1. Arog ni Hading David, ano an tibaad maihapot kan nagkapira sa sato?

GABOS kita gustong magkaigwa nin kalmado asin matuninong na buhay. Siisay man an gustong naghahadit? Pero kun minsan, tibaad mahadit kitang marhay. Sa katunayan, may mga lingkod si Jehova na tibaad ihapot man an ihinapot ni Hading David ki Jehova: “Sagkod nuarin ako magkakaigwa nin kahaditan na may grabeng kamunduan sa sakong puso sa kada aldaw?”—Sal. 13:2, NWT.

2. Ano an pag-uulayan ta sa artikulong ini?

² Dawa ngani dai ta man talaga lubos na malilikayan an paghadit, dakul kitang magigibo para makontrol iyan. Sa artikulong ini, pag-uulayan ta nguna an nagkapirang bagay na puwedeng makapahadit sa sato. Dangan pag-uulayan ta an anom na praktikal na paagi na makakatabang sa sato na magdanay na kalmado pag may mga problema kita.

3. Anong mga problema an napapaatubang sa sato, asin mapupugulan o malilikayan ta daw an mga iyan?

³ May mga bagay na haros mayo kitang kontrol o talagang dai ta kontrolado na puwedeng makapahadit sa sato. Halimbawa, dai ta mapupugulan an paglangkaw kada taon kan presyo nin kakanon, bado, asin istaran. Dai ta man kontrolado kun gurano kita kaparating tetentaran kan satong mga katrabaho o kaeskuwela na magin bakong onesto o gumibo nin seksuwal na imoralidad. Asin dai ta man mapupundo an mga krimen na nangyayari sa satong lugar. Napapaatubang kita sa mga problemang ini huling nabubuhay kita sa kinaban na an kaisipan kan kadaklan na tawo bakong  basado sa mga prinsipyo sa Bibliya. Aram ni Satanas, an Diyos kan kinaban na ini, na may mga tawong dai maglilingkod ki Jehova huli sa “kahaditan kan sistemang ini nin mga bagay.” (Mat. 13:22; 1 Juan 5:19) Bakong makangangalas na an kinaban pano-pano nin mga problema na nakakapahadit na marhay sa mga tawo!

4. Ano an puwedeng magin epekto sa sato kan satong mga problema?

⁴ Huli sa mga problema, tibaad mahadit kitang marhay kaya iyo na sana iyan an pigpaparaisip ta. Halimbawa, tibaad mahadit kita kun paano magkakaigwa nin igong panggastos para sa satong mga pangangaipo o na tibaad magkahilang kita asin dai makatrabaho o mawaran pa ngani nin trabaho. Tibaad mahadit man kita na dai kita magigin maimbod pag may sugot na balgahon an pagbuot nin Diyos. Madali nang pahiruon ni Satanas an mga nasa kontrol niya tanganing atakihon an mga lingkod nin Diyos, kaya tibaad mahadit kita sa kun ano an gigibuhon ta pag nangyari na iyan. Tibaad maisip ta, ‘Sala daw na mahadit ako sa mga bagay na arog kaiyan?’

5. Ano an buot sabihon ni Jesus kan sabihon niya: “Dai na kamo magparahadit”?

⁵ Aram ta na sinabi ni Jesus sa saiyang mga parasunod: “Dai na kamo magparahadit.” (Mat. 6:25) An buot sabihon daw ni Jesus dai kita dapat mahadit sa ano man na bagay? Dai nanggad! Girumdumon na kaidto may maimbod na mga lingkod si Jehova na nakamati man nin paghadit, pero dai man ninda naiwara an pag-uyon ni Jehova. * (1 Ha. 19:4; Sal. 6:3) An totoo, rinaranga kita kaiyan ni Jesus. Habo niyang magparahadit kitang marhay manungod sa mga pangangaipo ta na bako na lugod an paglilingkod ki Jehova an pinakaimportante sa satong buhay. Kun siring, ano an mga paagi na makokontrol ta an paghadit?—Hilingon an kahon na “ Kun Paano Gigibuhon Iyan.”

6. Sigun sa Filipos 4:6, 7, ano an makakatabang sa sato na magin kalmado?

⁶ (1) Parating mamibi. Kun nahahadit ka manungod sa sarong problema, magiginhawahan ka kun udok sa puso kang mamimibi ki Jehova para sa tabang. (1 Ped. 5:7) Bilang simbag sa saimong mga pamibi, itatao sa saimo “an katuninungan nin Diyos na nakakalabi sa gabos na pakasabot” nin tawo. (Basahon an Filipos 4:6, 7.) Tinatabangan kita ni Jehova na magin kalmado paagi sa saiyang makapangyarihan na banal na espiritu.—Gal. 5:22.

