1-2. (a) Ano an nahihiling ni Jehova pag nagtitiripon an minilyon na tawo sa bilog na kinaban para sa Pamanggihan kan Kagurangnan? (Hilingon an ritrato sa cover.) (b) Ano an pag-uulayan niyato sa artikulong ini?

ISIP-ISIPA kun ano an nahihiling ni Jehova pag nagtitiripon an minilyon na tawo sa bilog na kinaban para sa Pamanggihan kan Kagurangnan. Hinihiling niya bako sana an dakulang bilang nin tawo kundi pati an lambang indibidwal na yaon. Halimbawa, nahihiling niya an mga pirming nag-aatender taon-taon. Tibaad an iba sa sainda nag-aatender dawa napapaatubang sa grabeng persekusyon. An iba dai regular na nag-aatender sa ibang mga pagtiripon, alagad ibinibilang nindang sagradong obligasyon an pag-atender sa Memoryal. Naririsa man ni Jehova an mga indibidwal na tibaad primerong beses pa sanang makaatender sa Memoryal, posibleng huli ta gusto nindang maaraman kun manungod sa ano iyan.

² Siguradong nauugma si Jehova na mahiling na dakulon an nag-aatender sa Memoryal. (Luc. 22:19) Alagad, bako sa bilang kan mga nag-aatender panginot na interesado si Jehova. Mas interesado siya sa dahilan kan pag-atender ninda, huling mahalaga ki Jehova an motibo. Sa artikulong ini, pag-uulayan niyato an sarong mahalagang marhay na hapot: Taano ta nag-aatender kita bako lang sa taunan na pagselebrar kan Memoryal kundi pati man sa semanal na mga pagtiripon na itinatao ni Jehova sa mga namumuot sa saiya?

3-4. (a) Taano ta nag-aatender kita sa mga pagtiripon? (b) Ano an ipinapahiling manungod sa sato kan pag-atender niyato sa mga pagtiripon? (c) Sigun sa sinasabi sa 1 Corinto 11:23-26, taano ta dapat kitang mag-atender sa Memoryal?

³ Nag-aatender kita sa mga pagtiripon kan kongregasyon panginot na huling kabtang iyan kan satong pagsamba. Nag-aatender  man kita huling tinutukduan kita ni Jehova sa mga pagtiripon. Habo kan mga tawong mapalangkaw an ideya na kaipuhan sindang tukduan nin ano man. (3 Juan 9) Sa kabaliktaran, gustong-gusto niyatong tukduan kita ni Jehova asin kan ginagamit niyang organisasyon.—Isa. 30:20; Juan 6:45.

⁴ Pag nag-aatender kita sa mga pagtiripon, ipinapahiling kaiyan na kita mapakumbaba—andam asin gustong magpatukdo. Sa banggi kan Memoryal kan kagadanan ni Jesus, nag-aatender kita sa mahalagang pagtiripon na ini bako sana huling namamatian tang obligasyon iyan kundi huling mapakumbaba man niyatong sinusunod an pagbuot ni Jesus: “Padagos nindong gibuhon ini sa pagrumdom sa sako.” (Basahon an 1 Corinto 11:23-26.) Pinapakusog kan pagtiripon na iyan an satong paglaom para sa maabot na panahon asin ipinapagirumdom kaiyan sa sato kun gurano kita kanamumutan ni Jehova. Alagad, aram ni Jehova na kaipuhan niyato nin pampakusog nin buot bako lang sarong beses kada taon. Kaya, tinatawan niya kita nin mga pagtiripon kada semana asin dinadagka kitang umatender diyan. An kapakumbabaan nagpapahiro sa sato na magsunod. Dakul na panahon kada semana an ginagamit niyato sa pag-andam asin pag-atender sa mga pagtiripon na iyan.

