1, 2. (a) Ano an hinagad ni Jesus sa saiyang huring pamibi kaiba an mga apostol niya? (b) Taano ta posibleng iniisip kaidto ni Jesus an dapit sa pagkasararo?

NASA isip ni Jesus an dapit sa pagkasararo kan huring pamanggihan niya kaiba an mga apostol. Mantang namimibi kaiba sinda, sinambit niya na mawot niyang gabos na disipulo niya magin saro, kun paanong siya asin an saiyang Ama nagkakasaro. (Basahon an Juan 17:20, 21.) An saindang pagkasararo magigin mapuwersang patotoo, huling magtatao iyan nin malinaw na ebidensiya na isinugo ni Jehova si Jesus sa daga tanganing gibuhon an kabutan nin Diyos. An pagkamuot an magigin midbidan kan tunay na mga disipulo ni Jesus asin makakatabang iyan sa sainda na mas magkasararo.—Juan 13:34, 35.

² Natural sana na iduon ni Jesus an dapit sa pagkasararo. Narisa niya kaya na dai lubos na nagkakasararo asin nagkakauruyon an mga apostol, halimbawa kaidtong huring pamanggihan niya kaiba sinda. Arog kan nangyari na man kaidto, nagdiriskutiran sinda “kun baga siisay sa sainda an pinakaurog.” (Luc. 22:24-27; Mar. 9:33, 34) Sa ibang pagkakataon, hinagad ni Santiago asin Juan ki Jesus na tawan sinda nin prominenteng posisyon sa saiyang Kahadian sa kataid niya mismo.—Mar. 10:35-40.

3. Ano an mga posibleng dahilan kaya dai lubos na nagkakasararo kaidto an mga disipulo ni Cristo, asin anong mga hapot an pag-uulayan niyato?

 ³ Pero, an pagmawot na magin prominente bako sana an posibleng nagin dahilan kan dai pagkasararo kan mga disipulo ni Cristo kaidto. Baranga an mga tawo kan nasyon huli sa mga kaanggutan asin pagpalain-lain. Kakaipuhanon kan mga disipulo ni Jesus na mahali an mga pagmating iyan. Sa artikulong ini, pag-uulayan ta an minasunod na hapot: Paano inatubang ni Jesus an pagpalain-lain? Paano niya tinabangan an mga disipulo niya kun paano tatrataron na mayong pagpalain-lain an iba asin kun paano magigin tunay na nagkakasararo? Asin paano kita matatabangan kan saiyang halimbawa na magdanay na nagkakasararo?

4. Magtao nin mga halimbawa kan mga pagpalain-lain na naeksperyensiyahan ni Jesus.

⁴ Si Jesus mismo nakaeksperyensiya nin pagpalain-lain. Kan sabihon ni Felipe ki Natanael na nanumpungan na niya an Mesiyas, sinabi ni Natanael: “Igwa daw nin ano man na marahay na magikan sa Nazaret?” (Juan 1:46) Minalataw na aram ni Natanael an propesiya sa Miqueas 5:2, asin para sa saiya sobra man kamenos kan Nazaret para magin ginikanan na banwaan kan Mesiyas. Kaagid kaiyan, minenos kan mga Judio si Jesus huling taga Galilea siya. (Juan 7:52) Para kaya sa dakul na taga Judea, menos na mga tawo an mga taga Galilea. An ibang mga Judio man ininsulto si Jesus paagi sa pag-apod sa saiya na Samaritano. (Juan 8:48) An mga Samaritano hali sa ibang nasyon asin bako sindang karelihiyon kan mga Judio. Parehong hababa an paghiling kan mga taga Judea asin Galilea sa mga Samaritano asin linilikayan ninda an mga ini.—Juan 4:9.

