1. Ano an namamatian ni Jehova pag nagbalik sa saiya an saro sa mga karnero niyang nalagalag?

AROG kan tinukar ta sa sinusundan na artikulo, iinagid ni Jehova an sadiri niya sa sarong marahay na pastor na mamumuton na inaataman an lambang karnero niya. Asin hinahanap niya an siisay man na nalagalag. Sinabi ni Jehova sa mga Israelita na nagbaya sa saiya: “Bumalik kamo sako, asin mabalik ako sa saindo.” Aram niyato na arog pa man giraray kaiyan an namamatian niya huling sinabi niya: “Dai ako nagbabago.” (Mal. 3:6, 7, NWT) Sinabi ni Jesus na nauugmang marhay si Jehova asin an mga anghel pag magbalik sa Saiya maski an saro sa mga lingkod Niya na nalagalag.—Luc. 15:10, 32.

2. Ano an pag-uulayan ta sa artikulong ini?

² Pag-uulayan ta an tulo sa mga ilustrasyon ni Jesus na nagtutukdo nin importanteng mga leksiyon manungod sa pagtabang sa mga naparayo ki Jehova. Pag-uulayan ta man an nagkapirang espesipikong kuwalidad na kaipuhan niyato tanganing matabangan an nawawarang mga karnero na magbalik sa saiya. Asin aaramon ta kun taano ta sulit an paghihinguwa na tabangan an mga maluya.

3-4. Taano ta maingat na marhay na hinanap kan babayi na sinambit sa Lucas 15:8-10 an saiyang nawarang sinsilyong drakma?

³ Kaipuhan tang magmaigot para mahanap an mga gustong magbalik ki Jehova. Sa sarong parabula na nasa Ebanghelyo ni Lucas, ilinadawan ni Jesus kun paano hinanap nin sarong babayi an sarong nawarang mahalagang bagay—sarong sinsilyong drakma. Dinadara kan ilustrasyon na ini an satong atensiyon sa pagmamaigot kan babayi na mahanap an sinsilyo.—Basahon an Lucas 15:8-10.

⁴ Ilinadawan ni Jesus an namatian kan sarong babayi kan manumpungan kaini an nawarang mahalagang marhay na sinsilyong drakma. Kan panahon ni Jesus, minalataw na igwang mga Judiong ina na tinatawan an saindang aking babayi nin sampulong sinsilyong drakma sa aldaw kan kasal kaini. An sinsilyong idto tibaad  saro sa mga sinsilyong itinao saiya kan saiyang ina. Inisip kan babayi na nahulog sa salog an sinsilyo. Kaya nagpalaad siya nin lampara asin nagpuon na maghanap, alagad mayo siyang nahiling. Tibaad dai igo an liwanag kan saiyang lampara para mahiling an sadit na sinsilyong pirak. Kan huri, maingat siyang nanighid sa bilog na harong. Nahiling niya sa alpog na sinighid niya an mahalagang marhay na drakma na nagkikinang sa liwanag kan lampara. Ugmahon siyang marhay! Inarapod niya an saiyang mga amiga asin pagtaraid para isabi sa sainda an maugmang bareta.

5. Taano ta tibaad masakit na hanapon an mga inaktibo?

⁵ Arog kan nanudan ta sa ilustrasyon ni Jesus, kaipuhan nin pagmamaigot para mahanap an sarong bagay na nawara. Kaagid kaiyan, tibaad kaipuhan niyatong magmaigot para hanapon an mga inaktibo. Tibaad mga taon na an naglihis puon kan magpundo sinda sa pakikiasosyar sa sato. Tibaad nagbalyo pa ngani sinda sa lugar na dai sinda midbid kan mga tugang duman. Pero sa mismong oras na ini, siguradong an nagkapira sa mga inaktibong ini gustong-gusto nang bumalik ki Jehova. Gusto nindang maglingkod ki Jehova kaiba kan saiyang pamilya nin tunay na mga parasamba, pero kaipuhan ninda an satong tabang.

