1-2. (a) Taano ta inaasahan na niyato na simple an paaging itatao ni Jesus sa sato tanganing girumdumon an saiyang kagadanan? (b) Anong mga kuwalidad ni Jesus an pag-uulayan ta?

MAILALADAWAN mo daw an mga ginigibo sa taunan na Memoryal kan kagadanan ni Cristo? Siguradong magigirumduman kan kadaklan sa sato an panginot na mga ginigibo sa Pamanggihan kan Kagurangnan. Taano? Huling simplehon sana an pamanggihan na iyan. Pero, mahalaga an okasyon na ini. Kaya tibaad ihapot ta, ‘Taano ta simplehon sana an pamanggihan na iyan?’

² Kan panahon kan ministeryo ni Jesus sa daga, midbid siya sa pagtukdo nin mahalagang mga katotoohan sa paaging simple, malinaw, asin madaling masabutan. (Mat. 7:28, 29) Sa kaparehong paagi, tinawan niya kita nin simple alagad makahulugan na paagi nin paggirumdom * kan saiyang kagadanan. Pag-ulayan niyatong marhay an mapadapit sa pamanggihan na ini nin Memoryal asin an pira sa mga bagay na sinabi asin ginibo ni Jesus. Mas masasabutan pa niyato an dapit sa kapakumbabaan, kusog nin buot, asin pagigin mamumuton ni Jesus, saka manunudan ta man kun paano pa niyato siya mas maaarog.

3. Arog kan mababasa sa Mateo 26:26-28, gurano kasimple an pamanggihan nin Memoryal na inestablisar ni Jesus, asin sa ano nagsisimbolisar an duwang simpleng bagay na ginamit niya?

³ Inestablisar ni Jesus an Memoryal kan saiyang kagadanan sa presensiya kan saiyang 11 maimbod na apostol. Kinua niya an mga natada sa pamanggihan kan Paskuwa asin ginibo an simpleng  paggirumdom na ini. (Basahon an Mateo 26:26-28.) An ginamit niya sana iyo an tinapay na daing lebadura asin an arak na yaon duman. Sinabi ni Jesus sa saiyang mga apostol na an duwang simpleng bagay na iyan nagsisimbolisar sa saiyang perpektong hawak asin dugo, na sa dai na mahahaloy iaatang niya alang-alang sa sainda. Posibleng marhay na dai ikinangalas kan mga apostol an pagigin simple kan bago asin importanteng okasyon na ini. Taano?

4. Paano nakakatabang sa sato an sadol ni Jesus ki Marta na masabutan kun taano ta ginibo ni Jesus na simple an pamanggihan nin Memoryal?

⁴ Pag-isipan an nangyari mga pirang bulan bago kaiyan, kan ikatulong taon kan ministeryo ni Jesus, kaidtong magbisita siya sa harong kan dayupot niyang mga amigo—si Lazaro, Marta, asin Maria. Sa relaks na kamugtakan na iyan, nagpuon na magtukdo si Jesus. Yaon kaidto si Marta, alagad naaagaw an atensiyon niya sa pag-andam nin dakul na kakanon para sa saiyang mahalagang marhay na bisita. Kan mahiling iyan ni Jesus, mabuot niyang itinanos si Marta paagi sa pagtabang sa saiya na masabutan na dai man pirming kaipuhan na magarbo an handa. (Luc. 10:40-42) Pag-abot nin panahon, kan pirang oras na sana an natatada bago siya magadan bilang atang, inaplikar mismo ni Jesus an sadol niyang iyan. Ginibo niyang simple an pamanggihan nin Memoryal. Ano an manunudan ta digdi mapadapit ki Jesus?

5. Ano an ipinapahiling kan pagigin simple kan pamanggihan na ini manungod ki Jesus, asin paano ini kauyon kan sinasabi sa Filipos 2:5-8?

⁵ Mapakumbaba si Jesus sa gabos na sinabi asin ginibo niya. Kaya bakong makangangalas na nagpahiling siya nin pambihirang kapakumbabaan kan huring banggi kan buhay niya sa daga. (Mat. 11:29) Aram niya na madali na niyang itao an pinakadakulang sakripisyo sa kasaysayan nin tawo asin na bubuhayon siya ni Jehova tanganing tawan nin mamuraway na posisyon sa langit. Dawa arog kaiyan, linikayan niyang matawan siya nin sobrang atensiyon kaya dai siya naghagad nin magarbong seremonya tanganing girumdumon an saiyang kagadanan. Imbes, sinabi niya sa saiyang mga disipulo na dapat ninda siyang girumdumon sarong beses kada taon paagi kan simpleng pamanggihan na iyan. (Juan 13:15; 1 Cor. 11:23-25) Ipinapahiling kan simple alagad angay na pamanggihan na idto na bakong mapalangkaw si Jesus. Nakakaugma na an kapakumbabaan saro sa pambihirang mga kuwalidad kan satong langitnon na Hadi.—Basahon an Filipos 2:5-8.

