1. Ano an nagin epekto sa sarong hoben na lalaki kan sarong pahayag sa sarong kumbensiyon kan 1935?

DISIOTSO anyos an hoben na lalaki kan mabawtismuhan siya kan 1926. An mga magurang niya mga Estudyante sa Bibliya, an apod sa mga Saksi ni Jehova kan panahon na idto. Igwa sinda nin tulong aking lalaki asin duwang aking babayi na tinukduan ninda na maglingkod sa Diyos na Jehova asin arugon si Jesu-Cristo. Arog kan ginigibo kan gabos na Estudyante sa Bibliya kaidto, an sinserong hoben na lalaking ini nagkakakan kan tinapay asin nag-iinom kan arak kada taon sa Pamanggihan kan Kagurangnan. Alagad, nagbago an paglaom niya sa puturo huli sa sarong makasaysayan na pahayag na may temang “An Dakulang Kaburunyugan.” Ipinahayag iyan kan 1935 ni J. F. Rutherford sa sarong kumbensiyon sa Washington, D.C., U.S.A. Ano an naaraman kan mga Estudyante sa Bibliya sa kumbensiyon na iyan?

2. Anong nakakaugmang katotoohan an ipinaliwanag ni Brother Rutherford sa saiyang pahayag?

² Sa saiyang pahayag, ipinaliwanag ni Brother Rutherford kun siisay an kaiba sa “dakulang kaburunyugan” (King James Version), o sa “dakulang kadaklan,” na sinambit sa Kapahayagan 7:9. Bago kan pahayag na iyan, iniisip kan mga Estudyante sa Bibliya na an dakulang kadaklan sarong sekondaryong langitnon na grupo na bakong arog kaimbod kan mga linahidan. Ginamit ni Brother Rutherford an Kasuratan para ipaliwanag na an dakulang kadaklan dai pinili na mag-istar sa langit. Imbes, sinda kaiba sa  ibang mga karnero * ni Cristo na makakaligtas sa grabeng kasakitan asin mabubuhay nin daing sagkod sa daga. (Kap. 7:14) Nanuga si Jesus: “Igwa pa ako nin ibang mga karnero, na bakong sa turil na ini; an mga iyan man dapat kong giyahan, asin magdadangog sinda sa sakuyang boses, asin magkakaigwa nin sarong aripumpon saka sarong pastor.” (Juan 10:16) An ibang mga karnerong ini iyo an maimbod na mga Saksi ni Jehova na may paglaom na mabuhay nin daing sagkod sa Paraiso digdi sa daga. (Mat. 25:31-33, 46) Hilingon ta kun paano nabago kan bagong pakasabot na ini sa katotoohan sa Bibliya an buhay kan dakul sa mga lingkod ni Jehova, kaiba na an 18 anyos na brother na sinambit kasubago.—Sal. 97:11; Tal. 4:18.

3-4. Sa kumbensiyon kan 1935, ano an nasabutan kan rinibo manungod sa saindang paglaom, asin taano?

³ Sa kumbensiyon na idto, nakakaugma talaga kan haputon na kan ispiker an mga nagdadangog: “Puwede tabing tumindog an gabos na may paglaom na mabuhay sagkod lamang sa daga?” Sigun sa sarong nag-atender, labing kabanga kan mga 20,000 na yaon duman an nagtirindog. Dangan sinabi ni Brother Rutherford: “Uya! An dakulang kaburunyugan!” Sinundan iyan nin makusugon na paralakpakan. Narealisar kan mga nagtirindog na dai sinda pinili para mabuhay sa langit. Malinaw nindang nasabutan na dai sinda linahidan kan espiritu nin Diyos. Kan sunod na aldaw kan kumbensiyon, 840 bagong Saksi an nabawtismuhan, na an kadaklan kabilang sa ibang mga karnero.

