1. Ano an ginibo ni Jehova para sa lambang saro sato?

IRINANI ni Jehova sa saiya an lambang saro sato. (Juan 6:44) Isip-isipa an buot sabihon kaiyan. Mantang pinagmamasdan na marhay ni Jehova an gabos na binilyon na tawo sa kinaban, nakahiling siya saimo nin mahalagang marhay na bagay—sarong sinserong puso na mamumutan siya. (1 Cron. 28:9) Midbid ka ni Jehova, nasasabutan ka niya, saka namumutan. Nakakapakusog nanggad iyan!

2. Paano iinilustrar ni Jesus an pagmakulog ni Jehova sa lambang karnero Niya?

² Nagmamakulog na marhay si Jehova saimo, saka nagmamakulog man siya sa gabos mong Kristiyanong tugang. Para tabangan kitang masabutan iyan, ikinumparar ni Jesus si Jehova sa sarong pastor. Kun an 1 sa 100 na karnero maparayo sa aripumpon, ano an gigibuhon kan pastor? “Babayaan niya an 99 sa kabukidan dangan hahanapon an saro na nalagalag.” Pag nahanap niya na an karnero, dai niya iyan aanggutan dahil nagrayo iyan. Mag-uugma siya. An punto? Mahalaga ki Jehova an lambang karnero. Sinabi ni Jesus: “Dai nakakaugma sa sakuyang Ama na nasa langit na mapahamak an maski saro sa mga tawong arog nin sadit na mga aki.”—Mat. 18:12-14.

3. Ano an pag-uulayan ta sa artikulong ini?

³ Dai ta nanggad gugustuhon na kita an magin dahilan na mangluya an buot kan siisay man sa satong mga tugang. Paano ta malilikayan na magibo iyan? Asin ano an puwede tang gibuhon kun may nakakulog sato? Sisimbagon ta iyan sa artikulong ini. Alagad, pag-ulayan ta nguna an manungod sa “mga tawong  arog nin sadit na mga aki” na binanggit sa Mateo kapitulo 18.

4. Sairisay an “mga tawong arog nin sadit na mga aki”?

⁴ An “mga tawong arog nin sadit na mga aki” iyo an gabos na disipulo ni Jesus ano man an edad ninda. Hoben man sinda o may edad na, sinda “mga tawong arog nin sadit na mga aki” dahil andam sindang tukduan ni Jesus. (Mat. 18:3) Manlain-lain an pinaghalian saka kultura ninda asin magkakaiba nin opinyon saka personalidad, pero gabos sinda nagtutubod ki Cristo. Asin namumutan niya sindang marhay.—Mat. 18:6; Juan 1:12.

5. Ano an namamatian ni Jehova pag pigkukulgan an saro sa mga lingkod niya?

⁵ Mahalagang marhay ki Jehova an gabos na “tawong arog nin sadit na mga aki.” Para masabutan an namamatian niya, pag-isipan an namamatian ta sa mga aki. Mahalaga sindang marhay sato. Gusto ta sindang protektaran dahil maluya sinda, saka mayo pa kan eksperyensiya asin kadunungan na igwa an mga adulto. Sa katunayan, habo tang nahihiling na nakukulgan an siisay man, pero lalo nang nauuyam kita—naaanggot pa ngani—pag aki an pigkukulgan. Sa kaagid na paagi, gusto ni Jehova na protektaran kita. Nauuyam siya—naaanggot pa ngani—pag pigkukulgan an saro sa mga lingkod niya!—Isa. 63:9; Mar. 9:42.

6. Uyon sa 1 Corinto 1:26-29, ano an paghiling kan kinaban sa mga disipulo ni Jesus?

⁶ Sa ano pang paagi an mga disipulo ni Jesus arog sa “sadit na mga aki”? Pag-isipan: Sa kinaban na ini, sairisay an ibinibilang na importante? Sinda an mga mayaman, sikat, saka makapangyarihan. Kun ikukumparar sainda, an mga disipulo ni Jesus garo baga bakong importante asin hamak na “sadit na mga aki.” (Basahon an 1 Corinto 1:26-29.) Pero bakong arog kaiyan an paghiling sainda ni Jehova.