5. Anong pagpalain-lain an naeksperyensiyahan kan mga parasunod ni Jesus?

⁵ Ininsulto man kan Judiong mga lider an mga parasunod ni Jesus. Inapod sinda kan mga Fariseo na mga “tawong isinumpa.” (Juan 7:47-49) Iyo, ibinilang nindang daing kuwenta asin ordinaryo an siisay man na dai nakapag-adal sa mga eskuwelahan para sa pagsasanay nin mga magigin rabbi o dai nagsusunod sa saindang mga tradisyon. (Gibo 4:13, nota sa ibaba) An pagpalain-lain na naeksperyensiyahan ni Jesus asin kan saiyang mga disipulo resulta kan pagkabaranga kan mga tawo huli sa relihiyon, estado sa buhay, asin rasa. Naimpluwensiyahan man nin pagpalain-lain an mga disipulo. Kaya tanganing magkasararo, kaipuhan nindang baguhon an saindang kaisipan.

6. Magtao nin halimbawa kun ano an puwedeng magin epekto sa sato nin pagpalain-lain.

⁶ Yaon kita ngunyan sa kinaban na pano nin pagpalain-lain. Puwedeng kita an biktima, o tibaad kita mismo nakakamati kaiyan sa iba. “Lalong naggrabe an kaanggutan ko sa mga puti kan pigparaisip ko an inhustisyang ginibo ninda sa mga katutubong Aborigine—kaidto asin ngunyan,” an sabi nin sarong sister na payunir na ngunyan sa Australia. “Lalo man na nag-urog an kaanggutan ko huli sa mga pag-abusong naeksperyensiyahan ko mismo.” Sarong brother na taga Canada an nag-istorya dapit sa pagpalain-lain niya kaidto may koneksiyon sa lengguwahe. “Iniisip ko kaidto na nakakalabi an mga tawong nagtataram nin French,” an inadmitir niya. “Saka anggot ako kaidto sa mga tawong nagtataram nin Ingles.”

7. Paano inatubang ni Jesus an pagpalain-lain?

⁷ An pagpalain-lain na namamatian kan mga tawo ngunyan puwedeng magin arog kagrabe asin arog kadipisil mahali kaidtong panahon ni Jesus. Paano iyan inatubang ni Jesus? Inot, siya mismo nungkang nagpalain-lain, mayo siyang pinaurog. Naghulit siya sa mga mayaman asin sa mga pobre, sa mga Fariseo saka Samaritano, asin dawa sa mga parasingil nin buhis asin parakasala. Ikaduwa, paagi sa saiyang mga itinutukdo asin halimbawa, ipinahiling ni Jesus sa saiyang mga disipulo na dapat nindang halion an pagigin mapagsuspetsa o an pagpalain-lain sa iba.

8. Anong mahalagang prinsipyo an basehan kan Kristiyanong pagkasararo? Ipaliwanag.

⁸ Itinukdo ni Jesus sa saiyang mga parasunod an sarong pundamental na prinsipyo na iyo an basehan kan satong pagkasararo. “Gabos kamo magturugang,” an sabi niya. (Basahon an Mateo 23:8, 9.) Siyempre, masasabi tang “magturugang” kita huling kita gabos naggikan ki Adan. (Gibo 17:26) Pero may iba pang dahilan. Sinabi ni Jesus na an saiyang mga disipulo magturugang huling minimidbid ninda si Jehova bilang saindang Ama sa langit. (Mat. 12:50) Apuwera kaiyan, nagin miyembro sinda nin sarong dakulang espirituwal na pamilya, na pinagkakasararo nin pagkamuot asin pagtubod. Kaya sa mga surat kan mga apostol, parati nindang inaapod na “mga tugang” an mga kapwa ninda disipulo.—Roma 1:13; 1 Ped. 2:17; 1 Juan 3:13.

9, 10. (a) Taano ta mayong dahilan an mga Judio na mag-orgulyo huli sa saindang rasa? (b) Paano itinukdo ni Jesus an sarong leksiyon kun paano mahahali an pagpalain-lain huli sa rasa? (Hilingon an ritrato sa kapinunan kan artikulo.)

