1. Ano an buot sabihon niyato kan terminong “an katotoohan”?

“PAANO mo nahanap an katotoohan?” “Nagdakula ka daw sa pamilyang Saksi?” “Gurano ka na kahaloy sa katotoohan?” Posibleng marhay na may naghapot na saimo kaiyan—o tibaad naihapot mo na iyan sa iba. Ano an buot sabihon niyato kan terminong “an katotoohan”? Sa pangkagabsan, ginagamit ta iyan para iladawan an satong mga tinutubod, paagi nin pagsamba, asin paagi nin pamumuhay. Aram kan mga tawong “nasa katotoohan” kun ano an itinutukdo kan Bibliya, asin namumuhay sinda kauyon kan mga prinsipyo kaiyan. Bilang resulta, napatalingkas sinda sa mga kaputikan nin relihiyon asin igwa sinda kan pinakamarahay na buhay na posible para sa bakong perpektong mga tawo.—Juan 8:32.

2. Uyon sa Juan 13:34, 35, ano an tibaad inot na makadagka sa sarong tawo na akuon an katotoohan?

² Ano an inot na nakadagka sa saimo na akuon an katotoohan? Tibaad an marahay na paggawi kan mga lingkod ni Jehova. (1 Ped. 2:12) O tibaad an pagkamuot na ipinahiling ninda. Narisa iyan kan dakul sa primerong pagtiripon na inatenderan ninda, asin mas nagigirumduman ninda an pagkamuot na iyan kisa sa ano man na sinabi sa plataporma. Asin bako iyan makangangalas huli ta sinabi ni Jesus na mamimidbid an mga disipulo niya paagi sa pagkamuot ninda sa lambang saro. (Basahon an Juan 13:34, 35.) Pero bako sana iyan an kaipuhan para magkaigwa nin makusog na pagtubod.

3. Ano an puwedeng mangyari kun an satuyang pagtubod sa Diyos nakabasar sana sa arog-Cristong pagkamuot kan satong mga tugang?

³ An satong pagtubod kaipuhan na nakabasar bako sana sa arog-Cristong pagkamuot kan mga lingkod nin Diyos. Taano? Halimbawa, paano kun may sarong kapagtubod—maski pa ngani elder siya o payunir—na makakomiter nin magabat na kasalan? O paano kun makulgan ka nin sarong brother o sister? O tibaad may magin apostata tapos iniinsistir niya na mayo sa sato an katotoohan. Kun mangyari an mga bagay na iyan, masisingkog ka daw asin mapundo na sa paglilingkod ki Jehova? An leksiyon: Kun an pagtubod  mo sa Diyos nakadepende sana sa paggawi kan iba imbes na sa relasyon mo ki Jehova, an saimong pagtubod dai magigin makusog. An pagpakusog nin pagtubod puwedeng iagid sa pagtugdok nin harong, dapat na bako lang malumoy na mga materyales arog nin mga pagmati asin emosyon an gagamiton mo kundi pati solidong mga katotoohan asin pangangatanusan. Kaipuhan na patunayan mo sa sadiri mo na nasa Bibliya an katotoohan manungod ki Jehova.—Roma 12:2.

4. Uyon sa Mateo 13:3-6, 20, 21, ano an epekto sa nagkapira pag nababalo an saindang pagtubod?

⁴ Sinabi ni Jesus na aakuon kan nagkapira an katotoohan nin “may kagaya-gayahan,” pero magluluya an pagtubod ninda pag iyan nabalo. (Basahon an Mateo 13:3-6, 20, 21.) Tibaad dai ninda nasabutan na may mga kadipisilan asin kasakitan an pagsunod ki Jesus. (Mat. 16:24) O tibaad paghuna ninda pag Kristiyano sinda mayo na nin problema sa buhay—puro na sana bendisyon asin mayo nin mga kadipisilan. Pero sa bakong perpektong kinaban na ini, magkakaigwa talaga nin mga kasakitan. Puwedeng magbago an mga kamugtakan kaya puwedeng mabawasan an satong kaugmahan.—Sal. 6:6; Par. 9:11.

