1. Arog kan ipinaparisa kan 3 Juan 3, 4, ano an nakakapaugma sato?

NAIIMAHINAR mo daw kun gurano kaugma si apostol Juan kan mabaretaan niyang padagos na maimbod na naglilingkod ki Jehova an mga natabangan niyang manudan an katotoohan? Napaatubang sinda sa mga problema, asin naghinguwang marhay si Juan na pakusugon an pagtubod kan maimbod na mga Kristiyanong ini na ibinilang niyang mga aki niya sa espirituwal. Kaagid kaiyan, nauugma kita pag an satong mga aki o an mga tinatabangan niyato na manudan an katotoohan, nagdudusay kan sadiri ninda ki Jehova asin padagos na naglilingkod saiya.—Basahon an 3 Juan 3, 4.

2. Ano an katuyuhan kan mga surat na ginibo ni Juan?

² Kan 98 C.E., posibleng marhay na nakaistar si Juan sa Efeso o harani diyan. Tibaad nagbalyo siya diyan kan makatalingkas na siya sa pagkapreso sa isla nin Patmos. Kan mga panahon na iyan, pinahiro siya kan banal na espiritu ni Jehova na gumibo nin tulong surat. Katuyuhan kan mga surat na iyan na dagkahon an maimbod na mga Kristiyano na pagdanayon an saindang pagtubod ki Jesus asin padagos na maglakaw sa katotoohan.

3. Anong mga hapot an sisimbagon ta?

³ Kan panahon na idto, si Juan na sana an buhay na apostol, asin nahahadit siya sa nagigin epekto kan palsong mga paratukdo sa mga kongregasyon. * (1 Juan 2:18, 19, 26) Hinihingako kan mga apostatang idto na midbid ninda an Diyos, pero dai ninda sinusunod an mga pagbuot ni Jehova. Pag-ulayan ta an ipinasabong na sadol na itinao ni Juan. Mantang ginigibo niyato iyan, sisimbagon ta an tulong hapot: Ano an buot sabihon kan paglakaw sa katotoohan? Ano an puwedeng makaulang sato na magibo iyan? Paano ta matatabangan an iba na magdanay sa katotoohan?

4. Uyon sa 1 Juan 2:3-6 asin 2 Juan 4, 6, ano an kalabot sa paglakaw sa katotoohan?

⁴ Para makalakaw sa katotoohan, kaipuhan niyatong maaraman an katotoohan na nasa Tataramon nin Diyos, an Bibliya. Dugang pa, dapat na ‘utubon [niyato] an mga tugon [ni Jehova],’ an buot sabihon, kaipuhan niyatong sunudon an mga iyan. (Basahon an 1 Juan 2:3-6; 2 Juan 4, 6.) Nagpahiling si Jesus nin perpektong halimbawa kan pagsunod ki Jehova. Kaya an sarong mahalagang paagi na nagkukuyog kita ki Jehova iyo an paggibo kan satong pinakamakakaya na masundan an mga lakad ni Jesus.—Juan 8:29; 1 Ped. 2:21.

5. Sa ano kita dapat na magin kumbinsido?

⁵ Para padagos na makalakaw sa katotoohan, kaipuhan na kumbinsido kita na si Jehova an Diyos nin katotoohan, na totoo an gabos na sinasabi niya sa sato sa saiyang Tataramon, an Bibliya. Asin dapat na kumbinsido man kita na si Jesus an ipinanugang Mesiyas. Dakul ngunyan an nagdududa na linahidan si Jesus bilang Hadi kan Kahadian nin Diyos. Nagpatanid si Juan na igwa nin “dakul na paradaya,” na puwedeng makadaya sa mga dai andam na idepensa an katotoohan manungod ki Jehova asin ki Jesus. (2 Juan 7-11) Isinurat ni Juan: “Siisay an putikon kundi idtong saro na dai minimidbid na si Jesus iyo an Cristo?” (1 Juan 2:22) An solamenteng paagi para malikayan tang madaya iyo an pag-adal sa Tataramon nin Diyos. Dangan saka ta sana mamimidbid si Jehova asin si Jesus. (Juan 17:3) Asin magigin kumbinsido kita na yaon sa satuya an katotoohan.

