1. Ano an ginibo ni Jehova para saimo?

PAANO ka nagin Saksi ni Jehova? Inot, nadangog mo “an maugmang bareta”—tibaad paagi sa mga magurang mo, katrabaho o kaklase, o paagi sa paghuhulit sa harong-harong. (Mar. 13:10) Dangan, may saro na nagtao nin dakul na panahon asin naghinguwang konduktahan ka nin pag-adal sa Bibliya. Sa pag-adal na iyan, namutan mo si Jehova asin naaraman mong namumutan ka niya. Dinara ka ni Jehova sa katotoohan, asin ngunyan na disipulo ka na ni Jesu-Cristo, igwa ka na kan paglaom na mabuhay nin daing katapusan. (Juan 6:44) Siguradong nagpapasalamat kang marhay ki Jehova dahil may pinahiro Siyang tawo para itukdo saimo an katotoohan asin inako ka Niya bilang saro sa mga lingkod Niya.

2. Ano an pag-uulayan ta sa artikulong ini?

² Ngunyan na aram ta na an katotoohan, igwa kita kan pribilehiyo na tabangan an iba na umiba sato sa paglakaw sa dalan pasiring sa buhay. Tibaad komportable kita sa pagharong-harong, pero tibaad nadidipisilan kitang mag-alok saka magkondukta nin pag-adal sa Bibliya. Arog ka daw kaiyan? Kun iyo, puwedeng makatabang saimo an mga suhestiyon sa artikulong ini. Pag-uulayan ta kun ano an nagmomotibar sato na tumabang sa paggibo nin mga disipulo. Aaramon ta man kun paano ta makakayanan an mga kadipisilan na puwedeng makaulang sato na magkondukta nin pag-adal sa Bibliya. Inot, pag-ulayan ta kun taano ta dapat na bako lang kitang mga parahulit kundi mga paratukdo man kan maugmang bareta.

3. Taano ta naghuhulit kita?

³ Kan yaon digdi sa daga si Jesus, tinawan niya an mga parasunod niya nin sarong pagbuot na may duwang kabtang. Inot, sinabi niya sainda na ihulit an maugmang bareta kan Kahadian, asin ipinahiling niya sainda kun paano iyan gigibuhon. (Mat. 10:7; Luc. 8:1) Halimbawa, inandam ni Jesus an mga disipulo niya kun  ano an gigibuhon ninda pag magayon o pag bakong magayon an reaksiyon kan mga tawo sa mensahe kan Kahadian. (Luc. 9:2-5) Ihinula niya man an hiwas kan saindang gibuhon na paghuhulit, na sinasabi sainda na an mga parasunod niya matao nin “patotoo sa gabos na nasyon.” (Mat. 24:14; Gibo 1:8) Ano man an magin reaksiyon kan mga tawo sa paghuhulit, dapat na sabihon kan mga disipulo sa mga tawo an manungod sa Kahadian nin Diyos asin sa mga gigibuhon kaiyan.

4. Uyon sa Mateo 28:18-20, ano an dapat tang gibuhon apuwera sa paghuhulit kan Kahadian?

⁴ Ano an ikaduwang kabtang kan pagbuot na iyan na itinao ni Jesus? Sinabi niya sa saiyang mga parasunod na itukdo sa potensiyal na mga disipulo na sunudon an gabos na ipinagbuot niya. Pero kan inot na siglo sana daw dapat gibuhon an paghuhulit saka pagtutukdong ini, arog kan sinasabi kan iba? Dai. Ipinarisa ni Jesus na an importanteng marhay na gibuhon na ini magpapadagos dawa sa panahon niyato “sagkod sa pagtatapos kan sistema nin mga bagay.” (Basahon an Mateo 28:18-20.) Posibleng marhay na itinao ni Jesus an pagbuot na iyan kan magpahiling siya sa labing 500 sa saiyang mga disipulo. (1 Cor. 15:6) Asin sa kapahayagan na itinao niya ki Juan, malinaw na ipinahiling ni Jesus na inaasahan na tatabangan kan gabos niyang disipulo an iba na makanuod manungod ki Jehova.—Kap. 22:17.

5. Uyon sa 1 Corinto 3:6-9, paano iinilustrar ni Pablo an koneksiyon kan paghuhulit asin pagtutukdo?

⁵ An paggibo nin disipulo iinagid ni apostol Pablo sa pagkultibar nin tinanom, na nagpaparisa na bako lang pagtanom nin banhi an dapat tang gibuhon. Ipinagirumdom niya sa mga taga Corinto: “Ako an nagtanom, si Apolos an nagbaribi . . . Kamo an uma na pigkukultibar nin Diyos.” (Basahon an 1 Corinto 3:6-9.) Bilang mga trabahador sa “uma . . . nin Diyos,” dai ta lang pigtatanom an banhi kundi binabaribian iyan asin regular na pighihiling an pagtalubo kaiyan. (Juan 4:35) Kasabay kaiyan, aram ta na an Diyos an nagpapatalubo kan banhi.

