1. Sa anong masakit na sitwasyon namugtak si David?

 NAGDUDULAG si David ta namemeligro an saiyang buhay. Si Saul, an makapangyarihan na hadi kan Israel, determinado na gadanon siya. Kan si David nangangaipo nin kakanon, nagpundo siya sa siyudad nin Nob, na diyan nakiulay siya na tawan sinda nin dawa limang tinapay sana. (1 Sam. 21:1, 3) Dangan, siya saka an mga tawuhan niya nagtago sa sarong kuweba. (1 Sam. 22:1) Paano namugtak sa arog kaiyan na sitwasyon si David?

2. Paano ibinugtak ni Saul an sadiri niya sa delikadong sitwasyon? (1 Samuel 23:16, 17)

² Grabe an pagkauri ni Saul ki David huling gusto ini kan dakul na tawo asin dakul na ralaban an ginana kaini. Aram ni Saul na an pagsuway niya an dahilan kaya isinikwal siya ni Jehova bilang hadi kan Israel asin na pinili ni Jehova si David para magin hadi. (Basahon an 1 Samuel 23:16, 17.) Pero dahil si Saul pa man giraray an hadi kan Israel, igwa siya nin dakulang hukbo saka dakul na suportador, kaya kinaipuhan ni David na dumulag. Inisip daw talaga ni Saul na kaya niyang ulangon an kabutan nin Diyos na gibuhon na hadi si David? (Isa. 55:11) Mayo nin sinasabi an Bibliya, pero ini an sigurado ta: Ibinugtak ni Saul an sadiri niya sa delikadong sitwasyon. Dai nuarin man manggagana an mga nagtutumang sa Diyos!

3. Ano an namatian ni David sa ibong kan saiyang kamugtakan?

³ Si David bakong ambisyoso. Bako siya an nagpili sa sadiri niya na magin hadi kan Israel. Si Jehova an nagpili sa saiya. (1 Sam. 16:1, 12, 13) Kan huri, ikinaungis na marhay ni Saul si David. Pero dai  binasol ni David si Jehova sa nagin sitwasyon niya. Saka dai siya nagreklamo dawa limitado an kakanon niya asin kinaipuhan niyang magtago sa kuweba. Sa kabaliktaran, minalataw na nagtatago siya sa kuwebang iyan kan isurat niya an magayon na kanta nin pag-umaw na kaiba an mga tataramon kan satong temang teksto: “An mga naghahanap ki Jehova dai magkukulang nin ano man na bagay na marahay.”—Sal. 34:10.

4. Anong mga hapot an sisimbagon ta, asin taano ta mahalaga na pag-ulayan ta an mga iyan?

⁴ Sa ngunyan dakul na lingkod ni Jehova an nakakaeksperyensiya nin kakulangan nin kakanon asin iba pang mga pangangaipo sa buhay. * Totoo ini lalo na kan magkaigwa nin pandemya. Asin mantang paparani an “dakulang kasakitan,” asahan niyato na mapapaatubang kita sa mas masakit pa nganing mga sitwasyon. (Mat. 24:21) Kaya marahay na simbagon ta an apat na hapot na ini: Sa paanong paagi ‘dai nagkulang si David nin ano man na bagay na marahay’? Taano ta dapat tang manudan na magin kontento? Taano ta makakapagtiwala kita na dai kita papabayaan ni Jehova? Asin paano kita makakapag-andam ngunyan para sa maabot?

5-6. Paano kita tinatabangan kan Salmo 23:1-6 na masabutan an buot sabihon ni David kan sabihon niya na an mga lingkod nin Diyos “dai magkukulang nin ano man na bagay na marahay”?

⁵ Ano an buot sabihon ni David kan sabihon niya na an mga lingkod ni Jehova “dai magkukulang nin ano man na bagay na marahay”? Makakakua kita nin ideya paagi sa pagkonsiderar kan kaparehong mga tataramon na mababasa sa ika-23 na Salmo. (Basahon an Salmo 23:1-6.) Pinunan ni David an salmong iyan paagi sa mga tataramon na ini: “Si Jehova an sakuyang Pastor. Dai ako kukulangon nin ano man.” Dangan sinambit ni David an mga bagay na talagang mahalaga—an abundang espirituwal na mga bendisyon na nakakamtan niya huli sa pagmidbid niya ki Jehova bilang saiyang Pastor. Ginigiyahan siya ni Jehova “sa mga dalan nin katanusan,” asin maimbod Niyang sinusuportaran si David marahay man o bako an sitwasyon. Aram ni David  na makakaeksperyensiya pa man giraray siya nin mga problema dawa yaon siya sa “maduot na mga pasabsaban” ni Jehova. Puwedeng pangluyahan siya nin buot kun minsan, na garo baga naglalakaw siya “sa kababan nin grabeng kadikluman,” asin magkakaigwa siya nin mga kaiwal. Pero huling si Jehova an saiyang Pastor, ‘dai siya matatakot sa ano man na kapahamakan.’