7. Ano an dapat tang tandaan pag namimibi sa Diyos?

⁷ Pag namimibi ki Jehova, sabihon sa saiya an gabos mong namamatian. Magin espesipiko. Sabihon sa saiya kun ano an problema, asin ipaliwanag kun ano an namamatian mo huli kaiyan. Kun may posibleng solusyon an satong problema, hagadon sa saiya an kadunungan para maaraman kun ano an gigibuhon asin an kusog para magibo iyan. Kun mayo kang magigibo manungod sa problema, hagadon ki Jehova na tabangan ka na dai magparahadit manungod diyan. Pag espesipiko ka sa mga pamibi mo, dai mahahaloy mas malinaw mong mahihiling kun paano iyan sinisimbag ni Jehova. Kun nagparapamibi ka na tapos dai tulos iyan sinisimbag, dai magpundo sa pagpamibi. Apuwera sa pagigin espesipiko, gusto man ni Jehova na magin pursigido ka sa pagpamibi.—Luc. 11:8-10.

8. Ano an dapat na kaiba sa satong mga pamibi?

⁸ Mantang ipinapasa mo ki Jehova sa pamibi an saimong mga kahaditan, magsambit man nin mga pasasalamat. Makakarahay sa sato kun iisipon ta an mga bendisyon na inaako ta, dawa pag dakul kitang inaagihan na mga problema. Sa mga pagkakataon na dai mo maipahayag  sa tataramon an saimong mga namamatian, girumdumon na sinisimbag ni Jehova dawa an simpleng mga pamibi arog kan ‘Tabangan mo po ako!’—2 Cron. 18:31; Roma 8:26.

9. Paano magkakaigwa nin tunay na seguridad?

⁹ (2) Magsarig sa kadunungan ni Jehova bako sa sadiri mo. Kaidtong ikawalong siglo B.C.E., an mga taga Juda natakot na atakihon kan mga Asiriano. Habo kan mga taga Juda na masakop kan mga Asiriano kaya nagpatabang sinda sa paganong Ehipto. (Isa. 30:1, 2) Pinatanidan sinda ni Jehova na an saindang salang desisyon magreresulta sa kapahamakan. (Isa. 30:7, 12, 13) Paagi ki Isaias, sinabi nin Diyos sa banwaan kun paano sinda magkakaigwa nin tunay na seguridad. Sinabi niya: “An saindong kusog yaon sa pagdanay na kalmado asin pagpahiling nin tiwala” ki Jehova.—Isa. 30:15b, NWT.

10. Sa anong mga sitwasyon maipapahiling ta an satong pagtitiwala ki Jehova?

¹⁰ Paano ta maipapahiling an satong pagtitiwala ki Jehova? Isipa an nagkapirang halimbawa. Ipamugtak na inalukan ka nin trabaho na mas halangkaw an suweldo, pero kaipuhan mong magtagama nin mas dakul na panahon para diyan asin makakaulang iyan sa espirituwal na rutina mo. O paano kun may katrabaho ka na may gusto saimo, pero bako siyang bawtisadong lingkod nin Diyos. O pinapapili ka ngaya kan namumutan mong kapamilya: “Ako o an Diyos mo?” Sa lambang sitwasyon na iyan, may dipisil kang desisyon na gigibuhon, pero sa kada saro kaiyan, tatawan ka ni Jehova kan kinakaipuhan mong paggiya. (Mat. 6:33; 10:37; 1 Cor. 7:39) An hapot, Magtitiwala ka daw ki Jehova asin susunudon an paggiyang iyan?

