1-3. Anong mga bagay an puwedeng makapaluha sa mga lingkod ni Jehova?

 KASUARIN ka huring naghibi? Kun minsan, napapaluha kita dahil sa kaugmahan pero sa parati, napapahibi kita dahil sa grabeng kamunduan. Halimbawa, tibaad naghibi kita dahil sa pagkagadan nin sarong mahal sa buhay. An sister na si Lorilei na taga Estados Unidos nagsurat: “May mga panahon na grabe an namamatian kong kamunduan sa pagkagadan kan aki kong babayi. Pagmati ko pati mayong makakaranga sa sako. Sa mga panahon na iyan, dai ko aram kun baga makakayanan ko pa an grabeng kamunduan.” *

² Tibaad may iba pang mga dahilan kaya napapaluha kita. Sinabi kan payunir na taga Japan na si Hiromi: “Sa pana-panahon nadidisganar ako dahil sa kawaran nin interes kan mga tawo na nanunumpungan ko sa ministeryo. Kun minsan napapaluha ako mantang sinasabi ki Jehova na tabangan akong makanumpong nin saro na naghahanap nin katotoohan.”

³ Minsan daw nakakamati ka man nin arog kaiyan? Kadaklan sa sato iyo. (1 Ped. 5:9) Gusto tang “maglingkod ki Jehova nin may kagaya-gayahan,” pero tibaad naglilingkod kita sa saiya na may kaibang mga luha huli sa namamatian tang grabeng kamunduan, pagkadisganar, o huli sa inaagihan niyatong masakit na sitwasyon na diyan nababalo an satong kaimbudan sa Diyos. (Sal. 6:6; 100:2) Ano an puwede tang gibuhon pag nakakamati kita nin arog kaiyan?

4. Ano an pag-uulayan ta sa artikulong ini?

⁴ Makakanuod kita sa halimbawa ni Jesus. May panahon na nakamati man siya nin grabeng emosyon kaya “napaluha” siya. (Juan 11:35; Luc. 19:41; 22:44; Heb. 5:7) Pag-ulayan ta an mga  pangyayaring iyan. Aramon ta diyan kun ano an manunudan ta manungod ki Jesus asin sa saiyang Ama, si Jehova. Pag-uulayan ta man an mga puwede tang gibuhon pag may inaagihan kitang mga sitwasyon na nakakapaluha sa sato.

5. Ano an manunudan ta manungod ki Jesus sa Juan 11:32-36?

⁵ Tiglipot kaidto kan 32 C.E. kan magkahilang asin magadan an amigo ni Jesus na si Lazaro. (Juan 11:3, 14) May duwang tugang siyang babayi, si Maria saka si Marta, asin namumutan na marhay ni Jesus an pamilyang ini. Munduon na marhay an magtugang kan magadan an namumutan nindang tugang na si Lazaro. Gadan na si Lazaro kan magpasiring si Jesus sa baryo nin Betania kun sain nakaistar si Maria saka si Marta. Kan maaraman ni Marta na papaabot na si Jesus, dali-dali niyang sinabat ini. Isipa na sana an grabeng emosyon na namatian niya kan sinabi niya: “Kagurangnan, kun yaon ka lang digdi, dai kutana nagadan an tugang ko.” (Juan 11:21) Dangan kan nahiling ni Jesus si Maria saka an iba pa na naghihiribi, “napaluha” siya.—Basahon an Juan 11:32-36.

6. Taano ta naghibi si Jesus kan magadan si Lazaro?

⁶ Taano ta naghibi si Jesus kan magadan si Lazaro? An Insight on the Scriptures nagsasabi: “Huli sa pagkagadan kan amigo niyang si Lazaro asin an grabeng kamunduan na dara kaiyan sa mga tugang ni Lazaro, ‘nakamati si Jesus nin grabeng kulog asin napaluha.’” * Posibleng naiisip kaidto ni Jesus an kulog na namatian kan namumutan niyang amigong si Lazaro kan naghihilang ini asin tibaad naiimahinar niya an namatian ni Lazaro kan madali na ining magadan. Siguradong napaluha man si Jesus kan mahiling niya kun paano naapektaran na marhay si Maria saka si Marta sa pagkagadan kan saindang tugang. Kun nagadanan ka na nin dayupot na amigo o kapamilya, siguradong namatian mo man an arog kaiyan. Pag-isipan an tulong leksiyon na manunudan mo sa pangyayaring ini.

