1. Ano an mga dahilan kaya nakakamati kun minsan an mga lingkod ni Jehova na nagsosolo sinda?

KADAKLAN sato nakakamati kun minsan na nagsosolo kita. May mga tawong madali lang na nawawara an pagmating iyan, pero sa iba haloy. Puwede kitang makamati kaiyan dawa pag dakul man an kaiba ta. Pag naglipat sa bagong kongregasyon, may mga tawong nasasakitan na makipag-amigo. An iba na urugos sa pamilya napupungaw pag nagbalyo sinda sa lugar na harayo sa mga kapamilya. An iba man grabe an kapungawan sa nagadan na mahal sa buhay. Saka may mga Kristiyano, lalo na an mga dai pa sana nahahaloy sa katotoohan, na nakakamating nagsosolo sinda pag isinisikwal o pinepersegir sinda kan bakong kapagtubod na mga kapamilya saka dating mga amigo.

2. Anong mga hapot an sisimbagon ta?

² Aram saka nasasabutan ni Jehova an gabos manungod sato. Pag nakakamati kitang nagsosolo kita, aram niya iyan, saka gusto niyang tabangan kita na makayanan iyan. Paano kita tinatabangan ni Jehova? Ano an puwede tang gibuhon para matabangan an sadiri ta? Paano ta matatabangan an mga kakongregasyon ta na nakakamating nagsosolo sinda? Pag-ulayan ta an simbag sa mga hapot na iyan.

3. Paano si Jehova nagmakulog ki Elias?

³ Gusto nanggad ni Jehova na magin maugma an gabos niyang parasamba. Harani siya sa lambang saro sato, saka aram niya pag dai ta na makaya an namamatian tang pangluluya nin buot. (Sal. 145:18, 19) Isipa an dakulang pagmakulog ni Jehova sa propeta niyang si Elias. Nabuhay an maimbod na lalaking iyan kaidtong nasa masakit na panahon an Israel. Pigpepersegir nin grabe an mga parasamba ni Jehova, tapos si Elias an puntirya kan  makapangyarihan na mga kaiwal na kontra sa Diyos. (1 Ha. 19:1, 2) An saro pang posibleng nakapurisaw ki Elias iyo an pakamating siya na lang an natatadang propeta na naglilingkod ki Jehova. (1 Ha. 19:10) May ginibo tulos an Diyos para tabangan si Elias. Nagsugo si Jehova nin sarong anghel para asiguraron an Saiyang propeta na dai ini nagsosolo—na may dakul pang Israelita na may takot sa Diyos!—1 Ha. 19:5, 18.

4. Paano ipinapahiling kan Marcos 10:29, 30 na nagmamalasakit si Jehova sa mga lingkod niya na mayo na kan suporta kan mga kapamilya o mga amigo?

⁴ Aram ni Jehova na pag pinili ta siyang paglingkudan, kakaipuhanon kan iba sato na gumibo nin dakulang pagsasakripisyo. Puwedeng kaiba diyan an suporta kan mga kapamilya o mga dating amigo. Tibaad dahil sa pagkahadit ni apostol Pedro, naghapot siya minsan ki Jesus: “Binayaan mi an gabos na bagay asin nagsunod kami sa saimo; kaya, ano an nakatagama sa samo?” (Mat. 19:27) Mamumuton na inasigurar ni Jesus an mga disipulo niya na magkakaigwa sinda nin dakulaon na espirituwal na pamilya. (Basahon an Marcos 10:29, 30.) Asin nanunuga si Jehova, an Payo kan satong espirituwal na pamilya, na tatabangan niya an mga gustong maglingkod saiya. (Sal. 9:10) Pag-isipan an pirang praktikal na paagi para makua mo an tabang ni Jehova pag nakakamati kang nagsosolo ka.

5. Ano an mga pakinabang kun mapokus ka sa kun paano ka tinatabangan ni Jehova?

⁵ Magpokus sa kun paano ka tinatabangan ni Jehova. (Sal. 55:22) Makakatabang ini saimo na mamatian na dai ka nagsosolo. An daragang sister na si Carol, * na solong Saksi sa pamilya, nagsabi: “Pag hinuhurop-hurop ko kun paano ako tinabangan ni Jehova sa dipisil na mga panahon, nakakatabang iyan sako na dai ko mamating nagsosolo ako. Nagtatao man iyan sako nin asigurasyon na pirmi siyang yaon para tabangan ako.”