6. Paano an gabos sa kongregasyon makakatabang sa paghanap sa mga inaktibo?

⁶ Siisay an puwedeng tumabang sa paghanap sa mga inaktibo? Gabos kita—mga elder, payunir, mga kapamilya kan inaktibo, asin mga parahayag sa kongregasyon—puwedeng tumabang sa paghanap sa sainda. Igwa ka daw nin amigo o kapamilya na nagin inaktibo? May nanumpungan ka daw na inaktibo mantang naghaharong-harong o nagpapatotoo sa publiko? Kun gusto niyang itao an contact information niya sa mga elder sa kongregasyon nindo, puwede mong itao iyan sainda.

7. Ano an manunudan mo sa sinabi kan elder na si Thomas?

⁷ Anong praktikal na mga lakdang an puwedeng gibuhon partikular na kan mga elder para mahanap an mga gustong bumalik ki Jehova? Mangnuhon an sinabi kan elder na si Thomas * na nakaistar sa Espanya. Labi nang 40 Saksi an natabangan niyang bumalik sa kongregasyon. Sinabi niya: “Inot, hinahapot ko an iba-ibang tugang kun aram ninda kun sain nakaistar ngunyan an mga inaktibo. O kaya hinahapot ko an mga parahayag kun may nagigirumduman sindang siisay man na dai na nag-aatender sa mga pagtiripon. Excited na magtabang an kadaklan sa mga tugang sa kongregasyon huling namamatian nindang kaiba talaga sinda sa paghanap. Dangan pag nagbibisita na ako sa inaktibong mga tugang, naghahapot ako manungod sa mga aki ninda saka iba pang kapamilya. May mga inaktibo na iniiba kaidto an saindang mga aki sa mga pagtiripon, asin tibaad nagin mga parahayag man kaidto an mga aking ini. Puwede man sindang matabangan na bumalik ki Jehova.”

8. Sa ilustrasyon na nasa Lucas 15:17-24 manungod sa aking naparaot an buhay, paano trinatar kan ama an saiyang nagsusulsol na aki?

⁸ Anong mga kuwalidad an dapat na igwa kita para matabangan ta an mga gustong bumalik ki Jehova? Mangnuhon an nagkapirang leksiyon na manunudan ta sa ilustrasyon ni Jesus manungod sa sutil na aking lalaki na naghali sa saindang harong. (Basahon an Lucas 15:17-24.) Sinabi ni Jesus na nakapag-isip-isip man giraray an aking lalaki, kaya nagdesisyon ining bumalik sa harong. Duminalagan an ama para sabaton an saiyang aki dangan mapagpadangat niya ining kinugos tanganing ipamati sa aki na namumutan niya ini. Nakokonsiyensiya an aking lalaki asin para saiya dai na siya angay na apudon na aki kan saiyang ama. Kan ibuyboy kan aki an mga sabuot niya, nakamati nin empatiya an saiyang ama para sa saiya. Dangan naggibo an ama nin praktikal na mga lakdang para siyertuhon sa saiyang aki na inaako niya ini liwat sa harong, bako bilang trabahador, kundi bilang  namumutan na miyembro kan pamilya. Para patunayan ini, nagpahanda an ama nin sarong bangkete asin tinawan niya nin magagayon na bado an saiyang nagsusulsol na aki.

9. Anong mga kuwalidad an dapat na igwa kita para matabangan an mga inaktibo na bumalik ki Jehova? (Hilingon an kahon na “ Kun Paano Tatabangan an mga Gustong Bumalik.”)

⁹ Si Jehova arog kan ama sa ilustrasyon na iyan. Namumutan niya an satong inaktibong mga tugang asin gusto niyang bumalik sinda sa saiya. Paagi sa pag-arog ki Jehova, matatabangan niyato sinda na bumalik. Para magibo ini, kaipuhan niyatong magin mapasensiya, magpahiling nin empatiya, asin magin mamumuton. Taano ta dapat niyatong ipahiling an espesipikong mga kuwalidad na iyan, asin paano ta iyan magigibo?

