1-2. (a) Ano an nagin epekto sa sister na si Yoshiko kan mensahe na nasa Isaias 41:10? (b) Siisay an puwedeng makinabang sa mensaheng ipinasurat ni Jehova sa Isaias 41:10?

SI Yoshiko, na sarong maimbod na sister, nakaresibi nin mamundong bareta. Sinabi kan saiyang doktor na pirang bulan na sana siyang mabubuhay. Ano an reaksiyon niya? Nagirumduman ni Yoshiko an sarong paboritong teksto sa Bibliya, an Isaias 41:10. (Basahon.) Dangan kalmado niyang sinabi sa doktor na dai siya natatakot huling kinakaputan ni Jehova an saiyang kamot. * An nakakarangang mensahe sa tekstong iyan nakatabang sa satong namumutan na sister na lubos na magtiwala ki Jehova. Makakatabang man sa sato an tekstong iyan na magin kalmado pag napapaatubang sa grabeng mga pagbalo. Tanganing masabutan kun paano iyan makakatabang sa sato, pag-ulayan ta nguna kun taano ta itinao ni Jehova ki Isaias an mensaheng iyan.

² Ipinasurat ni Jehova ki Isaias an mga tataramon na iyan panginot na tanganing rangahon an mga Judio na dadarahon bilang bihag sa Babilonya pag-abot nin panahon. Alagad, prineserbar ni Jehova an mensaheng iyan para makinabang bako lang an mga Judiong bihag kundi pati man an gabos niyang lingkod puon kan panahon na iyan. (Isa. 40:8; Roma 15:4) Nabubuhay kita ngunyan sa “delikado asin masakit na mga panahon,” kaya mas lalo nang kaipuhan ta an pampakusog nin buot na nasa libro nin Isaias.—2 Tim. 3:1.

3. (a) Anong mga panuga an yaon sa Isaias 41:10, na iyo an tekstong pinili para sa 2019? (b) Taano ta kaipuhan niyato an mga asigurasyon na itinatao sa sato kan mga panugang ini?

³ Sa artikulong ini, mapokus kita sa tulong nakakapakusog sa  pagtubod na mga panuga ni Jehova na nasa Isaias 41:10: (1) Si Jehova masasakaibanan ta, (2) siya an satong Diyos, asin (3) tatabangan niya kita. Kaipuhan niyato an mga asigurasyon * na ini huling, arog ni Yoshiko, napapaatubang kita sa mga pagbalo sa buhay. Kaipuhan man niyatong atubangon an mga panggigipit huli sa maraot na mga kamugtakan sa kinaban. An nagkapira sa sato nagtatagal pa ngani nin mga persekusyon kan makapangyarihan na mga gobyerno. Pag-ulayan niyato saro-saro an tulong asigurasyon.

4. (a) Ano an inot na asigurasyon na pag-uulayan ta? (Hilingon man an nota sa ibaba.) (b) Paano ipinapahayag ni Jehova an saiyang namamatian para sa sato? (c) Ano an epekto sa saimo kan mga sinabi nin Diyos?

⁴ Inot, inaasigurar kita ni Jehova paagi kan mga tataramon na: ‘Dai ka matakot, ta kaibanan mo ako.’ * Ipinapahiling ni Jehova na kaibanan ta siya paagi sa pagtao sa sato kan saiyang bilog na atensiyon asin mamumuton na pagpadangat. Risahon an sinabi niya mapadapit sa saiyang mamumuton na pagpadangat sa sato. ‘Nagi kang mahalaga sa sakong mga mata, [tinawan ka nin onra], asin namumutan ko ika.’ (Isa. 43:4, An Banal na Biblia) Mayong puwersa sa uniberso na makakapapundo ki Jehova sa pagkamuot niya sa mga naglilingkod sa saiya; an kaimbudan niya sa sato dai matatanyog. (Isa. 54:10) Nakakapakusog nanggad sa sato an saiyang pagkamuot asin pakikiamigo. Poprotektaran niya kita ngunyan, kun paanong prinotektaran niya an saiyang amigong si Abram (Abraham). Sinabi ni Jehova sa saiya: “Dai ka matakot Abram; ako an kalasag mo.”—Gen. 15:1.

5-6. (a) Paano niyato naaraman na interesado si Jehova na tabangan kita sa satong mga problema? (b) Ano an manunudan ta ki Yoshiko?