5. Taano ta inaako kan mapakumbabang mga tawo an imbitasyon ni Jehova?

⁵ Kada taon, dakul na mapakumbabang tawo an nag-aako kan imbitasyon ni Jehova na matukduan niya. (Isa. 50:4) Nauugma sindang mag-atender sa Memoryal, asin nag-aatender na man sinda sa iba pang mga pagtiripon. (Zac. 8:20-23) Maugma kitang marhay na magkairibanan na matukduan asin magiyahan ni Jehova, “an [satong] paratabang asin [satong] parasalbar.” (Sal. 40:17, NW) Sa katunayan, igwa pa daw nin mas nakakaugma—o mas mahalaga—kisa sa pag-ako kan imbitasyon na matukduan ni Jehova asin ni Jesus, an Aki na namumutan niyang marhay?—Mat. 17:5; 18:20; 28:20.

6. Paano an kapakumbabaan nakatabang sa sarong lalaki na mag-atender sa Memoryal?

⁶ Kada taon, hinihinguwa tang imbitaran an pinakadakul na mapupuwede na umatender sa Memoryal kan kagadanan ni Jesus. Dakul na mapakumbabang tawo an nakinabang kan akuon ninda an imbitasyon niyato. Hilinga an sarong halimbawa. Pirang taon na an nakaagi, sarong lalaki an natawan nin imprentadong imbitasyon sa Memoryal, alagad sinabi niya sa brother na nagtao kaiyan na dai siya makakaatender. Pero kan banggi kan Memoryal, nasurpresa an brother kan mahiling niya an lalaking idto na palaog sa Kingdom Hall. Naghangang marhay an lalaki sa mainit na pag-ako sa saiya na huli kaiyan nagpuon na siyang mag-atender sa satong semanal na mga pagtiripon. Sa katunayan, tulong beses lang siyang dai nakaatender nin pagtiripon sa bilog na taon. Ano an nagpahiro sa saiya na gibuhon iyan? An saiyang pagigin mahuyo an dahilan kaya binago niya an saiyang desisyon. Kan huri, sinabi kan brother na nag-imbitar sa saiya: “Mapakumbaba siyang marhay.” Siguradong irinani ni Jehova an lalaking iyan para sambahon Siya, asin ngunyan bawtisado na siya.—2 Sam. 22:28; Juan 6:44.

7. Paano an mga nanunudan niyato sa mga pagtiripon asin an mga nababasa ta sa Bibliya nakakatabang sa sato na magin mapakumbaba?

⁷ An mga nanunudan niyato sa mga pagtiripon asin an mga nababasa ta sa Bibliya makakatabang sa sato na magin mapakumbaba. Sa mga semana bago an Memoryal, sa parati nakapokus an satong mga pagtiripon sa halimbawa ni Jesus asin sa kapakumbabaan na ipinahiling niya sa pagtao kan saiyang buhay bilang pantubos. Asin sa mga aldaw bago an Memoryal, dinadagka kitang basahon sa Bibliya an mga pangyayari bago asin pagkatapos kan kagadanan asin pagkabuhay liwat ni Jesus. An mga nanunudan niyato sa mga pagtiripon na iyan asin an mga nababasa ta sa mga pangyayaring iyan sa Bibliya nakakatabang sa sato na urog na magin mapagpasalamat sa sakripisyong ginibo ni Jesus para sa sato. Napapahiro kitang  arugon an saiyang kapakumbabaan asin gibuhon an kabutan ni Jehova, dawa pag dipisil iyan para sa sato.—Luc. 22:41, 42.

8. Paano si Jesus nagpahiling nin kusog nin buot?

⁸ Hinihinguwa man niyatong arugon si Jesus sa pagpahiling nin kusog nin buot. Isipa an kusog nin buot na ipinahiling niya kan mga aldaw bago siya magadan. Aram niyang marhay na sa dai na mahahaloy papasupugon, bubugbugon, asin gagadanon siya kan saiyang mga kaiwal. (Mat. 20:17-19) Dawa arog kaiyan, gikan sa buot niyang inatubang an kagadanan. Kan mag-abot na an oras, sinabi niya sa saiyang maimbod na mga apostol na kaiba niya sa Getsemane: “Bangon kamo, magduman na kita. Uya na an matraydor sa sako.” (Mat. 26:36, 46) Asin kan mag-abot na an armadong grupo tanganing arestaron siya, hinampang niya sinda, nagpamidbid siya, asin ipinagbuot sa mga suldados na pabayaan na makahali an saiyang mga apostol. (Juan 18:3-8) Pambihira nanggad na kusog nin buot an ipinahiling ni Jesus! Ngunyan, an linahidan na mga Kristiyano asin an mga kabilang sa ibang mga karnero nagmamaigot na arugon si Jesus sa pagpahiling nin kusog nin buot. Paano?