5. Paano pinapatunayan kan kadaklan sa satong mga tugang na kumbinsido sindang yaon sa sainda an katotoohan?

⁵ Pinapatunayan kan kadaklan sa satong mga tugang na kumbinsido sindang yaon sa sainda an katotoohan. Paano? Dai nagluluya an saindang kumbiksiyon dawa kun an sarong kapagtubod makulgan sinda o makagibo nin sarong bagay na dai puwede sa Kristiyano. (Sal. 119:165) Sa kada pagbalo, nagkukusog an saindang pagtubod imbes na nagluluya. (Sant. 1:2-4) Paano ka magkakaigwa nin arog kaiyan na pagtubod?

6. Sa ano ibinasar kan mga disipulo kan inot na siglo an saindang pagtubod?

⁶ An pagtubod kan mga disipulo kan inot na siglo ibinasar ninda sa saindang kaaraman sa Kasuratan asin sa mga katukduan ni Cristo Jesus, na iyo an “katotoohan kan maugmang bareta.” (Gal. 2:5) An katotoohan na ini kompuwesto kan gabos na Kristiyanong katukduan, kaiba na an mga impormasyon manungod sa atang na pantubos ni Jesus asin sa saiyang pagkabuhay liwat. Kumbinsido si apostol Pablo na totoo an mga katukduan na ini. Taano ta nasabi niyato iyan? Huling ginamit niya an Kasuratan para patunayan “paagi sa mga nakasurat diyan na an Cristo kaipuhan na magsakit asin bumangon hali sa mga gadan.” (Gibo 17:2, 3) Inako kan mga disipulo kan inot na siglo an mga katukduan na iyan asin nanarig sa banal na espiritu na tabangan sinda na masabutan an Tataramon nin Diyos. Pinatunayan ninda sa sadiri ninda na basado sa Kasuratan an mga katukduan na iyan. (Gibo 17:11, 12; Heb. 5:14) An pagtubod ninda bako sana sa pagmati asin emosyon nakabasar, asin dai sinda naglilingkod ki Jehova dahil sana sa kaugmahan na namamatian ninda pag kaiba an mga kapagtubod. Imbes, an pagtubod ninda nakabasar sa “tamang kaaraman mapadapit sa Diyos.”—Col. 1:9, 10.

7. Paano makakatabang sa sato an satong pagtubod na nakabasar sa mga katotoohan sa Bibliya?

⁷ An mga katotoohan na nasa Tataramon nin Diyos dai nagbabago. (Sal. 119:160) Halimbawa, an mga iyan dai nagbabago kun nakulgan kita nin sarong kapagtubod o kun nakagibo siya nin magabat na kasalan. Asin dai iyan nagbabago pag napapaatubang kita sa mga kadipisilan. Kaya kaipuhan niyatong magin pamilyar na marhay sa mga katukduan sa Bibliya asin magin kumbinsido na totoo iyan. An makusog na pagtubod na nakabasar sa mga katotoohan sa Bibliya makakatabang na magdanay kitang maimbod sa dipisil na mga panahon, kun paanong an angkla pinagdadanay an bangka sa kinamumugtakan kaiyan pag may bagyo. Paano mo mapapakusog an saimong kumbiksiyon na yaon saimo an katotoohan?