7. Ano an manunudan ta manungod ki Jehova sa mga luha ni Jesus para sa saiyang mga amigo?

⁷ Nasasabutan ni Jehova an namamatian mo.  Si Jesus “an eksaktong ladawan” kan saiyang Ama. (Heb. 1:3) Ipinahiling niya kun ano an namamatian kan saiyang Ama. (Juan 14:9) Kun nagadanan ka nin mahal sa buhay, makakasigurado ka na dai lang ni Jehova nahihiling an saimong kamunduan, namumundo man siyang marhay para sa saimo. Gusto niyang bulungon an puso mong nalugadan.—Sal. 34:18; 147:3.

8. Taano ta makakapagtiwala kita na bubuhayon liwat ni Jesus an mga mahal ta sa buhay?

⁸ Gusto ni Jesus na buhayon liwat an mga mahal mo sa buhay. Bago napahibi si Jesus, sinigurado niya ki Marta: “Mabangon an saimong tugang.” Tubod si Marta ki Jesus. (Juan 11:23-27) Bilang maimbod na parasamba ni Jehova, siguradong aram ni Marta an mga ginibong pagbuhay liwat kan mga propetang si Elias asin Eliseo pirang siglo na an nakaagi. (1 Ha. 17:17-24; 2 Ha. 4:32-37) Asin posibleng marhay na nabaretaan man niya an mga ginibong pagbuhay liwat ni Jesus. (Luc. 7:11-15; 8:41, 42, 49-56) Puwede ka man na magin kumbinsido na mahihiling mo giraray an mga mahal mo sa buhay na nagadan. An mga luha ni Jesus mantang rinaranga an nagmumundo niyang mga amigo patunay na gustong-gusto niya nang buhayon liwat an mga gadan!

9. Arog ni Jesus, paano mo matatabangan an mga nagmumundo? Magtao nin halimbawa.

⁹ Puwede mong matabangan an mga nagmumundo. Si Jesus dai lang naghibi kaiba ni Marta saka ni Maria kundi nagdangog man siya asin rinanga sinda. Puwede ta man gibuhon iyan sa mga nagmumundo. Si Dan, na sarong elder na taga Australia, nagsabi: “Kan magadan an agom ko, kaipuhan ko talaga nin tabang. Dakul na brother kaiba an mga agom ninda an yaon pirmi para lang magdangog sako. Pinabayaan lang ninda ako na iluwas an mga kamunduan ko saka okey lang sainda na maghibi ako. Tinabangan man ninda ako sa praktikal na paagi, arog nin paglinig kan awto ko, paggroseri, saka pagluto pag dai ko kayang gibuhon an mga iyan. Asin parati sindang namimibi kaibanan ako. Talagang tunay na mga amigo sinda saka mga tugang na ‘namumundag sa mga panahon nin kasakitan.’”—Tal. 17:17.

10. Anong pangyayari an mababasa sa Lucas 19:36-40?

¹⁰ Nag-abot kaidto si Jesus sa Jerusalem kan Nisan 9, 33 C.E. Kan padangadang na siya sa siyudad, nagkatiripon an dakul na tawo, asin mantang nag-aabante siya, may mga naglatag sa dalan kan saindang pang-ibabaw na mga bado na tanda kan pag-ako ninda sa saiya bilang saindang Hadi. Siguradong maugmang pangyayari idto. (Basahon an Lucas 19:36-40.) Kaya posibleng dai inaasahan kan mga disipulo niya an sunod na nangyari. “Kan harani na [si Jesus] sa siyudad, pinagmasdan niya ini asin tinangisan.” Mantang nagluluha, ihinula ni Jesus an makatatakot na kaaabtan kan mga nakaistar sa Jerusalem.—Luc. 19:41-44.