⁵ Aram niyato na interesado si Jehova na tabangan kita sa satong personal na mga problema huling nanunuga siya sa saiyang mga lingkod: ‘Kun mag-agi ka sa katubigan, masasakaibanan mo ako, an mga salog dai saimo makakasanop. Kun maglakaw ka sa tahaw nin kalayo, dai ka masusulo, asin an laad dai saimo makakapaso.’ (Isa. 43:2, An Banal na Biblia) Ano an buot sabihon kaini?

⁶ Dai nanunuga si Jehova na hahalion niya an mga problemang nakakapadipisil sa buhay, pero  dai niya tutugutan na malamos kita kan ‘mga salog’ nin problema o na permanente kitang madanyaran kan mga “laad” nin pagbalo. Sinisiyerto niya na masasakaibanan ta siya asin tatabangan kitang ‘makaagi’ o makayanan an mga kadipisilan na iyan. Ano an gigibuhon ni Jehova? Tatabangan niya kita na dai matakot tanganing mapagdanay niyato an satong integridad sa saiya, dawa kun mapaatubang kita sa kagadanan. (Isa. 41:13) Napatunayan iyan ni Yoshiko na sinambit kasubago. Sinabi kan saiyang aking babayi: “Naghanga kami sa pagigin kalmado ni Mama. Nahiling mi na talagang tinawan siya ni Jehova nin panglaog na katuninungan. Sagkod kan aldaw na magadan siya, ipinapakipag-ulay ni Mama sa mga nars saka pasyente an mapadapit ki Jehova asin sa mga panuga niya.” Ano an manunudan ta ki Yoshiko? Kun nagtitiwala kita sa panuga nin Diyos na ‘masasakaibanan mo ako,’ magigin makusog man an satong buot asin marigon mantang nagtatagal sa mga pagbalo.

7-8. (a) Ano an ikaduwang asigurasyon na pag-uulayan ta, asin ano an buot sabihon kaiyan? (b) Taano ta sinabi ni Jehova sa mga Judiong bihag na ‘Dai ka maghadit’? (c) Anong mga tataramon sa Isaias 46:3, 4 an siguradong nakapakalma sa puso kan banwaan nin Diyos?

⁷ Mangnuhon an ikaduwang asigurasyon na isinurat ni Isaias: ‘Dai ka maghadit, ta ako an saimong Diyos.’ Ano an buot sabihon kan mga tataramon na ini mapadapit sa kahaditan? Sa bersikulong ini, an orihinal na tataramon para sa ‘maghadit’ nagpaparisa nin ideya na “magparasalingoy sa likod huling namamatian mong may papaabot na peligrong dai mo aram” o “mangalagkalag-kalag arog kan ginigibo nin saro na nasa peligro.”

⁸ Taano ta sinabi ni Jehova sa mga Judiong magigin bihag sa Babilonya na dai ‘maghadit’? Huling aram niya na an mga nakaistar sa Babilonya magkakatarakot. Taano? Sa pagtatapos kan 70 taon na pagkabihag kan mga Judio, an Babilonya sasakyadahon kan makusog na mga hukbo kan Medo-Persia. Gagamiton ni Jehova an hukbong ini tanganing patalingkason an saiyang banwaan sa pagkabihag sa Babilonya. (Isa. 41:2-4) Kan maaraman kan mga Babilonyo asin kan mga taga ibang nasyon kan panahon na idto na padangadang na an saindang mga kalaban, pinurbaran nindang pakusugon an buot kan lambang saro paagi sa pagsabi: ‘Magpakakusog ka.’ Naggibo man sinda nin dakul pang diyos-diyosan, na nag-aasang poprotektaran sinda kaiyan. (Isa. 41:5-7) Miyentras tanto, pinakalma ni Jehova an puso kan mga Judiong bihag paagi sa pagsabi: ‘Ika, O Israel, [bakong arog kan saimong pagtaraid] sakuya kang uripon. Dai ka maghadit, ta ako an saimong Diyos.’ (Isa. 41:8-10) Mangnuhon na sinabi ni Jehova: ‘Ako an saimong Diyos.’ Paagi sa mga tataramon na iyan, inasigurar ni Jehova an saiyang maimbod na mga parasamba na dai niya sinda nalingawan—siya pa man giraray an Diyos ninda, asin sinda pa man giraray an banwaan niya. Sinabi niya sa sainda: “Dadarahon ko kamo . . . asin ililigtas ko kamo.” Siguradong napakusog kan mga tataramon na iyan an mga Judiong bihag.—Basahon an Isaias 46:3, 4. *

9-10. Taano ta dai niyato kaipuhan na matakot? Iilustrar.

