1. Ano an puwedeng magin epekto sa mga tawo kan pakikipagkumpetensiya?

SA KINABAN ngunyan, dakul na tawo an mahilig makipagkumpetensiya dahil sa pagigin makasadiri. Halimbawa, tibaad gumamit an sarong negosyante nin daing hirak na mga pamamaagi para lang madaog an mga kapwa niya negosyante. Sa sarong kawat, tibaad tuyong kulgan nin sarong atleta an kapwa niya atleta kan kalaban na team para lang manggana. An sarong estudyante tibaad mandaya sa entrance exam para lang makalaog sa sarong sikat na unibersidad. Bilang Kristiyano, aram ta na sala an mga iyan; kaiba iyan sa “mga gibo kan laman.” (Gal. 5:19-21) Alagad, posible daw na mangyari na an pira sa mga lingkod ni Jehova minagawi na sa paaging nagpupukaw nin kurumpetensiyahan sa laog kan kongregasyon nin dai ninda naririsa? Mahalagang hapot iyan dahil an kurumpetensiyahan puwedeng makaapektar sa pagkasararo ta bilang magturugang.

2. Ano an pag-uulayan ta sa artikulong ini?

² Sa artikulong ini, pag-uulayan niyato an negatibong mga ugali na puwedeng magin dahilan na magpukaw kita nin kurumpetensiyahan sa satong mga tugang. Pag-uulayan ta man an mga halimbawa kan maimbod na mga lalaki asin babayi kan mga panahon kan Bibliya na dai nagpukaw nin kurumpetensiyahan. Inot, pag-ulayan ta kun paano niyato masisiyasat an satong motibo.

3. Ano an mga dapat tang ihapot sa satong sadiri?

³ Sa pana-panahon, marahay na siyasaton ta an satong motibo. Puwede tang haputon an satong sadiri: ‘Nahihiling ko lang daw an halaga ko pag ikinukumparar ko an sadiri ko sa iba? Nagmamaigot  daw ako sa kongregasyon dahil gusto kong ako an pinakamahusay sa ano man na ginigibo ko o iniisip na mas matibay ako kisa sa sarong partikular na tugang? O an gusto ko lang iyo na itao ki Jehova an pinakamakakaya ko?’ Taano ta dapat niyatong ihapot iyan? Mangnuhon an sinasabi kan Tataramon nin Diyos.

4. Taano ta dai niyato dapat ikumparar sa iba an sadiri ta, arog kan binanggit sa Galacia 6:3, 4?

⁴ Dinadagka kita kan Bibliya na dai ikumparar an satong sadiri sa iba. (Basahon an Galacia 6:3, 4.) Taano? An sarong dahilan iyo na kun iisipon ta na nakakalabi kita kisa sa satong tugang, tibaad magin orgulyoso kita. Sa ibong na kampi, kun minemenos ta man an sadiri ta kumpara sa iba, posibleng marhay na madisganar kita. Arin man diyan, bakong madunong na isipon ta iyan. (Roma 12:3) An sister na si Katerina, * na nakaistar sa Grecia, nagsabi: “Kaidto pirmi kong pigkukumparar an sadiri ko sa iba na sa hiling ko mas magayon sako, mas matibay sa ministeryo, saka mas mahusay makipag-amigo. Kaya namatian ko na bako akong mahalaga.” Dapat tang tandaan na irinani kita ni Jehova saiya, bako dahil magayon kita, matibay magtaram, o sikat, kundi dahil andam kitang mamutan siya asin magdangog sa saiyang Aki.—Juan 6:44; 1 Cor. 1:26-31.

5. Ano an nanudan mo sa eksperyensiya kan brother na si Hyun?

⁵ An saro pang puwede tang ihapot sa sadiri iyo ini: ‘Bisto daw ako bilang parapatuninong, o parati daw akong may dai nakakasundo?’ Mangnuhon an eksperyensiya kan brother na si Hyun na nakaistar sa South Korea. May panahon kaidto na ibinilang niyang karibal an pirang brother na may pribilehiyo sa paglilingkod. Sinabi niya, “Pigpaparakritika ko kaidto an mga brother na iyan, saka sa parati dai ako nag-uuyon sa mga sinasabi ninda.” Ano an resulta? “Dahil sa ugali ko, naapektaran an pagkasararo kan kongregasyon,” an inadmitir niya. Tinabangan si Hyun kan pira sa mga amigo niya na marealisar niya an problema. Naggibo si Hyun nin kinakaipuhan na mga pagbabago, asin ngunyan naglilingkod siya bilang sarong mahusay na elder. Kun marisa ta na may tendensiya kitang magpukaw nin kurumpetensiyahan imbes na tumabang na mapagdanay an katuninungan, dapat na humiro tulos kita asin gumibo nin mga pagbabago.

