“HELLO! Kumusta ka?”

Siguradong dakul ka nang binati nin arog kaiyan, asin tibaad sinabayan mo pa ngani iyan nin abrasa o kugos. An mga kaugalian asin sinasabi sa pagbati nagkakaiba-iba depende sa lugar, pero sa pangkagabsan may pagkakapareho an mga pagbati. Sa katunayan, an dai pagbati o dai pag-intindi sa pagbati puwedeng ibilang na bakong mamumuton o kawaran nin modo.

Pero may mga tawong dai tuod magbati. An iba nag-aalangan huling masusupgon sinda o hababa an paghiling sa sadiri. May mga nasasakitan man na bation an iba na lain an rasa, kultura, o estado sa buhay. Pero, dawa an halipot na pagbati puwedeng magkaigwa nin marahayon na mga resulta.

Haputon an sadiri: ‘Ano an puwedeng magibo nin sarong pagbati? Asin ano an itinutukdo sa sako kan Tataramon nin Diyos mapadapit sa pagbati?’

Sa pag-ako ni apostol Pedro sa inot na Hentil na si Cornelio sa Kristiyanong kongregasyon, sinabi niya: “An Diyos mayong pinapalain.” (Gibo 10:34) Kan huri, nagsurat si Pedro na “gusto [nin Diyos] na an gabos magkaigwa nin oportunidad na magsulsol.” (2 Ped. 3:9) Tibaad inot na maisip ta sa tekstong iyan an mga tawong nakakanuod kan katotoohan. Pero inenkaminar ni Pedro an mga Kristiyano: “Tawan nindo nin onra an gabos na klase nin tawo, magkaigwa kamo nin pagkamuot sa bilog na kasararuan nin magturugang.” (1 Ped. 2:17) Kaya bako daw na marahay kun babation niyato an iba ano man an saindang rasa, kultura, o pinaghalian? Sarong paagi iyan nin pagpahiling nin onra asin pagkamuot sa sainda.

Dinagka ni apostol Pablo an mga miyembro kan kongregasyon: “Maugmang akuon an lambang saro, kun paanong kamo maugmang inako man kan Cristo.” (Roma 15:7) Espesyalmenteng sinambit ni Pablo an mga tugang na napatunayan niyang “tabang na nagpapakusog” sa saiya. Nangangaipo man nin pampakusog nin buot lalo na an satong mga tugang ngunyan mantang inaatubang ta an grabeng pag-atake ni Satanas sa banwaan nin Diyos.—Col. 4:11, nota sa ibaba; Kap. 12:12, 17.

Ipinapahiling kan mga halimbawa sa Kasuratan na may nagigibo pa an pagbati apuwera sa nagigin komportable an sinasabihan ta kaiyan.

Kan mag-abot na an panahon para ibalyo an buhay kan Aki nin Diyos pasiring sa matris ni Maria, nagsugo si Jehova nin sarong anghel para makipag-ulay sa saiya. “Marahay na aldaw, ika na kinawiwilihan na marhay,” an inot na sinabi kan anghel, “si Jehova yaon sa saimo.” ‘Dai mapamugtak’ si Maria huling dai niya aram kun ano an tuyo kan anghel. Narisa iyan kan anghel kaya sinabi kaini: “Dai ka matakot, Maria, huli ta nawiwilihan ka nin Diyos.” Ipinaliwanag saiya kan anghel na katuyuhan nin Diyos na ipangaki niya an Mesiyas. Imbes na magdanay na dai mapamugtak, an makinuyog na si Maria nagsabi: “Uni ako, an babaying uripon ni Jehova! Mangyari lugod iyan sa sako sigun sa deklarasyon mo.”—Luc. 1:26-38.

Para sa anghel, sarong pribilehiyo na magin mensahero ni Jehova; pero dai niya ibinilang na sarong menos na asignasyon an makipag-ulay sa sarong bakong perpektong tawo. Nagpuon siya paagi sa sarong pagbati. Ano an manunudan ta sa halimbawang iyan? Dapat na magin andam kita na bation o kumustahon an iba asin pakusugon sinda. Sa dikit sanang tataramon, matatabangan ta an iba asin maaasigurar sinda na talagang parte sinda kan banwaan ni Jehova.