⁹ Pagkatapos niyang linawon na dapat niyatong ibilang na tugang an lambang saro, idinuon ni Jesus na kaipuhan nindang magin mapakumbaba. (Basahon an Mateo 23:11, 12.) Arog kan nasambit na, huli sa pagigin orgulyoso, dai kun minsan nagkakasararo an mga apostol. Posible man na nagin problema an dapit sa pag-orgulyo huli sa rasa. Dakul na Judio kaya an talagang kumbinsido na mas nakakalabi sinda sa iba huling naggikan sinda ki Abraham. Pero sinabi sa sainda ni Juan Bautista: “Kaya nin Diyos na gumibo nin mga aki ni Abraham hali sa mga gapong ini.”—Luc. 3:8.

¹⁰ Kinondenar ni Jesus an pag-orgulyo huli sa rasa. Iyan an ginibo niya kan may eskribang maghapot: “Siisay man nanggad an sakuyang kapwa?” Bilang simbag, itinao ni Jesus an ilustrasyon dapit sa sarong mabuot na Samaritano na tinabangan an sarong nagbabaklay na lalaki—sarong Judio—na binugbog nin mga tulisan. Dai inintindi kan mga nag-aging Judio an lalaki, alagad nahirak saiya an Samaritano. Tinapos ni Jesus an istorya paagi sa pagsabi sa eskriba na magin arog kan Samaritanong iyan. (Luc. 10:25-37) Ipinahiling ni Jesus na an sarong Samaritano puwedeng magtukdo sa mga Judio kun ano an tunay na pagkamuot sa kapwa.

11. Taano ta kaipuhan kan mga disipulo ni Cristo na mansayon nin mayong pagpalain-lain an mga dayuhan, asin paano sinda tinabangan ni Jesus na masabutan iyan?

¹¹ Tanganing mautob an sugo sa sainda, kaipuhan kan mga disipulo ni Jesus na halion an saindang pagigin orgulyoso asin pagpalain-lain. Bago magsakat sa langit, isinugo niya sinda na magpatotoo “sa bilog na Judea saka Samaria, asin sa pinakaharayong parte kan daga.” (Gibo 1:8) Inandam na sinda kaidto ni Jesus para sa dakulang asignasyon na iyan paagi sa pagtabang sa sainda na magpokus sa marahay na mga kuwalidad kan mga dayuhan. Inumaw niya an sarong dayuhan na opisyal nin hukbo huli sa pambihirang pagtubod kaini. (Mat. 8:5-10) Sa ginikanan niyang banwaan na Nazaret, ipinaliwanag ni Jesus kun paano tinabangan ni Jehova an mga dayuhan, arog kan babaying balo na taga Fenicia sa Zarefta asin kan Sirianong may leproso na si Naaman. (Luc. 4:25-27) Saka bako sanang sa sarong Samaritana naghulit si Jesus kundi nagduwang aldaw siya sa sarong banwaan nin mga Samaritano huling interesado an mga tawo duman sa saiyang mensahe.—Juan 4:21-24, 40.

12, 13. (a) Ano an nagin reaksiyon kan mga apostol kan tukduan ni Jesus an sarong Samaritana? (Hilingon an ritrato sa kapinunan kan artikulo.) (b) Ano an nagpapahiling na dai nasabutan nin lubos ni Juan asin Santiago an leksiyon?

¹² Pero, dai nagin madali sa mga apostol na halion sa saindang puso an pagpalain-lain. Nagngalas sinda kan mahiling nindang andam si Jesus na tukduan an sarong Samaritana. (Juan 4:9, 27) An Judiong mga lider nin relihiyon habong makipag-ulay sa sarong babayi pag nasa publiko, kaya lalo na sa sarong Samaritana na may maraot na reputasyon.  Inagda kan mga apostol si Jesus na magkakan. Pero mahihiling sa simbag niya na seryosong marhay an pag-uulay ninda kan Samaritana dapit sa espirituwal na mga bagay, asin na para sa saiya mas mahalaga iyan kisa sa namamatian niyang gutom. An paghuhulit—dawa pa sa sarong Samaritana—kabutan kan saiyang Ama, asin garo iyan kakanon para sa saiya.—Juan 4:31-34.