11. Anong mga halimbawa sa Bibliya an puwede tang pag-adalan tanganing magdanay na kalmado sa ibong nin pagkontra?

¹¹ (3) Makanuod sa marahay asin maraot na mga halimbawa. An Bibliya igwa nin dakul na halimbawa na nagtatampok kan kahalagahan kan pagdanay na kalmado asin pagtitiwala ki Jehova. Mantang pinag-aadalan an mga halimbawang ini, pag-isipan kun ano an nakatabang sa mga lingkod nin Diyos na magdanay na kalmado sa ibong nin grabeng pagkontra. Halimbawa, kan pagbutan kan Judiong korte suprema an mga apostol na magpundo sa paghuhulit, dai sinda natakot. Imbes kusog-buot nindang sinabi: “An Diyos an dapat niyamong sunudon bilang tagapamahala imbes na an mga tawo.” (Gibo 5:29) Dawa pagkatapos sindang hampakon, an mga apostol dai natakot. Taano? Huling aram ninda na nasa kampi ninda si Jehova. Nauugma siya sa sainda. Kaya nagpadagos sinda sa paghuhulit kan maugmang bareta. (Gibo 5:40-42) Siring man, kan an disipulong si Esteban madali nang gadanon, nagdanay siyang kalmadong marhay kaya an saiyang ‘lalawgon garo lalawgon nin anghel.’ (Gibo 6:12-15) Taano? Huling sigurado siya na inuuyunan siya ni Jehova.

12. Sigun sa 1 Pedro 3:14 asin 4:14, taano ta puwede kitang magin maugma pag pinepersegir kita?

¹² An mga apostol igwa nin malinaw na ebidensiya na nasa kampi ninda si Jehova. Tinawan niya sinda kan kapangyarihan na gumibo nin mga milagro. (Gibo 5:12-16; 6:8) Pero bako nang arog kaiyan sa sato ngunyan. Minsan siring, paagi sa saiyang tataramon mamumuton kitang inaasigurar ni Jehova na pag nagsasakit kita alang-alang sa katanusan, nauugma siya sa sato asin an saiyang espiritu yaon sa sato. (Basahon an 1 Pedro 3:14; 4:14.) Kaya imbes na pagparaisipon kun ano an gigibuhon ta pag napaatubang na kita sa grabeng persekusyon sa maabot, kaipuhan tang magpokus sa kun ano an magigibo ta ngunyan para mapakusog an satong pagtitiwala sa kakayahan ni Jehova na tabangan asin iligtas kita. Arog kan ginibo kan inot na mga disipulong idto, dapat kitang magtiwala sa panuga ni Jesus: “Itatao ko sa saindo an mga tataramon  asin kadunungan na dai makakayang kontrahon o diskutiron kan sararong paghihinguwa kan gabos nindong kalaban.” Igwa kita kan garantiya: “Paagi sa saindong pakatagal maiingatan nindo an saindong buhay.” (Luc. 21:12-19) Asin dai nanggad paglingawan na ginigirumdom ni Jehova an kasadit-saditing mga detalye manungod sa saiyang mga lingkod na nagadan na maimbod sa saiya. Paagi sa mga detalyeng iyan, bubuhayon niya liwat sinda.

13. Paano kita makikinabang sa pag-adal sa halimbawa kan mga dai nagdanay na kalmado asin dai nagtiwala ki Jehova?

¹³ Makakanuod man kita sa halimbawa kan mga dai nagdanay na kalmado asin dai nagtiwala ki Jehova. Kun pag-aadalan ta an maraot na mga halimbawang iyan, makakatabang iyan sato na malikayan na magibo an mga sala na nagibo ninda. Halimbawa, sa mga inot na taon kan pamamahala ni Hading Asa kan Juda, nagtiwala siya ki Jehova kan mapaatubang sa pagsalakay nin sarong dakulaon na hukbo, asin tinawan siya ni Jehova nin kapangganahan. (2 Cron. 14:9-12) Alagad pag-abot nin panahon, kan magsalakay an mas sadit nanggad na hukbo ni Hading Baasa kan Israel, imbes na magtiwala ki Jehova para sa kaligtasan arog kan ginibo niya dati, binayadan ni Asa an mga Siriano para tabangan sinda. (2 Cron. 16:1-3) Asin kan madali na siyang magadan kan magkaigwa siya nin malalang hilang, dai siya naghagad nin tabang ki Jehova.—2 Cron. 16:12.

14. Ano an manunudan ta sa salang ginibo ni Asa?

¹⁴ Kan inot, nagdudulok si Asa ki Jehova pag may mga problema siya. Pero kan huri, dai na siya nagtiwala sa saiyang Diyos para sa tabang. Imbes, mas pinili niyang magsadiring desisyon manungod sa mga bagay-bagay. Kun hihilingon, garo baga praktikal na marhay an plano ni Asa na magpatabang sa mga Siriano laban sa Israel. Pero dai naghaloy an katuninungan na resulta kan saiyang plano. Paagi sa sarong propeta, sinabi ni Jehova ki Asa: “Huling nagsarig ka sa hadi kan Siria asin dai ka nagsarig ki Jehova na saimong Diyos, nakadulag lugod sa kamot mo an hukbo kan hadi kan Siria.” (2 Cron. 16:7, NWT) Dapat tang likayan an kaisipan na kaya tang solusyunan an satong mga problema sa sadiri ta sana na dai naghahagad nin paggiya ki Jehova paagi sa saiyang Tataramon. Dawa pag kaipuhan tang gumibo nin daralian na desisyon, dapat kitang magdanay na kalmado asin magsarig ki Jehova, asin tatabangan niya kitang makagibo nin tamang desisyon.

