Magpahiling nin Pagmalasakit sa “Gabos na Klase nin Tawo”
KAN tinutukduan ni Jesus an saiyang mga disipulo kun paano ihuhulit an maugmang bareta, sinabi niya na bako sa gabos na panahon aakuon kan mga tawo an mensahe kan Kahadian. (Luc. 10:3, 5, 6) Sa satong ministeryo, tibaad makanumpong kita nin mga tawong tataraman o gigibuhan pa ngani kita nin maraot. Iyo, an arog kaiyan na mga reaksiyon puwedeng magin dahilan na madipisilan kita na pirming magpahiling nin pagmalasakit sa mga nahuhulitan ta.
An tawong mapagmalasakit nahihiling an mga pangangaipo asin problema kan iba, may simpatiya, asin gustong tabangan sinda. Alagad, kun nawawara na an satong pagmalasakit sa mga nanunumpungan ta sa ministeryo, tibaad magpuon man na mabawasan an satong kaigutan asin pagigin epektibo. Sa ibong na lado, kun hinihinguwa niyatong magin mas mapagmalasakit, garo ta man sana dinadagdagan nin gatong an kalayo—pinagdadanay niyatong makusog an laad kan satong kaigutan sa ministeryo!—1 Tes. 5:19.
Paano kita makakapahiling nin pagmalasakit dawa sa mga sitwasyon na masakit iyan gibuhon? Pag-ulayan ta an tulong halimbawa na maninigo niyatong arugon—an halimbawa ni Jehova, ni Jesus, asin ni apostol Pablo.
ARUGON AN PAGMALASAKIT NI JEHOVA
Rinibong taon nang tinatagalan ni Jehova an mga pagtuya sa saiyang pangaran. Alagad, nagdadanay siyang “mabuot . . . sa mga dai tataong magpasalamat asin sa mga maraot.” (Luc. 6:35) An saiyang kabuutan nahihiling sa saiyang pagigin mapasensiya. Gusto ni Jehova na “an gabos na klase nin tawo maligtas.” (1 Tim. 2:3, 4) Baga man ikinakaungis nin Diyos an karatan, mahalagang marhay para sa saiya an mga tawo asin habo niya na malaglag an siisay man.—2 Ped. 3:9.
Aram ni Jehova na epektibong marhay si Satanas sa pagbuta sa mga dai nagtutubod. (2 Cor. 4:3, 4) Dakul an natukduan nin salang mga paniniwala asin sabuot puon kan sinda aki pa, kaya nadidipisilan sindang akuon an katotoohan. Gustong-gusto ni Jehova na tabangan an mga arog ninda. Taano ta nasabi ta iyan?
Pag-isipan an pagmansay ni Jehova sa suanoy na mga taga Nineve. Sa ibong kan pagigin maringis ninda, sinabi ni Jehova ki Jonas: ‘Dai daw ako [dapat] mahirak sa Nineve an dakulang banwaan na igwa nin labing 120,000 katawo na dai nakakaaram [kun ano an tama asin kun ano an sala]?’ (Jon. 4:11) Minansay ni Jehova an mga taga Nineve bilang mga tawong dukha sa espirituwal, kaya huli sa pagkahirak isinugo niya si Jonas tanganing patanidan sinda.
Arog ni Jehova, mahalaga man na marhay sa sato an mga tawo. Maaarog ta siya kun determinado niyatong hihinguwahon na tabangan an siisay man na tibaad magdangog, dawa kun sa hiling ta habo talaga ninda.
ARUGON AN PAGMALASAKIT NI JESUS
Arog kan saiyang Ama, pagkahirak man sa mga tawong dukha sa espirituwal an nakapahiro ki Jesus. “Kan mahiling niya an dakul na tawo, nahirak siya sa sainda, huli ta sinda naanitan asin napabayaan arog nin mga karnero na daing pastor.” (Mat. 9:36) Nasasabutan ni Jesus an kamugtakan ninda; aram niya na an mga nagduman para magdangog sa saiya natukduan nin mga kaputikan asin trinato nin bakong tama kan mga lider kan saindang relihiyon. Dawa aram niya na dakul an dai maako huli sa manlain-lain na ulang, nagpadagos pa man giraray si Jesus na “magtukdo sa sainda nin dakul na bagay.”—Mar. 4:1-9.
