mismong banggi kan Memoryal, pag-isipan na marhay an dapit sa pagtrato mo sa iba. Haputon an sadiri: ‘Malinaw daw na nahihiling sa sako na dai ako nagtatanom nin raot nin buot? Nahihiling daw sa sako na talagang hinihinguwa kong magin mapagpatuninong asin mas makakontribwir sa pagkasararo?’ Mahalagang mga hapot ini na marahay na hurop-hurupon niyato sa panahon na iyan kan taon.

14. Paano ta maipapahiling na “pinagpapasensiyahan [niyato] an lambang saro paagi sa pagkamuot”?

¹⁴ An ikaapat na paagi para makakontribwir kita sa pagkasararo iyo an pagpahiling nin pagkamuot arog ni Jehova, an Diyos nin pagkamuot. (1 Juan 4:8) Dai kita masabi kun dapit sa satong mga kapagtubod, “Iyo, kaipuhan ko sindang mamutan, pero dai ko sinda kaipuhan na magustuhan”! Kun arog kaiyan an satong kaisipan, dai ta sinusunod an sadol ni Pablo na dapat na “pinagpapasensiyahan [niyato] an lambang saro paagi sa pagkamuot.” (Efe. 4:2) Risahon na dai niya sana basta sinabi na dapat na “pinagpapasensiyahan [niyato] an lambang saro.” Idinagdag niya na dapat tang gibuhon iyan “paagi sa pagkamuot.” May pagkakaiba an duwang iyan. An satong kongregasyon kompuwesto nin gabos na klase nin tawo na irinani ni Jehova sa saiya. (Juan 6:44) Huling irinani sinda ni Jehova sa saiya, siguradong may nahiling siyang marahayon na dahilan na mamutan sinda. Kaya, taano ta huhusgaran nin siisay man an saiyang kapagtubod na dai ini maninigo sa saiyang pagkamuot? Dai niyato dapat ipanguri an pagkamuot na ipinagbuot ni Jehova na ipahiling niyato!—1 Juan 4:20, 21.

15. Paano niyato naaraman na magkakaigwa nin pangultimong Memoryal?

¹⁵ Maabot an panahon na an Memoryal na aatenderan niyato iyo na an magigin pangultimo. Paano niyato iyan naaraman? Sa inot na ipinasabong na surat ki Pablo sa mga taga Corinto, sinabi niya sa mga linahidan na Kristiyano na paagi sa paggirumdom sa kagadanan ni Jesus kada taon, “padagos [nindang] ibinabalangibog an kagadanan kan Kagurangnan, sagkod na siya dumatong.” (1 Cor. 11:26) An termino digding “dumatong” nanunungod sa iyo man sanang ‘pagdatong’ ni Jesus na sinambit niya sa saiyang hula mapadapit sa panahon kan katapusan. Mapadapit sa grabeng kasakitan na madali nang mangyari, sinabi niya: “An tanda kan Aki nin tawo mahihiling sa langit, asin tuturubtubon kan gabos na tribo sa daga an saindang daghan sa kamunduan, asin mahihiling ninda an Aki nin tawo na minadatong na nasa mga panganuron nin langit asin may kapangyarihan saka dakulang kamurawayan. Asin isusugo [ni Jesus] an saiyang mga anghel na may kasabay na makusog na tanog nin trumpeta, asin titiripunon ninda an saiyang mga pinili hali sa apat na direksiyon, magpuon sa sarong puro kan kalangitan sagkod sa ibong na puro kaiyan.” (Mat. 24:29-31) An ‘pagtipon na ini kan mga pinili’ nanunungod sa panahon na aakuon na kan gabos na linahidan na Kristiyano na yaon pa sa daga an saindang balos sa langit. Mangyayari iyan pagkatapos kan inot na kabtang kan grabeng kasakitan pero bago an giyera nin Armagedon. Dangan an gabos na 144,000 matabang ki Jesus sa pagdaog sa mga hadi kan daga. (Kap. 17:12-14) An Memoryal na aatenderan niyato bago “dumatong” si Jesus tanganing tipunon an mga linahidan iyo an magigin pangultimo.

16. Taano ta determinado kang magin presente sa Memoryal ngunyan na taon?

¹⁶ Lugod na magin determinado kitang mag-atender sa Memoryal sa Marso 31, 2018 tanganing makinabang kita. Asin lugod na hagadon niyato ki Jehova na tabangan kitang padagos na makakontribwir sa pagkasararo kan saiyang banwaan! (Basahon an Salmo 133:1.) Tandaan, maabot an panahon na an Memoryal na iseselebrar niyato iyo na an magigin pangultimo. Pero mantang dai pa iyan nangyayari, lugod na gibuhon niyato an satong pinakamakakaya tanganing makaatender, asin lugod na pahalagahan tang marhay an kahanga-hangang pagkasararo niyato pag Memoryal.