10. Taano ta kaipuhan tang magin mapasensiya pag tinatabangan niyato an saro na maibalik an saiyang espirituwalidad?

¹⁰ Kaipuhan tang magin mapasensiya huling kaipuhan nin panahon para maibalik an espirituwalidad nin sarong tawo. Inadmitir nin dakul na dating inaktibo na saka sana sinda nagbalik sa paglilingkod ki Jehova pagkatapos nin pauruutrong pagbisita sa sainda kan mga elder asin kan iba pa sa kongregasyon. Si Nancy, na sarong sister na taga Timog-Sirangan na Asia, nagsabi: “Dakulaon an naitabang sako kan sarong dayupot na amiga sa kongregasyon. Pinadangat niya ako na garo Ate niya ako. Ipinagirumdom niya sako an maugma ming pag-iribanan kaidto. Mapasensiya siyang nagdadangog sako mantang sinasabi ko an mga namamatian ko, saka dai siya nag-aalangan na tawan ako nin sadol. Pinatunayan niya na tunay siyang amiga, na handang magtabang sa ano man na panahon.”

11. Taano ta kaipuhan tang magpahiling nin empatiya para matabangan na magrahay an nakulgan na buot?

¹¹ An empatiya garo sarong epektibong panglahid; nakakatabang iyan na magrahay an nakulgan  na buot. May mga inaktibo na dakul na taon nang igwang hinanakit sa sarong tugang sa kongregasyon. An paghinanakit na iyan nakakaulang sa pagmawot na bumalik ki Jehova. Tibaad iniisip kan iba na trinato sinda nin bakong makatanusan. Tibaad kaipuhan ninda nin saro na madangog sainda saka makakasabot kan namamatian ninda. (Sant. 1:19) Si María, na nagin inaktibo kaidto, nagsabi, “Kaipuhan ko nin saro na madangog sako, na mahihibian ko, saka nin saro na matabang asin magiya sako.”

12. Iilustrar kun paano irinarani kan pagkamuot ni Jehova an mga inaktibo pabalik sa saiyang banwaan.

¹² Ilinaladawan kan Bibliya an pagkamuot ni Jehova sa saiyang banwaan bilang sarong pisi, o lubid. Taano ta arog sa sarong pisi an pagkamuot nin Diyos? Pag-isipan an ilustrasyon na ini: Imahinaron na nalalamos ka sa maalon na kadagatan, tapos may nag-itsa saimo nin salbabida. Siguradong papasalamatan mo iyan huling makakatabang iyan na dai ka maglubog. Pero dai ka magdadanay na buhay kun salbabida sana an igwa ka. Maliputon an tubig, saka dai ka makakaligtas sagkod na dai ka nakakasakay sa lifeboat. Kaipuhan mo nin saro na maitsa sa saimo nin lubid saka mabutong saimo pasiring sa lifeboat. Sinabi ni Jehova manungod sa nalagalag na mga Israelita: “Irinani ko sinda sa sako paagi sa mga lubid nin kabuutan, paagi sa mga pisi nin pagkamuot.” (Os. 11:4, NWT) Arog man kaiyan an namamatian nin Diyos ngunyan manungod sa mga nagpundo na sa paglilingkod sa saiya asin nalalamos sa mga problema saka kahaditan. Gusto niyang maaraman ninda na namumutan niya sinda, asin na gusto niyang irani sinda sa saiya. Asin puwede kang gamiton ni Jehova para ipahiling an pagkamuot niya sa sainda.

13. Magsaysay nin sarong eksperyensiya na nagpapahiling kan nagigibo kan pagkamuot bilang magturugang.

¹³ Mahalaga na siyertuhon ta sa mga inaktibo  na namumutan sinda ni Jehova asin na namumutan man niyato sinda. Si Pablo, na sinambit sa sinusundan na artikulo, nagin inaktibo sa laog nin labing 30 taon. Sinabi niya: “Sarong aga, kan pahali na ako sa harong, sarong mabuot asin may edad nang sister an nagdulok sako tapos nakipag-ulay sako sa mamumuton na paagi. Nagpuon akong maghibi na garo sarong aki. Sinabi ko saiya na garo isinugo siya ni Jehova para makipag-ulay sako. Diyan ako nagdesisyon na bumalik na ki Jehova.”