11. Taano ta tinangisan ni Jesus an mga nakaistar sa Jerusalem?

¹¹ Namundong marhay si Jesus dahil aram niya na maski ngani maugma siyang inako kan mga kahimanwa niya, dai aakuon kan kadaklan sa sainda an mensahe kan Kahadian. Bilang resulta, malalaglag an Jerusalem asin dadarahon na bihag an siisay man na Judio na makakaligtas sa pagkalaglag kan siyudad. (Luc. 21:20-24) Nakakamundo nanggad, arog kan inasahan ni Jesus, isinikwal siya kan kadaklan. Ano an reaksiyon kan kadaklan na tawo sa mensahe kan Kahadian sa saindong lugar? Kun dikit sana an naghihimati sa paghihinguwa mo na itukdo an katotoohan, ano an manunudan mo sa mga luha ni Jesus? Pag-isipan an tulo pang leksiyon.

12. Ano an manunudan ta manungod ki Jehova sa mga luha ni Jesus para sa saiyang mga kahimanwa?

 ¹² Nagmamalasakit si Jehova sa mga tawo. Ipinapagirumdom sa sato kan mga luha ni Jesus na nagmamalasakit na marhay si Jehova sa mga tawo. “Habo niyang malaglag an siisay man, imbes, gusto niya na an gabos makapagsulsol.” (2 Ped. 3:9) Sa ngunyan maipapahiling niyato na namumutan ta an satong kapwa paagi sa padagos na pagsasakripisyo asin paghihinguwa na itukdo sa sainda an maugmang bareta.—Mat. 22:39.

13-14. Paano ipinahiling ni Jesus na nagmamalasakit siya sa mga tawo, asin paano ta man iyan maipapahiling?

¹³ Nagmaigot na marhay si Jesus sa ministeryo. Ipinahiling niya na namumutan niya an mga tawo paagi sa padagos na pagtukdo sa sainda sa lambang pagkakataon. (Luc. 19:47, 48) Ano an nagpahiro sa saiya na gibuhon iyan? Nahirak si Jesus sa sainda. May mga pagkakataon kaidto na dakulon an gustong magdangog ki Jesus saka sa saiyang mga disipulo kaya “maski an magkakan dai na ninda magibo.” (Mar. 3:20) Andam man na maghulit si Jesus dawa banggi—an oras na mas kumbenyente sa sarong tawo na gustong magdangog sa saiya. (Juan 3:1, 2) Dai nagin mga disipulo ni Jesus an kadaklan sa mga inot na nakadangog kan mensahe niya, pero gabos sinda lubos na napatotoohan. Sa ngunyan man, gusto tang tawan nin pagkakataon an gabos na makadangog kan maugmang bareta. (Gibo 10:42) Para magibo iyan, tibaad kaipuhan tang baguhon an pamamaagi ta nin paghuhulit.

¹⁴ Magin andam na gumibo nin kinakaipuhan na mga pagbabago. Kun dai ta buburubaguhon an oras kan satong paghuhulit, tibaad dai ta manumpungan an mga gustong makanuod kan maugmang bareta. Sinabi kan payunir na si Matilda: “Pinurbaran mi ni agom na maghulit sa iba-ibang oras. Pag amay na aga, naghuhulit kami sa mga lugar nin negosyo. Pag udto na, kun sain an kadaklan na tawo nasa luwas, nagka-cart witnessing kami. Pag hapon na, mas dakul kaming nanunumpungan na tawo sa saindang harong.” Imbes na maghulit sa mga oras sana na kumbenyente para sa sato, dapat na andam kita na baguhon an satong iskedyul nin paghuhulit para mas dakul na tawo an makaulay ta. Kun gigibuhon ta iyan, siguradong mauugma si Jehova.

15. Sigun sa Lucas 22:39-44, ano an nangyari kan huring banggi bago magadan si Jesus?

¹⁵ Matangang banggi kaidto kan Nisan 14, 33 C.E. kan magduman si Jesus sa hardin nin Getsemane. Diyan, sinabi niya ki Jehova an gabos na nasa puso niya. (Basahon an Lucas 22:39-44.) Kan mga oras na iyan “nagpahayag si [Jesus] nin mga pagngayo-ngayo . . . na may kaibang makusog na mga pag-agrangay saka mga luha.” (Heb. 5:7) Ano an ipinamibi ni Jesus kan huring bangging iyan bago siya magadan? Ipinamibi niya na tawan siya nin kusog na magdanay na maimbod ki Jehova asin magibo an saiyang kabutan. Dinangog ni Jehova an udok sa pusong pamibi ni Jesus asin nagsugo siya nin anghel para pakusugon an saiyang Aki.