6. Paano niyato maaarog an kapakumbabaan ni Jesus pag napapaatubang sa mga kasakitan?

⁶ Paano niyato maaarog an kapakumbabaan ni Jesus? Paagi sa pag-inot sa kapakanan kan iba kisa sa satong sadiri. (Fil. 2:3, 4)  Balikan ta an huring banggi kan buhay ni Jesus sa daga. Aram ni Jesus na madali niya nang maeksperyensiyahan an makulugon na kagadanan; pero an nasa isip niya iyo an kapakanan kan saiyang maimbod na mga apostol, na siguradong magmumundo sa pagkagadan niya. Kaya kan huring banggi niya, tinukduan, pinakusog, asin inasigurar niya sinda. (Juan 14:25-31) Mapakumbabang ipinahiling ni Jesus na mas nagmamalasakit siya sa kapakanan kan iba kisa sa sadiri niya. Marahayon nanggad na halimbawa siya sa sato!

7. Paano nagpahiling nin kusog nin buot si Jesus kan katatapos pa sana niyang iestablisar an Pamanggihan kan Kagurangnan?

⁷ Nagpahiling si Jesus nin pambihirang kusog nin buot kan katatapos pa sana niyang iestablisar an Pamanggihan kan Kagurangnan. Paano? Inako ni Jesus an kabutan kan saiyang Ama para sa saiya dawa aram niyang an paggibo kaiyan nangangahulugan na gagadanon siya sa makasusupog na krimen na paglanghad. (Mat. 26:65, 66; Luc. 22:41, 42) Pinagdanay ni Jesus na perpekto an saiyang integridad tanganing tawan nin onra an pangaran ni Jehova, suportaran an soberaniya nin Diyos, asin buksan an dalan pasiring sa buhay na daing katapusan para sa nagsusulsol na mga tawo. Kasabay kaiyan, inandam man ni Jesus an saiyang mga parasunod para sa madali na nindang atubangon.

8. (a) Ano an sinabi ni Jesus sa saiyang maimbod na mga apostol? (b) Sa mga taon pagkagadan ni Jesus, paano inarog kan saiyang mga disipulo an saiyang kusog nin buot?

⁸ Nagpahiling man nin kusog nin buot si Jesus paagi sa pagpokus bako sa mga kahaditan na tibaad namatian niya kundi sa mga pangangaipo kan saiyang maimbod na mga apostol. An simpleng pamanggihan, na pinunan niya pagkapahali ki Judas, magpapagirumdom sa magigin linahidan niyang mga parasunod mapadapit sa mga pakinabang kan pinabulos na dugo ni Jesus. Magpapagirumdom man iyan sa sainda na magigin kabtang sinda kan bagong tipan. (1 Cor. 10:16, 17) Tanganing matabangan sindang magdanay  na maimbod para makaibanan ni Jesus sa langit, sinabi ni Jesus sa saiyang mga parasunod kun ano an inaasahan niya asin kan saiyang Ama na gigibuhon ninda. (Juan 15:12-15) Sinabi man ni Jesus sa mga apostol niya an dapit sa mga pagbalong mapapaatubang sa sainda. Dangan paagi sa pagsambit sa saiya mismong halimbawa, sinadol niya sinda na ‘kusugan an buot!’ (Juan 16:1-4a, 33) Pakalihis nin dakul na taon, inaarog pa man giraray kan mga disipulo ni Jesus an saiyang pagigin mapagsakripisyo asin nagpapahiling pa man giraray sinda nin kusog nin buot. Sinuportaran ninda an lambang saro sa manlain-lain na kasakitan dawa mangahulugan iyan na kaipuhan nindang magsakit.—Heb. 10:33, 34.

