ARTIKULONG PAG-AADALAN 4
“An Espiritu Mismo Nagpapatotoo”
“An espiritu mismo nagpapatotoo kaiba an satong espiritu na kita mga aki nin Diyos.”—ROMA 8:16.
KANTA 25 Sarong Espesyal na Pagsadiri
SUMARYO KAN PAG-AADALAN *
Ibinubo ni Jehova an saiyang banal na espiritu sa makangangalas na paagi kan Pentecostes sa sarong grupo nin mga 120 Kristiyano (Hilingon an parapo 1-2)
1-2. Anong pambihirang bagay an nangyari kan aldaw nin Pentecostes 33 C.E.?
DOMINGONG aga kaidto sa Jerusalem, taon 33 C.E., aldaw nin Pentecostes. Sarong grupo nin mga 120 disipulo an nagkakatiripon sa kuwarto sa itaas nin sarong harong. (Gibo 1:13-15; 2:1) Pirang aldaw bago kaiyan, sinabihan sinda ni Jesus na magdanay sa Jerusalem huling may itatao sa saindang sarong espesyal na regalo. (Gibo 1:4, 5) Ano an sunod na nangyari?
2 “Bigla na sanang nagkaigwa nin makusog na tanog hali sa langit, siring sa siwit nin makusog na duros.” Dangog-dangog an tanog sa bilog na harong. Dangan, may naglataw na “garo mga dila nin kalayo” sa ibabaw kan payo kan mga disipulo, asin gabos sinda “napano nin banal na espiritu.” (Gibo 2:2-4) Sa pambihirang paaging ini ibinubo ni Jehova an saiyang banal na espiritu sa grupong iyan. (Gibo 1:8) Sinda an inot na mga linahidan kan banal na espiritu * asin tinawan kan paglaom na mamahala kaiba ni Jesus sa langit.
ANO AN NANGYAYARI PAG AN SARO LINAHIDAN?
3. Taano ta an mga yaon kaidto kan Pentecostes dai nagduda na sinda linahidan kan banal na espiritu?
3 Kun saro ka sa mga disipulong idto na nagkakatiripon sa kuwarto sa itaas kan aldaw na idto, dai mo nanggad iyan malilingawan. May garo dila nin kalayo na nagtugdon sa payo mo, tapos nagpuon kang magtaram nin ibang lengguwahe! (Gibo 2:5-12) Dai ka nanggad magdududa na linahidan ka kan banal na espiritu. Alagad an gabos daw na linahidan kan banal na espiritu inaako an paglahid sa sainda sa sarong pambihirang paagi asin sa pararehong panahon sa buhay ninda? Dai. Paano niyato naaraman iyan?
4. An gabos daw na linahidan kan inot na siglo nag-ako kan paglahid sa sainda sa pararehong panahon sa buhay ninda? Ipaliwanag.
4 Pag-ulayan ta an dapit sa panahon nin paglahid. Bako lang an grupong idto nin mga 120 Kristiyano an linahidan kan banal na espiritu kan Pentecostes, 33 C.E. Dangan kan aldaw man sanang idto, mga 3,000 pa an nag-ako man kan ipinanugang banal na espiritu. An paglahid sa sainda nangyari kan sinda bawtismuhan. (Gibo 2:37, 38, 41) Pero kan suminurunod na mga taon, bakong gabos na linahidan na Kristiyano nag-ako kan paglahid sa sainda kan sinda bawtismuhan. An mga Samaritano nag-ako kan paglahid sa sainda mga pirang panahon pagkabawtismo sa sainda. (Gibo 8:14-17) Asin sa saro nganing pambihirang marhay na pangyayari, si Cornelio asin an mga kairiba niya sa saiyang harong linahidan maski ngani dai pa sinda nabawtismuhan.—Gibo 10:44-48.