8. Arog kan ipinapahiling sa 2 Timoteo 3:14, 15, paano nagin kumbinsido si Timoteo na yaon sa saiya an katotoohan?

⁸ Kumbinsido si Timoteo na yaon sa saiya an katotoohan. Paano niya naaraman na yaon sa saiya an katotoohan? (Basahon an 2 Timoteo 3:14, 15.) An saiyang ina asin lola an inot na nagtukdo saiya kan mga katukduan sa “banal na Kasuratan.” Pero siguradong siya mismo nagtao man nin panahon asin kusog para pag-adalan an mga kasuratan na iyan. Bilang resulta, ‘nakumbinsir siyang paniwalaan’ na yaon diyan an katotoohan. Pag-abot nin panahon, nanudan ni Timoteo, kan saiyang ina, asin kan lola niya an Kristiyanong mga katukduan. Siguradong naghangang marhay si Timoteo sa pagkamuot na ipinahiling kan mga parasunod ni Jesus, asin gustong-gusto niyang makiiba-iba sainda saka nagmamakulog siya sa saiyang espirituwal na mga tugang. (Fil. 2:19, 20) Minsan siring, an pagtubod niya nakabasar bako sa pagkamuot niya sa mga tawo, kundi sa mga katotoohan na nakaparani sa saiya ki Jehova. Dapat mo man na pag-adalan na marhay an mga nanudan mo manungod ki Jehova sa pagbasa mo nin Bibliya para mapatunayan mo mismo na totoo an mga iyan.

9. Ano an tulong panginot na katotoohan na kaipuhan mong patunayan sa sadiri mo?

⁹ Para magibo iyan, kaipuhan mong patunayan sa sadiri mo an kisiyera tulong panginot na katotoohan. Inot, dapat na magin kumbinsido ka na an Diyos na Jehova an Kaglalang kan gabos na bagay. (Ex. 3:14, 15; Heb. 3:4; Kap. 4:11) Ikaduwa, dapat na patunayan mo sa sadiri mo na an Bibliya an ipinasabong na mensahe nin Diyos para sa katawuhan. (2 Tim. 3:16, 17) Asin ikatulo, kaipuhan na kumbinsido ka na igwa si Jehova nin organisadong grupo nin mga tawo na nagsasamba saiya sa panginginot ni Cristo, asin na an mga Saksi ni Jehova an grupong iyan. (Isa. 43:10-12; Juan 14:6; Gibo 15:14) An pagpatunay sa sadiri mo kan panginot na mga katotoohan na iyan dai man nangangahulugan na dapat aram mo an gabos manungod sa Bibliya. Dapat na an pasuhan mo iyo na gamiton an saimong “kakayahan na mag-isip” para pakusugon an kumbiksiyon mo na yaon saimo an katotoohan.—Roma 12:1.

10. Apuwera sa pag-aram ta kan katotoohan, ano pa an kaipuhan tang gibuhon?

¹⁰ Pag napatunayan mo na sa sadiri mo an tulong panginot na katotoohan manungod sa Diyos, sa Bibliya, asin sa banwaan nin Diyos, kaipuhan na andam ka na patunayan sa iba an mga katotoohan na ini gamit an Kasuratan. Taano? Dahil bilang mga Kristiyano, may responsabilidad kita na itukdo sa mga magdadangog sa sato an mga katotoohan na nanunudan ta. * (1 Tim. 4:16) Asin mantang hinihinguwa tang tabangan an iba na makumbinsir sa mga katotoohan sa Bibliya, nagkukusog man an satong kumbiksiyon sa mga katotoohan na iyan.

11. Anong halimbawa an ipinahiling ni apostol Pablo bilang paratukdo?

¹¹ Pag nagtutukdo si apostol Pablo sa mga tawo, ‘kinukumbinsir [niya] sinda manungod ki Jesus base sa Katugunan ni Moises saka sa Mga Propeta.’ (Gibo 28:23) Paano niyato maaarog si Pablo pag nagtutukdo kita kan katotoohan? Dapat na dai ta sana basta sabihon sa sainda kun ano sinasabi kan Bibliya. Dapat na tabangan ta an satong mga tinutukduan sa Bibliya na mangatanusan gamit an Kasuratan mantang nagrarani sinda ki Jehova. Gusto tang akuon ninda an katotoohan, bako dahil ta hinahangaan ninda kita, kundi dahil napatunayan ninda sa saindang sadiri na an nanunudan ninda iyo an katotoohan manungod sa satong mamumuton na Diyos.