⁶ Kaya ngunyan may simbag na kita sa satong hapot: Sa paanong paagi ‘dai nagkulang si David nin ano man na bagay na marahay’? Igwa siya kan gabos na kaipuhan niya tanganing magdanay na harani ki Jehova. An kaugmahan niya dai nakadepende sa materyal na mga bagay. Kontento si David sa mga itinatao ni Jehova. Binebendisyunan asin pinoprotektaran siya kan saiyang Diyos. Iyan an pinakamahalaga sa saiya.

7. Uyon sa Lucas 21:20-24, anong masakit na sitwasyon an napaatubang sa inot na siglong mga Kristiyano sa Judea?

⁷ Mahihiling ta sa mga tataramon ni David kun gurano kaimportante na magkaigwa kita nin tamang pagmansay sa materyal na mga bagay. Siguradong ikinakaugma ta an ano man na materyal na bagay na igwa kita, pero dai ta iyan dapat ibilang na pinakaimportante sa satong buhay. Iyan an sarong mahalagang katotoohan na nasabutan kan inot na siglong mga Kristiyano na nakaistar sa Judea. (Basahon an Lucas 21:20-24.) Pinatanidan sinda ni Jesus na maabot an panahon na an siyudad nin Jerusalem ‘papalibutan nin nagkakampong mga hukbo.’ Pag nangyari iyan, kakaipuhanon nindang ‘dumulag pasiring sa kabukidan.’ Maliligtas sinda kun gigibuhon ninda iyan, pero dakula an kaipuhan nindang isakripisyo. Pirang taon na an nakaagi, arog kaini an pagkakasabi diyan kan An Torrengbantayan: “Binayaan ninda an mga uma asin harong, na dai ngani kinua an saindang mga rugaring sa saindang harong. Kumpiyado sa pagprotehir asin pagsuportar ni Jehova, ininot ninda an pagsamba sa saiya kisa gabos na iba [pang bagay] na tibaad garo mahalaga.”

8. Anong nakakapaisip na leksiyon an manunudan ta sa nangyari sa inot na siglong mga Kristiyano na nakaistar sa Judea?

⁸ Anong nakakapaisip na leksiyon an manunudan ta sa nangyari sa inot na siglong mga Kristiyano na nakaistar sa Judea? An Torrengbantayan na sinambit pa sana nagsabi: “Tibaad magkaigwa nin mga pagbalo sa ngapit [na diyan mahihiling] kun ano an punto de vista niyato manungod sa materyal na mga bagay; an mga iyan daw an pinakamahalagang bagay, o mas mahalaga daw an kaligtasan na madatong para sa gabos na nasa lado nin Diyos? Iyo, an satong pagdulag tibaad may kalabot na nagkapirang kasakitan asin kadaihon. Kaipuhan na kita magin andam na gibuhon an ano man na kaipuhan, arog kan mga kapareho niyato kaidtong inot na siglo na nagdulag hali sa Judea.” *

9. Paano ka napakusog kan konseho ni apostol Pablo sa mga Hebreo?

⁹ Naiimahinar mo daw kun gurano kadipisil para sa mga Kristiyanong idto na bayaan an haros gabos na igwa sinda asin magpuon giraray? Kaipuhan nin pagtubod para magtiwala ki Jehova na itatao niya an saindang panginot na mga pangangaipo. Pero may makakatabang sa sainda. Limang taon bago salikupan kan mga Romano an Jerusalem, nagtao si apostol Pablo sa mga Hebreo nin kapaki-pakinabang na sadol: “An saindo lugod na pamumuhay dai mahilingan nin pagkamuot sa kuwarta, mantang kontento na kamo sa mga bagay na igwa kamo. Huli ta siya nagsabi: ‘Dai taka nuarin man babayaan, asin dai taka nuarin man papabayaan.’ Sa siring mákusog na marhay an satuyang buot asin masabi: ‘Si Jehova an sakuyang paratabang; dai ako matatakot. Ano an magigibo sa sako nin tawo?’” (Heb. 13:5, 6) Siguradong nagin madali para sa mga nag-aplikar kan sadol ni Pablo na matuod sa simpleng buhay sa bago nindang istaran bago magsakyada an Roma. Tiwala sinda na itatao ni Jehova an saindang  panginot na mga pangangaipo. An mga tataramon ni Pablo nag-aasigurar sa sato na puwede man kitang magkaigwa nin arog kaiyan na kumpiyansa.