Dai madisganar kun sa primero dai magpahiling nin interes an sarong tawo
Nagbabago an mga kamugtakan sa buhay, siring man an sabuot nin saro dapit sa katotoohan
Kun negatibo an reaksiyon kan mga tawo sa satong mensahe, kaipuhan niyato nin pakasabot asin haputon an satong sadiri kun taano ta arog kaiyan an reaksiyon ninda. May mga tawo na tibaad negatibo an paghiling sa Bibliya o sa Kristiyanismo huli sa maraot na mga gibo kan naghihingakong mga Kristiyano. An iba tibaad natukduan nin mga kaputikan dapit sa mga tinutubod ta. Asin may mga tawo na habo kitang akuon ta tibaad tuyaon sinda kan mga pagtaraid o kapamilya ninda.
May mga nakakaulay kita sa ministeryo na tibaad bakong magayon an pag-ako sa sato huli sa nakaka-traumang mga eksperyensiya na nakapangluyang marhay sa buot ninda. Si Kim, na sarong misyonera nagsabi: “May lugar sa teritoryo mi na an dakul sa nakaistar biktima nin giyera na huli kaiyan nawara an gabos na pagsadiri ninda. Mayo sindang tunay na paglaom para sa ngapit. Disganado sindang marhay saka talagang mapagduda. Parati kaming nakakanumpong sa mga lugar na ini nin mga tawong kontra sa satong mensahe. Sarong beses, inatake ninda ako mantang naghuhulit.”
Paano si Kim padagos na nagpahiling nin pagmalasakit sa ibong kan siring na pagtrato? Sinabi niya: “Kun bakong magayon an pagtrato sako, hinihinguwa kong isaisip an Talinhaga 19:11, na an sabi: ‘An pakasabot nin tawo nakakapugol nanggad sa saiyang kaanggutan.’ (NW) An pagkonsiderar sa mga eksperyensiya sa buhay kan mga tawo sa teritoryo mi nakakatabang sako na magpahiling nin pagmalasakit sa sainda. Saka bako man anggot an gabos na nakakaulay mi diyan. Sa lugar man sanang iyan, igwa kaming marahayon na mga interesadong binabalikan.”
Puwede tang ihapot sa sadiri, ‘Kun ako an nasa kamugtakan kan mga hinuhulitan ko, ano man daw an magigin reaksiyon ko sa mensahe kan Kahadian?’ Halimbawa, paano kun pauruutro kitang nakakadangog nin mga kaputikan dapit sa mga Saksi ni Jehova? Kun arog kaiyan, tibaad negatibo man an magin reaksiyon ta kaya nangangaipo man kitang pahilingan nin pagmalasakit. Kun isinasaisip ta an pagbuot ni Jesus na trataron an iba arog kan gusto tang magin pagtratar sa sato, mapapahiro kita kaiyan na sabuton asin pagpasensiyahan sinda dawa masakit iyan na gibuhon.—Mat. 7:12.
ARUGON AN PAGMALASAKIT NI PABLO
Nagpahiling si apostol Pablo nin pagmalasakit dawa sa bayolenteng mga parakontra. Taano? Pirmi niya kayang isinasaisip an dating buhay niya. Sinabi niya: “Dati akong paralanghad asin parapersegir saka aroganteng tawo. Minsan siring, pinahilingan ako nin pagkahirak huli ta ginibo ko idto dara nin kawaran nin aram asin kawaran nin pagtubod.” (1 Tim. 1:13) Aram niya na pinahilingan siya ni Jehova asin ni Jesus nin dakulang pagkahirak. Posibleng marhay na nahihiling niya sa nagkapira sa mga hinuhulitan niya an dati niyang pagkatawo.