12-13. Paano matatabangan kan mga magurang an saindang mga aki na magdanay sa katotoohan?

¹² Mga magurang, mayong duda na gusto nindong magdanay sa katotoohan an saindong mga aki. Tibaad isipon nindo na kun igwa sinda nin marahay na mga amigo sa kongregasyon, mag-uuswag na sinda sa espirituwal. Minsan siring, para makumbinsir an saindong mga aki na yaon sa sainda an katotoohan, kaipuhan ninda bako lang an marahay na mga amigo. Kaipuhan nindang magkaigwa nin personal na relasyon sa Diyos asin magin kumbinsido na totoo an mga itinutukdo kan Bibliya.

¹³ Para maitukdo kan mga magurang sa saindang mga aki an katotoohan manungod sa Diyos, dapat na magin marahay na halimbawa sinda sa pag-adal nin Bibliya. Dapat na magtao sinda nin panahon sa paghurop-hurop kan mga nanunudan ninda. Dangan matutukduan na ninda an saindang mga aki na iyan man an gibuhon. Kaipuhan nindang tukduan an saindang mga aki na gamiton an satong mga pantabang sa pag-adal sa Bibliya, arog kan ginigibo ninda sa mga Bible study ninda. Sa paggibo kaiyan, matatabangan ninda an saindang mga aki na pahalagahan si Jehova asin an pinakapaagihan na ginagamit niya para magtao nin espirituwal na kakanon—“an maimbod asin mapagmansay na uripon.” (Mat. 24:45-47) Mga magurang, bako lang panginot na mga katotoohan sa Bibliya an dapat na itukdo nindo sa saindong mga aki.  Tabangan man sinda na magkaigwa nin makusog na pagtubod paagi sa pagtukdo sa sainda kan manungod sa “harararom na bagay nin Diyos” na angay sa edad asin kakayahan ninda.—1 Cor. 2:10.

14. Taano ta dapat niyatong pag-adalan an mga propesiya sa Bibliya? (Hilingon man an kahon na “ Ikakapaliwanag Mo Daw an mga Propesiyang Ini?”)

¹⁴ Mahalagang kabtang kan Tataramon nin Diyos an mga propesiya. Nakakatabang iyan sa sato na mapakusog an pagtubod niyato. Anong mga propesiya an nakapakusog kan saimong pagtubod? Tibaad sambiton mo an mga propesiya manungod sa “huring mga aldaw.” (2 Tim. 3:1-5; Mat. 24:3, 7) Alagad ano pang ibang mga propesiya na nautob na an makakapakusog kan saimong kumbiksiyon? Halimbawa, ikakapaliwanag mo daw an nautob na asin padagos pang nauutob na mga propesiya na nasa Daniel kapitulo 2 o sa Daniel kapitulo 11? * Kun igwa ka nin pagtubod na marigon na nakabasar sa Bibliya, an pagtubod na iyan dai nanggad mararaot. Pag-isipan an halimbawa kan satong mga tugang na nag-agi nin grabeng persekusyon sa Alemania kan Giyera Mundiyal II. Dai ninda lubos na nasasabutan an mga propesiya may koneksiyon sa huring mga aldaw, pero may makusog sindang pagtubod sa Tataramon nin Diyos.

15-17. Paano an pag-adal sa Bibliya nakapakusog sa satong mga tugang na pinersegir kan mga Nazi?

