1-2. (a) Nuarin ta lalo nang nagigirumduman an satong mahal sa buhay na nagadan? (b) Ano an pinunan ni Jesus kan banggi bago siya magadan?

 DAWA haloy nang nagadan an satong mga mahal sa buhay, nagigirumduman ta pa man giraray sinda. Nagigirumduman ta sinda lalo na sa anibersaryo kan pagkagadan ninda.

² Kada taon, kaiba kita sa minilyon sa bilog na kinaban na nagtitiripon sa anibersaryo kan kagadanan kan saro na namumutan tang marhay—si Jesu-Cristo. (1 Ped. 1:8) Nagtitiripon kita tanganing girumdumon an saro na nagtao kan saiyang buhay bilang pantubos para iligtas kita sa kasalan asin kagadanan. (Mat. 20:28) Sa katunayan, gusto ni Jesus na girumdumon kan saiyang mga parasunod an saiyang kagadanan. Kan banggi bago siya magadan, pinunan niya an sarong espesyal na pamanggihan asin ipinagbuot: “Padagos nindong gibuhon ini sa paggirumdom sa sako.”—Luc. 22:19.

3. Ano an pag-uulayan ta sa artikulong ini?

³ Sa Memoryal kan kagadanan ni Cristo, igwa nin sarong sadit na bilang nin mga nag-aatender na may paglaom na mabuhay sa langit. Pero presente man diyan an milyon-milyon na may paglaom na mabuhay sa daga. Sa artikulong ini, pag-uulayan ta kun taano ta gustong-gusto kan duwang grupong iyan na mag-atender sa Memoryal kada taon. Pag-uulayan ta man kun paano kita nakikinabang sa pag-atender diyan. Inot tang pag-ulayan an nagkapirang rason kun taano ta nag-aatender an mga linahidan.

4. Sa Memoryal, taano ta nagkakakan kan tinapay asin nag-iinom kan arak an mga linahidan?

⁴ Kada taon, hinahalat-halat kan mga linahidan an pag-atender  sa Memoryal bilang mga nakikikabtang sa mga emblema. Taano ta angay sinda na magkakan kan tinapay asin mag-inom kan arak? Para masimbag iyan, pag-isipan an nangyari kan huring banggi ni Jesus digdi sa daga. Pagkatapos kan pamanggihan kan Paskuwa, pinunan ni Jesus an inaapod na an Pamanggihan kan Kagurangnan. Ipinasa niya an tinapay asin an arak sa saiyang 11 maimbod na apostol asin sinabihan sinda na kakanon asin inumon iyan. Sinabi ni Jesus sa sainda an manungod sa duwang tipan o kasunduan—an bagong tipan asin an tipan para sa Kahadian. * (Luc. 22:19, 20, 28-30) Paagi sa mga tipan na iyan, nagin posible para sa mga apostol asin sa iba pa na may limitadong bilang na magin mga hadi asin saserdote sa langit. (Kap. 5:10; 14:1) An linahidan na mga natatada * sana, na kaiba sa duwang tipan na iyan, an puwedeng magkakan kan tinapay asin mag-inom kan arak sa Memoryal.

5. Ano an aram kan mga linahidan manungod sa paglaom na itinao sa sainda?

⁵ Uni pa an sarong rason kun taano ta gustong-gusto kan mga linahidan na mag-atender sa Memoryal: An okasyon na ini nagtatao sainda nin oportunidad na hurop-hurupon an saindang paglaom. Tinawan sinda ni Jehova nin pambihirang paglaom—an magkaigwa nin imortal asin daing kalapaan na buhay sa langit, maglingkod kaiba kan pinamuraway na si Jesu-Cristo saka kan iba pa na kabilang sa 144,000 asin, urog sa gabos, an mahiling mismo an Diyos na Jehova! (1 Cor. 15:51-53; 1 Juan 3:2) Aram kan mga linahidan na inimbitaran sinda na magkaigwa kan siring na mga pribilehiyo sa langit. Pero tanganing akuon sa langit, dapat na magdanay sindang maimbod sagkod sa kagadanan. (2 Tim. 4:7, 8) Nagtatao nin dakulang kaugmahan sa mga linahidan an paghurop-hurop kan saindang paglaom sa langit. (Tito 2:13) Kumusta man an “ibang mga karnero”? (Juan 10:16) Ano an nagkapirang rason kun taano ta nag-aatender sinda sa Memoryal?