6. Ano an kalabot sa gibuhon ta bilang paratukdo?

⁶ Hinahanap ta an mga tawo na “igwang pusong nasa tamang kamugtakan para sa buhay na daing katapusan.” (Gibo 13:48) Para matabangan sinda na magin mga disipulo, dapat tang tabangan sinda na (1) masabutan, (2) akuon, asin (3) iaplikar an mga nanunudan ninda sa Bibliya. (Juan 17:3; Col. 2:6, 7; 1 Tes. 2:13) An gabos sa kongregasyon puwedeng makatabang sa mga tinutukduan sa Bibliya paagi sa pagpahiling nin pagkamuot sa sainda asin pag-welcome sainda sa mga pagtiripon. (Juan 13:35) Tibaad kaipuhan man kan nagkokondukta nin pag-adal na magtao nin dakul na panahon asin kusog para matabangan an saiyang tinutukduan na bayaan kaini an mga paniniwala o kaugalian “na nakagamot na nin marigon.” (2 Cor. 10:4, 5) Puwedeng mangaipo nin dakul na bulan an pagtabang sa saro na magibo iyan tanganing maabot niya an pasuhan na pagpabawtismo pag-abot nin panahon. Pero sulit na marhay an paghihinguwa.

7. Ano an nagmomotibar sato na makikabtang sa gibuhon na paghuhulit asin paggibo nin mga disipulo?

⁷ Taano ta nakikikabtang kita sa gibuhon na paghuhulit asin paggibo nin mga disipulo? Inot, dahil namumutan ta si Jehova. Pag ginigibo mo an pinakamakakaya mo para sunudon an pagbuot na maghulit asin gumibo nin mga disipulo, pinapatunayan mo na namumutan mo an Diyos. (1 Juan 5:3) Pag-isipan ini: Huli sa pagkamuot mo ki Jehova, nagigibo mo nang maghulit sa harong-harong. Pasil daw na sunudon an pagbuot na iyan? Posibleng dai. Kan inot na beses kang makipag-ulay sa harong-harong, pignerbiyos ka daw? Siguradong iyo! Pero dahil aram mo na iyan an gusto ni Jesus na gibuhon mo, nagsunod ka sa pagbuot niya. Asin posibleng marhay na sa paglihis nin panahon, nagin mas madali  na saimo na makikabtang sa paghuhulit. Pero kumusta man sa pagkondukta nin pag-adal sa Bibliya? Iniisip mo pa lang daw iyan pignenerbiyos ka na? Siguro. Alagad, pag hinagad mo ki Jehova na tabangan kang malabanan an nerbiyos mo asin magkaigwa nin kusog nin buot para mag-alok nin pag-adal sa Bibliya, tatabangan ka niya na kumusog an pagmawot mo na gumibo nin mga disipulo.

8. Uyon sa Marcos 6:34, ano pa an makakapahiro sa sato na tukduan an iba?

⁸ Ikaduwa, pinapahiro kita kan pagkamuot sa satong kapwa na tukduan sinda kan katotoohan. Sa sarong pangyayari, pagal-pagal si Jesus saka an mga disipulo niya pagkatapos nin maigot na paghuhulit. Kaipuhan ninda nin lugar na diyan puwede sindang makapahingalo, pero nahiling sinda nin dakul na tawo. Nahirak na marhay si Jesus kaya nagpuon siyang magtukdo sa mga tawo nin “dakul na bagay.” (Basahon an Marcos 6:34.) Ginibo niya iyan maski pagal-pagal siya. Taano? Ibinugtak ni Jesus an sadiri niya sa kamugtakan ninda. Nahiling niya an grabeng pagsakit ninda—kun gurano ninda kaipuhan an paglaom—asin gusto niya sindang tabangan. Arog man kaiyan an kamugtakan kan mga tawo ngunyan. Dai isipon na miling garo baga maugma saka kontento sinda, mayo na sindang problema asin dai na ninda kaipuhan nin paglaom. Garo sinda mga karnerong nalalagalag na mayong pastor na naggigiya. Ilinadawan sinda ni apostol Pablo bilang mga tawong dai nakakamidbid sa Diyos asin mayo nin paglaom. (Efe. 2:12) Sinda yaon sa “dalan pasiring sa kalaglagan”! (Mat. 7:13) Pag iniisip ta an espirituwal na kamugtakan kan mga tawo sa satong teritoryo, napapahiro kita nin pagkamuot asin pagkahirak na tabangan sinda. Asin an pinakamarahay na paagi na matatabangan ta sinda iyo an pag-alok sainda nin pag-adal sa Bibliya.

