1-2. Ano an sinabi nin sarong anghel sa mga babayi sa lulubngan ni Jesus, asin ano an ipinagibo ni Jesus sa sainda?

AMAY na aga kaidto kan Nisan 16, 33 C.E. May sarong grupo nin may takot sa Diyos na mga babayi na grabe an kamunduan mantang naglalakaw pasiring sa lulubngan na diyan ilinaag an bangkay kan Kagurangnan na Jesu-Cristo labing 36 na oras na an nakaagi. Kan makaabot na sinda sa lulubngan para laagan nin mahamot na mga sangkap asin mga pahamot na lana an bangkay, nagngalas sinda ta mayo nang laog an lulubngan! May anghel na nagsabi sa mga disipulong ini na si Jesus nagbangon na hali sa mga gadan, asin sinabi pa: “Nag-inot na siya pasiring sa Galilea. Mahihiling nindo siya duman.”—Mat. 28:1-7; Luc. 23:56; 24:10.

² Kan an mga babayi maghali na sa lulubngan, si Jesus mismo nagdulok sa sainda asin may ipinagibo sa sainda: “Sige, baretaan nindo an mga tugang ko tanganing magpasiring sinda sa Galilea, asin mahihiling ninda ako duman.” (Mat. 28:10) Siguradong may mahalagang marhay na mga instruksiyon na itatao si Jesus sa saiyang mga disipulo, huling an pagtiripon na iyan an inot niyang iinareglo pagkabuhay liwat sa saiya!

3-4. Taano ta masasabi niyato na an pagbuot na nasa Mateo 28:19, 20 bako lang para sa mga apostol? (Hilingon an ritrato sa cover.)

³ Basahon an Mateo 28:16-20. Sa pagtiripon na inorganisar ni Jesus, sinabi niya an manungod sa mahalagang marhay na gibuhon na isasagibo kan saiyang mga disipulo sa bilog na inot na siglo—an iyo man sanang gibuhon na isinasagibo ta ngunyan. Sinabi ni Jesus: “Kun siring, padumán kamo asin gumibo kamo nin mga disipulo sa mga tawo kan gabos na nasyon, . . . na tinutukduan sinda na utubon an gabos na bagay na ipinagbuot ko sa saindo.”

 ⁴ Gusto ni Jesus na maghulit an gabos niyang parasunod. Itinao niya an pagbuot na ini bako sana sa 11 maimbod na apostol. Taano ta sigurado kitang marhay diyan? Buweno, an mga apostol sana daw an yaon kaidto sa bukid na iyan sa Galilea kan itao an pagbuot na gumibo nin mga disipulo? Girumdumon na sinabi kan anghel sa mga babayi: “Mahihiling nindo siya [sa Galilea].” Kaya an maimbod na mga babayi siguradong yaon man kaidto sa pagtiripon na iyan. Saka bako sana sinda an yaon. Sinabi ni apostol Pablo na “nagpahiling [si Jesus] sa labing 500 na tugang sa sarong pagkakataon.” (1 Cor. 15:6) Sain?

5. Ano an naaraman ta base sa 1 Corinto 15:6?

⁵ May marahay na mga dahilan kita na isipon na an nasa isip ni Pablo iyo mismo an pagtiripon sa Galilea na isinaysay sa kapitulo 28 kan Mateo. Ano an mga dahilan na iyan? Inot, an kadaklan sa mga disipulo ni Jesus mga taga Galilea. Kaya sarong bukid sa Galilea—imbes na sarong harong sa Jerusalem—an praktikal na magin lugar na pagtitiripunan nin dakul na tawo. Ikaduwa, an binuhay liwat na si Jesus nakipagtipon na sa saiyang 11 apostol sa sarong harong sa Jerusalem. Kun an mga apostol sana an gusto ni Jesus na instruksiyunan na maghulit asin gumibo nin mga disipulo, ginibo na niya kuta iyan sa Jerusalem imbes na sabihan pa sinda asin an mga babayi saka an iba na makipagtipon sa saiya sa Galilea.—Luc. 24:33, 36.

6. Paano ipinapahiling kan Mateo 28:20 na an pagbuot na gumibo nin mga disipulo aplikado ngunyan, asin paano iyan sinusunod kan mga tawo ngunyan?