7. Ano an gusto ni Jehova na mamatian ta para sa satong mga tugang?

⁷ Namumutan ni Jehova an gabos niyang lingkod, sinda man haloy nang naglilingkod saiya o bago pa sana sa katotoohan. Mahalaga ki Jehova an gabos tang tugang, kaya dapat na mahalaga man sinda sato. Gusto niyato na “magkaigwa . . . nin pagkamuot sa bilog na kasararuan nin magturugang,” bako sanang sa nagkapira sainda. (1 Ped. 2:17) Dapat na andam kitang gibuhon an ano man na makakaya ta para protektaran asin pagmakulgan sinda. Kun naaraman tang may nakulgan kita, dai ta iyan dapat ipasipara, na iniisip na sobra lang siya kasensitibo kaya dapat na patawadon niya na lang kita asin lingawan na sana iyan. Ano an mga posibleng dahilan kaya nakukulgan sinda? Tibaad dahil sa dinakulaan ninda kaya may mga tugang na hababa an paghiling sa sadiri. An iba man baguhan sa katotoohan kaya dai pa ninda aram kun paano atubangon an mga kaluyahan nin tawo. Ano man an sitwasyon, dapat tang gibuhon an makakaya ta na maibalik an katuninungan. Sa ibong na lado, kaipuhan na masabutan nin sarong tawong madaling makulgan an buot na bako iyan marahay na ugali asin kaipuhan niyang hinguwahon na baguhon iyan. Kaipuhan niyang gibuhon iyan para magkaigwa siya nin katuninungan nin isip asin para man sa ikakarahay kan iba.

8. Anong kaisipan kan dakul kaidto an nakaimpluwensiya sa mga disipulo ni Jesus?

⁸ Taano ta sinambit ni Jesus an manungod sa “mga tawong arog nin sadit na mga aki”? Hinapot siya kan mga disipulo niya: “Siisay man nanggad an pinakaurog sa Kahadian kan kalangitan?” (Mat. 18:1) Kan panahon na idto, mahalagang marhay para sa dakul na Judio an posisyon asin ranggo. Sinabi nin sarong iskolar: “An mga tawo kaidto nabubuhay asin  nagagadan para sa onra, reputasyon, kabantugan, pag-uyon, saka paggalang.”

9. Ano an kinaipuhan na gibuhon kan mga disipulo ni Jesus?

⁹ Aram ni Jesus na kaipuhan kan mga disipulo niya na magmaigot na halion sa saindang puso an espiritu nin pakikipagkumpetensiya na nakagamot nang marhay sa kulturang Judio. Sinabi niya sainda: “An saro na pinakaurog sa saindo iyo an magin siring sa pinakanguhod, asin an saro na nanginginot iyo an magin paralingkod.” (Luc. 22:26) Minagawi kita siring sa “pinakanguhod” pag ‘ibinibilang ta an iba na mas urog kisa’ sato. (Fil. 2:3) Mantang mas hinihinguwa tang ipahiling iyan, mas sadit man an tsansa na makulgan ta an iba.

10. Anong sadol ni Pablo an dapat tang isapuso?

¹⁰ An kada saro sa mga tugang ta mas urog kisa sato sa sarong bagay o sa iba pang mga paagi. Madali iyan mahiling pag nakapokus kita sa marahay na mga kuwalidad ninda. Dapat tang isapuso an sadol na itinao ni apostol Pablo sa mga taga Corinto: “Siisay an guminibo sa saimo na magin lain ka sa iba? Asin ano an igwa ka na dai itinao sa saimo? Ngunyan kun itinao man nanggad iyan sa saimo, ano ta naghahambog ka na garo baga dai iyan itinao sa saimo?” (1 Cor. 4:7) Kaya dai ta nanggad dapat pagmawuton na hangaan kita o isipon na mas urog kita kisa sa iba. Kun an sarong brother mahusayon na magpahayag o an sarong sister matibayon sa pagpuon nin mga pag-adal sa Bibliya, dapat na itao niya tulos ki Jehova an kaumawan sa mga nagigibo niya.