10. Ano an “sekreto” na ihiniras sa sato ni Pablo?

¹⁰ Nagtao si Pablo nin kaparehong konseho ki Timoteo na aplikado man sa sato ngunyan. Isinurat niya: “Kaya, sa pagkaigwa nin kakanon asin maisusulot, makontento na kita sa mga bagay na iyan.” (1 Tim. 6:8) Buot sabihon daw kaini dai na kita puwedeng magkakan nin masiram na kakanon, mag-istar sa komportableng harong, o magbakal nin bagong bado paminsan-minsan? Bako iyan an punto ni Pablo. An sinasabi ni Pablo iyo na dapat kitang makontento sa ano man na materyal na bagay na igwa kita. (Fil. 4:12) Iyan an “sekreto” na sinasabi ni Pablo. An pinakamahalagang pagsadiri ta iyo an satong relasyon sa satong Diyos, bako an ano man na materyal na bagay na igwa kita.—Hab. 3:17, 18.

11. Anong leksiyon manungod sa pagigin kontento an manunudan ta sa sinabi ni Moises sa mga Israelita?

¹¹ An satong pagmansay sa mga pangangaipo ta puwedeng bakong kapareho kan pagmansay ni Jehova. Pag-isipan an sinabi ni Moises sa mga Israelita pagkatapos nin 40 taon na yaon sinda sa kaawagan: “Binendisyunan kamo ni Jehova na saindong Diyos sa gabos na ginibo nindo. Aram niya nin lubos an paglakaw nindo sa mahiwas na kaawagan na ini. Sa laog nin 40 taon, inantabayanan kamo ni Jehova na saindong Diyos, asin dai kamo nagkulang nin ano man.” (Deu. 2:7) Sa laog nin 40 taon na idto, tinawan ni Jehova an mga Israelita nin manna na makakakan ninda. An  saindang mga bado—an mismong mga bado na igwa sinda kan maghali sinda sa Ehipto—dai lamang nagkaruluma. (Deu. 8:3, 4) Dawa ngani tibaad inisip kan iba na dai igo an mga probisyon na ini, ipinagirumdom ni Moises sa mga Israelita na igwa sinda kan gabos na kaipuhan ninda. Mauugma si Jehova kun manunudan tang magin kontento—na inaapresyar dawa an simpleng mga probisyon na itinatao sa sato asin ibinibilang iyan na sarong bendisyon na maipagpapasalamat ta.

12. Ano an nagpaparisa na ki Jehova nagtiwala si David, bako sa sadiri niya?

¹² Aram ni David na si Jehova maimbod asin nagmamalasakit na marhay sa mga namumuot sa Saiya. Dawa ngani namemeligro an buhay niya kan isurat niya an ika-34 Salmo, nahihiling ni David, sa saiyang mata nin pagtubod, na “an anghel ni Jehova nagkakampo sa palibot” niya. (Sal. 34:7) Posibleng ikinumparar ni David an anghel ni Jehova sa sarong suldados na nagkakampo sa langtad, na pirming alerto sa mga kalaban. Dawa ngani si David sarong matibay na parapakilaban asin pinangakuan ni Jehova na magin hadi, dai siya nagsarig sa tibay niyang maglagpitaw o maggamit nin espada para daugon an kaiwal. (1 Sam. 16:13; 24:12) Sa Diyos siya nagtiwala, na may kumpiyansa na ‘iliniligtas kan anghel ni Jehova an mga may pagkatakot sa Saiya.’ Siyempre, dai man kita nag-aasa na poprotektaran kita ngunyan paagi sa milagro. Pero aram niyato na dawa magadan sa ngunyan an siisay man na nagtitiwala ki Jehova, mag-aako sinda nin buhay na daing katapusan.

13. Pag magsalakay na an Gog nin Magog, taano ta garo baga magigin daing kalaban-laban kita, pero taano ta dai kita dapat matakot? (Hilingon an ritrato sa cover.)