⁶ Risahon an ikatulong importanteng dahilan. An pagbuot ni Jesus na gumibo nin mga disipulo bako lang para sa mga Kristiyano kan inot na siglo. Paano niyato naaraman iyan? Tinapos ni Jesus an pagtao niya nin instruksiyon sa saiyang mga parasunod paagi sa pagsabing: “Kaibanan nindo ako sa gabos na aldaw sagkod sa pagtatapos kan sistema nin mga bagay.” (Mat. 28:20) Arog mismo kan sinabi ni Jesus, dakul an naggigibo ngunyan nin mga disipulo. Isipa na sana! Haros 300,000 kada taon an nagpapabawtismo bilang Saksi ni Jehova asin nagigin mga disipulo ni Jesu-Cristo!

7. Ano an pag-uulayan niyato ngunyan, asin taano?

⁷ Dakul na tinutukduan sa Bibliya an nag-uuswag asin nagpapabawtismo pag-abot nin panahon. Minsan siring, may mga regular na tinutukduan sa Bibliya na garo nag-aalangan na magin mga disipulo. Gustong-gusto nindang tinutukduan sinda nin Bibliya, pero dai sinda nag-uuswag para mabawtismuhan. Kun nagkokondukta ka nin pag-adal sa Bibliya, siguradong gusto mong tabangan an saimong tinutukduan na isabuhay an mga nanunudan niya asin na magin disipulo ni Cristo. Pag-uulayan sa artikulong ini kun paano ta maaabot an puso kan tinutukduan asin kun paano ta siya matatabangan na umuswag sa espirituwal. Taano ta kaipuhan niyatong pag-ulayan ini? Huling maabot an punto na tibaad kaipuhanon tang magdesisyon kun baga ipapadagos niyato an pag-adal sa sarong tinutukduan o dai na.

8. Taano ta puwedeng magin dipisil na abuton an puso kan mga tinutukduan?

⁸ Gusto ni Jehova na pagkamuot an dahilan kan paglilingkod kan mga tawo sa saiya. Kaya an pasuhan ta iyo na tabangan an satong mga tinutukduan na masabutan na si Jehova nagmamakulog na marhay sa sainda bilang indibidwal asin na namumutan niya sindang marhay. Gusto niyatong tabangan sinda na ibilang si Jehova na “ama nin mga mayo nang ama asin paraprotektar nin mga babaying balo na.” (Sal. 68:5, NW) Mantang luway-luway na nasasabutan kan mga tinutukduan mo kun gurano kadakula kan pagkamuot nin Diyos sa sainda, posibleng marhay na makapahiro iyan sa puso ninda na mamutan man siya. May mga tinutukduan sa Bibliya na nadidipisilan na ibilang si Jehova na sarong mamumuton na Ama huling an sadiri mismo nindang ama dai sinda pinahilingan nin pagkamuot. (2 Tim. 3:1, 3) Kaya mantang nagkokondukta ka nin pag-adal, iduon an magagayon na kuwalidad ni Jehova. Tabangan an saimong mga tinutukduan na masabutan na gusto  kan satong mamumuton na Diyos na magkaigwa sinda nin buhay na daing katapusan, asin na andam siyang tabangan sinda na makamtan iyan. Ano pa an puwede niyatong gibuhon?

9-10. Anong mga publikasyon an dapat na gamiton ta pag nagkokondukta nin mga pag-adal sa Bibliya, asin taano?

⁹ Gamiton an mga librong “Ano an Itinutukdo Sato kan Bibliya?” asin “Kun Paano Magdadanay sa Pagkamuot nin Diyos.” An mga publikasyon na iyan dinisenyo partikular na para tabangan kitang maabot an puso kan satong mga tinutukduan. Halimbawa, sinisimbag kan kapitulo 1 kan librong Itinutukdo Sato an mga hapot na: May pagmakulog daw sa sato an Diyos?, Ano an namamatian nin Diyos pag nagsasakit kita?, asin Puwede ka daw magin amigo ni Jehova? Kumusta an librong Magdanay sa Pagkamuot? An publikasyon na iyan makakatabang sa tinutukduan na masabutan kun paano an pagsabuhay kan mga prinsipyo sa Bibliya puwedeng makatao saiya nin mas marahay na buhay asin mas haraning relasyon ki Jehova. Dawa kun ginamit mo na an mga publikasyon na ini sa ibang mga tinutukduan, pag-andaman na marhay an lambang pag-adal asin isaisip an espesipikong mga pangangaipo kan tinutukduan.