15. Ano an puwede tang gibuhon pag nagbabasa nin Bibliya?

¹⁵ (4) Magtuom nin mga teksto sa Bibliya. Kun may mabasa kang mga teksto sa Bibliya na nagpapahiling kun gurano kaimportante na magdanay na kalmado asin magtiwala ki Jehova, pagmaigutan na tuumon iyan. Tanganing matuom iyan, makakatabang sa saimo an pagbasa kaiyan nin makusog o pagsurat asin parating pagrepaso kaiyan. Pinagbutan ni Jehova si Josue na regular na basahon sa maluway na boses an libro kan Katugunan tanganing humiro siya nin may kadunungan. An mababasa niya diyan makakatabang man sa saiya na dai matakot kundi magkaigwa nin kusog nin buot sa panginginot sa banwaan nin Diyos. (Jos. 1:8, 9) Dakul na teksto sa Tataramon nin Diyos an makakatao sa saimo nin katuninungan nin isip asin puso sa mga sitwasyon na sa parati nakakahadit o nakakatakot.—Sal. 27:1-3; Tal. 3:25, 26.

16. Paano ginagamit ni Jehova an kongregasyon tanganing tabangan kitang magdanay na kalmado asin magtiwala sa saiya?

¹⁶ (5) Makiiba-iba sa mga lingkod nin Diyos. Ginagamit ni Jehova an satong mga tugang tanganing tabangan kitang magdanay na kalmado asin magtiwala sa saiya. Sa satong mga pagtiripon, nakikinabang kita sa mga pahayag, sa mga komento kan mga nag-atender, asin sa nakakapakusog na pakikipag-ulay sa satong mga  tugang. (Heb. 10:24, 25) Mapapakusog man kitang marhay kun sinasabi ta an satong namamatian sa mapagtitiwalaan na mga amigo sa kongregasyon. “An marahay na tataramon” nin sarong amigo dakulang marhay an maitatabang tanganing mabawasan an satong kahaditan.—Tal. 12:25.

17. Sigun sa Hebreo 6:19, paano kita napaparigon kan satong paglaom sa Kahadian sa ibong nin dipisil na mga kamugtakan?

¹⁷ (6) Papagdanayon na makusog an saimong paglaom. An satong paglaom sa Kahadian “nagseserbing angkla kan kalag,” na nagpaparigon sa sato sa ibong nin dipisil na mga kamugtakan o mga kahaditan. (Basahon an Hebreo 6:19.) Hurop-hurupon an puturong ipinanuga ni Jehova na diyan mayo na kitang ikakahadit. (Isa. 65:17) Imahinaron na yaon ka sa matuninong na bagong kinaban, na diyan mayo nang maraot na mga mangyayari. (Miq. 4:4) Mapapakusog man an saimong paglaom pag ihinihiras mo iyan sa iba. Gibuhon an gabos na makakaya sa paghuhulit asin paggibo nin disipulo. Kun gigibuhon mo iyan, ‘magkakaigwa ka nin lubos na kasiyertuhan sa saimong paglaom sagkod sa katapusan.’—Heb. 6:11.

18. Ano an inaasahan tang mangyayari sa maabot, asin paano ta iyan mapangganang maaatubang?

¹⁸ Mantang parani na an katapusan kan sistemang ini nin mga bagay, magkakaigwa kita nin dakul pang problema na makakapahadit sa sato. An satong teksto para sa taon 2021 makakatabang sa sato na maatubang an mga problemang iyan asin magdanay na kalmado, bako paagi sa sadiri tang kusog, kundi paagi sa pagtitiwala ta ki Jehova. Ngunyan na taon, ipahiling ta paagi sa satong gibo na nagtutubod kita sa panuga ni Jehova: “An saindong kusog yaon sa pagdanay na kalmado asin pagpahiling nin tiwala.”—Isa. 30:15, NWT.