ARTIKULONG PAG-AADALAN 25
“Ako Mismo an Mahanap sa Sakuyang mga Karnero”
“Ako mismo an mahanap sa sakuyang mga karnero, asin aatamanon ko sinda.”—EZEQ. 34:11, NWT.
KANTA 105 “An Diyos Pagkamuot”
SUMARYO KAN PAG-AADALAN *
1. Taano ta ikinumparar ni Jehova an saiyang sadiri sa sarong nagpapasusong ina?
“MALILINGAWAN daw nin sarong ina an saiyang aking pinapasuso?” Iyan an ihinapot ni Jehova kan panahon ni propeta Isaias. Sinabi nin Diyos sa saiyang banwaan: “Dawa pa makalingaw an sarong ina, dai taka nuarin man malilingawan.” (Isa. 49:15, NWT) Bihira niyang ikumparar an saiyang sadiri sa sarong ina. Pero ginibo niya iyan sa pagkakataon na idto. Ikinumparar ni Jehova an namamatian niya sa saiyang mga lingkod sa makusog na pagkamuot nin sarong ina sa saiyang aki para ipahiling na namumutan niya sindang marhay. Masasabutan kan kadaklan na ina an sinabi kan sister na si Jasmin: “Pag pinapasuso mo an aki mo, nagkakaigwa kamo nin espesyal na marhay na relasyon na magdadanay habangbuhay.”
2. Ano an namamatian ni Jehova pag magrayo sa saiya an saro sa mga aki niya?
2 Naririsa ni Jehova pag magpundo sa pakikiasosyar sa Kristiyanong kongregasyon asin sa pakikikabtang sa paghuhulit an maski saro sana sa mga lingkod niya. Kaya, isipa na sana kun gurano kakulog sa saiya na mahiling an rinibo sa mga lingkod niya na nagigin inaktibo * taon-taon.
3. Ano an gusto ni Jehova?
3 An dakul sa namumutan niyatong mga tugang na ini na nagin inaktibo nagbabalik sa kongregasyon, asin maugma kita pag ginigibo ninda iyan. Gusto ni Jehova na magbalik sinda, asin iyo man kita. (1 Ped. 2:25) Paano ta sinda matatabangan? Bago ta iyan simbagon, marahay na aramon ta nguna kun taano ta may mga nagpupundo sa pag-atender sa mga pagtiripon asin sa pakikikabtang sa ministeryo.
TAANO TA MAY MGA NAGPUPUNDO SA PAGLILINGKOD KI JEHOVA?
4. Paano nakaapektar sa iba an saindang sekular na trabaho?
4 Tinugutan kan iba na magin panginot sa buhay ninda an saindang sekular na trabaho. Inadmitir ni Hung, * sarong brother na taga Timog-Sirangan na Asia: “Inubos ko an panahon saka kusog ko sa pagtrabaho. Inisip ko kaidto na pag mas makuwarta ako, mas makakapaglingkod ako ki Jehova. Kaya mas nagtrabaho pa ako nin dakul na oras. Parati na akong nagpapalta sa mga pagtiripon sagkod na nagpundo na talaga ako sa pakikiasosyar sa kongregasyon. Nahiling ko na dinisenyo an kinaban para luway-luway na irayo sa Diyos an mga tawo.”
5. Ano an nagin epekto sa sarong sister kan sunod-sunod na problemang uminabot sa saiya?
5 May mga tugang na pinangluyahan nin buot dahil sa dakul na problema. Si Anne, na sarong ina na taga Britania na may limang aki, nagsabi: “An saro sa mga aki ko igwa nin grabeng diperensiya sa pisikal. Paghaloy-haloy, natiwalag su saro sa mga aki kong babayi. Tapos nagkadiperensiya sa isip an saro kong aking lalaki. Na-depress akong marhay kaya nagpundo ako sa pag-atender sa mga pagtiripon saka paghuhulit. Pag-abot nin panahon, nagin inaktibo ako.” Nakikisimpatiya nanggad kita ki Anne asin sa saiyang pamilya pati man sa iba pa na nag-aagi nin siring na mga kadipisilan!
6. Paano an dai pag-aplikar kan Colosas 3:13 puwedeng magin dahilan na maparayo an saro sa banwaan ni Jehova?
6 Basahon an Colosas 3:13. An nagkapira sa mga lingkod ni Jehova nakulgan nin sarong kapagtubod. Aram ni apostol Pablo na kun minsan, tibaad igwa kita nin balidong “dahilan na ireklamo” an sarong tugang. Tibaad ngani trinato kita nin bakong makatanusan. Kun dai kita mag-iingat, puwede kitang magin mapaghinanakit. An raot nin buot puwedeng luway-luway na irayo an saro sa banwaan ni Jehova. Pag-isipan an eksperyensiya ni Pablo, sarong brother na taga Timog Amerika. Sinahutan siya na may ginibo siyang maraot dawa inosente siya, asin dahil kaiyan nawaran siya nin pribilehiyo sa kongregasyon. Ano an nagin reaksiyon niya? Sinabi ni Pablo: “Naanggot ako tapos luway-luway nang naparayo sa kongregasyon.”