6. Uyon sa Galacia 5:26, anong maraot na mga ugali an puwedeng makapukaw nin kurumpetensiyahan?

⁶ Basahon an Galacia 5:26. Anong maraot na mga ugali an puwedeng makapukaw nin kurumpetensiyahan? An saro iyo an egotismo. An saro na may arog kaiyan na ugali orgulyoso saka makasadiri. An saro pang maraot na ugali iyo an pagkauri. Gusto kan tawong maurihon bako lang an mga bagay na igwa an saro kundi gusto niya man na halion iyan saiya. Iyo, an pagkauri sarong klase nin pagkaungis. Kaya gusto talaga niyatong likayan an maraot na mga ugaling iyan siring sa nakakaulakit na marhay na hilang!

7. Iilustrar kun ano an puwedeng magin danyos kan egotismo saka pagkauri.

⁷ An maraot na mga kuwalidad na egotismo saka pagkauri puwedeng iagid sa mga ati na nakakakontaminar sa gasolina nin sarong eroplano. Tibaad makalayog man an eroplano, pero puwedeng mabara kan mga ati an mga inaagihan kan gasolina na puwedeng magin dahilan na magpundo an makina bago mismo maglanding an eroplano asin bumagsak iyan. Kaagid kaiyan, tibaad naglilingkod an saro ngunyan ki Jehova. Pero kun nagpapahiling siya nin egotismo saka maurihon, mabagsak siya. (Tal. 16:18) Mapundo siya sa paglilingkod ki Jehova asin madadanyaran niya an sadiri niya saka an iba. Kaya, ano an puwede tang gibuhon para malikayan an egotismo saka pagkauri?

8. Paano ta malalabanan an egotismo?

 ⁸ Malalabanan ta an egotismo paagi sa pagsaisip kan sadol ni apostol Pablo sa mga taga Filipos: “Likayan nindo an paggibo nin ano man na bagay dahil sa hilig na makipagdaugan o dahil sa pagigin mapagpaimportante sa sadiri, kundi may kapakumbabaan nindong ibilang an iba na mas urog kisa saindo.” (Fil. 2:3) Kun ibibilang ta an iba na mas urog kisa sato, dai kita makikipagkumpetensiya sa mga igwa nin mga talento saka kakayahan na nakakalabi kisa kan sa sato. Sa kabaliktaran, magigin maugma kita para sa sainda. Totoo iyan lalo na kun ginagamit ninda an saindang mga kakayahan sa paglilingkod ki Jehova para umawon siya. Para man sa mga tugang tang may arog kaiyan na mga kakayahan, kun sinusunod ninda an sadol ni Pablo, mapokus sinda sa mga kuwalidad na naaapresyar ninda sato. Kaya gabos kita, makakatabang na magdanay na matuninong saka nagkakasararo an kongregasyon.

9. Paano ta makokontrol an tendensiya ta na mauri?

⁹ Makokontrol ta an tendensiya tang mauri paagi sa pagpahiling nin kababaan nin buot na nangangahulugan na aram ta an mga limitasyon ta. Kun may kababaan kita nin buot, dai ta pupurbaran na patunayan na mas may kakayahan o mas maabilidad kita kisa sa gabos na iba pa. Imbes, mahanap kita nin paagi kun paano makakanuod sa mga mas maabilidad kisa sato. Halimbawa, ipamugtak na may sarong brother sa kongregasyon na talagang mahusay magpahayag. Puwede ta siyang haputon kun paano niya pinag-aandaman an mga pahayag niya. Kun an sarong sister matibayon magluto, puwede kitang maghagad nin mga suhestiyon saiya na makakatabang sato na magin mas mahusay magluto. Asin kun an sarong hoben na Kristiyano nasasakitan na makipag-amigo, puwede siyang magpatabang sa saro na madalion makipag-amigo. Kun gigibuhon ta iyan, malilikayan ta na mauri saka mapapauswag ta man an satong mga kakayahan.

