1. Paano kita nagtatao nin panahon para makaibanan si Jehova?

 GUSTONG-GUSTO tang makaibanan an mga tawong mahalaga sa sato. An maugmang mag-agom gustong-gustong makaibanan an lambang saro lalo na sa matuninong na banggi. An mga hoben nauugmang makaibanan an saindang dayupot na mga amigo. Asin gabos kita nauugmang makaibanan an satong mga kapagtubod. Pero, urog sa gabos, gustong-gusto tang magtao nin panahon para makaibanan an satong Diyos. Ginigibo ta iyan paagi sa pagpamibi sa saiya, sa pagbasa kan saiyang Tataramon, asin paghurop-hurop sa saiyang katuyuhan asin magagayon na mga kuwalidad. Mahalagang marhay nanggad an panahon na itinatao ta para makaibanan si Jehova!—Sal. 139:17.

2. Anong mga kadipisilan an napapaatubang sa sato?

² Dawa ngani gustong-gusto tang magtao nin panahon para ki Jehova, may mga kadipisilan. Sibot kita sa aroaldaw, asin puwede iyan magpadipisil sa sato na makapagtagama nin panahon para sa espirituwal na mga aktibidad. An satong trabaho, mga responsabilidad sa pamilya, asin iba pang mahalagang mga gibuhon puwedeng makaubos kan satong panahon kaya tibaad pagmati ta sibot kitang marhay kaya mayo na kitang panahon para sa pagpamibi, pag-adal, o paghurop-hurop.

3. Ano an saro pang puwedeng makaubos kan satong panahon?

³ May saro pa na dai gayong risa na puwedeng makaubos nin panahon. Kun dai kita magigin maingat, tibaad mapabayaan tang maagaw kan mga aktibidad na bako man sala an satong panahon na puwede ta kutang magamit para mas maparani ki Jehova. Halimbawa,  gabos kita nakikinabang sa paminsan-minsan na paglilibang. Pero dawa an marahay na mga libangan puwedeng makaubos kan satong panahon kaya dikit na sana an natatada tang panahon para sa espirituwal na mga aktibidad. Dapat tang girumdumon na an paglilibang bako an pinakaimportante sa buhay.—Tal. 25:27; 1 Tim. 4:8.

4. Ano an pag-uulayan ta?

⁴ Sa artikulong ini, pag-uulayan ta kun taano ta kaipuhan tang magbugtak nin tamang mga priyoridad. Pag-uulayan ta man kun paano ta magagamit sa pinakamarahay an satong panahon para ki Jehova asin kun paano kita makikinabang sa marahayon na paggamit na iyan kan satong panahon.

5. Paano makakatabang sa sarong hoben an konseho na mababasa sa Efeso 5:15-17 sa pagpili nin pinakamarahay na karera sa buhay?

⁵ Pilion an pinakamarahay na karera sa buhay. Sa parati iniisip kan mga hoben kun paano ninda magagamit sa pinakamarahay an saindang buhay. Puwede sindang engganyaron kan mga guidance counselor sa eskuwelahan asin bakong kapagtubod na mga kapamilya na kumua nin halangkaw na edukasyon tanganing magkaigwa nin magayon na karera sa kinaban. Nangangaipo iyan nin dakul na panahon. Sa ibong na lado, puwedeng dagkahon kan mga magurang asin kan mga amigo sa kongregasyon an mga hoben na gamiton an saindang buhay sa paglilingkod ki Jehova. Ano an makakatabang sa sarong hoben na namumutan si Jehova na makagibo nin pinakamarahay na desisyon? Makikinabang siya kun babasahon niya an Efeso 5:15-17 asin huhurop-hurupon iyan. (Basahon.) Pagkatapos na mabasa an mga bersikulong ini, puwedeng haputon kan sarong hoben an saiyang sadiri: ‘Ano “an kabutan ni Jehova”? Anong desisyon an makakapaugma sa saiya? Anong desisyon sa buhay an makakatabang sa sako na magamit ko sa pinakamarahay an sakong panahon?’ Tandaan, “an mga aldaw maraot,” asin an sistemang ini na pinamamahalaan ni Satanas madali nang matapos. Madunong nanggad kun gagamiton ta an satong buhay sa paaging makakapaugma ki Jehova.