6. Taano ta nag-aatender sa Memoryal kada taon an ibang mga karnero?

⁶ Nag-aatender sa Memoryal an ibang mga karnero bako para makikabtang sa mga emblema kundi bilang mga nagmamasid. Kan 1938, inimbitaran na mag-atender sa Memoryal sa kainot-inuting pagkakataon partikularmente idtong mga may paglaom na mabuhay sa daga. An The Watchtower na Marso 1, 1938, nagsabi: “Tama sana na magin presente an [ibang mga karnero] sa siring na pagtiripon asin magmasid. . . . Panahon man iyan para sa sainda na mag-ugma.” Arog nin inimbitaran na mga bisita na maugmang nagmamasid sa sarong kasal, an ibang mga karnero maugma man na magin presente bilang mga nagmamasid sa Memoryal.

7. Taano ta inaabangan kan ibang mga karnero an pahayag sa Memoryal?

⁷ An ibang mga karnero man hinuhurop-hurop an saindang paglaom. Inaabangan ninda an pahayag sa Memoryal huling ipinapaliwanag na marhay diyan an gigibuhon ni Cristo saka kan saiyang 144,000 na kairibang tagapamahala para sa maimbod na mga tawo durante kan Sangribong Taon na Paghadi. Sa panginginot kan saindang Hading si Jesu-Cristo, an mga tagapamahalang iyan sa langit matabang para gibuhon na paraiso an daga asin darahon sa pagkaperpekto an masinunod na mga tawo. Nakakaugmang marhay para sa minilyon na nagmamasid sa Memoryal na imahinaron na nauutob na an mga propesiya sa Bibliya, arog kan mababasa sa Isaias 35:5, 6; 65:21-23;  asin Kapahayagan 21:3, 4. Paagi sa pag-imahinar kan saindang sadiri na yaon na sinda sa bagong kinaban kaiba an saindang mga mahal sa buhay, pinapakusog ninda an saindang paglaom sa maabot asin an saindang determinasyon na nungkang magpundo sa paglilingkod ki Jehova.—Mat. 24:13; Gal. 6:9.

8. Ano an saro pang rason kun taano ta nag-aatender sa Memoryal an ibang mga karnero?

⁸ Pag-isipan an saro pang rason kun taano ta nag-aatender sa Memoryal an ibang mga karnero. Gusto nindang ipahiling an saindang pagkamuot asin suporta sa mga linahidan. Ihinula kan Tataramon nin Diyos na magkakaigwa nin dayupot na pag-ibanan an mga linahidan asin an mga may paglaom na mabuhay digdi sa daga. Paano? Pag-ulayan ta an nagkapirang halimbawa.

9. Anong paglaladawan an ipinapahiling kan propesiya sa Zacarias 8:23 manungod sa namamatian kan ibang mga karnero sa mga linahidan?

⁹ Basahon an Zacarias 8:23. Ipinapahiling kan propesiyang ini an magayunon na paglaladawan manungod sa namamatian kan ibang mga karnero sa saindang linahidan na mga tugang. An sinambit diyan na “sarong Judio” asin “nindo” nanunungod sa saro sanang grupo—an linahidan na mga natatada. (Roma 2:28, 29) An “sampulong lalaki hali sa gabos na lengguwahe kan mga nasyon” nagrerepresentar sa ibang mga karnero. “Makapot sinda nin higot”—maimbod sindang makikisumaro—sa mga linahidan asin maiba sainda sa dalisay na pagsamba. Kaya sa banggi kan Memoryal, ipinapahiling kan ibang mga karnero an saindang pagigin dayupot sa mga linahidan paagi sa pagigin presente kaiba ninda.

10. Ano an ginibo ni Jehova bilang kautuban kan propesiya sa Ezekiel 37:15-19, 24, 25?

¹⁰ Basahon an Ezekiel 37:15-19, 24, 25. Bilang kautuban kan propesiyang ini, pinangyari ni Jehova na pagkasararuon an mga linahidan saka an ibang mga karnero. Sinambit sa propesiya an manungod sa duwang pidaso nin kahoy. An mga may paglaom na mabuhay sa langit iyo an irinerepresentar kan pidaso nin kahoy “para ki Juda” (an tribo kun sain pinili an mga hadi kan Israel), asin an mga may paglaom na mabuhay sa daga iyo an irinerepresentar kan pidaso nin kahoy “ni Efraim.” * Pagsasaruon ni Jehova an duwang grupong iyan tangani na sinda magin “sarong pidaso nin kahoy.” Nangangahulugan ini na maglilingkod sinda na may pagkasararo sa pamamahala kan sarong Hadi, si Jesu-Cristo. Kada taon, nag-aatender sa Memoryal an mga linahidan saka an ibang mga karnero, bako bilang duwang magkalain na grupo, kundi bilang “sarong aripumpon” sa panginginot nin “sarong pastor.”—Juan 10:16.