⁹ An mga tawo sa satong panahon lalo nang napupurisaw huli sa naggagrabeng mga kamugtakan sa kinaban. Siyempre, apektado man kita kan kaparehong mga problema. Pero dai ta kaipuhan na matakot. Sinasabi sa sato ni Jehova: ‘Ako an saimong Diyos.’ Taano ta mapuwersang dahilan iyan na magdanay kitang kalmado?

¹⁰ Pag-isipan an ilustrasyon na ini: Duwang pasahero, si Jim asin si Ben, an nakasakay sa eroplano na garo piggugugo nin makusog na duros. Mantang pigpapalid-palid paitaas-pababa nin makusog na duros an eroplano, may nagtaram sa  loudspeaker: “Pagdanayon na nakakabit an saindong seat belt. Medyo halóy-halóy kitang malayog sa makusog na mga duros (turbulence).” Haditon na si Jim. Dangan sinabi kan piloto: “Dai kamo mahadit. Ini an saindong piloto.” Sa puntong ini, napapiling-piling si Jim asin nagsabi: “Anong asigurasyon ’yan?” Pero narisa niya na dai lamang nahahadit si Ben. Hinapot siya ni Jim: “Taano ta kalmaduhon ka?” Nagngirit si Ben asin nagsabi: “Midbid ko kayang marhay an piloto ta. Papa ko ‘yan!” Dangan nagsabi si Ben: “Iistorya ko sa saimo si Papa. Sigurado ako na pag mabisto mo siya saka maaraman mo an abilidad niya, magigin kalmado ka man.”

11. Ano an mga manunudan ta sa ilustrasyon mapadapit sa duwang pasahero?

¹¹ Ano an mga manunudan ta sa ilustrasyon na ini? Arog ni Ben, kalmado kita huling midbid niyatong marhay an satong Ama sa langit, si Jehova. Aram niyato na gigiyahan niya kita na ligtas na makaagi sa arog bagyong mga problema na inaatubang niyato sa huring mga aldaw kan sistemang ini. (Isa. 35:4) Nagtitiwala kita ki Jehova, kaya makakapagdanay kitang kalmado mantang an mga tawo sa kinaban natatakot na marhay. (Isa. 30:15) Arog ni Ben, sinasabi man niyato sa satong mga pagtaraid an mga dahilan na magtiwala sa Diyos. Sa siring, makakasigurado man sinda na ano man na problema an mapaatubang sa sainda, tatabangan sinda ni Jehova.

12. (a) Ano an ikatulong asigurasyon na pag-uulayan ta? (b) Ano an ipinapagirumdom sa sato kan pagsambit sa “takyag” ni Jehova?

¹² Isipon an ikatulong asigurasyon na isinurat ni Isaias: ‘Papakusugon taka, [iyo,] tatabangan taka.’ Nainot nang ilinadawan ni Isaias kun paano papakusugon ni Jehova an saiyang banwaan: ‘Si Jehova maabot na may kakusugan, asin an saiyang takyag magsasakop.’ (Isa. 40:10) Parating ginagamit kan Bibliya an tataramon na “takyag” bilang simbolo nin kapangyarihan. Kaya ipinapagirumdom sa sato kan tataramon na ‘an takyag ni Jehova magsasakop’ na si Jehova sarong  makapangyarihan na Hadi. Ginamit niya an saiyang daing kapantay na kusog tanganing tabangan asin protektaran an saiyang mga lingkod kaidto, asin padagos niyang pinapakusog asin pinoprotektaran an mga nagtitiwala sa saiya ngunyan.—Deut. 1:30, 31; Isa. 43:10.

13. (a) Sa anong kamugtakan lalo nang inuutob ni Jehova an saiyang panuga na papakusugon niya kita? (b) Anong garantiya an nakakapakusog nanggad kan satong buot asin kumpiyansa?

¹³ Lalo na pag pinepersegir kita kan satong mga kaiwal, inuutob ni Jehova an saiyang panuga: ‘Papakusugon taka.’ May mga lugar sa kinaban ngunyan na pinagmamaigutan kan mga kaiwal ta na papunduhon an satong paghuhulit o ipagbawal an satong organisasyon. Dawa arog kaiyan, dai kita nahahadit na marhay sa siring na mga pag-atake. Tinawan kita ni Jehova nin garantiya na nakakapakusog nanggad kan satong buot asin kumpiyansa. Nanunuga siya sa sato: “Mayong armas na gigibuhon laban sa saimo an magkakaepekto.” (Isa. 54:17, NW) Ipinapagirumdom sa sato kan mga tataramon na iyan an tulong mahalagang katotoohan.