Dakul na Kristiyano an namidbid ni Pablo sa mga kongregasyon sa bilog na Asia Minor asin Europa. Sa mga surat niya, igwa nin dakul na pagbati para sa espesipikong mga tawo. Mababasa ta iyan sa Roma kapitulo 16. Nagpaabot si Pablo nin pagbati sa dakul na kapagtubod. Sinambit niya si Febe, “an satuyang tugang  na babayi,” asin dinagka an mga tugang na “maugma . . . siyang akuon bilang kapwa [ninda] parasunod sa Kagurangnan sa paaging maninigo para sa mga banal asin maitao sa saiya an ano man na tabang na tibaad kaipuhanon niya.” Binati ni Pablo si Prisca asin Aquila, na “sa sainda nagpapasalamat bako lang [si Pablo] kundi pati na an gabos na kongregasyon kan mga nasyon.” Binati niya an mga indibidwal na mayo kitang kaide-ideya kun siisay sinda—“sa namumutan kong si Epeneto” pati man si “Trifena asin Trifosa, mga babaying maigot na naglilingkod para sa Kagurangnan.” Iyo, pirming andam si Pablo na bation an saiyang mga kapagtubod.—Roma 16:1-16.

Isipa kun gurano sinda kaugma na dai sinda nalilingawan ni Pablo. Siguradong napakusog kaiyan an pagkamuot ninda ki Pablo asin sa lambang saro! Asin kan madangog kan ibang Kristiyano an mamumuton na mga pagbating iyan, siguradong nakapakusog iyan sa sainda na magdanay na marigon sa pagtubod. Iyo, an mga pagbati na may kaibang tunay na personal na interes asin komendasyon nakakapakusog sa relasyon nin mga mag-aramigo asin nakakapasararo sa maimbod na mga lingkod nin Diyos.

Kan magbaba na si Pablo sa duungan sa Puteoli asin paduman na sa Roma, may mga tugang duman na nagbiyahe patimog para tagbuon siya. Kan mahiling sinda ni Pablo sa harayo, “nagpasalamat siya sa Diyos asin kuminusog an saiyang buot.” (Gibo 28:13-15) Kun minsan, tibaad an magigibo ta sanang pagbati iyo na magngirit o magkaway. Alagad dawa an simpleng mga bagay na iyan puwede nang makaparahay sa pagmati nin saro na tibaad mamundo.

Kaipuhan na magtao nin magabat na konseho an disipulong si Santiago. May mga Kristiyano kaya kaidto na nagsasambay na sa espirituwal paagi sa pakikipag-amigo sa kinaban. (Sant. 4:4) Pero risahon kun paano pinunan ni Santiago an surat niya:

“Hali ki Santiago, na sarong uripon nin Diyos asin kan Kagurangnan na Jesu-Cristo, para sa 12 tribo na nagkasuruway-suway: Akuon nindo an sakong pangungumusta!” (Sant. 1:1) Siguradong nagin mas madali para sa mga nagbabasa na akuon an saiyang sadol kan mahiling ninda sa pagbati niya na pareho an kamugtakan ninda sa atubangan nin Diyos. Iyo, an simpleng pagbati puwede pa nganing magin paagi para mapag-ulayan dawa an seryosong mga bagay.

Tanganing magin epektibo an pagbati, gurano man iyan kahalipot, dapat na iyan sinsero asin nagpapahiling nin tunay na pagkamuot. Totoo iyan dawa sa hiling ta dai iyan naririsa kan iba. (Mat. 22:39) Sarong sister sa Ireland an nag-abot sa Kingdom Hall kan eksaktong mapuon na an pagtiripon. Mantang naghihidali siya palaog, may sarong brother na nagsalingoy saiya, nagngirit, asin nagsabi: “Hello. Nauugma talaga akong mahiling ka.” Nagdurudiretso lang sa tukawan an sister.

Pakalihis nin pirang semana, nagdulok siya sa brother asin sinabi na may inaagihan siya kaidtong problema sa harong. “Aburido talaga ako kan bangging idto,” an sabi kan sister, “dai na kuta ako kaidto mapa-Kingdom Hall. Haros mayo akong magirumduman sa pagtiripon, apuwera sa pagbati mo. Talagang namatian kong welcome ako. Salamat ha.”

Dai aram kan brother na nagkaigwa palan nin marahayon na epekto an halipot niyang pagbati. “Kan sabihon niya sako an nagin epekto saiya kan halipot na sinabi ko,” an sabi kan brother, “naugma akong marhay ta ginibo ko idto. Saka marahay iyan sa pagmati.”

Si Solomon nagsurat: ‘Iapon mo an saimong tinapay sa ibabaw kan katubigan, ta pakaagi nin dakul na aldaw makukua mo iyan.’ (Par. 11:1) Kun pirmi tang isinasaisip an kahalagahan kan satong mga pagbati, lalo na sa mga kapwa niyato Kristiyano, mapaparahay niyato an pagmati kan iba asin pati man an pagmati ta. Kaya lugod na nungka tang pagmenuson an nagigibo nin sarong pagbati.