10. Anong kadipisilan an napaatubang ki Gideon?

¹⁰ Pag-isipan an nangyari ki Gideon, na hali sa tribo ni Manases, asin sa mga lalaki kan tribo ni Efraim. Sa tabang ni Jehova, si Gideon asin an saiyang 300 na tawuhan nagkaigwa nin pambihirang kapangganahan na puwede kutanang ipinag-orgulyo nindang marhay. Nagdulok  ki Gideon an mga lalaki kan tribo ni Efraim, bako para komendaran siya, kundi para mang-iwal. Minalataw na naanggot sinda dahil dai sinda inimbitaran ni Gideon puon sa kapinunan na umiba sa pakikipaglaban sa mga kaiwal nin Diyos. Nagpokus sindang marhay sa pagprotektar sa onra kan tribo ninda imbes na sa kun ano an mas importante—na nakatabang pa sana si Gideon na tawan nin onra an pangaran ni Jehova asin na protektaran an Saiyang banwaan.—Hok. 8:1.

11. Ano an sinabi ni Gideon sa mga lalaki kan Efraim?

¹¹ Mapakumbabang sinabi ni Gideon sa mga lalaki kan Efraim: “Ano man an nagibo ko kumpara sa nagibo nindo?” Dangan nagtao siya nin sarong espesipikong halimbawa kun paano sinda binendisyunan ni Jehova. Bilang resulta, “kuminalma” an mga lalaki. (Hok. 8:2, 3, NWT) Andam na nagpakumbaba si Gideon tanganing mapagdanay an katuninungan sa tahaw kan banwaan nin Diyos.

12. Ano an manunudan ta sa halimbawa kan mga Efraimita asin ni Gideon?

¹² Ano an manunudan ta sa istoryang iyan? Sa halimbawa kan mga Efraimita, nanudan ta na dai kita dapat magpokus sa pagprotektar sa satong onra, imbes dapat na magpokus kita sa pagtaong onra ki Jehova. Bilang mga payo nin pamilya asin mga elder, may manunudan kita ki Gideon. Kun igwa nin naaanggot sato dahil sa sarong bagay na ginibo ta, dapat tang hilingon an mga bagay-bagay sa pagmansay niya. Puwede ta man siyang komendaran sa mga marahay na nagigibo niya. Nangangaipo iyan na magpahiling kita nin kapakumbabaan, lalo na kun malinaw man na sala siya. Pero an katuninungan mas mahalaga nanggad kisa sa patunayan na tama kita.

13. Anong kadipisilan an napaatubang ki Hana, asin paano niya iyan napangganahan?

¹³ Pag-isipan man an halimbawa ni Hana. Agom siya kan Levitang si Elkana, na namumutan siyang marhay. Pero may saro pang agom si Elkana, si Penina. Mas namumutan ni Elkana si Hana kisa ki Penina; alagad, “si Penina igwang mga aki, pero si Hana mayo.” Huli kaiyan, “pigpaparatuya-tuya [ni Penina si Hana] para kulgan an buot niya.” Ano an nagin reaksiyon ni Hana? Nakulgan na marhay an buot niya! “Naghihibi siya asin dai nagkakakan.” (1 Sam. 1:2, 6, 7, NWT) Dawa arog kaiyan, mayong sinasabi an Bibliya na pinurbaran ni Hana na bumalos ki Penina sa ano man na paagi. Imbes, sinabi niya ki Jehova an gabos na nasa puso niya asin nagtiwala na itatanos Niya an mga bagay-bagay. Nagbago daw an pagtrato ni Penina ki Hana? Mayong sinasabi an Bibliya. Pero an aram ta, nagkaigwa na giraray si Hana nin panglaog na katuninungan asin napagdanay iyan. ‘Bako nang mamundo an saiyang lalawgon.’—1 Sam. 1:10, 18.

14. Ano an manunudan ta sa halimbawa ni Hana?

¹⁴ Ano an manunudan ta sa halimbawa ni Hana? Kun may saro na nagpupurbar na makipagkumpetensiya saimo, tandaan na kontrolado  mo an magigin reaksiyon mo. Dai mo kaipuhan na makikumpetensiya na man saiya. Imbes na magbalos nin maraot sa maraot, hinguwahon na makipagkatuninungan sa saiya. (Roma 12:17-21) Dawa kun dai siya magbago, mapagdadanay mo an saimong panglaog na katuninungan.