7. Ano an puwedeng magin epekto sa sarong tawo kan pagkakonsiyensiya?
7 An saro na nakagibo kaidto nin magabat na kasalan tibaad pasakitan kan saiyang konsiyensiya, na huli kaiyan namamatian niyang dai na siya maninigo sa pagkamuot nin Diyos. Dawa kun nagsulsol na siya asin pinahilingan na nin pagkahirak, tibaad mamatian niya na dai na siya angay na magin saro sa mga lingkod nin Diyos. Arog kaiyan an namatian kan brother na si Francisco. Sinabi niya: “Sinagwi ako dahil nakakomiter ako nin seksuwal na imoralidad. Nagpadagos ako sa pag-atender kan primero, pero na-depress ako saka pagmati ko dai na ako angay na magin kabilang sa banwaan ni Jehova. Nakokonsiyensiya pa man giraray ako, saka para sako, dai pa talaga ako napatawad ni Jehova. Pag-abot nin panahon, nagpundo ako sa pakikiasosyar sa kongregasyon.” Ano an namamatian mo manungod sa mga tugang na nasa mga sitwasyon na kaagid kan mga pinag-ulayan ta pa sana? Nakakamati ka daw nin empatiya sainda? An mas mahalaga, ano an namamatian ni Jehova sa sainda?
NAMUMUTAN NI JEHOVA AN SAIYANG MGA KARNERO
Sarong Israelitang pastor na inaataman na marhay an nawarang karnero (Hilingon an parapo 8-9) *
8. Linilingawan daw ni Jehova an mga naglingkod sa saiya kaidto? Ipaliwanag.
8 Dai linilingawan ni Jehova an mga naglingkod sa saiya kaidto alagad temporaryong nagpundo sa pakikiasosyar sa saiyang banwaan. Dai man niya linilingawan an mga ginibo ninda para paglingkudan siya. (Heb. 6:10) Isinurat ni propeta Isaias an sarong magayon na ilustrasyon para ipahiling kun paano inaataman ni Jehova an saiyang banwaan. Isinurat ni Isaias: “Siring sa sarong pastor aatamanon niya an saiyang aripumpon. Paagi kan saiyang takyag, an mga kordero saiyang titipunon, asin sa saiyang daghan sinda saiyang kakargahon.” (Isa. 40:11, NWT) Ano an namamatian kan Dakulang Pastor pag an saro sa saiyang mga karnero malagalag parayo sa aripumpon? Sinabi ni Jesus an namamatian ni Jehova kan haputon niya an saiyang mga disipulo: “Ano sa paghuna nindo? Kun an sarong tawo may 100 na karnero asin an saro sa mga iyan malagalag, bako daw na babayaan niya an 99 sa kabukidan dangan hahanapon an saro na nalagalag? Asin kun manumpungan niya iyan, sinisigurado ko sa saindo, mas mauugma siya dahil sa sarong iyan kisa sa 99 na dai nalagalag.”—Mat. 18:12, 13.
9. Kan mga panahon kan Bibliya, paano tinatratar nin marahay na mga pastor an saindang mga karnero? (Hilingon an ritrato sa cover.)
9 Taano ta angay na iagid si Jehova sa sarong pastor? Huling kan mga panahon kan Bibliya, an sarong marahay na pastor nagmamalasakit na marhay sa saiyang mga karnero. Halimbawa, nakipaglaban si David sa sarong leon asin oso para protektaran an saiyang aripumpon. (1 Sam. 17:34, 35) Siguradong maririsa nin sarong marahay na pastor kun maski saro sanang karnero an mawara. (Juan 10:3, 14) An arog kaiyan na pastor babayaan an saiyang 99 karnero sa sarong ligtas na turil o iwawalat sa pangangataman nin sarong kapwa pastor para hanapon an saro na nawawara. Ginamit ni Jesus an ilustrasyon na iyan para itukdo sa sato an sarong importanteng katotoohan: “Dai nakakaugma sa sakuyang Ama na nasa langit na mapahamak an maski saro sa mga tawong arog nin sadit na mga aki.”—Mat. 18:14.