6. Ano an pinili ni Maria, asin taano ta madunong iyan?

⁶ Magbugtak nin tamang mga priyoridad. Kun minsan, tanganing magamit ta sa pinakamarahay an satong panahon kaipuhan tang magpili sa duwang aktibidad na parehong bako man sala. Mahihiling ta an puntong iyan sa pamilyar na pagkasaysay sa Bibliya manungod sa pagbisita ni Jesus sa harong ni Maria saka ni Marta. Siguradong ugmahon si Marta na istimaron si Jesus bilang bisita, kaya naghanda siya nin kadakul na pagkakan. Miyentras tanto, inaprobetsaran man kan tugang niyang si Maria an pagbisitang ini kaya nagtukaw siya harani sa saiyang Kagurangnan asin nagdangog sa mga itinutukdo kaini. Siguradong marahayon an intensiyon ni Marta sa ginibo niya, pero sinabi ni Jesus na “pinili [ni Maria] an pinakamarahay na parte.” (Luc. 10:38-42, nota sa ibaba) Pag-abot nin panahon, posibleng nalingawan na ni Maria an isinerbing pagkakan sa okasyon na idto, pero siguradong dai niya nalingawan an mga nanudan niya ki Jesus. Kun paanong pinahalagahan na marhay ni Maria an halipot na panahon na iyan na makaibanan si Jesus, pinapahalagahan ta man na marhay an satong panahon na makaibanan si Jehova. Paano ta magagamit sa pinakamarahay an panahon na iyan?

7. Taano ta maninigong tawan ta nin panahon an pagpamibi, pag-adal, asin paghurop-hurop?

⁷ Tandaan na an pamibi, pag-adal, asin paghurop-hurop kabtang kan satong pagsamba. Pag namimibi kita, nakikikomunikar kita sa satong Ama sa langit, na namumutan kitang marhay. (Sal. 5:7) Pag nag-aadal kita nin Bibliya, nagkukua kita nin “kaaraman manungod sa Diyos,”  an Gikanan kan gabos na kadunungan. (Tal. 2:1-5) Pag naghuhurop-hurop kita, pinag-iisipan ta an marahayon na mga kuwalidad ni Jehova pati na an saiyang makangangalas na katuyuhan sa gabos na linalang asin kun paano kita mahiro kauyon kan katuyuhan na iyan. Iyan an pinakamarahay na paagi na magagamit ta an satong panahon. Pero paano ta magagamit sa pinakamarahay an satong limitadong panahon?

8. Anong leksiyon an manunudan ta ki Jesus sa kun paano niya ginamit an saiyang panahon sa kaawagan?

⁸ Kun posible, pumili nin tuninong na lugar. Pag-isipan an halimbawa ni Jesus. Bago niya pinunan an saiyang ministeryo digdi sa daga, 40 aldaw siyang nasa kaawagan. (Luc. 4:1, 2) Sa tuninong na lugar na idto, namibi si Jesus ki Jehova asin naghurop-hurop kan kabutan kan saiyang Ama para sa saiya. Siguradong nakatabang iyan ki Jesus na magin andam sa mga pagbalo na madali na niyang agihan. Ano an manunudan ta sa halimbawa ni Jesus? Kun dakul kamo sa pamilya, tibaad bako pirming posible na makahanap ka nin tuninong na lugar sa harong nindo. Sa arog kaiyan na sitwasyon, puwede kang maghanap nin tuninong na lugar sa luwas. Arog kaiyan an ginigibo ni Julie pag gusto niyang magtao nin panahon para ki Jehova sa pamibi. Nakaistar sinda kan agom niya sa sadit na apartment sa France kaya dipisil magsolo, na dai nadidisturbo. “Kaya nagduduman ako sa park aroaldaw,” an sabi ni Julie. “Duman nakakapagsolo ako, nakakapokus, asin talagang nakakaulay ko si Jehova.”