⁴ Pagkatapos kan pahayag na iyan, an hoben na lalaking sinambit kasubago asin an rinibong iba pa dai na nagkakan kan tinapay asin nag-inom kan arak sa Pamanggihan kan Kagurangnan. Dakul an nakamati kan arog kan namatian nin sarong mapakumbabang brother na nagsabi: “An Memoryal kan 1935 an pinakahuring beses na nagkakan asin nag-inom ako kan mga emblema. Narealisar ko na dai sako pinukaw ni Jehova paagi kan saiyang banal na espiritu an paglaom na mabuhay sa langit; imbes, igwa ako kan paglaom na mabuhay sa daga asin magtabang na magin paraiso ini.” (Roma 8:16, 17; 2 Cor. 1:21, 22) Puon kaidto, padagos na nagdadakul an mga kabilang sa dakulang kadaklan asin nakikipagtabangan sinda sa linahidan na mga natatada. *

5. Ano an pagmansay ni Jehova sa mga dai na nagkakakan asin nag-iinom kan mga emblema sa Memoryal?

⁵ Ano an pagmansay ni Jehova sa mga dai na nagkakan asin nag-inom kan mga emblema sa Memoryal pagkatapos kan 1935? Paano man kun an sarong bawtisadong Saksi ngunyan naniniwala na linahidan siya kaya nagkakakan siya kan tinapay asin nag-iinom kan arak sa Pamanggihan kan Kagurangnan pero pag-abot nin panahon narealisar niyang bako man palan talaga siyang linahidan? (1 Cor. 11:28) May mga nagkakan asin nag-inom kan emblema huling sala an pakasabot ninda sa saindang paglaom. Pero kun onesto nindang admitiron an saindang sala, dai na makakan saka mainom kan emblema, asin padagos na maimbod na maglilingkod ki Jehova, siguradong ibibilang niya sinda na kaiba sa ibang mga karnero. Dawa ngani dai sinda nagkakakan kan tinapay asin nag-iinom kan arak, nag-aatender pa man giraray sinda sa Memoryal huling pinapahalagahan nindang marhay an ginibo ni Jehova asin ni Jesus para sa sainda.

6. Ano an ipinagbuot ni Jesus sa mga anghel?

⁶ Huling haranihon na an grabeng kasakitan, mapapakusog kita kun pag-uulayan ta kun ano pa an sinasabi kan Kapahayagan kapitulo 7 manungod sa linahidan na mga Kristiyano asin sa dakulang kadaklan nin ibang mga karnero. Ipinagbuot ni Jesus sa mga anghel na padagos na pugulan an apat na duros nin kalaglagan. Dai ninda dapat butasan an mga duros na iyan sa daga sagkod na dai pa natatatakan an gabos na linahidan na Kristiyano, an buot sabihon, sagkod na dai pa sinda idinedeklarar na maimbod ni Jehova. (Kap. 7:1-4) Bilang balos sa saindang kaimbudan, an linahidan na mga tugang ni Cristo magigin mga hadi asin saserdote kaiba niya sa langit. (Kap. 20:6) Mauugmang marhay an gabos na minakompuwesto sa langitnon na kabtang kan pamilya nin Diyos pag mahiling na nindang inaako kan 144,000 na linahidan an saindang langitnon na balos.

7. Sigun sa Kapahayagan 7:9, 10, sairisay an nahiling ni Juan sa bisyon, asin ano an ginigibo ninda? (Hilingon an ritrato sa cover.)

⁷ Pagkatapos sambiton an manungod sa 144,000 na mga hadi asin saserdoteng ini, may nakakaugmang nahiling si Juan, an “sarong dakulang kadaklan” na nakaligtas sa Armagedon. Bakong arog kan inot na grupo, mas dakula nanggad asin mayo nin eksaktong bilang an ikaduwang grupong ini. (Basahon an Kapahayagan 7:9, 10.) Nakasulot sinda nin “haralabang badong puti,” na nagpapahiling na pinagdanay nindang “daing digta” an saindang sadiri sa kinaban ni Satanas asin nagdanay na maimbod sa Diyos asin ki Cristo. (Sant. 1:27) Nagkukurahaw sinda na sinda nailigtas huli sa ginibo ni Jehova asin ni Jesus, an Kordero nin Diyos. May kapot man sindang mga sanga nin palma na nagpapahiling na maugma nindang minimidbid si Jesus bilang an Hadi na ninombrahan ni Jehova.—Ikumparar an Juan 12:12, 13.