6. Paano nakakapakusog an 1 Pedro 5:9, 10 sa mga nakakamating nagsosolo sinda?

⁶ Isip-isipon kun paano tinatabangan ni Jehova an mga kapagtubod na nakakamating nagsosolo sinda. (Basahon an 1 Pedro 5:9, 10.)  An brother na si Hiroshi, na dakul na taon nang siya lang an Saksi sa pamilya, nagsabi: “Sa kongregasyon, mahihiling mong mayo man talaga nin may perpektong sitwasyon sa buhay. Dawa arog kaiyan, gabos kita ginigibo an pinakamakakaya ta para maglingkod ki Jehova. Nakakapakusog talaga iyan sa mga solong Saksi sa pamilya.”

7. Paano nakakatabang saimo an pamibi?

⁷ Pagdanayon an marahay na espirituwal na rutina. Kaiba digdi an pagsabi ki Jehova kan gabos mong namamatian. (1 Ped. 5:7) “An saro sa pinakanakatabang sako na makayanan an pagmating nagsosolo ako iyo an pagparapamibi ki Jehova,” an sabi ni Massiel. Saro siyang hoben na sister na nakamating garo bako na siyang parte kan saiyang pamilya kan manindugan siya sa katotoohan. “Nagin tunay siyang Ama sako, saka aroaldaw akong namibi, dakul na beses kada aldaw, para sabihon saiya an namamatian ko.”

8. Paano nakakatabang saimo an pagbasa saka paghurop-hurop kan Tataramon nin Diyos?

⁸ Regular na basahon an Tataramon nin Diyos, asin hurop-hurupon an partikular na mga istorya diyan na nagpapahiling na namumutan ka talaga ni Jehova. Si Bianca, na sarong sister na an mga kapamilya pigtataraman siya nin mga nakakapangluya sa buot, nagsabi: “Nakatabang talaga sako an pagbasa asin paghurop-hurop sa mga istorya sa Bibliya saka sa mga istorya nin buhay kan mga lingkod ni Jehova na napaatubang man sa kaagid na sitwasyon.” May mga Kristiyano na nagtutuom nin mga tekstong nakakagian na marhay sa pagmati, arog kan Salmo 27:10 saka Isaias 41:10. Nakakatabang man sa iba an pagdangog nin audio recording kan mga pag-aadalan na publikasyon para dai sinda gayong makamati na nagsosolo sinda pag naghahanda para sa mga pagtiripon o pag nagbabasa nin Bibliya.

9. Paano ka nakikinabang sa pag-atender sa mga pagtiripon?

⁹ Hinguwahon na regular na umatender sa mga pagtiripon. Makikinabang ka sa nakakapakusog na programa, saka mas mabibisto mo man an mga tugang. (Heb. 10:24, 25) Si Massiel, na sinambit kasubago, nagsabi: “Masusupgon akong marhay, pero nagdesisyon akong mag-atender sa gabos na pagtiripon kan kongregasyon saka magkomento. Nakatabang ini sako na mamatian na parte ako kan kongregasyon.”

10. Taano ta mahalaga na makipag-amigo sa maimbod na mga Kristiyano?

¹⁰ Makipag-amigo sa maimbod na mga Kristiyano. Makipag-amigo sa mga kakongregasyon mo na marahay na halimbawa saimo, maski bako mo sindang kaedad o iba an kultura. Ipinapagirumdom sato kan Bibliya na an kadunungan “yaon sa mga gurang.” (Job 12:12, An Banal  na Biblia) Dakulon man na manunudan sa maimbod na mga hoben an mga mas maedad. Mas hoben na marhay si David ki Jonathan, pero dai iyan nakaulang para magin dayupot sindang mag-amigo. (1 Sam. 18:1) Tinabangan ninda an lambang saro na maglingkod ki Jehova sa ibong nin masakiton na mga sitwasyon. (1 Sam. 23:16-18) “Puwede ta talagang magin magurang o tugang sa espirituwal an satong mga kapagtubod,” an sabi ni Irina, na sa ngunyan siya lang an Saksi sa pamilya. “Puwede sindang gamiton ni Jehova para itao an pamilyang kaipuhan ta.”