16. Taano ta haditon si Jesus kan namimibi siya sa hardin nin Getsemane?

¹⁶ Siguradong naghibi si Jesus mantang namimibi sa hardin nin Getsemane huling haditon siya ta ibinibilang siya kan mga tawo na sarong paralanghad. Nasa isip man niya an dakulaon niyang responsabilidad—an ibindikar an pangaran kan saiyang Ama. Kun nasa masakit kang sitwasyon na diyan nababalo an kaimbudan mo ki Jehova, ano an manunudan mo sa mga luha ni Jesus? Pag-isipan an tulo pang leksiyon.

17. Ano an manunudan ta manungod ki Jehova sa simbag niya sa udok na mga pamibi ni Jesus?

¹⁷ Dinadangog ni Jehova an saimong mga pagngayo-ngayo. Dinangog ni Jehova an udok na pakiulay ni Jesus. Taano? Huling an pinakaimportante ki Jesus iyo na magdanay na maimbod sa saiyang Ama asin ibindikar an Saiyang pangaran. Kun iyan man an pinakaimportante sa sato, sisimbagon niya an satong mga pamibi asin paghagad nin tabang.—Sal. 145:18, 19.

18. Taano ta masasabi tang sarong maduminamay na amigo si Jesus?

¹⁸ Nasasabutan ni Jesus an namamatian mo. Pag nahahadit kita, nakakagian sa buot pag rinaranga kita nin sarong maduminamay na amigo lalo na kun nakaeksperyensiya man siya kan inaagihan ta. Arog kaiyan na amigo si Jesus. Aram niya an pagmati nin sarong pinangluluyahan saka nangangaipo nin tabang. Nasasabutan niya na may mga kaluyahan kita, asin sisiguraduhon niya na mag-aako kita kan suporta na kaipuhan ta “sa tamang panahon.” (Heb. 4:15, 16)  Inako ni Jesus an tabang kan anghel sa hardin nin Getsemane, kaya dapat andam man kita na akuon an tabang na itinatao ni Jehova, iyan man paagi sa sarong publikasyon, video, pahayag, o nakakapakusog na pagdalaw nin sarong elder o maygurang na amigo.

19. Paano ka magkakaigwa nin kusog pag nag-aagi ka nin masakit na sitwasyon na nakakabalo kan kaimbudan mo sa Diyos? Magtao nin halimbawa.

¹⁹ Tatawan ka ni Jehova kan “katuninungan nin Diyos.” Paano kita papakusugon ni Jehova? Pag namimibi kita, makakamtan ta “an katuninungan nin Diyos na nakakalabi sa gabos na pakasabot.” (Fil. 4:6, 7) An katuninungan na itinatao ni Jehova nakakatabang sa sato na magin kalmado asin makapag-isip nin malinaw. Naeksperyensiyahan mismo iyan kan sister na si Luz. Sinabi niya: “Pirmi akong nakakamati nin kamunduan kaya kun minsan pagmati ko dai ako namumutan ni Jehova. Pero pag nangyayari iyan, sinasabi ko tulos ki Jehova an namamatian ko. Paagi sa pamibi, nakokontrol ko an pagmati ko.” Arog kan ipinapahiling kan saiyang eksperyensiya, puwede kitang makamati nin katuninungan paagi sa pamibi.

20. Anong mga leksiyon an nanudan ta sa mga luha ni Jesus?

²⁰ Nakakaranga nanggad asin kapaki-pakinabang an mga leksiyon na nanudan ta sa mga luha ni Jesus! Napagirumdom kita kaiyan na tabangan an nagmumundo niyatong mga amigo asin na magtiwala ki Jehova saka ki Jesus na tatabangan ninda kita pag nagadanan kita nin mahal sa buhay. Nadagka kita kan pagmalasakit na ipinahiling kan Diyos na Jehova saka ni Jesu-Cristo na magin mapagmalasakit man sa satong paghuhulit asin pagtutukdo. Naranga man kita huling aram tang nasasabutan ni Jehova saka kan saiyang namumutan na Aki an namamatian ta, an mga kaluyahan ta, asin gusto ninda kitang tabangan na makatagal. Lugod na padagos tang isabuhay an mga nanudan ta sagkod na utubon na ni Jehova an nakakaugma niyang panuga na “papahidon niya an lambang luha sa [satong] mga mata”!—Kap. 21:4.