5. Sigun sa 2 Corinto 1:21, 22, ano an nangyayari pag an saro linahidan kan banal na espiritu?
5 Pag-ulayan ta man kun ano an nangyayari pag an saro linahidan kan banal na espiritu. May mga linahidan na tibaad sa primero nasasakitan na akuon na pinili sinda ni Jehova. Tibaad maisip ninda, ‘Taano ta pinili ako nin Diyos?’ An iba tibaad bakong arog kaiyan an reaksiyon. Ano man an nagin reaksiyon ninda, ipinaliwanag ni apostol Pablo kun ano an nangyayari sa gabos na linahidan: “Pagkatapos nindong magtubod, kamo tinatakan * kan ipinanugang banal na espiritu paagi sa saiya, asin an espiritung ini garantiya kan kakamtan niyatong mana.” (Efe. 1:13, 14) Kaya ginagamit ni Jehova an saiyang banal na espiritu tanganing lubos na magin malinaw sa mga Kristiyanong ini na pinili niya sinda. Paagi kaini, an banal na espiritu sarong “garantiya [sarong paniguro o panuga]” na itinatao tanganing siyertuhon sa sainda na sa maabot na panahon mabubuhay sinda nin daing sagkod sa langit bako sa daga.—Basahon an 2 Corinto 1:21, 22.
6. Ano an kaipuhan na gibuhon nin sarong linahidan na Kristiyano tanganing makamtan niya an saiyang langitnon na balos?
6 Kun linahidan an sarong Kristiyano, sigurado na daw na makakamtan niya an saiyang langitnon na balos? Dai. An sigurado niya pinili siya na magpasiring sa langit. Minsan siring, dapat niyang tandaan an sadol na ini: “Mga tugang, urog pa nindong gibuhon an saindong pinakamakakaya tanganing masiyerto nindo an pag-apod asin pagpili sa saindo, huli ta kun padagos nindong ginigibo an mga bagay na ini, dai nanggad kamo masusudya.” (2 Ped. 1:10) Kaya dawa pinili, o inapod, an sarong linahidan na Kristiyano na magpasiring sa langit, makakamtan niya sana an saiyang balos kun magdadanay siyang maimbod.—Fil. 3:12-14; Heb. 3:1; Kap. 2:10.
PAANO NAAARAMAN NIN SARO KUN SIYA LINAHIDAN?
7. Paano naaaraman kan mga linahidan na igwa sinda kan paglaom na mabuhay sa langit?
7 Alagad paano naaaraman nin saro na igwa siya kan langitnon na pag-apod? An simbag malinaw na mahihiling sa sinabi ni Pablo sa mga nasa Roma na mga “inapod tanganing mapabilang sa mga banal.” Sinabi niya sa sainda: “Dai kamo nag-ako nin espiritu nin pagkauripon na nagigin dahilan na bumalik an takot, kundi nag-ako kamo nin espiritu nin pag-ampon bilang mga aki nin Diyos, na paagi sa espiritung iyan kita minakurahaw: ‘Abba, Ama!’ An espiritu mismo nagpapatotoo kaiba an satong espiritu na kita mga aki nin Diyos.” (Roma 1:7; 8:15, 16) Kaya paagi sa saiyang banal na espiritu, linilinaw ni Jehova sa mga linahidan na igwa sinda kan paglaom na ini na mabuhay sa langit.—1 Tes. 2:12.
8. Paano ipinapahiling kan 1 Juan 2:20, 27 na dai kaipuhan kan mga linahidan an kumpirmasyon kan iba sa pagigin linahidan ninda?
8 Sinisigurado ni Jehova sa mga tinawan kan imbitasyon na magpasiring sa langit na dai sinda magkakaigwa nin ano man na pagduda. (Basahon an 1 Juan 2:20, 27.) Siyempre, an linahidan na mga Kristiyano kaipuhan na matukduan ni Jehova paagi sa kongregasyon arog kan gabos na iba pa. Pero dai ninda kaipuhan an siisay man para kumpirmaron na mga linahidan sinda. Ginagamit ni Jehova an pinakamakapangyarihan na puwersa sa uniberso, an saiyang banal na espiritu, tanganing lubos nanggad na magin malinaw sa sainda na linahidan sinda!