May mga pagkakataon na napaatubang si Pablo sa palsong mga paniniwala na nakagamot na nin marigon. Ano an nagin reaksiyon niya? Sinasabi sa Gibo 17:16 na mantang nasa Atenas si Pablo, “nakamati siya nin pagkairitar kan mahiling niya sa siyudad an kadakul na idolo.” Sa ibong kaiyan, ginamit ni Pablo an mismong ikinakairitar niya para magtao nin marahayon na patotoo. (Gibo 17:22, 23) Ibinagay niya an pamamaagi niya nin paghuhulit sa pinaghalian kan manlain-lain na klase nin tawo “tanganing sa gabos na paaging posible mailigtas [niya] an nagkapira.”—1 Cor. 9:20-23.
Puwede niyatong arugon si Pablo paagi sa pagsaisip kan negatibong mga sabuot o salang paniniwala kan mga tawo dangan paagi sa epektibong pag-introdusir kan “maugmang bareta dapit sa bagay na urog karahay.” (Isa. 52:7, NW) An sister na si Dorothy nagsabi: “Sa teritoryo mi, dakul an tinukduan na an Diyos maringis saka mapanghusgar. Kinokomendaran ko sinda sa makusog nindang paniniwala sa Diyos dangan dinadara ko an atensiyon ninda sa sinasabi kan Bibliya dapit sa pagigin mamumuton ni Jehova saka sa saiyang mga panuga para sa maabot na panahon.”
“PADAGOS NA DAUGON NIN MARAHAY AN MARAOT”
Mantang mas nagrarani kita sa katapusan kan “huring mga aldaw,” asahan na niyato na an ugali kan mga tawong hinuhulitan ta “lalo pang magigin maraot.” (2 Tim. 3:1, 13) Pero dai niyato dapat tugutan na magin dahilan iyan na dai na kita magin mapagmalasakit o mawara an satong kagaya-gayahan. Puwede kitang tawan ni Jehova nin kusog tanganing “padagos na daugon nin marahay an maraot.” (Roma 12:21) An payunir na si Jessica nag-istorya: “Parati akong may nakakaulay na mga tawong mapalangkaw saka minemenos kita pati an satong mensahe. Puwede ining makairitar. Pag may arog kaiyan, silensiyo akong namimibi ki Jehova na tabangan niya akong hilingon an tawong iyan arog kan paghiling niya. Paagi kaiyan, an pokus ko bako na sa namamatian ko kundi sa kun paano matatabangan an tawong iyan.”
Padagos niyatong hinahanap an mga tawong igwang puso na nasa tamang kamugtakan para sa buhay na daing katapusan
Huli sa padagos tang paghihinguwa, inako na kan iba an espirituwal na tabang na itinatao ta
Dapat man niyatong pag-isipan kun paano papakusugon an mga kapwa niyato trabahador. Sinabi ni Jessica: “Kun may bakong magayon na eksperyensiya an saro samo, hinihinguwa kong bako diyan magpokus. Imbes ibinabalyo ko an urulay sa positibong mga tema, arog kan marahay na mga naisasagibo kan satong ministeryo sa ibong kan negatibong reaksiyon kan nagkapira.”
Aram na marhay ni Jehova an mga kadipisilan na inaatubang niyato sa ministeryo. Siguradong nauugma nanggad siya kun inaarog ta an saiyang pagkahirak! (Luc. 6:36) Siyempre, maabot an panahon na dai na si Jehova mapahiling nin pagmalasakit sa sistemang ini nin mga bagay. Makakapagtiwala kita na naaaraman niya kun nuarin an tamang panahon para tapuson an sistemang ini. Sagkod na dai pa iyan nag-aabot, apurado an satong paghuhulit. (2 Tim. 4:2) Padagos lugod niyatong isagibo an satong asignasyon nin may kaigutan asin mamumuton na pagmalasakit sa “gabos na klase nin tawo.”