11. Ano an dapat tang gibuhon para magkaigwa nin dayupot na mga amigo?

¹¹ Puwedeng magin dipisil na makipag-amigo, lalo na kun masusupgon ka. Arog kaiyan an sister na si Ratna, na inako an katotoohan dawa pigkokontra. Sinabi niya: “Kaipuhan kong akuon na kaipuhan ko an tabang saka suporta kan sakong espirituwal na pamilya.” Puwedeng dipisil saimo na sabihon sa iba an namamatian mo, pero iyan nanggad an kaipuhan para magkaigwa nin dayupot na mga amigo. Gusto kan mga amigo mo na pakusugon saka tabangan ka, pero kaipuhan mong ipaaram sainda kun paano ninda iyan magigibo.

12. Paano makakatabang an ministeryo para magkaigwa kita nin dayupot na mga amigo?

¹² An saro sa pinakamagayon na paagi na magkaigwa nin mga amigo iyo an pakikikabtang sa ministeryo kaiba nin mga kapwa Kristiyano. Si Carol, na sinambit kasubago, nagsabi: “Nagkaigwa ako nin dakul na dayupot na amiga paagi sa pag-iba sa mga sister sa ministeryo saka sa iba pang teokratikong aktibidad. Sa naglihis na mga taon, tinabangan ako ni Jehova paagi sa mga amiga kong ini.” Sulit nanggad an pakikipag-amigo sa maimbod na mga Kristiyano. Ginagamit sinda ni Jehova para tabangan kang labanan an nakakapangluyang mga emosyon, arog kan pagmating nagsosolo ka.—Tal. 17:17.

13. Ano an responsabilidad kan gabos sa kongregasyon?

¹³ An gabos sa kongregasyon may responsabilidad na ipamati sa lambang saro an pagkamuot asin katuninungan tanganing mayo nin siisay man na makamating nagsosolo siya. (Juan 13:35) Puwede nanggad na magkaigwa nin dakulang epekto an satong mga ginigibo saka sinasabi! Mangnuhon an sinabi nin sarong sister: “Kan manudan ko an katotoohan, nagin pamilya ko an kongregasyon. Dai ako magigin Saksi ni Jehova kun mayo an tabang ninda.” Ano an puwede mong gibuhon para mamatian kan mga nagsosolong Saksi na parte sinda kan kongregasyon?

14. Ano an puwede mong gibuhon para makipag-amigo sa mga baguhan?

¹⁴ Amiguhon an mga baguhan. Puwede mong punan iyan paagi sa mainamigong pagbati sainda. (Roma 15:7) Pero bako sana iyan an gusto tang gibuhon. Gusto niyato na magin dayupot ta sindang amigo pag-abot nin panahon. Kaya magin mainamigo sa mga baguhan asin ipahiling na interesado ka talaga sainda. Hinguwahon na aramon an tibaad inaagihan ninda sa paaging iginagalang an personal na buhay ninda. Nasasakitan an iba na sabihon an namamatian ninda, kaya dai sinda pagpiriton na magtaram. Imbes, mabuot na aramon an namamatian ninda paagi sa maingat na paghapot saka mapasensiyang pagdangog sa simbag ninda. Halimbawa, puwede mo sindang haputon kun paano ninda naaraman an katotoohan.

15. Paano makakatabang sa iba sa laog kan kongregasyon an maygurang na mga Kristiyano?

¹⁵ Mag-uuswag sa espirituwal an gabos sa kongregasyon pag nagpapahiling sainda nin personal na interes an maygurang na mga Kristiyano, lalo na an mga elder. Si Melissa, na pinadakula sa katotoohan kan saiyang ina, nagsabi: “Kulang an mga tataramon para maipahayag  ko kun gurano ako nagpapasalamat sa mga brother na nagtao sako nin panahon. Nagin mga ama ko sinda sa espirituwal sa nag-aging mga taon. Pag kaipuhan ko nin kaulay, may madudulukan ako.” Si Mauricio, na nakamating nagsosolo siya kan bayaan kan nagtukdo saiya sa Bibliya an katotoohan, nag-istorya: “Dakula an naitabang sako kan personal na interes kan mga elder. Parati sindang nakikipag-ulay sako. Iniibanan ninda ako sa ministeryo, pighihirasan ako nin espirituwal na mga kayamanan na nakua ninda sa personal na pag-adal, tapos nagkakawat pa ngani kami nin sports.” Pag-abot nin panahon, parehong naglingkod nin bilog na panahon si Melissa saka Mauricio.