SINDA ‘IMINUNDAG GIRARAY’
9. Pag an saro linahidan, anong mga pagbabago an nangyayari sa saiya, arog kan ilinadawan sa Efeso 1:18?
9 Kadaklan sa mga lingkod nin Diyos ngunyan nadidipisilan na masabutan kun ano an nangyayari sa saro pag linahidan siya nin Diyos. Normal ini huling bako man kaya sindang linahidan. Linalang nin Diyos an mga tawo para mabuhay nin daing sagkod digdi sa daga, bako sa langit. (Gen. 1:28; Sal. 37:29) Alagad may mga pinili si Jehova na mabuhay sa langit. Kaya pag linahidan niya sinda, biyo niyang binabago an saindang paglaom asin paagi nin pag-iisip, kaya an hinahalat-halat na ninda iyo an mabuhay sa langit.—Basahon an Efeso 1:18.
10. Ano an kahulugan kan “imundag giraray”? (Hilingon man an nota sa ibaba.)
10 Pag an sarong Kristiyano linahidan kan banal na espiritu, siya ‘iminundag giraray,’ o ‘iminundag gikan sa itaas.’ * Ipinarisa man ni Jesus na imposibleng maipaliwanag nin eksakto sa saro na bakong linahidan kun ano an pagmati kan mga ‘iminundag giraray,’ o “namundag sa espiritu.”—Juan 3:3-8; nota sa ibaba.
11. Ipaliwanag an pagbabago sa kaisipan na nangyayari pag an saro linahidan kan banal na espiritu.
11 Anong pagbabago sa kaisipan an nangyayari pag an mga Kristiyano linahidan kan banal na espiritu? Bago linahidan ni Jehova an mga Kristiyanong ini, pinapahalagahan nindang marhay an paglaom na mabuhay nin daing sagkod digdi sa daga. Hinahalat-halat nindang marhay an panahon na hahalion na ni Jehova an gabos na karatan asin gigibuhon nang paraiso an daga. Tibaad naiimahinar ninda an saindang sadiri na sinasabat an saindang nagadan na kapamilya o amigo. Pero pagkatapos sindang lahidan, nagbago an kaisipan ninda. Paano ini nangyayari? Dai man buot sabihon na dai na sinda kontento sa daganon na paglaom. Dai man nagbago an kaisipan ninda dahil sa depresyon o sa inagihan na grabeng mga problema. Dai man ninda bigla na sanang napag-isip-isip na makalangkag an mabuhay nin daing sagkod digdi sa daga. Imbes, ginamit ni Jehova an saiyang banal na espiritu tanganing baguhon an saindang paagi nin pag-iisip asin an paglaom na pinapahalagahan ninda.
12. Sigun sa 1 Pedro 1:3, 4, ano an namamatian kan linahidan na mga Kristiyano mapadapit sa saindang paglaom?
12 An saro na linahidan puwedeng makamati na bako siyang maninigo sa mahalagang marhay na pribilehiyong ini. Pero dai lamang siya nagdududa na pinili siya ni Jehova. Nakakamati siya nin labi-labing kaugmahan asin pasasalamat pag iniisip niya an saiyang paglaom.—Basahon an 1 Pedro 1:3, 4.