9. (a) Taano ta tibaad kaipuhan niyatong magpahiling nin kusog nin buot tanganing regular na makaatender sa mga pagtiripon? (b) Ano an puwedeng magin epekto kan satong halimbawa sa satuyang mga tugang na nakapreso huli sa saindang pagtubod?

⁹ Tanganing regular na makaatender sa mga pagtiripon, tibaad kaipuhan niyatong magpahiling nin kusog nin buot sa dipisil na mga kamugtakan. May mga tugang kita na nag-aatender sa mga pagtiripon dawa grabe an saindang kamunduan, pinangluluyahan nin buot, o may mga problema sa salud. An iba kusog-buot na nag-aatender sa mga pagtiripon sa ibong kan grabeng pagkontra kan mga kapamilya o kan gobyerno. Pag-isipan an epekto kan satong halimbawa sa mga tugang niyatong nakapreso huli sa saindang pagtubod. (Heb. 13:3) Pag nababaretaan ninda na padagos kitang naglilingkod ki Jehova sa ibong nin mga pagbalo, napapakusog sinda na pagdanayon an saindang kaimbudan, kusog nin buot, asin integridad. May kaagid na eksperyensiya si apostol Pablo. Kan nakapreso siya sa Roma, nauugma siya pag nababaretaan niyang maimbod na naglilingkod ki Jehova an saiyang mga tugang. (Fil. 1:3-5, 12-14) Kan si Pablo madali nang makaluwas o kan kaluluwas pa sana, naggibo siya nin surat para sa mga Hebreo. Sa surat na iyan dinagka niya an maimbod na mga Kristiyanong idto na “padagos [sindang] magkaminuruutan bilang magturugang” asin dai pabayaan an mga pagtiripon.—Heb. 10:24, 25; 13:1.

10-11. (a) Sairisay an dapat niyatong imbitaran sa Memoryal? (b) Sigun sa Efeso 1:7, taano ta iniimbitaran niyato sinda?

¹⁰ Nagpapahiling kita nin kusog nin buot pag iniimbitaran ta sa Memoryal an satong mga paryente, katrabaho, asin mga pagtaraid. Taano ta iniimbitaran niyato sinda? Huling nagpapasalamat kitang marhay sa ginibo ni Jehova asin ni Jesus para sa sato kaya dai niyato mapugulan na imbitaran an iba na umatender sa Memoryal. Gusto niyatong maaraman ninda kun paano man sinda makikinabang sa “daing kapantay na kabuutan” ni Jehova paagi sa pantubos.—Basahon an Efeso 1:7; Kap. 22:17.

 ¹¹ Pag nagpapahiling kita nin kusog nin buot paagi sa pag-atender sa mga pagtiripon, naipapahiling man niyato an saro pang mahalagang marhay na kuwalidad na ipinapahiling ni Jehova asin ni Jesus sa pambihirang mga paagi.

12. (a) Paano napapakusog kan satong mga pagtiripon an pagkamuot niyato ki Jehova asin ki Jesus? (b) Bilang pag-arog ki Jesus, dinadagka kita kan 2 Corinto 5:14, 15 na gibuhon an ano?

¹² An pagkamuot niyato ki Jehova asin ki Jesus nagmomotibar sa sato na umatender sa mga pagtiripon. Dangan, an mga nanunudan niyato sa mga pagtiripon nagpapakusog kan pagkamuot niyato ki Jehova asin sa saiyang Aki. Sa mga pagtiripon, padagos na ipinapagirumdom sa sato an ginibo ninda para sa sato. (Roma 5:8) Ipinapagirumdom sa sato partikular na kan Memoryal kun gurano kadakula kan pagkamuot ninda, maski sa mga dai pa nakakasabot kan halaga kan pantubos. Huli sa dakulang pasasalamat niyato, pinagmamaigutan niyatong arugon si Jesus sa satong aroaldaw na buhay. (Basahon an 2 Corinto 5:14, 15.) Dugang pa, pinapahiro kita kan satuyang puso na umawon si Jehova sa pagtao kan pantubos. An sarong paagi na mauumaw niyato siya iyo an pagtao nin udok sa pusong mga komento sa satong mga pagtiripon.