Sarong pastor sa suanoy na Israel na inaataman an sarong nawarang karnero (Hilingon an parapo 9)
HINAHANAP NI JEHOVA AN SAIYANG MGA KARNERO
10. Sigun sa Ezequiel 34:11-16, ano an ipinanuga ni Jehova na gigibuhon niya sa saiyang nawawarang mga karnero?
10 Namumutan ni Jehova an lambang saro sa sato, pati na an “sadit na mga aki” na naparayo sa saiyang aripumpon. Paagi ki propeta Ezequiel, nanuga an Diyos na hahanapon niya an saiyang nawawarang mga karnero asin tatabangan sindang maibalik an saindang marahay na relasyon sa saiya. Asin sinabi niya an espesipikong mga lakdang na gigibuhon niya para iligtas sinda, mga lakdang na tipikal na gigibuhon nin sarong Israelitang pastor kun mawara an sarong karnero. (Basahon an Ezequiel 34:11-16.) Inot, hahanapon kan pastor an karnero, asin puwedeng mangaipo iyan nin dakul na oras asin kusog. Dangan, pag nahanap na niya an nawawarang karnero, ibabalik niya iyan sa aripumpon. Dugang pa, kun nalugadan o gutom na marhay an karnero, mamumuton na tatabangan iyan kan pastor, na binebendahan an mga lugad, kinakarga iyan, saka pinapakakan. An mga elder, na iyo an mga pastor kan “aripumpon nin Diyos,” kaipuhan na gibuhon an kaparehong mga lakdang para tabangan an siisay man na naparayo sa kongregasyon. (1 Ped. 5:2, 3) Hinahanap sinda kan mga elder, tinatabangan na makabalik sa aripumpon, asin pinapahilingan sinda nin pagkamuot paagi sa pagtao kan kinakaipuhan na espirituwal na suporta. *
11. Ano an aram nin sarong marahay na pastor?
11 Aram nin sarong marahay na pastor na puwedeng malagalag an saiyang mga karnero. Asin kun may sarong karnero na maparayo sa aripumpon, an pastor dai iyan tinatrato nin daing hirak. Pag-isipan an halimbawang ipinahiling nin Diyos kan tinatabangan niya an pira sa mga lingkod niya na, sa halipot na panahon, naparayo sa saiya.
12. Paano trinatar ni Jehova si Jonas?
12 Dinulagan ni propeta Jonas an saiyang asignasyon. Dawa arog kaiyan, dai tulos siya sinukuan ni Jehova. Arog nin sarong marahay na pastor, ilinigtas siya ni Jehova saka tinabangan na magkaigwa kan kusog na kaipuhan niya para magibo an saiyang asignasyon. (Jon. 2:7; 3:1, 2) Kan huri, ginamit nin Diyos an sarong tanom na upo para tabangan si Jonas na masabutan an halaga kan lambang buhay nin tawo. (Jon. 4:10, 11) Ano an manunudan ta diyan? An mga elder dapat na dai tulos sukuan an mga nagin inaktibo. Imbes, hinihinguwa kan mga elder na masabutan an dahilan kaya naparayo an sarong karnero sa aripumpon. Asin pag nagbalik na ki Jehova an karnerong iyan, padagos siyang pinapahilingan nin pagkamuot asin pagmalasakit kan mga elder.
13. Ano an manunudan ta sa reaksiyon ni Jehova sa kagsurat kan Salmo 73?
13 Nangluya an buot kan kagsurat kan Salmo 73 kan mahiling niya na garo pirming nagigin mapanggana an mga maraot. Kinuwestiyon niya kun baga may ano man na pakinabang an paggibo kan kabutan nin Diyos. (Sal. 73:12, 13, 16) Ano an nagin reaksiyon ni Jehova? Dai siya kinondenar ni Jehova. Sa katunayan, ipinasurat nin Diyos sa Bibliya an mga tataramon kan salmista. Pag-abot nin panahon, narealisar kan salmista na an pagkaigwa nin marahay na relasyon ki Jehova mas mahalaga kisa sa ano pa man na bagay, asin na minaresulta iyan sa kapaki-pakinabang na buhay. (Sal. 73:23, 24, 26, 28) Ano an manunudan ta diyan? An mga elder dai dapat husgaran tulos an saro na nagpupuon na kuwestiyunon an mga pakinabang kan paglilingkod ki Jehova. Imbes na kondenaron, dapat na hinguwahon kan mga elder na masabutan kun taano ta arog kaiyan an sinasabi o ginigibo niya. Dangan saka sana magagamit kan mga elder an Bibliya para magtao nin kinakaipuhan na pampakusog.