8. Ano an sinasabi sa sato kan Kapahayagan 7:11, 12 manungod sa langitnon na pamilya ni Jehova?

⁸ Basahon an Kapahayagan 7:11, 12. Ano an reaksiyon diyan kan mga nasa langit? Nahiling ni Juan na an gabos na miyembro kan langitnon na pamilya ni Jehova naugmang marhay asin nag-umaw sa Diyos kan mahiling ninda an mga kabilang sa dakulang kadaklan. An langitnon na pamilya ni Jehova mauugmang marhay pag mautob na an bisyon na ini asin mahiling na nindang nakabalyong buhay hali sa grabeng kasakitan an dakulang kadaklan.

9. Sigun sa Kapahayagan 7:13-15, ano an ginigibo ngunyan kan mga kabilang sa dakulang kadaklan?

⁹ Basahon an Kapahayagan 7:13-15. Isinurat ni Juan na “linabahan [kan dakulang kadaklan] an saindang haralabang bado saka pinaputi an mga iyan sa dugo kan Kordero.” Nangangahulugan iyan na igwa sinda nin malinig na konsiyensiya asin matanos sinda sa paghiling ni Jehova. (Isa. 1:18) Sinda dusay, bawtisadong mga Kristiyano na igwa nin makusog na pagtubod sa atang ni Jesus asin may dayupot na relasyon ki Jehova. (Juan 3:36; 1 Ped. 3:21) Kaya, kuwalipikado sinda na magtindog sa atubangan kan trono nin Diyos tanganing magtao saiya nin “sagradong paglilingkod aldaw asin banggi” sa daganon na patyo kan saiyang espirituwal na templo. Maigot nindang isinasagibo an dakulang kabtang kan gibuhon na paghuhulit kan Kahadian asin paggibo nin disipulo, na iniinot sa saindang buhay an intereses kan Kahadian nin Diyos.—Mat. 6:33; 24:14; 28:19, 20.

10. Sa ano makakasigurado an dakulang kadaklan, asin anong panuga an mahihiling nindang mangyayari?

¹⁰ An dakulang kadaklan na makakabalyo hali sa grabeng kasakitan makakasigurado na padagos sindang aatamanon nin Diyos, huling “bibikladon kan Saro na nakatukaw sa trono an saiyang tolda tanganing lindungan sinda.” Mangyayari na an panuga na haloy nang hinahalat-halat kan ibang mga karnero: “Papahidon [nin Diyos] an gabos na luha sa saindang mga  mata, asin an kagadanan mawawara na. Dai na man magkakaigwa nin pagmundo, o nin pagtangis, o nin kulog.”—Kap. 21:3, 4.

11-12. (a) Arog kan sinasabi sa Kapahayagan 7:16, 17, anong mga bendisyon an makakamtan kan dakulang kadaklan? (b) Ano an puwedeng gibuhon kan ibang mga karnero pag nasa Memoryal, asin taano?