9. Dawa ngani sibot na marhay, paano ipinahiling ni Jesus na pinapahalagahan niya an saiyang relasyon ki Jehova?

⁹ Sibot na marhay si Jesus. Sa ministeryo niya digdi sa daga, sinusundan siya kan mga tawo sa mga lugar na dinudumanan niya, asin gabos sinda gustong matawan nin atensiyon. Sa sarong pagkakataon, “an mga tawo sa bilog na siyudad nagkatiripon sa may pintuan” tanganing mahiling siya. Dawa arog kaiyan, naggibo si Jesus nin paagi para magkaigwa nin panahon na mamibi ki Jehova. Bago magsirang an aldaw, nakahanap siya nin “sarong puwerang lugar” na diyan nakapagtao siya nin panahon na makaibanan an saiyang Ama.—Mar. 1:32-35.

10-11. Uyon sa Mateo 26:40, 41, anong napapanahon na sadol an itinao ni Jesus sa saiyang mga disipulo sa hardin nin Getsemane, pero ano an nangyari?

¹⁰ Sa huring banggi kan buhay ni Jesus digdi sa daga, kan papatapos na an ministeryo niya, naghanap giraray siya nin tuninong na lugar na diyan makakahurop-hurop siya asin makakapamibi. Nahiling niya na tamang-tama para diyan an hardin nin Getsemane. (Mat. 26:36) Duman, tinawan ni Jesus an mga disipulo niya nin nagkapirang napapanahon na sadol manungod sa pamibi.

¹¹ Pag-isipan an nangyari. Kan mag-abot sinda sa hardin nin Getsemane, banggihon na kaidto, tibaad lampas nang matanga. Nakiulay si Jesus sa mga apostol na “padagos na magbantay,” dangan naghali siya para mamibi. (Mat. 26:37-39) Pero mantang namimibi siya, napaturog sinda.  Kan manumpungan niya sindang nagtuturog, sinabihan giraray sinda ni Jesus: “Padagos kamong magbantay asin padagos na mamibi.” (Basahon an Mateo 26:40, 41.) Nahiling niya na grabe an stress ninda saka pagal-pagal. Mapagmalasakit na sinabi ni Jesus na “an laman maluya.” Duwang beses pang naghali si Jesus para mamibi, asin sa kada pagbalik niya nanunumpungan niya an saiyang mga disipulo na nagtuturog imbes na namimibi.—Mat. 26:42-45.

12. Ano an puwede tang gibuhon pag stress kitang marhay o pagal-pagal para mamibi?

¹² Magpili nin tamang panahon. Kun minsan tibaad pagmati ta stress kitang marhay o pagal-pagal para mamibi. Kun nangyari na man iyan sa saimo, dai ka nagsosolo. Ano an puwede mong gibuhon? Nanumpungan kan nagkapirang nakatudan nang mamibi ki Jehova bago magturog na kapaki-pakinabang kun matao sinda nin panahon na mamibi nin medyo mas amay pa kun sain bako pa sindang gayong pagal. Nahiling kan iba na nakakatabang man an saindang posisyon pag namimibi. Pero, paano kun haditon ka o pinangluluyahan na marhay nin buot kaya nasasakitan kang mamibi? Sabihon ki Jehova kun ano an namamatian mo. Makakasigurado ka na nasasabutan iyan kan satong mahihirakon na Ama.—Sal. 139:4.

