1. Anong pagdesisyon an dapat na gibuhon nin sarong hoben dapit sa saiyang puturo, pero taano ta dai man iyan dapat ipaghadit na marhay? (Hilingon an ritrato sa itaas.)

POSIBLENG marhay na mauyon kamong mga hoben na bago magbiyahe, madunong na planuhon nguna kun masain kamo. An buhay garo pagbiyahe, asin ngunyan na hoben pa kamo an marahay na panahon na magplano para sa saindong puturo. Siyempre, bako iyan pasil. An daragitang si Heather nagsabi: “Nakakatakot ta kaipuhan mong magdesisyon kun ano an gigibuhon mo sa buhay mo.” Pero kusugi an buot nindo. Sinabi ni Jehova sa saiyang banwaan: ‘Dai ka matakot, ta yaon ako saimo. Dai magluya ta ako an saimong Diyos, na nagpapakusog saimo. Danay takang tatabangan.’—Isa. 41:10.

2. Paano mo naaraman na gusto ni Jehova na magplano ka para sa maugmang puturo?

² Dinadagka ka ni Jehova na madunong na magplano para sa saimong puturo. (Par. 12:1; Mat. 6:20) Gusto niya na magin maugma ka. Aram tang totoo iyan pag pinagmamasdan ta, nadadangog, asin nananamitan an marahayon na mga bagay na linalang niya. Inaataman man niya kita asin tinutukduan kun paano magkaigwa kan pinakamarahay na buhay. Sa  mga dai nagdadangog sa saiyang sadol, sinabi ni Jehova: ‘Pinirili nindo an nakakaungis sa sakuya. Uya! An sakuyang mga uripon mag-uurugma asin kamo mapapasupog. Uya! An sakuyang mga uripon mag-aarawit nin huli sa kaugmahan nin puso.’ (Isa. 65:12-14) Napapamuraway si Jehova kun naggigibo nin madunong na mga desisyon sa buhay an saiyang mga lingkod.—Tal. 27:11.

3. Ano an irinerekomendar sa saimo ni Jehova?

³ Anong mga plano an irinerekomendar sa saimo ni Jehova? Linalang niya an mga tawo na magin maugma paagi sa pagmidbid sa saiya asin maimbod na paglilingkod sa saiya. (Sal. 128:1; Mat. 5:3) An mga linalang niyang hayop kontento na sana sa pagkakan, pag-inom, asin pagpadakul. Pero an gusto nin Diyos planuhon mo an saimong buhay sa paagi na magigin maugma asin makahulugan iyan. An saimong Kaglalang iyo “an Diyos nin pagkamuot,” an “maugmang Diyos,” na ginibo an mga tawo nin ‘siring sa ladawan niya.’ (2 Cor. 13:11; 1 Tim. 1:11; Gen. 1:27) Magigin maugma ka kun aarugon mo an satuyang mamumuton na Diyos. Napatunayan mo na daw na totoo an sinasabing ini kan Bibliya: “Igwang urog na kaugmahan sa pagtao kisa sa pag-ako”? (Gibo 20:35) Panginot na katotoohan iyan sa buhay. Kaya, gusto ni Jehova na an mga plano mo nakabasar pirmi sa pagkamuot sa iba asin sa Diyos.—Basahon an Mateo 22:36-39.

4, 5. Ano an nakapaugma ki Jesus?

⁴ Itinao ni Jesu-Cristo an perpektong halimbawa para sa saindo na mga hoben. Kan siya aki pa, siguradong nakikikawat siya asin nagin maugma. Sinasabi kan Tataramon nin Diyos na may ‘panahon nin pagngisi asin panahon nin pagbayli.’ (Par. 3:4) Nagin harani man si Jesus ki Jehova paagi sa pag-adal kan Kasuratan. Kan siya 12 anyos, nagngalas an mga paratukdo sa templo sa “saiyang pakasabot asin mga simbag” mapadapit sa espirituwal na mga bagay.—Luc. 2:42, 46, 47.

⁵ Nagin maugma man si Jesus kan adulto na siya. Ano an nakapaugma sa saiya? Aram niyang an pinakagusto nin Diyos na gibuhon niya iyo na ‘ipahayag niya an maugmang bareta sa mga dukha asin ibalik an paghiling kan mga buta.’ (Luc. 4:18) An paggibo kan ipinapagibo sa saiya nin Diyos an nakapaugma ki Jesus. Mababasa sa Salmo 40:8 an nasa buot ni Jesus: ‘An paggibo kan saimong kabutan, Diyos ko, [an nakakapaugma] sa sakuya.’ Gustong-gusto ni Jesus na tukduan an mga tawo mapadapit sa saiyang Ama sa langit. (Basahon an Lucas 10:21.) Sarong beses, pagkatapos na tukduan an sarong babayi dapit sa tunay na pagsamba, sinabi ni Jesus sa saiyang mga disipulo: “An sakuyang kakanon iyo na gibuhon an kabutan niya na nagsugo sa sako asin na tapuson an saiyang gibuhon.” (Juan 4:31-34) Nakapaugma ki Jesus an pagpahiling nin pagkamuot sa Diyos asin sa iba. Puwede man iyan na makapaugma sa saimo.