¹¹ Basahon an Kapahayagan 7:16, 17. Ngunyan, may mga lingkod si Jehova na nagugutom huli sa grabeng pagtios o huli sa kariribukan sa sosyedad asin giyera. An iba man iprineso huli sa saindang pagtubod. Alagad, an mga kabilang sa dakulang kadaklan nauugmang marhay na maaraman na pag nakaligtas sinda sa kalaglagan kan maraot na sistemang ini nin mga bagay, pirmi na sindang magkakaigwa nin abundang pisikal asin espirituwal na kakanon. Pag linaglag na an sistema nin mga bagay ni Satanas, an dakulang kadaklan dai mapapaso kan “init” kan kaanggutan ni Jehova na ibububo niya sa mga nasyon. Pagkatapos kan grabeng kasakitan, gigiyahan ni Jesus an mga nakaligtas na ini pasiring sa mga “tubig nin buhay” na daing katapusan. Isipa na sana: An dakulang kadaklan igwa nin pambihirang paglaom. Sa gabos na bilyon-bilyon na nabuhay kasuarin man, puwede sindang dai na nuarin man magadan!—Juan 11:26.

¹² An ibang mga karnero may marahayon na paglaom na ipinagpapasalamat nanggad ninda ki Jehova asin ki Jesus! Dawa dai sinda pinili na mabuhay sa langit, namumutan sinda ni Jehova arog kan pagkamuot niya sa mga linahidan. An mga miyembro kan duwang grupo parehong puwedeng umawon an Diyos asin si Cristo. An sarong paagi na ginigibo ninda iyan iyo an pag-atender sa Pamanggihan kan Kagurangnan.

13-14. Taano ta dapat na mag-atender an gabos sa Memoryal kan kagadanan ni Cristo?

¹³ Sa nag-agi pa sanang mga taon, mga 1 sa kada 1,000 nag-aatender sa Memoryal an nagkakakan kan tinapay asin nag-iinom kan arak. An kadaklan sa mga kongregasyon mayo nin nagkakakan saka nag-iinom kan mga emblema, asin an kadaklan sa mga nag-aatender sa Memoryal may daganon na paglaom. Kaya, taano ta nag-aatender sinda sa Pamanggihan kan Kagurangnan? Kapareho iyan pag nag-aatender sa kasal nin sarong amigo. Nag-aatender kita huling gusto tang ipahiling an satong pagkamuot asin suporta sa ikinakasal. Kaagid kaiyan, an mga kabilang sa ibang mga karnero nag-aatender sa Memoryal ta gusto nindang ipahiling  an saindang pagkamuot asin suporta ki Cristo asin sa mga linahidan. Nag-aatender man an ibang mga karnero para ipahiling an saindang pasasalamat sa atang na ginigirumdom sa Memoryal, an atang na nagpagin posible na mabuhay sinda nin daing sagkod sa daga.

¹⁴ Nag-aatender sa Memoryal an ibang mga karnero huli sa saro pang importanteng dahilan—pagsunod iyan sa pagbuot ni Jesus. Kan punan ni Jesus an espesyal na pamanggihan na iyan kaiba kan saiyang maimbod na mga apostol, sinabi niya sa sainda: “Padagos nindong gibuhon ini sa pagrumdom sa sako.” (1 Cor. 11:23-26) Kaya an ibang mga karnero padagos na nag-aatender sa Pamanggihan kan Kagurangnan sagkod na may mga linahidan na buhay pa digdi sa daga. Sa katunayan, iniimbitaran kan ibang mga karnero an gabos na mag-iba sa sainda sa pag-atender sa Memoryal.

15. Paano ta mauumaw an Diyos asin si Cristo sa Memoryal?

¹⁵ Sa Memoryal, may oportunidad kita na umawon an Diyos asin si Cristo paagi sa kanta asin pamibi. Sa taon na ini, an pahayag may temang “Pahalagahan an Ginibo nin Diyos Asin ni Cristo Para sa Saimo!” Makakatabang iyan sa sato na urog na magin mapagpasalamat ki Jehova asin ki Cristo. Mantang ipinapasa an mga emblema, maipapagirumdom sa sato kun ano an isinisimbolisar kaiyan—an hawak asin an dugo ni Jesus. Magigirumduman ta na itinugot ni Jehova na magadan an saiyang Aki alang-alang sa sato tanganing magkaigwa kita nin buhay. (Mat. 20:28) Siguradong gusto kan gabos na namumuot sa satong Ama sa langit asin sa saiyang Aki na mag-atender sa Memoryal.