9. Uyon sa Filipos 2:13, paano ka matatabangan ni Jehova?

⁹ Tibaad nag-aalangan kang mag-alok nin pag-adal sa Bibliya dahil aram mong mangangaipo iyan nin dakul na panahon. Kun iyan an namamatian mo, sabihon iyan ki Jehova. Hagadon saiya na pakusugon an pagmawot mong makahanap asin makapagkondukta nin pag-adal sa Bibliya. (Basahon an Filipos 2:13.) Inaasigurar kita ni apostol Juan na sisimbagon nin Diyos an mga pamibi na kauyon kan Saiyang kabutan. (1 Juan 5:14, 15) Kaya makakasigurado ka na tatabangan ka ni Jehova na kumusog an pagmawot mong makikabtang sa paggibo nin mga disipulo.

10-11. Ano an puwedeng makaulang sa sato na magkondukta nin pag-adal sa Bibliya?

¹⁰ Sineseryoso ta an pagbuot sato na magtukdo dawa ngani napapaatubang kita sa mga kadipisilan na puwedeng makaulang sato na lubos na makikabtang sa paggibo nin mga disipulo dawa gustong-gusto ta. Pag-ulayan ta an pira sa mga kadipisilan na iyan asin kun paano ta iyan makakayanan.

¹¹ Tibaad nalilimitaran kita kan satong kamugtakan. Halimbawa, igwang mga parahayag na may edad na o maluya an salud. Iyan daw an sitwasyon mo? Kun iyo, pag-isipan an saro sa mga nanudan ta sa pandemyang COVID-19. Naaraman ta na puwede palan kitang makapagkondukta nin epektibong pag-adal sa Bibliya gamit an cellphone o iba pang electronic device! Kaya maski nasa harong, puwede kang makapuon saka makapagkondukta nin pag-adal. Asin may saro pang bentaha. May mga tawo na gustong mag-adal nin Bibliya, pero dai sinda puwede sa mga oras na sa parati iyo an pinipili kan mga tugang para maghulit. Imbes, tibaad puwede sinda sa amay na aga o pag banggihon na. Puwede ka daw mag-adjust para matukduan an saro na bakante sana sa panahon na iyan? Tinukduan ni Jesus si Nicodemo sa banggi, na iyo an oras na gusto ni Nicodemo.—Juan 3:1, 2.

12. Anong mga bagay an nakakapakusog kan satong kumpiyansa na kaya tang magin epektibong paratukdo?

 ¹² Tibaad kulang an kumpiyansa ta sa satong kakayahan na magkondukta nin pag-adal sa Bibliya. Tibaad namamatian niyato na dapat na dakulon an kaaraman ta o dapat na mahusayon kita bago magin paratukdo. Kun arog kaiyan an namamatian mo, pag-isipan an tulong bagay na makakapakusog kan kumpiyansa mo. Inot, para ki Jehova kuwalipikado kang magtukdo sa iba. (2 Cor. 3:5) Ikaduwa, si Jesus, na igwa kan “gabos na awtoridad sa langit asin sa daga,” ipinagbuot saimo na magtukdo ka. (Mat. 28:18) Asin ikatulo, makakaasa ka na tatabangan ka kan iba. Nagsarig si Jesus sa kun ano an itinukdo saiya kan saiyang Ama na sasabihon niya, asin magigibo mo man iyan. (Juan 8:28; 12:49) Saro pa, puwede kang makiulay sa saindong paraataman nin grupo sa paglilingkod, sa kuwalipikadong payunir, o sa sarong eksperyensiyadong parahayag na tabangan kang makapuon asin makakondukta nin pag-adal sa Bibliya. An sarong paagi para magkusog an kumpiyansa mo iyo an pag-iba sa pag-Bible study kan mga parahayag na iyan.

13. Taano ta kaipuhan tang magin madaling mag-adjust?

¹³ Tibaad nasasakitan kitang mag-adjust sa bagong mga pamamaagi asin mga pantabang. Nagbago na ngunyan an paagi ta nin pagkondukta nin pag-adal sa Bibliya. An panginot na publikasyon ta sa pagtukdo, an Mabuhay nin Maugma Sagkod Pa Man!, nangangaipo nin ibang paagi nin paghanda asin pagkondukta kumpara sa ginigibo ta kaidto. Mas dikit na parapo na sana an binabasa ta asin mas dakul na an pakikipag-ulay sa tinutukduan. Pag nagtutukdo, mas naggagamit na kita nin mga video asin mga elektronikong pantabang, arog kan JW Library^®. Kun dai ka pa gayong tataong maggamit kan mga pantabang na iyan, magdulok sa saro na makakatabang saimo na makanuod na maggamit kaiyan. Kitang mga tawo, komportable sa mga kinatudan ta na. Kaya bakong madali sato na mag-adjust sa bagong mga pamamaagi. Pero sa tabang ni Jehova asin kan iba, magigin mas madali saimo na mag-adjust asin magin mas nakakaugma pa ngani an pagtukdo sa mga tawo. Arog kan sinabi nin sarong payunir, an pamamaaging ini nin pagtukdo “nakakaugma pareho sa tinutukduan asin sa nagtutukdo.”