¹⁰ Pero paano kun an tinutukduan interesado sa temang tinutukar sa sarong publikasyon na dai  kaiba sa satong Toolbox sa Pagtutukdo? Puwede mo siyang dagkahon na personal na sanang basahon an publikasyon na iyan tanganing makapadagos kamo sa pag-adal sa saro sa mga irinerekomendar na pantabang sa pag-adal sa Bibliya na binanggit ta pa sana.

11. Nuarin ta dapat punan na buksan asin tapuson paagi sa pamibi an pag-adal, asin paano ta iyan puwedeng gibuhon?

¹¹ Punan an pag-adal paagi sa pamibi. Sa pangkagabsan, pinakamarahay na punan na buksan asin tapuson paagi sa pamibi an pag-adal sa lalong madaling panahon, na sa parati sa inot na pirang semana pagkatapos na makapuon nin regular na pag-adal. Dapat tang tabangan an tinutukduan na marealisar niya na masasabutan niyato an Tataramon nin Diyos paagi sana sa tabang kan espiritu nin Diyos. May mga nagkokondukta nin pag-adal sa Bibliya na iniintrodusir an manungod sa pagpamibi paagi sa pagbasa kan Santiago 1:5, na diyan sinasabi: “Kun an siisay man sa saindo kulang sa kadunungan, padagos siyang maghagad sa Diyos.” Dangan hinahapot niya an saiyang tinutukduan, “Paano kita makakahagad nin kadunungan sa Diyos?” Sa parati, minauyon an tinutukduan na dapat kitang mamibi sa Diyos.

12. Paano mo gagamiton an Salmo 139:2-4 para tabangan an sarong tinutukduan na dai mag-alangan na makipag-ulay ki Jehova sa pamibi?

¹² Tukduan an saimong Bible study kun paano mamibi. Sabihon sa saiya na gusto ni Jehova na madangog an saiyang udok sa pusong mga pamibi. Ipaliwanag na sa satong personal na mga pamibi, puwede talaga niyatong sabihon ki Jehova an gabos na nasa puso ta—mga bagay na tibaad alangan kitang sabihon sa siisay man na tawo. Girumdumon na dawa dai ta sabihon, aram na ni Jehova an satong kauruiraruming mga kaisipan. (Basahon an Salmo 139:2-4.) Puwede man niyatong dagkahon an satong tinutukduan na hagadon an tabang nin Diyos tanganing mabago an salang mga kaisipan asin maipundo an maraot na mga kinatudan. Halimbawa, ipamugtak na gustong-gusto nin sarong medyo haloy nang Bible study an sarong selebrasyon na may paganong pinaghalian. Aram niyang sala iyan, pero an totoo gustong-gusto niya an pirang aspekto kaiyan. Dagkahon siya na sabihon ki Jehova kun ano talaga an namamatian niya asin na makimahirak na tabangan siyang mamutan an mga bagay sanang namumutan nin Diyos.—Sal. 97:10.

13. (a) Taano ta dapat niyatong imbitaran an satong mga tinutukduan sa Bibliya na umatender sa satong mga pagtiripon sa lalong madaling panahon? (b) Paano niyato matatabangan an satong tinutukduan na magin mas pamugtak pag mag-atender na siya sa Kingdom Hall?

¹³ Imbitaran an saimong tinutukduan sa Bibliya na mag-atender sa mga pagtiripon sa lalong madaling panahon. An mga nadadangog asin naoobserbaran kan saimong tinutukduan pag nasa Kristiyanong mga pagtiripon puwedeng makapahiro sa saiya na maglingkod ki Jehova asin makatabang na umuswag. Ipahiling an video na Paano Ginigibo an Pagtiripon sa Kingdom Hall? asin maugma siyang imbitaran na umiba sa saimo. Mag-alok nin masasakayan o sunduon kun posible. Marahay na ideya na agdahon an iba-ibang parahayag tanganing ibanan ka sa pag-Bible study. Paagi kaiyan, magigin pamilyar siya sa mga tugang sa kongregasyon, asin posibleng marhay na magigin mas pamugtak siya pag mag-atender na siya sa satong mga pagtiripon.