14. Taano ta kinaipuhan ni Elias nin tabang, asin paano siya tinabangan ni Jehova?
14 Si propeta Elias nagdulag huli ki Reyna Jezebel. (1 Ha. 19:1-3) Paghuna niya solo na sana siyang naglilingkod bilang propeta ni Jehova, asin pagmati niya mayong pakinabang an ginigibo niya. Sa sobrang kamunduan ni Elias gusto na niyang magadan. (1 Ha. 19:4, 10) Imbes na kondenaron si Elias, inasigurar siya ni Jehova na dai siya nagsosolo, na makakapagtiwala siya sa Saiyang kapangyarihan, asin na dakul pa siyang gigibuhon. Mabuot na dinangog ni Jehova an mga ikinakahadit ni Elias asin tinawan ini nin bagong mga asignasyon. (1 Ha. 19:11-16, 18) Ano an manunudan ta diyan? Gabos kita, lalo na an mga elder, dapat na mabuot na trataron an mga karnero ni Jehova. Dawa pa an sarong iyan anggot o nakakamati na dai siya angay sa pagkahirak ni Jehova, dadangugon siya kan mga elder mantang sinasabi niya an gabos na nasa puso niya. Hihinguwahon nindang ipamati sa nawawarang karnero na namumutan siya ni Jehova.
ANO AN DAPAT NA MAGIN SABUOT NIYATO SA NAWAWARANG MGA KARNERO NIN DIYOS?
15. Sigun sa Juan 6:39, ano an sabuot ni Jesus sa mga karnero kan saiyang Ama?
15 Ano an gusto ni Jehova na magin sabuot niyato sa saiyang nawawarang mga karnero? Nagtao sa sato si Jesus nin arugan. Aram niya na an gabos na karnero ni Jehova mahalagang marhay sa Diyos, kaya ginibo ni Jesus an gabos niyang makakaya para tabangan an “nawawarang mga karnero . . . kan nasyon nin Israel” na makabalik ki Jehova. (Mat. 15:24; Luc. 19:9, 10) Bilang an marahay na pastor, ginibo man ni Jesus an pinakamakakaya niya para dai mawara an arin man sa mga karnero ni Jehova.—Basahon an Juan 6:39.
16-17. Ano an dapat na magin sabuot kan mga elder manungod sa pagtabang sa naparayong mga karnero? (Hilingon an kahon na “ Kun Ano an Posibleng Namamatian nin Sarong Nawawarang Karnero.”)
16 Dinagka ni apostol Pablo an mga kamagurangan sa kongregasyon sa Efeso na arugon an halimbawa ni Jesus. “Dapat nindong tabangan an mga maluya asin dapat nindong tandaan an mga tataramon kan Kagurangnan na Jesus, kan siya mismo magsabi: ‘Igwang urog na kaugmahan sa pagtao kisa sa pag-ako.’” (Gibo 20:17, 35) Malinaw, igwa ngunyan nin espesyal na responsabilidad an mga elder na atamanon an banwaan ni Jehova. Sinabi ni Salvador, sarong elder sa Espanya: “Pag iniisip ko kun gurano inaataman ni Jehova an saiyang nawawarang mga karnero, namomotibar ako kaiyan na gibuhon an gabos kong makakaya para tabangan sinda. Bilang sarong espirituwal na pastor, kumbinsido ako na gusto ni Jehova na atamanon ko sinda.”
17 An gabos na naparayong lingkod na sinambit sa artikulong ini natabangan na makabalik ki Jehova. Sa mismong oras na ini, dakul na iba pang naparayo an mawot man na makabalik ki Jehova. Sa sunod na artikulo, tutukaron nin mas detalyado an mga puwede tang gibuhon para tabangan sinda na makabalik ki Jehova.
KANTA 139 Imahinara Kun Bago Na an Gabos na Bagay
^ par. 5 Taano ta naparayo sa kongregasyon an nagkapira na maimbod na naglingkod ki Jehova nin dakul na taon? Ano an namamatian ni Jehova sainda? Pag-uulayan sa artikulong ini an simbag sa mga hapot na iyan. Pag-uulayan man digdi kun ano an manunudan niyato sa paagi nin pagtabang ni Jehova sa nagkapirang lingkod niya kan mga panahon kan Bibliya na temporaryong naparayo sa saiya.
^ par. 2 PALIWANAG DAPIT SA TATARAMON: An sarong inaktibong parahayag dai nagreport nin ano man na aktibidad sa paghuhulit asin paggibo nin disipulo sa laog nin anom na bulan o labi pa. Dawa siring, tugang ta pa man giraray an mga inaktibo, asin namumutan niyato sinda.
^ par. 4 Sinalidahan an nagkapirang pangaran.
^ par. 10 Tutukaron sa masunod na artikulo an espesipikong mga paagi na puwedeng gibuhon kan mga elder para masunod an mga lakdang na ini.
^ par. 60 DESKRIPSIYON KAN RITRATO: Sarong Israelitang pastor na nagmamalasakit sa saiyang nawawarang karnero kaya hinanap niya iyan asin tinabangan na makabalik sa aripumpon. Arog man kaiyan an ginigibo ngunyan kan espirituwal na mga pastor.
^ par. 64 DESKRIPSIYON KAN RITRATO: Mantang naghahalat na makahali an bus, sarong inaktibong sister an naghihiling sa duwang Saksi na maugmang nakikikabtang sa pagpapatotoo sa publiko.