¹³ Dai nasabutan ni Santiago asin ni Juan an leksiyon na iyan. Kan si Jesus asin an saiyang mga disipulo mag-agi sa Samaria, naghanap sinda duman nin mapapakiturugan. Dai sinda inako kan mga Samaritano. Huli kaiyan, naanggot si Santiago asin Juan kaya sinabi ninda ki Jesus na magpababa na siya nin kalayo hali sa langit tanganing tumtumon an enterong baryo. Marigon sindang sinaway ni Jesus. (Luc. 9:51-56) Kun an baryong iyan na dai sainda nagpadagos nasa dagang tinubuan ninda na Galilea, arog daw kaiyan an magigin reaksiyon ni Santiago asin Juan? Posibleng marhay na an pagpalain-lain ninda an dahilan kaya naanggot sinda. Siguradong nasupog si apostol Juan sa nagin pabigla-bigla niyang reaksiyon kan pag-abot nin panahon nagin mapanggana an paghuhulit niya sa mga Samaritano.—Gibo 8:14, 25.

14. Paano rinesolberan an sarong isyu na posibleng may koneksiyon sa lengguwahe?

¹⁴ Dai pa nahahaloy pagkalihis kan Pentecostes 33 C.E., nagkaigwa nin isyu mapadapit sa diskriminasyon. Pag nagdidistribwir nin kakanon sa tios na mga babaying balo, dai natatawan an mga balong nagtataram nin Griego. (Gibo 6:1) An pagpalain-lain dahil sa lengguwahe an posibleng sarong dahilan kaiyan. Rinesolberan tulos kan mga apostol an sitwasyon paagi sa pagnombra nin kuwalipikadong mga lalaki para iyo an mag-asikaso sa pagdistribwir nin kakanon. An gabos na lalaking iyan may Griegong pangaran kaya posibleng nakaranga ini sa mga balong idto na nakulgan an buot.

15. Paano nakanuod si Pedro na dai magpalain-lain? (Hilingon an ritrato sa kapinunan kan artikulo.)

¹⁵ Kan 36 C.E., lalo pang luminakop sa dakul na nasyon an gibuhon na paggibo nin disipulo. Nakatudan na kaidto ni apostol Pedro na makiasosyar sana sa mga Judio. Pero pagkatapos na malinaw na ipinahiling nin Diyos na an mga Kristiyano dai dapat magpalain-lain, hinulitan ni Pedro si Cornelio, na sarong Romanong suldados. (Basahon an Gibo 10:28, 34, 35.) Pagkatapos kaiyan, nagkakakan asin nakikiasosyar na si Pedro sa mga kapagtubod niyang Hentil. Pero pakalihis nin pirang taon, nagpundo si Pedro sa pagkakan kaiba kan mga Kristiyanong bakong Judio sa siyudad nin Antioquia. (Gal. 2:11-14) Sa pagkakataon na ini, tinawan ni Pablo si Pedro nin maninigong pagtatanos, na minalataw na inako man kaini. Kan gibuhon ni Pedro an inot na surat niya sa mga Kristiyanong Judio asin Hentil sa Asia Minor, maugma niyang sinambit an dapit sa bilog na kasararuan nin magturugang.—1 Ped. 1:1; 2:17.

16. Sa ano midbid an inot na mga Kristiyano?

¹⁶ Malinaw na talagang nakanuod an mga apostol sa halimbawa ni Jesus na kamutan an “gabos na klase nin tawo.” (Juan 12:32; 1 Tim. 4:10) Dawa medyo nahaloy, binago ninda an saindang kaisipan. Midbid an inot na mga Kristiyano na sinda may pagkamuot sa lambang saro. Si Tertuliano, na sarong parasurat kan ikaduwang siglo, kinotar an sinabi nin mga bakong Kristiyano: “Namumutan ninda an lambang saro . . . Andam pa ngani sindang magadan para sa lambang saro.” Paagi sa pagsulot kan “bagong personalidad,” narealisar kan mga Kristiyano na an gabos na tawo pantay-pantay sa paghiling nin Diyos.—Col. 3:10, 11.