13. Paano niyato maipapahiling kun gurano ta kanamumutan si Jehova asin an saiyang Aki? Ipaliwanag.

¹³ Maipapahiling niyato kun gurano ta kanamumutan si Jehova asin an saiyang Aki paagi sa pagigin andam na magsakripisyo para sa sainda. Sa parati, kaipuhan niyatong gumibo nin manlain-lain na pagsasakripisyo tanganing makaatender sa satong mga pagtiripon. Dakul na kongregasyon an nagsasagibo nin pagtiripon pagkatapos nin trabaho, sa mga oras na posibleng marhay na pagal na kita. Asin an saro pang pagtiripon ginigibo sa Sabado o Domingo na pahingalo man kan iba. Naririsa daw ni Jehova na nag-aatender kita sa pagtiripon dawa pagal kita? Iyo nanggad! Sa katunayan, mantang mas dakula an satong mga pagsasakripisyo, urog man na inaapresyar ni Jehova an pagkamuot na ipinapahiling niyato sa saiya.—Mar. 12:41-44.

14. Ano an itinaong arugan ni Jesus sa pagpahiling nin mapagsakripisyong pagkamuot?

¹⁴ Tinawan kita ni Jesus nin arugan sa pagpahiling nin mapagsakripisyong pagkamuot. Andam siya bako lang na magadan para sa mga disipulo niya kundi mamuhay man aroaldaw na iniinot an saindang kapakanan. Halimbawa, nagtao siya nin panahon na makaibanan an saiyang mga parasunod dawa pagal siya o napupurisaw. (Luc. 22:39-46) Asin nagpokus siya sa maitatao niya sa iba, bako sa makukua niya sa sainda. (Mat. 20:28)  Kun arog kaiyan kakusog an pagkamuot niyato ki Jehova asin sa satong mga tugang, gigibuhon ta an gabos niyatong makakaya na makaatender sa Pamanggihan kan Kagurangnan pati man sa gabos na iba pang pagtiripon kan kongregasyon.

15. Sairisay an lalo nang gusto niyatong tabangan?

¹⁵ Kabilang kita sa iyo sanang tunay na Kristiyanong kasararuan nin magturugang, asin nauugma kitang gamiton an pinakadakul na panahon na posible tanganing imbitaran an mga dai pa nakaatender. Alagad, partikular nang gusto tang tabangan an satong “mga tugang sa pagtubod” na nagin inaktibo. (Gal. 6:10) Pinapatunayan niyato na namumutan ta sinda paagi sa pagdagka sa sainda na umatender sa satong mga pagtiripon, lalo na sa Memoryal. Arog ni Jehova asin ni Jesus, nauugma kitang marhay pag an sarong inaktibo minabalik ki Jehova, an satong mamumuton na Ama asin Pastor.—Mat. 18:14.

16. (a) Paano niyato mapapakusog an buot kan lambang saro, asin paano nakakatabang sa sato an mga pagtiripon ta? (b) Taano ta marahay na panahon ini kan taon tanganing girumdumon an mga tataramon ni Jesus sa Juan 3:16?

¹⁶ Sa maabot na mga semana, imbitaran an pinakadakul na tawong posible na mag-atender sa Memoryal sa Biyernes na banggi, Abril 19, 2019. (Hilingon an kahon na “ Iimbitaran Mo Daw Sinda?”) Sa bilog na taon, pakusugon niyato an lambang saro paagi sa regular na pag-atender sa gabos na pagtiripon na itinatao sa sato ni Jehova. Mantang nagdadangadang na an katapusan kan sistemang ini nin mga bagay, kaipuhan niyato an satong mga pagtiripon huling matatabangan kita kaiyan na magdanay na mapakumbaba, makusog an buot, asin mamumuton. (1 Tes. 5:8-11) Lugod na bilog na puso niyatong ipahiling an satong dakulang pasasalamat ki Jehova asin sa saiyang Aki sa saindang dakulaon na pagkamuot sa sato!—Basahon an Juan 3:16.