6. Taano ta marahay na ipakipag-ulay sa eksperyensiyadong mga Kristiyano an mga plano mo?

⁶ Dakul na Kristiyano an nagpayunir kan sinda hoben pa, asin nakapaugma ini sa sainda. Taano ta dai mo ipakipag-ulay sa sainda an mga plano mo? “Masasayang an mga plano kun mayo nin maigot na pag-aadal. Alagad kun kadakul kan parahatol marahay an magigin bunga kaiyan.” (Tal. 15:22, BPV *) Puwedeng sabihon sa saimo kan eksperyensiyadong mga Kristiyanong ini na dakul kang manunudan sa pagpapayunir na mapapakinabangan mo sa bilog mong buhay. Sa langit, tinukduan si Jesus kan saiyang Ama. Dangan, kan panahon kan saiyang ministeryo sa daga, padagos pa siyang nakanuod. Halimbawa, nanudan niya na maugma pag naaabot kan maugmang bareta an puso kan iba asin pag nagdadanay na maimbod dawa may pagbalo. (Basahon an Isaias 50:4; Heb. 5:8; 12:2) Pag-ulayan ta an pirang aspekto kan bilog na panahon na paglilingkod na puwedeng magpaugmang marhay sa saimo.

7. Taano ta nagugustuhan kan dakul na hoben an paggibo nin mga disipulo?

⁷ Sinabi ni Jesus: “Padumán kamo asin gumibo  kamo nin mga disipulo sa mga tawo . . . na tinutukduan sinda.” (Mat. 28:19, 20) Kun plano mong magin paragibo nin disipulo, pinipili mo an pinakanakakaugmang karera na nagtataong onra sa Diyos. Arog nin ibang karera, kaipuhan mo nin panahon tanganing magin mahusay. Kasuarin pa sana, si Timothy, na nagpayunir kan siya tin-edyer pa sana, nagsabi: “Gustong-gusto ko an paglilingkod ki Jehova nin bilog na panahon huling iyan an paagi para maipahiling ko sa saiya na namumutan ko siya. Kan primero, dai ako nakakakua nin Bible study pero kan huri, nagbalyo ako sa ibang teritoryo, asin sa laog sana nin sarong bulan nakakua ako nin nagkapirang study. An saro nag-aatender na sa Kingdom Hall. Pagkatapos kan duwang bulan na pagklase ko sa Bible School for Single Brothers, * iinasignar ako sa sarong lugar na diyan may apat na akong tinutukduan. Gustong-gusto ko an pagtutukdo sa mga tawo huling nahihiling ko kun paano binabago kan banal na espiritu an saindang buhay.”—1 Tes. 2:19.

8. Ano an ginibo kan ibang hoben na Kristiyano tanganing lubos na makikabtang sa paggibo nin disipulo?

⁸ May mga hoben na Kristiyano na nag-aadal nin ibang lengguwahe. Halimbawa, si Jacob na taga North America, nagsabi: “Kan siyete anyos ako, dakul akong kaklase na Vietnamese. Gusto kong iistorya sa sainda an dapit ki Jehova, kaya dai nahaloy, nagplano akong adalan an lengguwahe ninda. Masasabi kong nakanuod talaga akong mag-Vietnamese paagi sa pagkumparar kan Ingles asin Vietnamese na An Torrengbantayan. Nakipag-amigo man ako sa mga tugang sa Vietnamese congregation na harani samo. Kan 18 anyos na ako, nagpayunir ako. Dangan, nagklase ako sa Bible School for Single Brothers. Nakatabang iyan sako sa bago kong asignasyon bilang payunir asin solo sanang elder sa Vietnamese-language group. Napapangalas an dakul na Vietnamese ta tatao ako kan lengguwahe ninda. Pinapadagos ninda ako, asin sa parati, nakakapuon ako nin mga pag-adal sa Bibliya. An iba sainda, nabawtismuhan na.”—Ikumparar an Gibo 2:7, 8.