6. Ano an sarong ulang na napapaatubang sa hoben na mga Kristiyano?

⁶ Dapat na protektaran kan gabos na Kristiyano an saindang sadiri na dai madaya kan pilosopiya nin tawo. (1 Juan 2:26) Nangungurog nang kaipuhan na mag-ingat sa siod na ini an hoben na mga Kristiyano. Si Alexia, * na sarong 25 anyos na sister na taga Pransia, nagsabi: “Kan nagkaklase pa ako, nagduda ako sa katotoohan dahil sa mga katukduan kan kinaban arog nin teoriya nin ebolusyon saka pilosopiya. May mga pagkakataon na nagugustuhan ko an mga katukduan na iyan. Pero naisip ko na sala man kun an mga itinutukdo na sana sa eskuwelahan an pagpaparadangugon ko tapos babaliwalaon ko an mga itinutukdo ni Jehova.” Pinag-adalan ni Alexia an librong Life—How Did It Get Here? By Evolution or  by Creation? Pakalihis nin pirang semana, nawara an mga pagduda niya. Sinabi ni Alexia: “Pinatunayan ko sa sadiri ko na nasa Bibliya an katotoohan. Asin narealisar ko na kun mamumuhay ako kauyon kan mga pamantayan kaiyan, magigin maugma ako asin magkakaigwa nin katuninungan.”

7. Sa ano kita dapat mag-ingat, asin taano?

⁷ Dapat na mag-ingat an gabos na Kristiyano, hoben man o may edad, na dai magkaigwa nin dobleng pamumuhay. Idinuon ni Juan na dai puwedeng naglalakaw kita sa katotoohan tapos kasabay kaiyan namumuhay man kita nin imoral. (1 Juan 1:6) Para makamtan an pag-uyon nin Diyos ngunyan asin sa ngapit, kaipuhan na pirmi tang isaisip na nahihiling ni Jehova an gabos na ginigibo ta. Kaya, mayong kasalan na maitatago ki Jehova.—Heb. 4:13.

8. Ano an dapat niyatong isikwal?

⁸ Kaipuhan niyatong isikwal an pagmansay kan kinaban sa kasalan. Si apostol Juan nagsurat: “Kun sasabihon ta, ‘Mayo kitang kasalan,’ dinadaya niyato an satong sadiri asin an katotoohan mayo sa sato.” (1 Juan 1:8) Kan panahon ni Juan, hinihingako kan mga apostata na an sarong tawo puwedeng tuyong gumibo nin mga kasalan asin magin amigo pa man giraray nin Diyos. Ngunyan, nabubuhay kita sa kinaban na an mga tawo may kaagid na kaisipan. Dakul an naghihingako na nagtutubod sinda sa Diyos, pero dai sinda uyon sa pagmansay ni Jehova sa kasalan, lalo na kun may koneksiyon iyan sa sekso. An mga gibo na kasalan para ki Jehova ibinibilang ninda na personal na kagustuhan, o alternatibong istilo nin pamumuhay.

9. Paano nakikinabang an mga hoben pag sinusunod ninda an basado sa Bibliyang mga tinutubod?

⁹ Puwedeng madipisilan na marhay lalo na an hoben na mga Kristiyano na mapagdanay an tamang pagmansay sa sekso huli sa impluwensiya kan saindang mga kaklase o katrabaho. Iyan an nangyari ki Aleksandar. Sinabi niya: “May mga kaeskuwela akong babayi na pigpe-pressure akong makipag-sex sainda. Sinabi ninda na bakla ako dahil mayo akong girlfriend.” Kun napapaatubang ka sa kaagid na pagbalo, tandaan na  pag danay mong sinusunod an saimong basado sa Bibliyang mga tinutubod, napagdadanay mo an paggalang mo sa sadiri, napoprotektaran mo an saimong salud, an saimong emosyon, asin an relasyon mo ki Jehova. Asin sa kada sugot na malabanan mo, urog man na magigin madali saimo na gibuhon kun ano an tama. Tandaan man na gikan ki Satanas an salang pagmansay sa sekso kan kinaban. Kaya pag dai ka nakikipagkompromiso, ‘dinadaog mo an saro na maraot.’—1 Juan 2:14.