16. Ano an mga pagkakapareho kan mga linahidan asin kan ibang mga karnero?

¹⁶ An pagkakaiba kan mga linahidan asin kan ibang mga karnero bako an saindang kahalagahan sa Diyos. Pareho sindang mahalagang marhay sa saiya. Tanganing bakalon an mga linahidan asin an ibang mga karnero, parehong halaga an ibinayad niya—an buhay kan saiyang namumutan na Aki. An pagkakaiba kan duwang grupo iyo an saindang paglaom. An duwang grupo parehong kaipuhan na magdanay na maimbod sa Diyos asin ki Cristo. (Sal. 31:23) Asin tandaan, itinatao ni Jehova an saiyang banal na espiritu sa lambang indibidwal sigun sa kinakaipuhan niya, linahidan man siya o kabilang sa ibang mga karnero.

17. Ano an hinahalat-halat nang mangyari kan linahidan na mga natatada?

¹⁷ An linahidan na mga Kristiyano dai ipinangaki na may langitnon na paglaom. An Diyos an nagtatao sa sainda kan paglaom na iyan. Hinuhurop-hurop ninda an saindang paglaom, ipinapamibi iyan, asin gustong-gusto nindang makamtan an saindang balos sa langit. Dai ngani ninda aram kun magigin ano talaga an hawak ninda sa langit. (Fil. 3:20, 21; 1 Juan 3:2) Gustong-gusto  na nindang mahiling si Jehova, si Jesus, an mga anghel, asin an gabos na iba pang linahidan. Hinahalat-halat na nindang makaibanan sinda sa langitnon na Kahadian.

18. Ano an hinahalat-halat nang mangyari kan ibang mga karnero?

¹⁸ An ibang mga karnero igwa kan paglaom na minamawot kan gabos na tawo. Hinahalat-halat na nindang mabuhay nin daing sagkod sa daga. (Par. 3:11) Gusto nindang mag-abot na an panahon na matabang sinda na magin paraiso an bilog na daga. Gustong-gusto na nindang mag-abot an aldaw na matugdok sinda kan saindang sadiring harong, matanom sa sadiring hardin ninda, asin mapadakula kan saindang mga aki na may perpektong salud. (Isa. 65:21-23) Hinahalat-halat na ninda an panahon na makakaduman sinda sa manlain-lain na lugar sa daga tanganing mahiling an kabukidan, kadlagan, saka kadagatan asin pag-adalan an gabos na linalang ni Jehova. Urog sa gabos, mauugma sindang marhay na maaraman na lalo sindang magigin dayupot ki Jehova.

19. Sa Memoryal, may anong oportunidad an lambang saro sa sato, asin nuarin gigibuhon an Memoryal sa taon na ini?

¹⁹ Tinawan ni Jehova an saiyang lambang dusay na lingkod nin marahayon na paglaom sa puturo. (Jer. 29:11) An Memoryal kan kagadanan ni Cristo nagtatao nin dakulang oportunidad sa lambang saro sato na umawon an Diyos asin si Cristo huli sa ginibo ninda para sa sato tanganing magkaigwa kita nin buhay na daing katapusan. An Memoryal iyo an pinakaimportanteng pagtiripon kan tunay na mga Kristiyano kada taon. Gigibuhon iyan pagsulnop kan saldang sa Sabado, Marso 27, 2021. Sa taon na ini, dakul an buwelong makakaatender sa importanteng okasyon na ini. An iba maatender sa ibong nin mga pagkontra. An iba gigibuhon an Memoryal mantang nasa presuhan. Mantang nakahiling si Jehova, si Jesus, asin an langitnon na kabtang kan pamilya nin Diyos, lugod na an lambang kongregasyon, grupo, asin indibidwal magkaigwa nin nakakaugmang Memoryal!