15. Sa ano magkapareho si Apolos saka si Pablo?

¹⁵ Panghuri, pag-isipan kun ano an manunudan ta sa halimbawa kan disipulong si Apolos saka ni apostol Pablo. Pareho sindang dakulon an aram sa Kasuratan. Pareho sindang midbid saka mahusayon na paratukdo. Saka pareho sindang dakul an natabangan na magin disipulo. Pero dai ninda ibinilang na karibal an lambang saro.

16. Anong klaseng tawo si Apolos?

¹⁶ Si Apolos “tubong Alejandria,” na sarong sentro nin edukasyon kan inot na siglo. Minalataw na mahusay siyang magtaram, saka “kabisado niya an Kasuratan.” (Gibo 18:24) Kan naglilingkod kaidto si Apolos sa Corinto, malinaw na ipinahiling kan nagkapirang tugang sa kongregasyon na mas gusto ninda siya kisa sa ibang mga tugang, kaiba na si Pablo. (1 Cor. 1:12, 13) Sinuportaran daw ni Apolos an nakakapabarangang kaisipan na iyan? Dai lamang. Sa katunayan, pagkahali ni Apolos sa Corinto, dinagka siya ni Pablo na bumalik duman. (1 Cor. 16:12) Nungkang gigibuhon iyan ni Pablo kun namatian niyang nagkakawsa nin pagkabaranga si Apolos sa kongregasyon. Malinaw na ginamit ni Apolos an saiyang mga kakayahan sa marahay na paagi—para ibalangibog an maugmang bareta asin pakusugon an mga tugang. Makakasigurado man kita na mapakumbaba si Apolos. Halimbawa, mayo kitang mababasa na nauyam siya kan si Aquila saka Priscila nagtao nin “mas tamang eksplikasyon manungod sa dalan nin Diyos.”—Gibo 18:24-28.

17. Ano an ginibo ni Pablo para mapagdanay an katuninungan?

¹⁷ Aram ni apostol Pablo an marahay na mga  naisagibo ni Apolos. Pero dai nahadit si Pablo na tibaad isipon kan mga tawo na mas matibay si Apolos kisa saiya. An kapakumbabaan saka pagkarasonable ni Pablo mahihiling sa sadol na itinao niya sa kongregasyon sa Corinto. Imbes na magdakula an payo dahil sa mga nagsasabing “ki Pablo ako,” itinao niya an gabos na atensiyon sa Diyos na Jehova asin ki Jesu-Cristo.—1 Cor. 3:3-6.

18. Base sa 1 Corinto 4:6, 7, ano an manunudan ta sa halimbawa ni Apolos saka ni Pablo?

¹⁸ Ano an manunudan ta sa halimbawa ni Apolos saka ni Pablo? Tibaad nagmamaigot kita para ki Jehova, asin tibaad dakul kitang matabangan na umuswag sagkod na mabawtismuhan. Pero aram ta na an ano man na kapangganahan na naisasagibo ta, posible sana iyan dahil sa tabang ni Jehova. May manunudan pa kita sa halimbawa ni Apolos saka ni Pablo—mantang mas dakul kitang paninimbagan sa kongregasyon, mas dakul man kitang oportunidad na makatabang na mapagdanay an katuninungan. Nagpapasalamat nanggad kita pag an nombradong mga lalaki nagtatabang na mapagdanay an katuninungan asin pagkasararo paagi sa pagbasar kan sadol ninda sa Tataramon nin Diyos asin pagtao kan atensiyon, bako sa sadiri ninda, kundi sa satong arugan, si Cristo Jesus!—Basahon an 1 Corinto 4:6, 7.

19. Ano an puwedeng gibuhon kan lambang saro sato? (Hilingon an kahon na “ Dai Magpukaw nin Kurumpetensiyahan.”)

¹⁹ An kada saro sato tinawan nin Diyos nin mga talento o kakayahan. Puwede tang gamiton an regalong iyan “sa paglilingkod sa lambang saro.” (1 Ped. 4:10) Tibaad iniisip ta na sadit na bagay lang an ginigibo ta. Pero an saradit na bagay na ginigibo ta para makasuportar sa pagkasararo, garo saradit na tahi na nagdudugtong sa mga tela. Pagmaigutan ta lugod na halion sa satong sadiri an ano man na ugali asin kaisipan na puwedeng makapukaw nin kurumpetensiyahan. Lugod na magin determinado kita na gibuhon an gabos tang makakaya para makakontribwir sa katuninungan asin pagkasararo sa laog kan kongregasyon.—Efe. 4:3.