17. Paano niyato mahahali an pagpalain-lain sa satong puso? Magtao nin mga halimbawa.

¹⁷ Sa ngunyan, tibaad haloy-haloy man na panahon an kaipuhan niyato tanganing mahali sa satong puso an pagpalain-lain. Ipinaliwanag nin sarong sister sa Pransia an pinaglalabanan niya: “Itinukdo sa sako ni Jehova kun ano an kahulugan kan pagkamuot, kan pagigin matinao, asin an kahulugan kan mamutan an gabos na klase nin tawo. Pero padagos ko pa man giraray na pinaglalabanan an namamatian kong pagpalain-lain sa iba, asin bako iyan pirming madali. Kaya padagos ko iyan na ipinapamibi.” Kaagid man kaiyan an inaagihan kan  sarong sister sa Espanya: “Kun minsan nasasakitan akong halion an kaanggutan ko sa sarong partikular na etnikong grupo, pero nagigibo ko man iyan sa haros gabos na pagkakataon. Pero aram kong kaipuhan kong padagos na labanan iyan. Salamat ki Jehova, maugma ako na kabilang ako sa sarong nagkakasararong pamilya.” Gabos kita puwedeng onestong siyasaton an satong sadiri. Arog kan duwang sister na ini, may kaipuhan daw kitang labanan na pakamati nin pagpalain-lain sa satong puso?

18, 19. (a) Ano an mga dahilan niyato para akuon an gabos na tawo? (b) Paano ta ini magigibo sa praktikal na mga paagi?

¹⁸ Mahalagang tandaan na gabos kita kaidto harayo sa Diyos. (Efe. 2:12) Pero irinani kita ni Jehova sa saiya paagi ‘sa [bugkos] nin pagkamuot.’ (Os. 11:4; Juan 6:44) Asin inako kita ni Cristo. Garo baga binuksan niya an pinto tanganing magin kabtang kita kan pamilya nin Diyos. (Basahon an Roma 15:7.) Huling may kabuutan kitang inako ni Jesus, dawa ngani bako kitang perpekto, dapat na mayo nanggad sa isip niyato na dai akuon an siisay man!

¹⁹ An pagkabaranga, pagpalain-lain, asin pagkaungis siguradong magrabe pa mantang paparani kita sa katapusan kan maraot na sistemang ini. (Gal. 5:19-21; 2 Tim. 3:13) Pero bilang mga lingkod ni Jehova, hinihinguwa niyatong magkaigwa kan kadunungan hali sa itaas, na daing ipinapaurog asin nakakatabang na magkaigwa nin katuninungan. (Sant. 3:17, 18) Nauugma kitang makiamigo sa mga tawong hali sa ibang nasyon, akuon an pagkakaiba-iba nin kultura, asin manudan pa ngani an lengguwahe kan iba. Kun ginigibo ta ini, an katuninungan mabulos na siring sa salog, asin an hustisya siring sa mga alon kan dagat.—Isa. 48:17, 18.

20. Ano an mangyayari kun minomolde nin pagkamuot an satong isip asin puso?

²⁰ “An mga burabod nin tunay na kaaraman binuruksan sa sako,” an sabi nin sarong sister sa Australia na sinambit kasubago. Dakula an nagin epekto sa saiya kan makipag-adal siya sa Bibliya. Sinabi niya: “Nakatabang ini sako na magkaigwa nin bagong sabuot asin kaisipan. Kaya nahali an gabos na pagpalain-lain asin pagkaungis na haloy nang yaon sa puso ko.” Asin sinabi kan brother na taga Canada na aram na niya ngunyan na an “kawaran nin aram sa parati an dahilan nin rasismo asin na an mga kuwalidad nin sarong tawo dai nakadepende sa kun sain na lugar siya namundag.” Nakaagom siya nin sarong sister na nagtataram nin Ingles! An mga pagbabagong iyan nin sabuot sarong patunay na an Kristiyanong pagkamuot talagang kayang madaog asin talagang nadadaog kaiyan an pagpalain-lain. Pinagkakasararo kita kaiyan paagi sa sarong dai mapuputol na bugkos.—Col. 3:14.