13. Paano puwedeng makadisturbo an mga electronic device sa itinatao tang panahon para ki Jehova?

¹³ Hinguwahon na dai madisturbo pag nag-aadal. Mapapakusog ta an satong relasyon ki Jehova bako lang paagi sa pamibi. An pag-adal kan Tataramon nin Diyos asin pag-atender sa mga pagtiripon kan kongregasyon makakatabang man sato na magin mas harani sa Diyos. May magigibo ka daw para magamit mo sa pinakamarahay an saimong oras para sa pag-adal asin sa mga pagtiripon kan kongregasyon? Haputon an sadiri, ‘Ano sa parati an nakakawara kan konsentrasyon ko sa mga pagtiripon o pag nag-aadal ako?’ Iyan daw mga apod, email, o text message sa saimong cellphone o sa iba pang electronic device? Sa ngunyan bilyon-bilyon an naggagamit kan kapaki-pakinabang na mga gamit na iyan. Sinasabi kan nagkapirang parasiyasat na an pagkaigwa sana nin cellphone sa may kataid mo makakaagaw na sa konsentrasyon mo. “Dai ka makakapagpokus sa ginigibo mo,” an sabi nin sarong propesor sa sikolohiya. “Nasa ibang bagay an isip mo.” Parati kitang pinapagirumdom bago an mga asembleya asin kumbensiyon na i-adjust an satong mga gadyet sa setting na dai makakadisturbo sa iba. Magigibo ta man daw iyan pag nagsosolo kita tanganing an satong mga gadyet dai  makadisturbo sa sato asin makaabala sa panahon ta para ki Jehova?

14. Sigun sa Filipos 4:6, 7, paano kita matatabangan ni Jehova na makapagpokus?

¹⁴ Hagadon ki Jehova na tabangan kang makapagpokus. Pag naririsa mo na naglalagaw-lagaw an isip mo mantang nag-aadal ka o nasa pagtiripon kan kongregasyon, hagadon ki Jehova na tabangan ka. Kun may mga ikinakahadit ka, tibaad bakong madali na dai nguna iyan isipon asin magpokus sa espirituwal na mga bagay, pero mahalagang marhay na gibuhon mo iyan. Mamibi na tawan ka nin katuninungan na magbabantay bako lang sa saimong puso kundi pati man sa saimong “kaisipan.”—Basahon an Filipos 4:6, 7.

15. Ano an saro sa pakinabang kan pagtao nin panahon para ki Jehova?

¹⁵ Makikinabang kang marhay kun matao ka nin panahon para makipag-ulay, magdangog, asin maghurop-hurop manungod ki Jehova. Paano? Inot, makakagibo ka nin mas marahay na mga desisyon. Sinisigurado sa sato kan Bibliya na “an saro na naglalakaw kaiba kan mga madunong magigin madunong.” (Tal. 13:20) Kaya mantang nagtatao ka nin panahon sa Gikanan nin kadunungan, si Jehova, magigin mas madunong ka. Mas masasabutan mo kun paano siya mapapaugma asin kun paano malilikayan na makagibo nin mga desisyon na makakapamundo sa saiya.

16. Paano an pagtao ta nin panahon para ki Jehova nakakatabang sa sato na magin mahusay na paratukdo?

¹⁶ Ikaduwa, magigin mas mahusay kang paratukdo. Pag may tinutukduan kita sa Bibliya, an saro sa pinakaimportanteng pasuhan ta iyo na tabangan siya na magin harani ki Jehova. Pag mas parati kitang nakikipag-ulay sa satong Ama sa langit, magigin mas makusog man an satong pagkamuot sa saiya asin magigin mas epektibo kita sa pagtukdo sa satong mga tinutukduan kun paano niya mamumutan si Jehova. Arog kaiyan si Jesus. Ilinadawan niya si Jehova bilang sarong marahayon asin mamumuton na Ama, kaya nakapahiro iyan sa saiyang maimbod na mga parasunod na mamutan man si Jehova.—Juan 17:25, 26.