11. Ano an manunudan ta sa ilustrasyon ni Jesus manungod sa sarong hadi asin sa uripon kaini?

¹¹ Pagkatapos na patanidan ni Jesus an mga parasunod niya na dai kulgan an buot kan iba, nagtao siya nin ilustrasyon manungod sa sarong hadi asin sa uripon kaini. Kinanselar kan hadi an dakulang utang kan uripon na dai nanggad kaini mababayadan. Paghaloy-haloy, an uripon na iyan nagsayumang kanselaron an utang kan kapwa niya uripon—na mas saditon kumpara sa utang niya. Kan huri, ipinapreso kan hadi an daing hirak na uripon na iyan. An leksiyon? Sinabi ni Jesus: “Siring man kaiyan an gigibuhon sa saindo kan sakuyang langitnon na Ama kun an lambang saro sa saindo dai magpapatawad nin gikan sa puso sa saiyang tugang.”—Mat. 18:21-35.

12. Kun dai kita nagpapatawad, paano ta nakukulgan an iba?

¹² Bako sana an sadiri niya an nadanyaran kan mga ginibo kan uripon kundi pati man an iba. Inot, daing hirak niyang “ipinapreso [an kapwa niya uripon] sagkod na dai ini nakakabayad kan saiyang utang.” Ikaduwa, nakulgan niya an ibang mga uripon na nakahiling sa ginibo niya. Kan “mahiling kan mga kapwa niya uripon an nangyari, nahadit sindang gayo.” Sa kaagid na paagi, may epekto sa iba an paggawi ta. Kun may makagibo nin sala sato tapos dai ta siya papatawadon, ano kaya an puwedeng mangyari? Inot, nakukulgan ta siya ta dai ta siya pinapatawad, tibaad dai ta siya tinitino asin dai pinapahilingan nin pagkamuot. Ikaduwa, nagigin alangan an iba sa laog kan kongregasyon pag narisa ninda na bako pa kamong okey kan tugang na iyan.

13. Ano an manunudan mo sa eksperyensiya nin sarong payunir?

¹³ Pag pinapatawad ta an satong mga tugang, nakikinabang kita saka an iba. Naeksperyensiyahan iyan kan sarong payunir na aapudon tang Crystal. Nakulgan siya nin sarong sister sa kongregasyon. Sinabi ni Crystal: “Kun minsan, garo niya ako pigsasaksak nin makulog na mga tataramon. Pag nasa ministeryo, habo ko na nganing makaibanan siya sa parehong car group. Nawawara na an kaigutan saka kaugmahan ko.” Para ki Crystal, tama sanang maanggot  siya. Pero dai siya nagdanay na anggot o sadiri sana an pigparaisip. Mapakumbaba niyang inaplikar an sadol kan Kasuratan na nasa artikulong “Magpatawad Gikan sa Saindong Puso” sa An Torrengbantayan na Oktubre 15, 1999. Pinatawad ni Crystal an sister. Sinabi niya: “Narealisar ko na gabos man kita naghihinguwang isulot an bagong personalidad saka andam si Jehova na patawadon kita sa kada aldaw. Garo man sana nahali an magabaton na pasan ko. Nagin maugma na giraray ako.”