14. Ano an puwedeng magpahiro sa sarong tinutukduan na umuswag sa espirituwal?

¹⁴ An pasuhan niyato iyo na tabangan an satong tinutukduan sa Bibliya na umuswag sa espirituwal. (Efe. 4:13) Minauyon na magpatukdo sa Bibliya an sarong indibidwal posibleng panginot na dahil interesado siya sa magigin pakinabang niya mismo diyan. Pero mantang lalo niyang namumutan si Jehova, posibleng marhay na pag-isipan na man niya kun paano siya makakatabang sa iba, kaiba na sa mga miyembro kan kongregasyon. (Mat. 22:37-39) Sa angay na pagkakataon, dai mag-alangan na sambiton sa saiya an  manungod sa pribilehiyo na suportaran an gibuhon na pang-Kahadian sa pinansiyal na paagi.

15. Paano niyato matatabangan an sarong Bible study na gibuhon an tama pag nagkaigwa nin problema?

¹⁵ Tukduan an saimong Bible study kun ano an gigibuhon niya pag nagkaigwa nin problema. Halimbawa ngayang an saimong tinutukduan, na dai pa bawtisadong parahayag, nagsabi saimo na may tugang sa kongregasyon na nakakulog kan buot niya. Imbes na may kampihan, ano daw kun ipaliwanag mo sa saiya kun ano an sinasabi kan Kasuratan na dapat niyang gibuhon? Puwede niyang patawadon an tugang o, kun dai niya iyan kayang palampason, puwede niyang kaulayon an tugang sa mabuot asin mamumuton na paagi na an katuyuhan iyo na ‘mabawi an saiyang tugang.’ (Ikumparar an Mateo 18:15.) Tabangan an saimong tinutukduan na andamon an sasabihon niya. Ipahiling saiya kun paano gamiton an JW Library^® app, an Giya sa Pag-research Para sa Mga Saksi ni Jehova, asin an jw.org^® para maaraman an praktikal na mga paagi kun paano aatubangon an sitwasyon. Pag mas dakul na pagsasanay an inaako niya bago mabawtismuhan, mas pasil man sa saiya na makasundo an mga tugang sa kongregasyon pag nabawtismuhan na siya.

16. Ano an nahihiling mong mga pakinabang kan pag-agda sa ibang parahayag na ibanan ka sa pag-Bible study?

¹⁶ Agdahon an ibang tugang sa kongregasyon—pati na an paraataman nin sirkito kun dalaw niya sa saindong kongregasyon—na ibanan ka sa pag-Bible study. Taano? Apuwera sa mga dahilan na binanggit na, an ibang parahayag tibaad iyo an mas nasa kamugtakan na magtabang sa saimong tinutukduan. Ipamugtak na hinihinguwa kan tinutukduan mo na magpundo na sa pagsigarilyo pero dai niya talaga iyan biyong maipundo. Agdahon an sarong kapwa Saksi na nasakitan man kaidto na ipundo an bisyong iyan na ibanan ka sa pag-Bible study. An tugang na iyan puwedeng makatao nin kapaki-pakinabang na sadol na kaipuhan na madangog kan saimong tinutukduan. Kun dai ka komportableng magkondukta nin pag-adal kaiba an sarong eksperyensiyadong tugang, pakiulayan siya na siya an magkondukta sa pagkakataon na iyan. Pag iniimbitaran mo an iba na ibanan ka sa pag-Bible study, an saimong tinutukduan puwedeng makinabang sa eksperyensiya ninda. Tandaan, an pasuhan niyato iyo na tabangan an satong tinutukduan na umuswag sa espirituwal.

17-18. Ano an dapat mong ikonsiderar pag nagdedesisyon kun baga dapat mo nang ipundo an pag-Bible study sa sarong tinutukduan?