16-17. Anong praktikal na mga tabang an puwede tang itao sa iba?

¹⁶ Magtao nin praktikal na tabang. (Gal. 6:10) “Sa parati, an kaipuhan mo lang na gibuhon sarong simpleng pagpahiling nin kabuutan sa tamang panahon,” an sabi ni Leo, na naglilingkod bilang misyonero sa sarong lugar na harayo sa pamilya niya. “Nagigirumduman ko kan maaksidente ako sa awto. Kan makapuli na ako sa harong, grabe su stress ko. Sakto man, may mag-agom na inimbitaran ako na magkakan sa harong ninda. Dai ko na nagigirumduman su kinakan mi, pero dai ko malilingawan su mabuot nindang pagdangog sako. Naggian talaga an pagmati ko!”

¹⁷ Gabos kita gustong-gusto an teokratikong mga okasyon, arog kan mga asembleya saka kumbensiyon. Nakakaibanan ta kaya diyan an mga tugang tapos napag-iiristoryahan an mga nadangog ta sa programa. Dawa arog kaiyan, sinabi ni Carol na sinambit kasubago: “Mas lalong masakit sako pag asembleya saka kumbensiyon.” Taano? “Dawa kaya ginatos o ribo-ribo pa nganing tugang an yaon,” an sabi niya, “sa parati kataid ninda an kanya-kanya nindang pamilya. Pag nahihiling ko sinda, lalo kong namamatian na nagsosolo ako.” An iba nasasakitan na umatender sa kumbensiyon o asembleya sa inot na pagkakataon pagkatapos na magadan an saindang agom. May bisto ka daw na nasa arog kaiyan na mga sitwasyon? Puwede mo daw siyang imbitaran na umiba sa pamilya nindo sa sunod na teokratikong okasyon?

18. Paano ta maiaaplikar an 2 Corinto 6:11-13 pag nagpapahiling kita nin pagkamapag-istimar?

¹⁸ Magtao nin panahon na makaibanan sinda. Hinguwahon na iiba an manlain-lain na tugang  sa mga lakaw o pagtiripon-tipon, lalo na an mga tibaad nakakamating nagsosolo sinda. Gusto tang ‘buksan nin lubos an satong puso,’ partikular na sa mga arog ninda. (Basahon an 2 Corinto 6:11-13.) “Maugmahon talaga pag iniimbitaran kami kan mga amigo mi sa sainda saka sa pamilya ninda o na umiba sainda sa pagbakasyon,” an sabi ni Melissa, na sinambit kasubago. Igwa daw sa kongregasyon nindo nin puwede mong pahilingan nin pagkamapag-istimar?

19. Sa anong mga pagkakataon tibaad lalo nang makatabang sa mga kapwa Kristiyano kun tatawan ta sinda nin panahon?

¹⁹ Tibaad may mga pagkakataon na lalo nang kaipuhan kan satong mga kapwa Kristiyano na tawan ta sinda nin panahon. Tibaad dipisil para sa nagkapira pag holiday kaiba an saindang bakong kapagtubod na mga kapamilya. An iba tibaad namumundong marhay sa partikular na mga petsa, arog kan anibersaryo kan kagadanan kan mahal ninda sa buhay. Pag nagtatao kita nin panahon para makaibanan an mga tugang na nakakaeksperyensiya kaiyan, ipinapahiling ta na “tunay [kitang] magmamakulog” sa sainda.—Fil. 2:20.

20. Paano makakatabang sato an Mateo 12:48-50 pag namamatian tang nagsosolo kita?

²⁰ Dakul an dahilan kun taano ta nakakamati kun minsan an sarong Kristiyano na nagsosolo siya. Dawa arog kaiyan, dai ta nanggad paglingawan na aram na marhay iyan ni Jehova. Tinatawan niya kita kan kaipuhan ta, sa parati paagi sa mga kapwa ta Kristiyano. (Basahon an Mateo 12:48-50.) Ipinapahiling ta man na nagpapasalamat kita ki Jehova sa mamumuton niyang areglo pag ginigibo ta an satong pinakamakakaya para suportaran an satong espirituwal na pamilya. Ano man an tibaad mamatian ta kun minsan, dai nanggad kita nagsosolo dahil pirmi tang kaibanan si Jehova!