¹³ Sa dai na mahahaloy, mababalo an satong pagtitiwala sa kakayahan ni Jehova na protektaran kita. Pag an Gog nin Magog, an koalisyon nin mga nasyon, magsalakay na sa banwaan nin Diyos, ’baad isipon niyato na namemeligro an satong buhay. Dapat na magin kumbinsido kita na kaya ni Jehova na iligtas kita asin iyan an gigibuhon niya. Sa paghiling kan mga nasyon, garo kita daing kalaban-laban na mga karnero na mayo nin maprotektar. (Ezek. 38:10-12) Dai kita magkakaigwa nin armas, dai man kita sinanay sa pakikipaglaban. Kaya sa paghiling kan mga nasyon madalion sana kitang daugon. Dai ninda mahihiling an nahihiling kan satong mga mata nin pagtubod—an sarong hukbo nin mga anghel na nagkakampo sa palibot kan banwaan nin Diyos, na andam na depensahan kita. Mayong espirituwal na paghiling an mga nasyon, kaya paano man ninda mahihiling an mga anghel? Mabibigla na sana sinda pag an mga hukbo sa langit makipaglaban para sa sato!—Kap. 19:11, 14, 15.

14. Ano an puwede niyatong gibuhon ngunyan tanganing makapag-andam para sa maabot?

¹⁴ Ano an puwede niyatong gibuhon ngunyan tanganing makapag-andam para sa maabot? Inot sa gabos, dapat na magkaigwa kita nin tamang pagmansay sa materyal na mga bagay, na isinasaisip na maabot an aldaw na kakaipuhanon tang bayaan an mga iyan. Dapat man kitang magin kontento asin ikaugmang marhay an satong relasyon ki Jehova. Mantang mas namimidbid ta pa an satong Diyos, mas magigin kumbinsido man kita sa kakayahan niya na protektaran kita pag magsalakay na an Gog nin Magog.

15. Ano an mga naeksperyensiyahan kaidto ni David kaya tiwala siya na pirmi siyang tatabangan ni Jehova?

¹⁵ Pag-isipan kun ano pa an nakatabang ki David na makakatabang man sa sato para makapag-andam sa mga pagbalo. Sinabi ni David: “Namitan nindo asin hilingon na marahay si Jehova; maugma an tawong nagpapaili sa saiya.” (Sal. 34:8) Ipinapahiling kan mga tataramon na iyan kun taano ta aram ni David na makakaasa siya sa suporta ni Jehova. Pirming nagsasarig si David ki Jehova, asin pirmi siyang tinatabangan kan saiyang Diyos. Kan hoben pa si David, inatubang  niya an higanteng Filisteo na si Goliat saka sinabihan niya an kinakatakutan na parapakilaban na iyan: “Sa mismong aldaw na ini, itatao ka ni Jehova sa sakuyang kamot.” (1 Sam. 17:46) Dangan, kan magin lingkod siya ni Hading Saul, pirang beses kaining pinurbaran na gadanon siya. Pero “nasa kaibanan ni David si Jehova.” (1 Sam. 18:12) Naeksperyensiyahan na kaidto ni David an tabang ni Jehova, kaya aram niyang tatabangan siya ni Jehova sa mga pagbalong inaagihan niya.

16. Sa anong mga sitwasyon puwede tang “namitan” an karahayan ni Jehova?

¹⁶ Mantang mas nagsasarig kita sa paggiya ni Jehova ngunyan, mas magigin makusog man an satong kumpiyansa sa kakayahan niya na iligtas kita sa maabot. Kaipuhan an pagtubod asin udok na pagsarig ki Jehova para maghagad nin bakasyon sa satuyang amo tanganing makaatender kita sa asembleya o kumbensiyon o para makiulay na i-adjust an satong iskedyul sa trabaho para makaatender kita sa gabos na pagtiripon asin mas makapartisipar sa ministeryo. Pero paano kun dai nagtugot an satong amo sa pakiulay ta asin nawaran kita nin trabaho? Magkakaigwa daw kita nin pagtubod na dai kita nuarin man papabayaan ni Jehova asin na pirmi niyang itatao an satong panginot na mga pangangaipo? (Heb. 13:5) Dakul na nasa bilog na panahon na paglilingkod an makakapag-istorya kun paano sinda tinabangan ni Jehova sa mga panahon na kaipuhan nindang marhay an tabang niya. Iyo, maimbod si Jehova.

17. Ano an teksto para sa taon 2022, asin taano ta angay iyan?

¹⁷ Huling kaibanan ta si Jehova, mayo kitang dapat na ikatakot sa mga mangyayari sa maabot. Dai kita nuarin man papabayaan kan satong Diyos sagkod na iniinot ta sa satuyang buhay an saiyang kabutan. Para ipagirumdom sa sato na mahalagang mag-andam na kita ngunyan para sa masakit na mga panahon na maabot asin na magtiwala na dai kita nuarin man papabayaan ni Jehova, pinili kan Namamahalang Grupo an Salmo 34:10 na magin satong teksto para sa taon 2022: “An mga naghahanap ki Jehova dai magkukulang nin ano man na bagay na marahay.”