¹⁷ Kun bakong dagos-dagos an pag-uswag kan saimong tinutukduan sa Bibliya, maabot an punto na kaipuhan mong ihapot sa saimong sadiri, ‘Dapat ko na daw ipundo an pag-Bible study saiya?’ Mantang inaanalisar mo an sitwasyon, dapat mong ikonsiderar an kakayahan kan saimong tinutukduan. An iba nangangaipo nin mas dakul na panahon para umuswag. Haputon an sadiri: ‘Rasonable daw an rikas kan pag-uswag kan tinutukduan ko sigun sa kakayahan niya?’ ‘Pinupunan na daw niyang “utubon,” o isabuhay, an mga nanunudan niya?’ (Mat. 28:20) Puwedeng luway-luway an pag-uswag kan tinutukduan, pero dapat na dagos-dagos iyan.

 ¹⁸ Pero, paano kun an saro na medyo haloy nang tinutukduan daing gayo o dai nagpapahiling na mahalaga saiya an pag-Bible study? Pag-isipan an senaryong ini: Natapos na nindo kan tinutukduan mo an librong Itinutukdo Sato asin tibaad nakapuon na ngani kamo sa librong Magdanay sa Pagkamuot, pero dai pa lamang siya nag-atender sa ano man na pagtiripon kan kongregasyon—maski sa Memoryal! Asin parati niyang kinakanselar an pag-Bible study huli sa bako man gayong mahalagang mga dahilan. Kun arog kaiyan an sitwasyon, marahay na prangka mong kaulayon an Bible study mo. *

19. Ano an puwede mong sabihon sa saro na garo dai pinapahalagahan an saiyang pag-adal sa Bibliya, asin paano makakatabang sa saimo an saindang simbag?

¹⁹ Puwede kang magpuon paagi sa paghapot saiya, ‘Ano sa hiling mo an magigin pinakadakulang ulang saimo na magin Saksi ni Jehova?’ Tibaad isimbag kan saimong tinutukduan, ‘Ayos lang sako na mag-adal nin Bibliya, pero dai ako ma-Saksi!’ Kun arog kaiyan an sabuot niya pagkatapos nin huruhalawig nang pag-adal, may dahilan pa daw na ipadagos mo an pagtukdo sa saiya? Sa ibong na lado, tibaad sabihon saimo sa primerong pagkakataon kan saimong tinutukduan an dahilan na nakakaulang saiya. Halimbawa, tibaad pagmati niya dai niya talaga kayang magharong-harong. Ngunyan na aram mo na an namamatian niya, magigin mas nasa posisyon ka nang tabangan siya.

20. Paano makakatabang sa sato an Gibo 13:48 tanganing madeterminaran kun baga ipapadagos ta o dai na an pagtukdo sa sarong Bible study?

²⁰ Nakakamundo, may mga tinutukduan na arog kan mga Israelita kaidto kan panahon ni Ezequiel. Manungod sa sainda, sinabi ni Jehova ki Ezequiel: ‘Uya! Ika garo sa sainda awit nin mga pagkamuot, maugma an tingog asin ta marahay na mag-awit. Maghihinanyog sinda kan saimong mga tataramon, alagad dai ninda iyan gigibuhon.’ (Ezeq. 33:32) Tibaad masakitan kitang sabihon sa sarong Bible study na ipupundo ta na an pakikipag-adal sa saiya. Dawa siring, “dikit na lang an panahon na natatada.” (1 Cor. 7:29) Imbes na magtao nin dakul na panahon sa sarong tinutukduan na dai nag-uuswag, kaipuhan niyatong maghanap nin saro na nagpapahiling na siya “igwang pusong nasa tamang kamugtakan para sa buhay na daing katapusan.”—Basahon an Gibo 13:48.

21. Ano an satong teksto para sa taon 2020, asin taano ta angay iyan?

²¹ Sa bilog na taon nin 2020, makakatabang sa sato an teksto kan taon para makapokus kita sa pagpauswag kan satong kakayahan sa paggibo nin mga disipulo. Itinatampok kaiyan an sinabi ni Jesus sa mahalagang marhay na pagtiripon kaidto sa sarong bukid sa Galilea: “Padumán kamo asin gumibo kamo nin mga disipulo . . . , na binabawtismuhan sinda.”—Mat. 28:19.