Pag an duwang tawo nagin mag-agom, siguradong gusto ni Jehova na magin maugma sinda saka dayupot sa kada saro habangbuhay. (Mat. 19:4-6) Kun gusto mo nang mag-agom, paano ka makakahanap nin marahay na maaagom? Dahil si Jehova an satuyang Kaglalang, aram niya kun ano an kaipuhan tang gibuhon para magkaigwa kita nin maugmang buhay may agom. Kaya kun isasabuhay ta an mga prinsipyo na itinao niya sa sato, talagang magigin maugma kita. Uni an nagkapira sa mga prinsipyong iyan.

Inot, dapat na malinaw sato an bagay na ini: “Madaya an puso nin labi sa gabos na bagay, asin maraot.” (Jer. 17:9) Pag an duwang tawo na gustong mag-agom magkabistuhan tapos nagpuon nang mag-date, madalion sindang makamati nin makusog na pagkagusto para sa kada saro. Dahil diyan puwedeng masakitan sinda na gumibo nin tamang mga desisyon. Kun an duwang tawo magdesisyon na magpakasal dahil lang sa namamatian ninda para sa kada saro, dakulang problema iyan sa huri. (Tal. 28:26) Kaya bakong tama para sa duwang tawo na magpahayag tulos kan namamatian ninda kun nagpupuon pa sana an relasyon ninda, o na gumibo nin mga pangako kun dai pa talaga ninda midbid an kada saro.

An Talinhaga 22:3 nagsasabi: “An saro na alisto an isip nahihiling an peligro asin minatago, pero an daing eksperyensiya minadiretso sana asin sinasapar an mga konsekwensiya.” (NWT) Ano an peligro sa paggamit nin mga dating site? Nakakamundo, may mga nakipagbistuhan online, nakipag-date, tapos kan huri naisihan ninda na linoko lang palan sinda. Igwa man nin mga nangloloko paagi sa paggibo nin pekeng account para makakua nin kuwarta sa mga inosenteng tawo. Kun minsan, sinasabi pa ngani ninda na mga Saksi daa sinda.

Uni an saro pang peligro. May mga dating site na naggagamit nin mga mathematical calculation para maaraman kun sairisay ngaya an mga bagay o compatible. Pero mayo man nin ebidensiya na talagang nakakatabang iyan. Madunong daw na ipagkatiwala sa sarong computer program na gibo nin tawo an paggibo nin importanteng desisyon, arog kan paghanap nin maaagom? Bakong arog kan mga prinsipyo sa Bibliya, an mga computer program na ini dai nanggad maaasahan.—Tal. 1:7; 3:5-7.

May mababasa man kitang prinsipyo sa Talinhaga 14:15, na an sabi: “An tawong inosente sa buhay pinapaniwalaan an lambang tataramon pero  an saro na alisto an isip pinag-iisipan an lambang lakad.” (NWT) Bago mo masabi na an saro puwede mong magin marahay na agom, dapat na bistuhon mo nguna siyang marhay. Pero masakit iyan gibuhon kun sa online mo lang siya nabisto. Maski ngani nahihiling nindo pareho an profile nindo tapos pirmi kamong nag-uulay online, masasabi mo daw talaga na midbid mo na siya? May mga naghuna na nahanap na ninda an tunay na mamumutan ninda, pero nabigla sinda sa mga naaraman ninda kan magkahilingan na sinda sa personal.

An salmista nagsabi: “Dai ako nakikiiba-iba sa mga tawong madaya, asin linilikayan ko idtong mga itinatago kun ano talaga sinda.” (Sal. 26:4, NWT) Iniisip nin dakul na normal sana na maglaag nin bakong totoong mga impormasyon sa online dating profile ninda para mas magustuhan sinda. Diyan puwede nindang itago an saindang tunay na pagkatawo, o dai ninda iyan ipahiling pag nagpo-post sinda o nagsi-send nin message. Dawa ngani may mga nagpapabisto na Saksi ni Jehova sinda, talaga daw na bawtisadong Kristiyano na sinda? Maygurang daw sinda sa espirituwal? Igwa daw sindang haraning relasyon ki Jehova? Iginagalang daw sinda sa saindang kongregasyon? O tibaad bako sindang marahay na halimbawa o “maraot na pag-iriba” pa ngani. (1 Cor. 15:33; 2 Tim. 2:20, 21) Puwede daw talaga sindang mag-agom kauyon kan mga prinsipyo sa Bibliya? Aram mo dapat an simbag sa mga hapot na ini. Pero masasakitan kang aramon an mga simbag kun dai ka mahapot sa ibang Saksi na nakakamidbid sa saiya. (Tal. 15:22) Tapos siyempre, dai lamang gugustuhon kan sarong maimbod na lingkod ni Jehova na ‘makipagsakal nin bakong timbang’ sa sarong bakong kapagtubod.—2 Cor. 6:14; 1 Cor. 7:39.

Dahil delikado an paggamit nin mga dating site, igwa nin mas marahay na mga paagi para makahanap nin saro na puwede mong magin agom. Sain ka makakahanap nin saro na puwedeng magin marahay na agom? Kun posible an pampublikong mga pagtiripon, puwede tang makabisto nin personal an iba pang mga Saksi ni Jehova paagi sa pag-atender sa mga pagtiripon kan kongregasyon, asembleya, kumbensiyon, asin iba pang pagtiripon-tipon.

Pag bakong posible an mga pagtiripon na ini, arog kun igwa nin COVID-19 na pandemya, naggagamit kita nin mga electronic device sa pag-attend niyato sa mga pagtiripon sa kongregasyon, na diyan may mga pagkakataon kita na mabisto an iba pang mga Saksi na daing agom. Mahihiling mo kun paano sinda nagpapartisipar sa mga pagtiripon saka madadangog mo kun paano ninda naipapahayag an saindang pagtubod. (1 Tim. 6:11, 12) Puwede man kamong makapag-ulay sa breakout room pagkatapos nin mga pagtiripon. Paagi sa virtual na mga social gathering kan mga Saksi, maoobserbaran mo kun paano nakikipag-ulay sa iba an tawong nagugustuhan mo. Makakatabang iyan na maaraman mo an tunay na ugali niya. (1 Ped. 3:4) Pag-abot nin panahon, pag mas lalo mong nabibisto siya, maaaraman mo kun magkapareho kamo nin mga gustong maabot asin mga ugali saka kun baga bagay kamo.

Kun gagamiton kan mga daraga saka soltero an mga prinsipyo sa Bibliya sa paghanap nin magigin agom, mas posibleng marhay na magkatotoo sa sainda an talinhagang ini na nagsasabi: ‘An nakakua nin [marahay na] agom na babayi [o agom na lalaki] nakakua nin karahayan asin nakaabot kan marahay na buot ni Jehova.’—Tal. 18:22.