9. Paano niyato maaarog si Jesus sa pagpahiling nin kusog nin buot?

⁹ Inaarog ta man ngunyan an halimbawa kan pagpahiling ni Jesus nin kusog nin buot. Halimbawa, kaipuhan an kusog nin buot para tabangan an satong mga tugang na pinepersegir huli sa saindang pagtubod. Kun minsan, tibaad bakong makatanusan na ipreso an satong mga tugang. Kun mangyari iyan, kaipuhan tang gibuhon an satong bilog na makakaya tanganing tabangan sinda, kaiba na an pagdepensa sa sainda. (Fil. 1:14; Heb. 13:19) An saro pang paagi na ipinapahiling ta an kusog nin buot iyo an padagos na paghuhulit nin “daing takot.” (Gibo 14:3) Arog ni Jesus, determinado kitang ihulit an mensahe kan Kahadian dawa ngani tibaad kontrahon kita asin persegiron nin mga tawo. Pero kun minsan, tibaad marisa ta na kulang an satong kusog nin buot. Ano an puwede tang gibuhon?

10. Sa mga semana bago an Memoryal, ano an dapat niyatong gibuhon, asin taano?

¹⁰ Mapapakusog niyato an satong buot paagi sa paghurop-hurop sa paglaom niyato na pinagin posible kan atang na pantubos ni Cristo. (Juan 3:16; Efe. 1:7) Sa mga semana bago an Memoryal, igwa kita nin espesyal na oportunidad para pararumon an satong pagpapahalaga sa pantubos. Sa panahon na iyan, makisabay sa pagbasa kan babasahon sa Bibliya para sa Memoryal asin hurop-hurupon na may pagpamibi an mga pangyayari bago an kagadanan ni Jesus. Dangan pag  nagtitiripon na kita para sa Pamanggihan kan Kagurangnan, mas lubos tang masasabutan an kahalagahan kan mga emblema sa Memoryal asin an daing kaagid na atang na pigrerepresentar kaiyan. Pag nasasabutan ta an mga ginibo ni Jesus asin ni Jehova para sa sato asin kun paano kita nakikinabang diyan pati na an satong mga mahal sa buhay, mas nagkukusog an satong paglaom, asin napapahiro kita na magtagal nin may kusog nin buot sagkod sa katapusan.—Heb. 12:3.

11-12. Ano an mga nanudan na niyato?

¹¹ Nanudan na niyato na ipinapagirumdom sa sato kan Pamanggihan kan Kagurangnan bako lang an mahalagang marhay na pantubos kundi pati man an pambihirang mga kuwalidad ni Jesus na kapakumbabaan asin kusog nin buot. Nagpapasalamat nanggad kita na padagos na ipinapahiling ni Jesus an mga kuwalidad na iyan bilang satong Halangkaw na Saserdote sa langit, na nakikiulay para sa sato! (Heb. 7:24, 25) Tanganing ipahiling an satong udok sa pusong pasasalamat, dapat na padagos niyatong girumdumon an kagadanan ni Jesus, siring sa ipinagbuot niya sa sato. (Luc. 22:19, 20) Ginigibo ta ini sa aldaw na katumbas kan Nisan 14, an pinakamahalagang petsa kan taon.

¹² Mahihiling ta sa simpleng Pamanggihan kan Kagurangnan an saro pang kuwalidad na nagpahiro ki Jesus na magadan para sa sato. Bilang sarong tawo sa daga, midbid siya sa kuwalidad na ini. Ano iyan?

13. Ano an sinasabi kan Juan 15:9 asin 1 Juan 4:8-10 mapadapit sa pagkamuot na ipinahiling ni Jehova asin ni Jesus, asin sairisay an nakikinabang sa saindang pagkamuot?

¹³ Perpektong ipinahiling ni Jesus an hararom na pagkamuot ni Jehova sa sato sa gabos niyang ginibo. (Basahon an Juan 15:9; 1 Juan 4:8-10.) Urog sa gabos, napahiro si Jesus na gikan sa pusong itao an saiyang buhay para sa sato. Kita man kabilang sa mga linahidan o sa “ibang mga karnero,” nakikinabang kita sa pagkamuot na ipinahiling sa sato ni Jehova asin kan saiyang Aki paagi sa atang na iyan. (Juan 10:16; 1 Juan 2:2) Pag-isipan man an mga bagay na ginamit sa pamanggihan nin Memoryal; ipinaparisa kaiyan an pagkamuot asin konsiderasyon ni Jesus sa saiyang mga disipulo. Paano?

14. Sa anong paagi ipinahiling ni Jesus an saiyang pagkamuot sa mga disipulo niya?

¹⁴ Nagpahiling nin pagkamuot si Jesus sa pinaniaki sa espiritu na mga parasunod niya paagi sa pag-establisar, bako nin sarong komplikadong ritwal, kundi nin sarong simpleng pamanggihan na dapat nindang iselebrar. Sa paglihis nin panahon, kaipuhan na iselebrar kan linahidan na mga disipulong iyan an Memoryal kada taon, na ginigibo iyan sa manlain-lain na kamugtakan, dawa sa bilangguan. (Kap. 2:10) Nasunod daw ninda si Jesus? Iyo nanggad!