13. Ano an pagmansay kan mga linahidan mapadapit sa buhay ninda digdi sa daga?
13 Kaya an buot sabihon daw kaini gusto nang magadan kan mga linahidan? Sinimbag ni apostol Pablo an hapot na iyan. Ikinumparar niya an saindang hawak sa sarong tolda dangan sinabi: “Sa katunayan, kita na yaon sa toldang ini nag-aagrangay asin nagagabatan nin grabe, huling habo ta man na hubaon nin siring sa bado an toldang ini, pero gusto man niyatong isulot idtong saro pa, na sa siring ining mortal biyong masalidahan nin buhay.” (2 Cor. 5:4) An mga Kristiyanong ini dai man nawawaran nin ganang mabuhay digdi sa daga asin gusto nang magadan tulos. Sa kabaliktaran, ikinakaugma ninda an buhay asin gusto nindang gamiton an kada aldaw para maglingkod ki Jehova kaiba an saindang pamilya asin mga amigo. Pero, ano man an saindang ginigibo, pirmi nindang isinasaisip an saindang mamuraway na paglaom sa maabot na panahon.—1 Cor. 15:53; 2 Ped. 1:4; 1 Juan 3:2, 3; Kap. 20:6.
LINAHIDAN KA DAW NI JEHOVA?
14. Ano an mga dai nagpapatunay na an sarong tawo linahidan kan banal na espiritu?
14 Tibaad iniisip mo kun baga linahidan ka kan banal na espiritu. Kun iyo, pag-isipan an mahalagang mga hapot na ini: Igwa ka daw nin makusugon na pagmawot na gibuhon an kabutan ni Jehova? Namamatian mo daw na maigot kang marhay sa gibuhon na paghuhulit? Ikinakaugma mo daw an pag-adal kan Tataramon nin Diyos asin makanuod dapit sa “harararom na bagay nin Diyos”? (1 Cor. 2:10) Namamatian mo daw na binebendisyunan ka ni Jehova nin marahayon na mga resulta sa gibuhon na paghuhulit? Nakakamati ka daw nin dakulang responsabilidad na tabangan an iba na makanuod dapit ki Jehova? May nahiling ka na daw na mga patunay na tinatabangan ka ni Jehova sa dakul na espesipikong paagi sa saimong buhay? Kun daing pagduwa-duwang iyo an simbag mo sa mga hapot na iyan, nagpapatunay na daw iyan na igwa ka na kan paglaom na mabuhay sa langit? Dai. Taano? Huling puwede man na mamatian kan gabos na lingkod nin Diyos an arog kaiyan, sinda man mga linahidan o bako. Asin paagi kan saiyang banal na espiritu, puwede man na tabangan ni Jehova an siisay man sa mga lingkod niya na magibo an mga bagay na iyan, ano man an saindang paglaom. Sa katunayan, kun pinag-iisipan mo kun baga linahidan ka kan banal na espiritu, an pagdudang iyan nangangahulugan mismo na bako kang linahidan. An mga inapod nin Diyos dai nagduduwa-duwa kun baga linahidan sinda o bako! Siguradong-sigurado sinda!
Ginamit ni Jehova an saiyang banal na espiritu tanganing tabangan si Abraham, Sara, David, asin Juan Bautista na makagibo nin makangangalas na mga bagay, pero dai niya ginamit an espiritung iyan tanganing tawan sinda kan paglaom na mabuhay sa langit (Hilingon an parapo 15-16) *
15. Paano niyato naaraman na bakong gabos na nag-ako kan espiritu nin Diyos pinili para magpasiring sa langit?
15 Sa bilog na Bibliya, dakul na halimbawa nin mga lalaking may makusog na pagtubod na nag-ako kan banal na espiritu; alagad mayo sinda kan paglaom na mabuhay sa langit. Halimbawa, si David giniyahan kan banal na espiritu. (1 Sam. 16:13) Tinabangan siya kan banal na espiritu na masabutan an harararom na bagay mapadapit ki Jehova asin giniyahan man siya kaiyan na isurat an pirang porsiyon kan Bibliya. (Mar. 12:36) Minsan siring, sinabi ni apostol Pedro na si David “dai . . . nagsakat sa langit.” (Gibo 2:34) Si Juan Bautista ‘napano nin banal na espiritu.’ (Luc. 1:13-16) Sinabi ni Jesus na dai pa nin siisay man na nakakalabi ki Juan, pero sinabi niya na si Juan dai magigin kabilang sa mga mamamahala sa langitnon na Kahadian. (Mat. 11:10, 11) Ginamit ni Jehova an saiyang banal na espiritu tanganing tabangan an mga lalaking idto na makagibo nin makangangalas na mga bagay, pero dai niya ginamit an espiritung iyan tanganing pilion sinda para mabuhay sa langit. An buot sabihon daw kaini bako sindang arog kaimbod kan mga pinili na mamahala sa langit? Dai. An buot sabihon sana kaiyan bubuhayon sinda liwat ni Jehova sa Paraiso digdi sa daga.—Juan 5:28, 29; Gibo 24:15.