11. Sa anong panginot na paagi sinusuportaran kan “mga karnero” na sinambit sa Mateo 25:31-36, 40 an mga tugang ni Cristo?

¹¹ Basahon an Mateo 25:31-36, 40. An “mga karnero” sa parabulang ini nagrerepresentar sa mga matanos sa panahon kan katapusan na igwa kan paglaom na mabuhay digdi sa daga—buot sabihon, an ibang mga karnero. Maimbod nindang sinusuportaran an natatadang linahidan nin espiritu na mga tugang ni Cristo panginot na paagi sa pagtabang sa sainda na mautob an dakulaon na responsabilidad—an paghuhulit asin paggibo nin disipulo sa bilog na kinaban.—Mat. 24:14; 28:19, 20.

12-13. Sa ano pang mga paagi ipinapahiling kan ibang mga karnero an saindang suporta sa mga tugang ni Cristo?

¹² Kada taon sa mga semana bago an Memoryal, ipinapahiling kan ibang mga karnero an saindang suporta sa mga tugang ni Cristo paagi sa lubos na pakikikabtang sa pambilog na kinaban na kampanya nin pag-imbitar sa mga interesado na mag-atender sa Memoryal. (Hilingon an kahon na “ Patiinot Ka Daw na Nagpaplano Para  sa Panahon nin Memoryal?”) Nagtatabang man sinda sa paggibo kan gabos na kinakaipuhan na areglo tanganing maiselebrar kan lambang kongregasyon sa bilog na kinaban an Memoryal, dawa ngani kadaklan na kongregasyon mayo man nin linahidan. Nauugmang marhay an ibang mga karnero na suportaran an mga tugang ni Cristo sa arog kaiyan na paagi. Aram kan mga karnerong ini na ibinibilang ni Jesus na an ginigibo ninda para sa saiyang linahidan na mga tugang garo man sana ginigibo ninda para sa saiya.—Mat. 25:37-40.

¹³ Ano pa an pira sa mga rason kun taano ta gabos kita nag-aatender sa Memoryal ano man an satong paglaom?

14. Paano ipinahiling ni Jehova asin ni Jesus an saindang dakulang pagkamuot para sa sato?

¹⁴ Nagpapasalamat kita sa pagkamuot na ipinahiling sa sato ni Jehova asin ni Jesus. Ipinahiling ni Jehova sa sato an saiyang pagkamuot sa dakul na paagi, pero saro diyan an nangungurog sa gabos. Ipinahiling kan satong Diyos an saiyang pinakadakulang kapahayagan nin bakong makasadiring pagkamuot kan isugo niya an saiyang namumutan na marhay na Aki tanganing magsakit asin magadan para sa sato. (Juan 3:16) Asin ipinahiling man ni Jesus an saiyang dakulang pagkamuot paagi sa gikan sa buot na pagtao kan saiyang buhay para sa sato. (Juan 15:13) Dai ta nanggad mababalusan si Jehova asin si Jesus sa pagkamuot na ipinahiling ninda sa sato. Pero maipapahiling ta an satong pasasalamat paagi sa kun paano ta ginagamit an satong buhay kada aldaw. (Col. 3:15) Asin nag-aatender kita sa Memoryal huling gusto tang girumdumon an saindang pagkamuot sa sato asin ipahiling man an satong pagkamuot sa sainda.