14. Uyon sa Mateo 18:21, 22, sa ano posibleng nasakitan si apostol Pedro asin ano an manunudan ta sa simbag ni Jesus?

¹⁴ Aram ta na dapat kitang magpatawad; iyan an tamang gibuhon. Pero tibaad nasasakitan pa man giraray kitang gibuhon iyan. Posibleng nakamati man nin arog kaiyan kun minsan si apostol Pedro. (Basahon an Mateo 18:21, 22.) Ano an makakatabang sato? Inot, hurop-hurupon kun gurano ka pinatawad ni Jehova. (Mat. 18:32, 33) Bako kitang maninigo sa pagpapatawad niya, pero bulaos niya kitang pinapatawad. (Sal. 103:8-10) Apuwera kaiyan, “may obligasyon man kitang kamutan an lambang saro.” Kaya bakong opsiyonal an pagpapatawad. Obligasyon ta na patawadon an satong mga tugang. (1 Juan 4:11) Ikaduwa, hurop-hurupon an nangyayari pag nagpapatawad kita. Puwede tang matabangan an tawong nakagibo nin sala sato, makakontribwir sa pagkasararo sa kongregasyon, maingatan an haraning relasyon ta ki Jehova, saka maginhawahan sa magabat na pasan. (2 Cor. 2:7; Col. 3:14) Panghuri, mamibi sa Saro na naghahagad sato na magpatawad kita. Dai pagtugutan si Satanas na rauton an marahay na relasyon nindo kan mga kapagtubod mo. (Efe. 4:26, 27) Kaipuhan ta an tabang ni Jehova para malikayan ta na masiod ni Satanas.

15. Kauyon kan Colosas 3:13, ano an puwede tang gibuhon kun napupurisaw kita sa paggawi nin sarong tugang?

¹⁵ Pero paano kun guminawi an sarong kapagtubod sa paaging nakakapurisaw na marhay saimo? Ano an dapat mong gibuhon? Gibuhon an  pinakamakakaya mo na mapagdanay an katuninungan. Udok na mamibi ki Jehova. Hagadon saiya na tabangan an tawong nakakulog saimo asin na tabangan kang mahiling an marahay na mga kuwalidad niya—an mga kuwalidad na gustong-gusto ni Jehova saiya. (Luc. 6:28) Kun dai mo kayang palampason an ginibo kan saimong tugang, pag-isipan kun paano mo siya dapat dulukon. Marahay na isipon na nungkang tutuyuhon kan tugang na kulgan ka. (Mat. 5:23, 24; 1 Cor. 13:7) Pag kaulay mo na siya, isipon na marahay an intensiyon niya. Paano kun habo niyang makipagkatuninungan? “Padagos [siyang] pagpasensiyahan.” Dai magpundo, dai sumuko. (Basahon an Colosas 3:13.) An pinakamahalaga, dai nanggad magtanom nin raot nin buot, dahil makakaraot iyan sa haraning relasyon mo ki Jehova. Nungkang pagtugutan an ano man na makapasingkog saimo. Kun gigibuhon mo iyan, pinapatunayan mo na namumutan mo si Jehova nin urog kisa sa ano pa man.—Sal. 119:165.

16. Ano an paninimbagan kan lambang saro sato?

¹⁶ Pinapahalagahan tang marhay an pribilehiyo ta na sararong maglingkod ki Jehova bilang “sarong aripumpon” sa paggiya nin “sarong pastor”! (Juan 10:16) An librong Organisado sa Paggibo kan Kabutan ni Jehova, pahina 165, nagsabi: “Huling nakikinabang ka sa pagkasararong iyan, may paninimbagan kang tumabang sa pagpapadanay kaiyan.” Kaya, kaipuhan tang hinguwahon na “hilingon an mga tugang nin arog kan paghiling sa sainda ni Jehova.” Para ki Jehova, gabos kita mahalagang marhay na “sadit na mga aki.” Arog daw kaiyan an paghiling mo sa mga tugang? Hinihiling asin pinapahalagahan ni Jehova an gabos na ginigibo mo para tabangan saka atamanon sinda.—Mat. 10:42.

17. Ano an determinado tang gibuhon?

¹⁷ Namumutan ta an satong mga kapagtubod. Kaya determinado kita na dai magbugtak nin singkugan o ulang sa atubangan nin sarong tugang. (Roma 14:13) Ibinibilang ta na mas urog kisa sato an satong mga tugang, saka gusto ta sindang patawadon nin gikan sa puso. Lugod na dai ta tugutan na masingkog kita kan iba. Imbes, “pagmaigutan tang gibuhon an mga bagay na nagdadara nin katuninungan asin an mga bagay na nakakapakusog sa lambang saro.”—Roma 14:19.