14. Taano ta dai kita nagngangalas na inaatake kita kan mga kaiwal nin Diyos?

¹⁴ Inot, bilang mga parasunod ni Cristo, inaasahan niyatong ikakaungis kita. (Mat. 10:22) Ihinula ni Jesus na pepersegiron nin grabe an saiyang mga disipulo sa huring mga aldaw. (Mat. 24:9; Juan 15:20) Ikaduwa, pinapatanidan kita kan propesiya ni Isaias na dai sana kita ikakaungis kan satong mga kaiwal; magamit sinda nin manlain-lain na armas laban sa sato. Kaiba sa mga armas na iyan an tusong pandadaya, hayag na mga kaputikan, asin maringis na persekusyon. (Mat. 5:11) Dai pupugulan ni Jehova an satong mga kaiwal na gamiton an mga armas na ini tanganing makilaban sa sato. (Efe. 6:12; Kap. 12:17) Pero dai ta kaipuhan na matakot. Taano?

15-16. (a) Ano an ikatulong katotoohan na kaipuhan niyatong tandaan, asin paano sinusuportaran kan Isaias 25:4, 5 an katotoohan na iyan? (b) Paano ilinaladawan kan Isaias 41:11, 12 an kaaabtan kan mga nang-aatake sa sato?

¹⁵ Isipon an ikatulong katotoohan na kaipuhan niyatong tandaan. Sinabi ni Jehova na “mayong armas” na ginagamit laban sa sato an “magkakaepekto.”  Kun paanong an lanob pinoprotektaran kita sa mapandestrosong bagyo, pinoprotektaran man kita ni Jehova sa ‘kabagsikan kan mga pangahas.’ (Basahon an Isaias 25:4, 5.) Dai nanggad kita magigibuhan nin ano man na permanenteng danyos kan satong mga kaiwal.—Isa. 65:17.

¹⁶ Pinapakusog man ni Jehova an satong pagtitiwala sa saiya paagi sa detalyadong paglaladawan kan kaaabtan kan mga ‘nagkakaaranggot’ sa sato. (Basahon an Isaias 41:11, 12.) Gurano man kadesidido kan pag-atake kan mga kaiwal niyato o gurano man kagrabe kan giyera, saro sana an resulta: Gabos na kaiwal kan mga lingkod nin Diyos lalaglagon asin paparaon.

17-18. (a) Paano mapapakusog kan pagbasa nin Bibliya an satong pagtitiwala sa Diyos? Magtao nin halimbawa. (b) Paano makakatabang sa sato an paghurop-hurop sa piniling teksto para sa 2019?

¹⁷ Mapapakusog niyato an satong pagtitiwala ki Jehova paagi sa urog na pagmidbid sa saiya. Asin an solamenteng paagi para talagang mamidbid an Diyos iyo na basahon tang marhay an Bibliya dangan hurop-hurupon an satong binasa. Mahihiling sa Bibliya an mapagtitiwalaan na rekord kun paano prinotektaran ni Jehova an saiyang banwaan kaidto. An rekord na iyan nagtatao sato nin kumpiyansa na dai niya kita papabayaan ngunyan.

¹⁸ Pag-isipan an sarong magayon na ilustrasyon na ginamit ni Isaias kun paano kita pinoprotektaran ni Jehova. Iinagid niya si Jehova sa sarong pastor asin an mga lingkod nin Diyos sa mga kordero. Sinabi ni Isaias mapadapit ki Jehova: ‘Sa saiyang takyag titipunon an mga kordero, asin sa saiyang daghan [kakargahon niya sinda].’ (Isa. 40:11, An Banal na Biblia) Pag namamati ta an makusog na mga takyag ni Jehova na kinukugos kita, namamatian niyato na protektado asin kalmado kita. Tanganing tabangan kitang magdanay na kalmado sa ibong kan mga problemang inaatubang ta, pinili kan maimbod asin madunong na uripon an Isaias 41:10 bilang teksto para sa 2019, ‘Dai ka maghadit, ta ako an saimong Diyos.’ Hurop-hurupon an nakakapakusog na mga tataramon na iyan. Papakusugon ka kaiyan mantang inaatubang mo an mga problemang maabot.