¹⁵ Sa pamamahala kan Nazi Germany, ribo-ribo sa satong mga tugang an ipinadara sa mga kampo de-konsentrasyon. Anggot na marhay si Hitler asin an SS Chief na si Heinrich Himmler sa Mga Saksi ni Jehova. Sigun sa sarong sister, sinabi ni Himmler sa sarong grupo nin mga sister sa sarong kampo de-konsentrasyon: “Posibleng an Jehova nindo an namamahala sa langit, pero digdi sa daga kami an namamahala! Ipapahiling mi saindo kun si’say an matatadang buhay, kamo o kami!” Ano an nakatabang sa mga lingkod ni Jehova na magdanay na maimbod?

¹⁶ Aram kan mga Estudyante sa Bibliyang idto  na nagpuon na mamahala an Kahadian nin Diyos kan 1914. Dai sinda nagngalas sa grabeng pagkontra sa sainda. Minsan siring, kumbinsido an mga lingkod ni Jehova na mayong gobyerno nin tawo an makakapapundo na mautob an katuyuhan nin Diyos. Dai kayang paraon ni Hitler an tunay na pagsamba o mag-establisar nin sarong gobyerno na mas makapangyarihan kisa sa Kahadian nin Diyos. Kumbinsido an satong mga tugang na pag-abot nin panahon, matatapos an pamamahala ni Hitler.

¹⁷ Dai napasala an kumbiksiyon kan mga tugang niyatong idto. Dai nahaloy, buminagsak an rehimen nin Nazi, asin si Heinrich Himmler—an nagsabing “digdi sa daga kami an namamahala”—kinaipuhan na dumulag. Mantang nagdudulag, nagkahilingan sinda ni Brother Lübke na dating preso na aram niyang sarong Estudyante sa Bibliya. Sa sobrang pagkadisganar, hinapot ni Himmler si Brother Lübke: “O, Estudyante sa Bibliya, ano na an mangyayari?” Ipinaliwanag ni Brother Lübke ki Himmler na kaidto pa sigurado an mga Saksi ni Jehova na mabagsak an rehimen nin Nazi asin na makakaligtas sinda. Kaidto kadakul kan maraot na sinasabi ni Himmler manungod sa mga Saksi ni Jehova, pero sa puntong ini mayo na siyang masabi. Dai nahaloy pagkatapos kaiyan, naghugot siya. Ano an leksiyon? An pag-adal niyato sa Bibliya, kaiba na an mga propesiya na yaon diyan, makakatabang para magkaigwa kita nin dai nanggad mararaot na pagtubod sa Diyos asin makapanindugan sa mga panahon nin pagbalo.—2 Ped. 1:19-21.

18. Arog kan ipinaparisa sa Juan 6:67, 68, taano ta kaipuhan niyato an “tamang kaaraman asin lubos na pakamansay” na sinambit ni Pablo sa Filipos 1:9?

¹⁸ An lambang saro sa sato dapat na magpahiling nin pagkamuot—an midbidan kan tunay na mga Kristiyano. Pero kaipuhan ta man nin “tamang kaaraman asin lubos na pakamansay.” (Fil. 1:9) Huling kun mayo kita kaiyan, puwede kitang maimpluwensiyahan kan “lambang duros nin katukduan huli sa pagdangog . . . sa mga pangloloko nin tawo,” kaiba na an mga apostata. (Efe. 4:14) Kan dakul na disipulo kan inot na siglo C.E. an nagpundo sa pagsunod ki Jesus, ipinahayag ni apostol Pedro an saiyang marigon na kumbiksiyon na yaon ki Jesus “an mga tataramon nin buhay na daing katapusan.” (Basahon an Juan 6:67, 68.) Dawa dai kaidto nasasabutan ni Pedro an gabos na detalye manungod sa mga tataramon na iyan, nagdanay siyang maimbod dahil nasabutan niya an katotoohan na si Jesus an Cristo. Puwede mo man pakusugon an saimong kumbiksiyon sa mga itinutukdo kan Bibliya. Kun gigibuhon mo iyan, an saimong pagtubod magdadanay na makusog ano man an mangyari, asin matatabangan mo man an iba na magkaigwa nin makusog na pagtubod.—2 Juan 1, 2.