14. Base sa ilustrasyon na nasa Lucas 15:4, 5, ano an ginibo kan pastor kan manumpungan na niya an nawawarang karnero?

¹⁴ Kaipuhan kan mga inaktibo an satong padagos na pagtabang. Arog kan ilustrasyon ni Jesus manungod sa aking naparaot an buhay, posibleng nakakamati sinda nin grabeng kabasulan. Asin posibleng marhay na maluya an saindang espirituwalidad huli sa mga naeksperyensiyahan ninda sa kinaban ni Satanas. Kaipuhan ta sindang tabangan na kumusog giraray an saindang pagtubod ki Jehova. Sa ilustrasyon manungod sa nawawarang karnero, ilinadawan ni Jesus kun paano pinasan kan pastor sa saiyang abaga an karnero asin dinara pabalik sa aripumpon. Dakul nang panahon saka kusog an ginamit kan pastor sa paghanap sa nawarang karnero. Pero aram niya na kaipuhan niyang pasanon iyan pabalik sa aripumpon huling mayo ining kusog na maglakaw pabalik.—Basahon an Lucas 15:4, 5.

15. Paano niyato matatabangan an mga maluya na gustong bumalik ki Jehova? (Hilingon an kahon na “ Sarong Mahalagang Marhay na Kasangkapan.”)

¹⁵ Tibaad kaipuhan niyatong magtao nin dakul na oras asin kusog para tabangan an nagkapirang inaktibo na mapangganahan an saindang mga kaluyahan. Pero paagi kan espiritu ni Jehova, kan saiyang Tataramon, asin kan mga publikasyon na itinatao paagi sa kongregasyon, matatabangan ta sindang kumusog giraray sa espirituwal. (Roma 15:1) Paano niyato iyan magigibo? Sarong eksperyensiyadong  elder an nagsabi, “An kadaklan na inaktibo kaipuhan na i-Bible study pagkatapos nindang magdesisyon na gusto na talaga nindang bumalik ki Jehova.” * Kaya kun pakiulayan kang i-Bible study an sarong inaktibo, taano ta dai akuon an pribilehiyong iyan? Sinabi pa kan elder, “An parahayag na nagkokondukta kan pag-adal kaipuhan na magin sarong marahay na amigo, saro na mapagkakatiwalaan kan inaktibo saka masasabihan kan mga sabuot kaini.”

16. Paano niyato naaraman na makakaasa kitang tatabangan kita kan mga anghel?

¹⁶ Dakul na eksperyensiya an nagpaparisa na an mga anghel nagtatrabaho kaiba niyato sa paghanap sa mga inaktibo na gustong-gusto nang bumalik ki Jehova. (Kap. 14:6) Halimbawa, si Silvio na taga Ecuador udok na namibi na matabangan siyang bumalik sa kongregasyon. Mantang namimibi siya, may nag-doorbell. Duwang elder an nasa may pinto niya. Durante kan pagbisitang iyan, maugma nindang tinawan si Silvio kan tabang na kinakaipuhan niya.

17. Anong balos an nakakamtan ta sa pagtabang sa mga maluya sa espirituwal?

¹⁷ Makakamati kita nin dakulang kagaya-gayahan sa pagtabang sa mga maluya sa espirituwal na bumalik ki Jehova. Mangnuhon an sinabi ni Salvador, sarong payunir na naggigibo nin espesyal na paghihinguwa para tabangan an mga inaktibo: “Kun minsan, dai ko napupugulan na mapaluha sa kaugmahan. Nauugma akong marhay pag iniisip kong pig-rescue ni Jehova an saro sa namumutan niyang mga karnero sa kinaban ni Satanas asin na nagkapribilehiyo akong makipagtabangan sa Saiya sa gibuhon na ini.”—Gibo 20:35.

18. Kun saro kang inaktibo, sa ano ka makakasigurado?

¹⁸ Kun nagpundo ka sa pakikiasosyar sa banwaan ni Jehova, makakasigurado ka na namumutan ka pa man giraray ni Jehova. Gusto niya na bumalik ka saiya. Kaipuhan mong gumibo nin nagkapirang lakdang para bumalik saiya. Pero arog kan ama sa ilustrasyon ni Jesus, nag-aabang si Jehova sa pagbabalik mo, asin maugma ka niyang aakuon liwat.