10. Paano makakatabang sato an 1 Juan 1:9 na maglingkod ki Jehova na may malinig na konsiyensiya?

¹⁰ Inaako niyato na si Jehova an may deretso na magdeterminar kun kasalan an sarong paggawi. Asin ginigibo ta an satong pinakamakakaya para dai makakomiter nin kasalan. Pero pag nagkasala kita, itinutuga ta iyan ki Jehova sa pamibi. (Basahon an 1 Juan 1:9.) Asin kun nakakomiter kita nin magabat na kasalan, mahagad kita nin tabang sa mga elder, na ninombrahan ni Jehova para pangatamanan kita. (Sant. 5:14-16) Minsan siring, dai na kita dapat padagos na makonsiyensiya sa mga nagibo tang sala kaidto. Taano? Huling itinao kan satong mamumuton na ama an atang na pantubos kan saiyang Aki para mapatawad an satuyang mga kasalan. Pag sinabi ni Jehova na papatawadon niya an mga nagkasala na nagsusulsol, gigibuhon niya talaga iyan. Kaya mayo nin makakapapundo sa sato sa paglilingkod niyato ki Jehova na may malinig na konsiyensiya.—1 Juan 2:1, 2, 12; 3:19, 20.

11. Paano niyato mapoprotektaran an satong isip sa mga katukduan na puwedeng makadanyar sa satong pagtubod?

¹¹ Isikwal an mga katukduan kan mga apostata. Puon pa kan iestablisar an Kristiyanong kongregasyon, ginagamit na kan Diyablo an dakul na paradaya para tanuman nin mga pagduda an isip kan maimbod na mga lingkod nin Diyos. Kaya kaipuhan na aram niyato an pagkakalain kan tama asin bakong tamang impormasyon. * Puwedeng gamiton kan satong mga kaiwal an Internet o social media para paluyahon an satong  pagtubod ki Jehova asin an pagkamuot niyato sa mga tugang. Girumdumon kun siisay an nasa likod kan propagandang iyan, asin isikwal iyan!—1 Juan 4:1, 6; Kap. 12:9.

12. Taano ta dapat niyatong pakusugon an satong pagtubod sa mga katotoohan na nanunudan ta?

¹² Para malabanan an pag-atake ni Satanas, kaipuhan niyatong pakusugon an satong pagtubod ki Jesus asin sa papel niya sa paggibo kan kabutan nin Diyos. Kaipuhan man niyatong magtiwala sa solamenteng pinakapaagihan na ginagamit ni Jehova ngunyan. (Mat. 24:45-47) Pinapararom niyato an satong pagtubod paagi sa regular na pag-adal kan Tataramon nin Diyos. Dangan an satong pagtubod magigin arog sa kahoy na hararom an pagkakagamot sa daga. May sinabing kaagid na punto si Pablo kan nagsusurat siya sa kongregasyon sa Colosas. Sinabi niya: “Kun paanong inako nindo si Cristo Jesus na Kagurangnan, padagos kamong maglakaw na kasaro niya, na pinapasarig an pagkakagamot sa saiya saka pinapakusog an sadiri paagi sa saiya asin na pinaparigon an sadiri sa pagtubod.” (Col. 2:6, 7) Dawa ano pang gibuhon ni Satanas o kan mga naimpluwensiyahan niya, dai ninda mapapapundo an sarong Kristiyano na pinakusog an saiyang pagtubod.—2 Juan 8, 9.

13. Ano an dapat niyatong asahan, asin taano?

¹³ Dapat niyatong asahan na ikakaungis kita kan kinaban. (1 Juan 3:13) Ipinapagirumdom sato ni Juan na “an bilog na kinaban nasa kapangyarihan kan saro na maraot.” (1 Juan 5:19) Mantang nagrarani an katapusan kan sistemang ini, urog man na naggagrabe an kaanggutan ni Satanas. (Kap. 12:12) Bako lang mga daing gayo risang pag-atake an ginagamit niya, arog nin imoralidad o mga kaputikan kan mga apostata. Ginagamit niya man an direktang pag-atake. Aram ni Satanas na may kadikit na panahon na sana siyang natatada para papunduhon an satong gibuhon na paghuhulit o rauton an satong pagtubod. Kaya bakong makangangalas na may restriksiyon o pagbabawal sa satong gibuhon sa nagkapirang nasyon. Dawa siring, an mga tugang ta diyan padagos na nagtatagal. Pinapatunayan ninda na ano man an gibuhon sato ni Satanas, puwede kitang magdanay na maimbod!