9. Ano an mga manunudan ta sa gibuhon na paggibo nin disipulo?

⁹ Dakulon kitang manunudan sa gibuhon na paggibo nin disipulo. Nanunudan ta diyan kun paano magkaigwa nin marahay na ugali sa trabaho, kun paano magigin mahusay sa pakikipag-ulay, kun paano magkaigwa nin kumpiyansa, asin kun paano magigin mataktika. (Tal. 21:5; 2 Tim. 2:24) Pero talagang nakakaugma an paggibo nin disipulo huling nakakatabang ini tanganing magin mas pamilyar ka sa maka-Kasuratan na mga basehan kan saimong pagtubod. Nanunudan mo man kun paano makikipagtabangan ki Jehova sa gibuhon niya.—1 Cor. 3:9.

10. Paano ka magigin maugma sa gibuhon na paggibo nin disipulo dawa sa teritoryong dikit sana an nagdadangog?

¹⁰ Puwede kang magin maugma sa gibuhon na paggibo nin disipulo dawa dikit na tawo sana sa teritoryo an nagdadangog kan maugmang bareta. Nagtatarabangan an bilog na kongregasyon sa paggibo nin disipulo. Gabos sinda nagmamaigot na makahanap nin mga sinsero. Dawa ngani saro sana sa kongregasyon an makakua nin tawong magigin disipulo pag-abot nin panahon, gabos sinda nakikabtang sa paghanap kaya kaugmahan iyan kan gabos. Halimbawa, siyam na taon na naghulit si Brandon sa sarong teritoryo na mayong interes an mga tawo. Sinabi niya: “Gustong-gusto kong maghulit kan maugmang bareta huling iyan an ipinapagibo sa sato ni Jehova. Nagpayunir ako dai nahaloy pagkatapos kan pagklase ko. Nauugma akong pakusugon an mga hoben na lalaki sa kongregasyon mi saka mahiling sindang nag-uuswag sa espirituwal. Pagkatapos kong mag-adal sa Bible School for Single Brothers, tinawan ako nin bagong asignasyon bilang payunir. Totoo, mayo akong natabangan sa teritoryo na mabawtismuhan, pero an iba igwa. Nagpapasalamat ako ta nagin plano ko na lubos na makikabtang sa gibuhon na paggibo nin disipulo.”—Par. 11:6.

11. Anong sagradong paglilingkod an pinurbaran nin dakul na hoben?

¹¹ Makakapaglingkod ka ki Jehova sa dakul na paagi. Halimbawa, dakul na hoben an nagboboluntaryo sa gibuhon na pagtugdok. Dakulon na bagong Kingdom Hall an kaipuhan. An pakikikabtang sa pagtugdok kaiyan sarong sagradong paglilingkod na nakakapamuraway sa Diyos asin makakapaugma sa saimo. Arog kan ibang paagi nin sagradong paglilingkod, talagang nakakaugma na makatrabaho an satong mga kapagtubod. Dakul ka man manunudan diyan. Makakanuod kang magin maingat sa trabaho, magin mahigos, asin makikooperar sa mga nanginginot.

12. Paano puwedeng magbukas nin ibang oportunidad an pagpapayunir?

¹² Ini man an sabi nin sarong brother na si Kevin: “Puon kan aki pa ako, gusto ko na talagang magin bilog na panahon na lingkod ni Jehova pag-abot nin panahon. Nangyari man nanggad iyan kan magpayunir ako sa edad na 19. Para suportaran an sadiri ko, nagtrabaho ako nin part-time sa sarong brother na kontratista. Nakanuod akong magkaag nin atop, bintana, saka pinto. Kan huri, sa laog nin duwang taon nag-iba ako sa sarong hurricane relief team na nagtutugdok kan naraot na mga Kingdom Hall asin mga harong kan mga tugang. Kan madangog ko na nangangaipo nin mga paratugdok sa South Africa, nag-aplay ako asin naimbitaran na magduman. Digdi sa Africa, pagkatapos ming maitugdok an sarong Kingdom Hall sa laog nin pirang semana, nagbabalyo na man kami sa saro pa. Garo kami sarong pamilya sa construction group. Saro lang an istaran mi, saka iriba kami sa pag-adal nin Bibliya asin sa pagtrabaho. Gustong-gusto ko man na maghulit kaiba kan mga tugang digdi kada semana. An mga planong ginibo ko kan aki pa ako talagang nakapaugma sako sa mga paaging dai ko lamang naisip.”