14. Ano an dapat tang tandaan pag naghuhulit sa masakit na teritoryo, asin paano nakakapakusog sato an 1 Corinto 3:6, 7?

¹⁴ Tibaad naghuhulit kita sa teritoryo na masakit makapuon nin mga pag-adal sa Bibliya. An mga tawo tibaad dai interesado sa satong mensahe o kontra pa ngani. Ano an makakatabang sato na magdanay na positibo sa arog kaiyan na teritoryo? Tandaan na puwedeng magbago tulos an kamugtakan kan mga tawo sa maribok na kinaban na ini, asin idtong mga dating bakong interesado tibaad marealisar ninda na kaipuhan ninda an paggiya nin Diyos sa saindang buhay. (Mat. 5:3) An iba na dai talaga kaidto nag-aako kan satong mga literatura kan huri nag-ako na nin pag-adal sa Bibliya. Aram ta man na si Jehova an Kagurangnan kan pag-ani. (Mat. 9:38) Gusto niya na padagos kitang magtanom asin magbaribi, pero siya an Saro na nagpapatalubo. (1 Cor. 3:6, 7) Asin nakakapakusog nanggad na girumdumon na dawa kun mayo kitang kinokonduktahan nin pag-adal sa Bibliya sa ngunyan, binabalusan kita ni Jehova base sa satong mga paghihinguwa, bako sa resulta! *

15. Ano an namamatian ni Jehova pag may saro na nag-aako nin pag-adal sa Bibliya asin inaaplikar an mga nanunudan niya?

¹⁵ Nauugma si Jehova pag inaako nin saro an katotoohan sa Bibliya asin sinasabi niya sa iba an katotoohan na iyan. (Tal. 23:15, 16) Siguradong  ugmahon na marhay si Jehova pag nahihiling niya an nangyayari ngunyan! Halimbawa, sa ibong kan pandemya sa bilog na kinaban kan 2020 taon nin paglilingkod, nakapagkondukta kita nin 7,705,765 pag-adal sa Bibliya, na nakatabang sa 241,994 tawo na idusay an sadiri ninda ki Jehova asin magpabawtismo. An bagong mga disipulong iyan makondukta na man nin mga pag-adal sa Bibliya asin magibo nin dakul pang disipulo. (Luc. 6:40) Mayong duda na napapaugma ta si Jehova pag nakikikabtang kita sa paggibo nin mga disipulo.

16. Ano an puwede tang magin pasuhan?

¹⁶ Kaipuhan nin paghihinguwa an paggibo nin mga disipulo, pero sa tabang ni Jehova puwede kitang makikabtang sa pagtukdo sa mga baguhan na mamutan an satong Ama sa langit. Puwede ta daw na magin pasuhan na makapuon asin makapagkondukta nin kisiyera sarong tinutukduan sa Bibliya? Puwede kitang masurpresa sa mangyayari kun gagamiton ta an lambang angay na pagkakataon na alukan nin pag-adal an mga nakakaulay ta. Makakasigurado kita na bebendisyunan ni Jehova an mga paghihinguwa ta.

17. Ano an mamamatian ta kun makapagkondukta kita nin pag-adal sa Bibliya?

¹⁷ Dakulang pribilehiyo nanggad niyato na hulitan asin tukduan an iba kan katotoohan! Tunay na nakakapaugma sato an gibuhon na ini. Si apostol Pablo, na dakul an natabangan na magin disipulo sa Tesalonica, ipinahayag an namamatian niya: “[Ano an] samuyang paglaom o an samuyang kaugmahan o korona nin kagaya-gayahan sa atubangan kan satuyang Kagurangnan na Jesus sa panahon kan saiyang presensiya? Bako daw na kamo? Kamo nanggad an samong kamurawayan asin kaugmahan.” (1 Tes. 2:19, 20; Gibo 17:1-4) Arog man kaiyan an namamatian kan dakul ngunyan. An sister na si Stéphanie, kaiba an agom niya, na natabangan an nagkapira na mabawtismuhan nagsabi, “Mayo nang mas nakakapaugma pa kisa sa pagtabang sa mga tawo na idusay an sadiri ninda ki Jehova.”