17. Taano ta an pamibi asin pag-adal nakakatabang sato na mapakusog an satong pagtubod?

¹⁷ Ikatulo, magigin mas makusog an saimong pagtubod. Pag-isipan an nagigin resulta pag naghahagad ka sa Diyos nin paggiya, pagranga, o suporta. Sa kada sinisimbag ni Jehova an mga pamibi mong iyan, nagkukusog man an saimong pagtubod sa saiya. (1 Juan 5:15) Ano pa an makakapakusog sa saimong pagtubod? An personal na pag-adal. Tandaan na “nagkakaigwa nin pagtubod pagkatapos na madangog an mensahe.” (Roma 10:17) Pero, tanganing magkaigwa nin makusog na pagtubod, bako lang basta pagkua nin kaaraman an kaipuhan. Ano pa an kaipuhan tang gibuhon?

18. Magtao nin halimbawa kun taano ta kaipuhan tang maghurop-hurop.

 ¹⁸ Kaipuhan tang hurop-hurupon an mga nanunudan ta. Pag-isipan an nagin eksperyensiya kan kagsurat kan Salmo 77. Napurisaw siyang marhay ta pagmati niya dai na siya inuuyunan ni Jehova saka an mga kapwa niya Israelita. Dai siya makaturog ta pigpapara-isip niya iyan. (Bersikulo 2-8) Ano an ginibo niya? Sinabi niya ki Jehova: “Huhurop-hurupon ko an gabos mong ginigibo asin iisip-isipon an saimong mga ginibo.” (Bersikulo 12) Iyo, aram na marhay kan salmista an mga ginibo kaidto ni Jehova para sa saiyang banwaan, pero nahahadit siya: “Nalingaw na daw an Diyos na ipahiling an saiyang kabuutan, o napara na daw an saiyang pagkahirak huli sa saiyang kaanggutan?” (Bersikulo 9) Hinurop-hurop kan salmista an mga ginibo ni Jehova asin an katunayan na kaidto pinahilingan na sinda kan Diyos nin pagkahirak asin pagmalasakit. (Bersikulo 11) An resulta? Nagin kumbinsido an salmista na dai papabayaan ni Jehova an Saiyang banwaan. (Bersikulo 15) Sa kaparehong paagi, magigin mas makusog man an saimong pagtubod mantang hinuhurop-hurop mo an mga ginibo na ni Jehova para sa saiyang banwaan asin an mga ginibo na niya para saimo.

19. Paano pa kita nakikinabang sa pagtao ta nin panahon para ki Jehova?

¹⁹ Ikaapat, asin an pinakaimportante, magigin makusog an saimong pagkamuot ki Jehova. Urog sa iba pang mga kuwalidad, an pagkamuot mapahiro sa saimo na sunudon si Jehova, na gumibo nin mga pagsasakripisyo para mapaugma siya, asin tagalan an ano man na pagbalo. (Mat. 22:37-39; 1 Cor. 13:4, 7; 1 Juan 5:3) An pagkaigwa nin dayupot asin mamumuton na pakikiamigo ki Jehova iyo nanggad an pinakaimportante sa buhay ta!—Sal. 63:1-8.

20. Ano an mga puwede mong gibuhon tanganing magkaigwa ka nin panahon para ki Jehova?

²⁰ Tandaan na an pamibi, pag-adal, asin paghurop-hurop kabtang kan satong pagsamba. Arog ni Jesus, maghanap nin tuninong na lugar kun sain makakatao ka nin panahon para ki Jehova. Halion an mga puwedeng makadisturbo. Hagadon ki Jehova na tabangan kang makapagpokus pag naggigibo ka nin espirituwal na mga aktibidad. Kun gagamiton mo ngunyan sa pinakamarahay an saimong panahon, bebendisyunan ka ni Jehova nin buhay na daing katapusan sa bagong kinaban nin Diyos.—Mar. 4:24.