15. Taano ta parehong nagpapasalamat na marhay an mga linahidan asin an ibang mga karnero sa regalong pantubos?

¹⁵ Pinapasalamatan tang marhay an regalong pantubos. (Mat. 20:28) Mahalagang marhay para sa mga linahidan an pantubos huling paagi kaiyan nagin posible an saindang magayunon na paglaom. Huli sa saindang pagtubod sa atang ni Cristo, ipinahayag sinda ni Jehova na matanos asin inampon bilang mga aki niya. (Roma 5:1; 8:15-17, 23) Nagpapasalamat man an ibang mga karnero sa pantubos. Huli sa saindang pagtubod sa pinabulos na dugo ni Cristo, igwa sinda nin malinig na kamugtakan sa atubangan nin Diyos, puwede sindang makatao sa saiya nin sagradong paglilingkod, asin igwa sinda nin paglaom na makabalyo ‘hali sa dakulang kasakitan.’ (Kap. 7:13-15) Paagi sa pagigin presente sa Memoryal kada taon, parehong naipapahiling kan linahidan asin kan ibang mga karnero an saindang pasasalamat sa pantubos.

16. Ano pa an sarong rason kaya nag-aatender kita sa Memoryal?

¹⁶ An saro pang rason kaya nag-aatender kita sa Memoryal huling gusto tang sunudon si Jesus. Ano man an satong paglaom sa maabot, gusto kan kada saro sato na sunudon an pagbuot na sinabi ni Jesus kan bangging punan niya an Memoryal: “Padagos nindong gibuhon ini sa paggirumdom sa sako.”—1 Cor. 11:23, 24.

17. Paano nakakatabang sa sato an Memoryal na mas maparani kita ki Jehova?

¹⁷ Mas napaparani kita ki Jehova. (Sant. 4:8) Arog kan nanudan ta, an Memoryal nagtatao sato nin oportunidad na hurop-hurupon an paglaom na itinao sa sato ni Jehova asin isip-isipon an dakulang pagkamuot na ipinahiling niya sa sato. (Jer. 29:11; 1 Juan 4:8-10) Pag hinuhurop-hurop ta an satong siguradong paglaom sa maabot asin an nagdadanay na pagkamuot nin Diyos sa sato, pinapakusog ta an satong pagkamuot asin pakikiamigo ki Jehova.—Roma 8:38, 39.

18. An paghurop-hurop sa halimbawa ni Jesus nakakadagka sa sato na gibuhon an ano?

 ¹⁸ Nadadagka kita na arugon an halimbawa ni Jesus. (1 Ped. 2:21) Sa mga aldaw bago an Memoryal, hinuhurop-hurop ta an mga pagkasaysay sa Bibliya manungod sa huring semana ni Jesus sa daga, sa saiyang kagadanan, asin pagkabuhay liwat. Dangan sa banggi kan Memoryal, ipinapagirumdom sa sato kan pahayag an pagkamuot ni Jesus para sa sato. (Efe. 5:2; 1 Juan 3:16) Pag binabasa ta an manungod sa mapagsakripisyong halimbawa ni Jesus asin hinuhurop-hurop iyan, nadadagka kita na “padagos na maglakaw arog kan paglakaw kan sarong idto.”—1 Juan 2:6.

19. Paano kita magdadanay sa pagkamuot nin Diyos?

¹⁹ Mas lalo pa kitang nagigin determinado na magdanay sa pagkamuot nin Diyos. (Jud. 20, 21) Magdadanay kita sa pagkamuot nin Diyos kun gigibuhon ta an satong pinakamakakaya na sunudon siya, pakangbanalon an saiyang pangaran, asin paugmahon an puso niya. (Tal. 27:11; Mat. 6:9; 1 Juan 5:3) An pagselebrar kan Memoryal nakakadagka sa sato na mas magin determinado na mamuhay sa kada aldaw sa paaging masasabi ta ki Jehova, ‘Gusto ko pong magdanay sa pagkamuot mo sagkod pa man!’

20. Anong marahayon na mga rason an igwa kita kaya nag-aatender kita sa Memoryal?

²⁰ An paglaom ta man mabuhay nin daing katapusan sa langit o sa daga, may marahayon kitang mga rason na mag-atender sa Memoryal. Kada taon pag nagtitiripon kita para mag-atender diyan, ginigirumdom ta an kagadanan kan saro na namumutan ta, si Jesu-Cristo. Urog sa gabos, ginigirumdom ta an pinakadakulang kapahayagan nin pagkamuot—an pagkamuot na ipinahiling ni Jehova sa sato paagi sa pagtao kan saiyang Aki bilang pantubos. Ngunyan na taon, gigibuhon an Memoryal sa banggi nin Biyernes, Abril 15, 2022. Namumutan ta si Jehova asin an saiyang Aki. Kaya sa anibersaryo kan kagadanan ni Jesus, mayo nang ibang mas importante sa sato kundi an magin presente sa Memoryal.