13. Taano ta dakul na hoben an nauugma na maglingkod sa Bethel?

¹³ An iba sa mga naghinguwang magibo an saindang plano na makapaglingkod ki Jehova nin bilog na panahon nasa Bethel na ngunyan. Maugma an  maglingkod sa Bethel ta gabos na ginigibo mo diyan para ki Jehova. An pamilyang Bethel nagtatabang sa pagtao nin espirituwal na kakanon. Si Dustin, na sarong Bethelite, nagsabi: “Kan ako nuwebe anyos nagin pasuhan ko na maglingkod nin bilog na panahon, dangan nagpayunir ako pakatapos kong magklase. Pakalihis nin saro may kabangang taon, naimbitaran akong maglingkod sa Bethel. Nanudan ko diyan na magpaandar nin imprentahan asin kan huri, nakanuod ako nin computer programming. Sa Bethel, nauugma akong madangog ko mismo an dapit sa pag-uswag kan gibuhon na paggibo nin disipulo sa bilog na kinaban. Gustong-gusto ko an paglilingkod digdi huling an ginigibo digdi nakakatabang sa mga tawo na maparani ki Jehova.”

14. Tanganing makapaglingkod nin bilog na panahon, anong mga plano an puwede mong gibuhon?

¹⁴ Anong mga plano an puwede mong gibuhon para magin bilog na panahon na Kristiyanong ministro? Tanganing mapaglingkudan nin lubos si Jehova, makakatabang na marhay sa saimo an pagpauswag kan saimong Kristiyanong mga kuwalidad. Kaya magin maigot sa pag-adal mo kan Tataramon nin Diyos, hurop-hurupon iyan na marhay, asin maghanap nin mga paagi na maipahayag an saimong pagtubod pag nasa mga pagtiripon. Mantang nag-eeskuwela ka, puwede mong pauswagon an saimong kakayahan na ipakipag-ulay sa iba an maugmang bareta. Magpahiling nin interes sa mga tawo paagi sa mataktikang paghagad kan saindang opinyon asin pagdangog kan saindang simbag. Puwede ka man tumabang sa mga gibuhon sa kongregasyon, arog kan paglinig asin pagmentenar kan Kingdom Hall. Nauugma si Jehova na gamiton an mga tawong mapakumbaba asin andam na tumabang. (Basahon an Salmo 110:3; Gibo 6:1-3) Inimbitaran ni apostol Pablo si Timoteo na magin misyonero huling “magayunon an sinasabi kan mga tugang . . . manungod sa saiya.”—Gibo 16:1-5.

15. Ano an mga puwede mong gibuhon tanganing magkaigwa ka nin trabaho pag-abot nin panahon?

¹⁵ Kadaklan na bilog na panahon na ministro kaipuhan na magtrabaho. (Gibo 18:2, 3) Tibaad makatabang an pag-eskuwela nin sarong halipot na kurso para makakua ka nin part-time na trabaho na kaipuhan sa saindong lugar. Mantang nagpaplano, makipag-ulay sa saindong paraataman nin sirkito asin sa mga payunir sa sirkito. Haputon sinda kun anong trabaho an praktikal sa mga payunir. Dangan, arog kan sinasabi kan Bibliya, ‘idusay mo [ki Jehova] an gabos mong gibo, asin mauutob an saimong mga plano.’—Tal. 16:3; 20:18, BPV.

16. Paano ka inaandam kan paglilingkod nin lubos ki Jehova para sa iba pang responsabilidad sa maabot na panahon?

¹⁶ Makakasigurado ka na gusto ni Jehova na “makapangapot [ka] nin higot” sa maugmang puturo. (Basahon an 1 Timoteo 6:18, 19.) An paglilingkod nin bilog na panahon makakatabang sa saimo na magin maygurang na Kristiyano mantang nakakaibanan mo an kapwa mo bilog na panahon na mga lingkod. Nahiling man kan dakul na an paglilingkod nin lubos ki Jehova kan sinda hoben pa nakatabang na magin mas maugma an saindang buhay may agom. An iba sa mga nagpayunir bago mag-agom nakapagpadagos sa pagpayunir kaiba kan saindang agom.—Roma 16:3, 4.

17, 18. Paano kalabot sa paggibo nin plano an saimong puso?

¹⁷ Kalabot sa pagpaplano an saimong puso. An Salmo 20:4 nagsasabi dapit ki Jehova: “Lugod na itao niya sa saimo an minamawot kan saimong puso, asin gibuhon niyang mapanggana an gabos mong plano.” (NW) Kaya isipon kun ano an gusto mong gibuhon sa saimong buhay. Pag-isipan kun ano an ginigibo ni Jehova ngunyan asin kun paano ka makakatabang sa gibuhon na iyan. Dangan magplano na gibuhon kun ano an nakakapaugma sa saiya.

¹⁸ An paglilingkod ki Jehova nin lubos magtatao sa saimo nin dakulang kaugmahan huling ini an pamumuhay na nagtataong onra sa Diyos. Iyo, “mag-ugma ka nin labi-labi ki Jehova, asin itatao niya sa saimo an mga minamawot kan saimong puso.”—Sal. 37:4, NW.