16. Anong balos an hinahalat-halat kan kadaklan sa mga lingkod nin Diyos ngunyan?
16 An mayoriya kan mga lingkod nin Diyos sa daga ngunyan mayo kan paglaom na mabuhay sa langit. Arog ni Abraham, Sara, David, Juan Bautista, asin kan dakul na iba pang lalaki asin babayi kan mga panahon kan Bibliya, hinahalat-halat nindang mabuhay digdi sa daga pag mamahala na sa sainda an Kahadian nin Diyos.—Heb. 11:10.
17. Anong mga hapot an pag-uulayan niyato sa sunod na artikulo?
17 Huling may mga linahidan na kaibanan pa kan mga lingkod nin Diyos ngunyan, tibaad may mga hapot kita. (Kap. 12:17) Halimbawa, paano dapat mansayon kan mga linahidan an saindang sadiri? Kun may kakongregasyon kang nagpuon na magkakan asin mag-inom kan mga emblema sa Memoryal, paano mo siya dapat trataron? Asin paano kun padagos an paglangkaw kan bilang kan mga nagsasabing linahidan sinda? Dapat mo daw na ipaghadit iyan? Sisimbagon niyato an mga hapot na iyan sa sunod na artikulo.
^ par. 5 Puon pa kan Pentecostes 33 C.E., tinatawan ni Jehova an nagkapirang Kristiyano nin sarong makangangalas na paglaom—an paglaom na mamahala kaiba kan saiyang Aki sa langit. Pero paano naaaraman kan mga Kristiyanong ini na pinili sinda para sa marahayon na pribilehiyong ini? Ano an nangyayari sa saro pag tinawan siya kan imbitasyon na ini? An artikulong ini basado sa artikulo na yaon sa Enero 2016 na Torrengbantayan. Sisimbagon digdi an interesanteng mga hapot na iyan.
^ par. 2 PALIWANAG DAPIT SA TATARAMON: Linahidan kan banal na espiritu: Ginagamit ni Jehova an saiyang banal na espiritu tanganing pilion an sarong tawo na mamamahala kaiba ni Jesus sa langit. Paagi kan saiyang espiritu, tinatawan nin Diyos an tawong iyan nin panuga para sa maabot, o nin sarong “garantiya.” (Efe. 1:13, 14) An mga Kristiyanong ini makakapagsabi na an banal na espiritu “nagpapatotoo,” o naglilinaw sa sainda na an saindang balos yaon sa langit.—Roma 8:16.
^ par. 5 PALIWANAG DAPIT SA TATARAMON: Tatak. An tatak na ini magigin permanente sana bago magadan an sarong nagdanay na maimbod na linahidan o bago magpuon an panahon kan grabeng kasakitan.—Efe. 4:30; Kap. 7:2-4; hilingon an “Hapot Hali sa mga Parabasa” sa Abril 2016 na Torrengbantayan.
^ par. 10 Para sa dagdag na paliwanag sa kahulugan kan “imundag giraray,” hilingon an Torrengbantayan na Abril 1, 2009, p. 3-12.
KANTA 27 An Paghayag sa mga Aki nin Diyos
^ par. 57 DESKRIPSIYON KAN RITRATO: Kita man nakapreso dahil sa satong pagtubod o libreng maghulit asin magtukdo sa iba dapit sa katotoohan, puwede niyatong isip-isipon pirmi an paglaom na mabuhay digdi sa daga pag mamahala na sa sato an Kahadian nin Diyos.