15-16. Paano naiselebrar kan nagkapira an Pamanggihan kan Kagurangnan dawa nasa dipisil na mga kamugtakan?

¹⁵ Puon kan inot na siglo sagkod ngunyan, pinagmamaigutan kan tunay na mga Kristiyano na girumdumon an kagadanan ni Jesus. Ginigibo ninda an saindang pinakamakakaya na sunudon an tamang paagi nin pagselebrar kan Pamanggihan kan Kagurangnan, dawa dipisil kun minsan an mga kamugtakan. Mangnuhon an mga halimbawang ini. Mantang nakabartolina sa sarong presuhan sa China, kaipuhan ni Brother Harold King na magin mapamaagi para maiselebrar an Memoryal. Pasekreto niyang inandam an mga emblema sa Memoryal gamit an mga bagay na igwa siya. Maingat man niyang kinarkulo an petsa kan Memoryal sagkod sa makakaya niya. Kan mag-abot na an oras tanganing iselebrar iyan, nagkanta siya, namibi, asin nagtao nin basado sa Kasuratan na pahayag dawa solo sana siya sa selda.

¹⁶ Uni an saro pang halimbawa. Sarong grupo nin mga sister na nakapreso sa sarong kampo de konsentrasyon kan Giyera Mundiyal II, an nagsapeligro kan saindang buhay tanganing iselebrar an Pamanggihan kan Kagurangnan. Alagad, huling simplehon sana an mga ginagamit sa okasyon  na ini, nagin posible na maselebrar ninda nin pasekreto an Memoryal. Sinabi ninda: “Taraid kaming nagtindog nin pabilog, asin sa tahaw mi may sarong tungtungan na pigmantelan nin puting tela na diyan ipinatong su mga emblema. Sarong kandila an ilaw mi sa kuwarto, ta kun ilaw na de kuryente an gagamiton mi tibaad madakop kami. . . . Ipinahayag mi giraray an samong udok na promesa sa samong Ama na gagamiton mi an bilog ming kusog para sa pagbindikar sa Saiyang banal na pangaran.” Pambihirang pagtubod nanggad an ipinahiling ninda! Asin dakulang pagkamuot nanggad an ipinahiling ni Jesus huling pinagin posible niya na maselebrar ta an Memoryal dawa sa dipisil na mga kamugtakan!

17. Ano an puwede niyatong ihapot sa satong sadiri?

¹⁷ Mantang paparani na an Memoryal, marahay na ihapot niyato sa satong sadiri: ‘Paano ko mas maaarog si Jesus sa pagpahiling nin pagkamuot? Mas iniisip ko daw an mga pangangaipo kan sakong mga kapagtubod kisa sa sakong sadiri? Hinahanapan ko daw an mga tugang nin sobra sa makakaya ninda, o aram ko daw an saindang mga limitasyon?’ Lugod na pirmi tang arugon si Jesus asin magpahiling kita nin “pakikidamay.”—1 Ped. 3:8.

18-19. (a) Sa ano kita makakasigurado? (b) Ano an determinado mong gibuhon?

¹⁸ An kahagadan na iselebrar an Memoryal kan kagadanan ni Cristo dai na maghahaloy. Pag “dumatong” na si Jesus sa panahon kan grabeng kasakitan, titiripunon niya sa langit an natatada sa saiyang “mga pinili,” asin dai na iseselebrar an Memoryal.—1 Cor. 11:26; Mat. 24:31.

¹⁹ Dawa pa sa panahon na dai na isineselebrar an pamanggihan kan Memoryal, makakasigurado kita na magigirumduman kan banwaan ni Jehova an simpleng pamanggihan na ini bilang simbolo kan daing kaagid na pagpahiling nin kapakumbabaan, kusog nin buot, asin pagkamuot nin sarong tawo kasuarin man. Sa panahon na iyan, an gabos na nag-atender sa ekstraordinaryong pamanggihan na ini siguradong iiistorya iyan para sa kapakinabangan kan gabos na nabubuhay sa panahon na iyan. Alagad para makinabang ngunyan sa pamanggihan na ini, dapat na magin determinado kitang arugon an kapakumbabaan, kusog nin buot, asin pagkamuot ni Jesus. Kun gigibuhon ta iyan, makakapagtiwala kita na makakamtan niyato an satong balos hali ki Jehova.—2 Ped. 1:10, 11.