14. Ano an sarong paagi na matatabangan ta an satong mga tugang na magdanay sa katotoohan?

¹⁴ Para matabangan an satong mga tugang na magdanay sa katotoohan, dapat kitang magpahiling nin malasakit. (1 Juan 3:10, 11, 16-18) Dapat na mamutan niyato an satong mga tugang bako sana pag marahay an sitwasyon kundi pati man pag may mga problema. Halimbawa, may midbid ka daw na nagadanan nin mahal sa buhay asin nangangaipong rangahon o tabangan sa praktikal na mga paagi? O may nabaretaan ka daw na mga kapagtubod na inagihan nin kalamidad asin nangangaipo nin tabang para itugdok liwat an saindang Kingdom Hall o harong? Ipinapahiling ta kun gurano niyato kanamumutan asin pinagmamalasakitan an satong mga tugang bako sana paagi sa tataramon, kundi an mas mahalaga, paagi sa gibo.

15. Arog kan sinambit sa 1 Juan 4:7, 8, ano an kaipuhan niyatong gibuhon?

¹⁵ Inaarog ta an satong mamumuton na Ama sa langit pag ipinapahiling niyato na namumutan ta an lambang saro. (Basahon an 1 Juan 4:7, 8.) An sarong mahalagang paagi na ipinapahiling ta an pagkamuot iyo an pagpatawad sa lambang saro. Halimbawa, tibaad may saro na nakakulog sa sato pero naghagad nin dispensa. Maipapahiling ta an pagkamuot paagi sa pagpapatawad saiya asin paglingaw sa nagibo niya. (Col. 3:13) Naeksperyensiyahan iyan kan brother na si Aldo kan madangog niya an sarong brother na iginagalang niya na nagsabi nin nakakakulog na komento manungod sa kultura niya. Sinabi ni Aldo, “Pirmi kong ipinapamibi ki Jehova na tabangan akong dai mag-isip nin negatibo manungod sa brother na idto.” Pero bako lang iyan an ginibo ni Aldo. Inagda niya an brother na ibanan siya sa  ministeryo. Mantang magkaibanan sindang naghuhulit, sinabi ni Aldo sa brother na nakulgan siya sa itinaram kaini. Sinabi ni Aldo, “Kan maaraman kan brother kun ano an namatian ko dahil sa nakakakulog na komento niya, naghagad siya nin dispensa. Sa tono kan boses niya, namati ko na nagbabasol talaga siya sa itinaram niya. Pagkatapos kan ministeryo, amigo ko na giraray siya asin liningawan mi na an problema.”

16-17. Ano an dapat na determinado niyatong gibuhon?

¹⁶ Mamumuton na nagmamalasakit si apostol Juan sa espirituwal na kapakanan kan saiyang mga tugang, asin malinaw iyan na maririsa sa saiyang sadol na yaon sa tulong ipinasabong na surat niya. Talagang nakakapakusog na maaraman na an mga lalaki asin babayi na linahidan para magin kairibang tagapamahala ni Cristo mamumuton asin mapagmalasakit man arog ni Juan!—1 Juan 2:27.

¹⁷ Lugod na isapuso ta an sadol na pinag-ulayan ta. Magin determinado lugod kitang maglakaw sa katotoohan, na sinusunod si Jehova sa gabos na aspekto kan satuyang buhay. Pag-adalan an saiyang Tataramon, asin magtiwala diyan. Pakusugon an pagtubod ki Jesus. Isikwal an mga pilosopiya nin tawo asin an mga katukduan kan mga apostata. Mag-ingat na dai magkaigwa nin dobleng pamumuhay asin makagibo nin kasalan. Mamuhay kauyon kan halangkaw na mga pamantayan ni Jehova sa moral. Asin tabangan niyato an satong mga tugang na magdanay na makusog paagi sa pagpatawad sa mga nakakulog sa sato asin pagtabang sa mga nangangaipo. Kun gigibuhon ta an mga bagay na ini, danay kitang maglalakaw sa katotoohan sa ibong kan mga kadipisilan na inaagihan ta.