1. Ano an nagkapirang parating ikinakatakot nin mga tawo?

 PAG-ISIPAN an minasunod na mga sitwasyon na base sa tunay na mga pangyayari. Si Nestor asin an saiyang agom na si Maria gustong maglingkod sa lugar kun sain mas dakula an pangangaipo. * Alagad para magibo iyan, kaipuhan nindang baguhon an saindang paagi nin pamumuhay. Pero natakot sinda na tibaad dai sinda magin tunay na maugma kun mamumuhay sinda na dikit lang an kuwarta. Kan si Biniam magin saro sa mga Saksi ni Jehova sa nasyon na ipinagbabawal an satong gibuhon, naisip niya na bilang saro sa mga lingkod nin Diyos, puwede siyang persegiron. Natakot siya huli kaiyan. Pero mas ikinatakot pa ngani niya an posibleng magin reaksiyon kan saiyang pamilya pag naaraman ninda an manungod sa bago niyang relihiyon. Si Valerie na-diagnose na igwa nin agresibong klase nin kanser, asin nagmaigot siya na makahanap nin sarong doktor na igagalang an saiyang mga paniniwalang basado sa Bibliya may koneksiyon sa dugo. Natural sana na matakot siya na tibaad magadan siya.

2. Taano ta kaipuhan tang pagmaigutan na mapangganahan an satong mga pagkatakot?

² Naeksperyensiyahan mo na daw an siring na mga pagkatakot? An dakul sa sato iyo. Kun dai ta manunudan na kontrulon an satong mga pagkatakot, posibleng marhay na makagibo kita nin salang mga desisyon na puwede pa nganing makaraot kan satong marahay na relasyon ki Jehova. Iyan an gusto ni Satanas. Hinihinguwa man niyang gamiton an satong mga pagkatakot para suwayon niyato an mga pagbuot ni Jehova, kaiba na an pagbuot na ihulit an maugmang bareta. (Kap. 12:17) Si Satanas maraot, daing  hirak, asin makapangyarihan. Pero puwede mong protektaran an saimong sadiri laban sa saiya. Paano?

3. Ano an makakatabang sa sato na mapangganahan an satong mga pagkatakot?

³ Pag kumbinsido kita na namumutan kita ni Jehova—na nasa kampi ta siya—madadaog ta an mga paghihinguwa ni Satanas. (Sal. 118:6) Halimbawa, an kagsurat kan Salmo 118 napaatubang sa nagkapirang masakiton na mga sitwasyon. Dakul siyang mga kalaban, kaiba na an nagkapirang prominenteng mga tawo (bersikulo 9, 10). Kun minsan, grabe an panggigipit sa saiya (bersikulo 13). Asin nag-ako siya nin magabat na disiplina hali ki Jehova (bersikulo 18). Dawa arog kaiyan, napahiro an salmistang iyan na magkanta: “Dai ako matatakot.” Taano ta namati niya na talagang ligtas siya asin tiwasay? Aram niya na dawa ngani dinisiplina siya ni Jehova, namumutan siyang marhay kan saiyang Ama sa langit. Kumbinsido an salmista na sa ano man na sitwasyon mapaatubang siya, an saiyang mamumuton na Diyos pirming andam na tabangan siya.—Sal. 118:29.

4. Anong mga pagkatakot an kaya tang mapangganahan kun magtitiwala kita na namumutan kita nin Diyos?

⁴ Kaipuhan tang magin kumbinsido na namumutan kita ni Jehova. An pagkaigwa ta kan siring na kumbiksiyon makakatabang sato na mapangganahan an tulong parating ikinakatakot: (1) pagkatakot na dai maitao an pangangaipo kan satong pamilya, (2) pagkatakot sa tawo, asin (3) pagkatakot sa kagadanan. An mga indibidwal na nasambit sa inot na parapo nakayang mapangganahan an saindang mga pagkatakot huling kumbinsido sinda sa pagkamuot nin Diyos.

5. Anong mga kamugtakan an tibaad magtao nin grabeng paghadit sa sarong payo nin pamilya? (Hilingon an ritrato sa cover.)

⁵ Sineseryoso nin sarong Kristiyanong payo nin pamilya an saiyang paninimbagan na itao an materyal na pangangaipo kan saiyang pamilya. (1 Tim. 5:8) Kun saro kang payo nin pamilya, tibaad kan magkapandemya ikinahadit mo an posibilidad na mawaran ka nin trabaho. Tibaad nahadit ka kun sain mo kukuanon an ipapakakan sa saimong pamilya asin kun paano mo makukua an pambayad sa arkila o panghulog sa harong nindo. Tibaad natakot ka man na kun mawaran ka nin trabaho, posibleng dai ka na makahanap nin ibang trabaho. O arog ni Nestor asin Maria, na nasambit kasubago, tibaad nag-alangan ka na gumibo nin pagbabago sa saimong trabaho ta posibleng maapektaran kaiyan an saindong paagi nin pamumuhay. Nagin mapanggana nang marhay si Satanas sa pag-aprobetsar sa siring na mga pagkatakot.

6. Hinihinguwa ni Satanas na patubudon kita sa ano?

⁶ Hinihinguwa ni Satanas na patubudon kita na dai nagmamalasakit sa sato si Jehova asin na dai niya kita tatabangan na maitao an pangangaipo kan satong pamilya. Bilang resulta, tibaad isipon ta na kaipuhan tang gibuhon an gabos dai lang kita mawaran nin trabaho, dawa pa mangahulugan iyan nin pagbaliwala sa mga prinsipyo sa Kasuratan.

7. Ano an inaasigurar sa sato ni Jesus?

⁷ Si Jesus, na mas nakakamidbid sa Ama urog kisa kiisay man, inaasigurar kita na an satong Diyos “aram . . . an mga kaipuhan [ta] bago pa man [kita] maghagad sa saiya.” (Mat. 6:8) Asin aram ni Jesus na andam si Jehova na itao an mga pangangaipo ta. Bilang mga Kristiyano, miyembro kita kan pamilya nin Diyos. Makakasigurado kita na bilang Payo kan pamilya, igagalang ni Jehova an prinsipyo na yaon sa 1 Timoteo 5:8.

8. (a) Ano an makakatabang sa sato na mapangganahan an pagkatakot na dai ta maitatao an mga pangangaipo kan satong pamilya? (Mateo 6:31-33) (b) Paano ta puwedeng maarog an mag-agom na nasa ritrato na nagdara nin pagkakan sa sarong sister?

⁸ Pag kumbinsido kita na namumutan kita ni Jehova asin na namumutan niya an satong pamilya, makakasigurado nanggad kita na magkakaigwa kita kan mga bagay na kaipuhan ta. (Basahon  an Mateo 6:31-33.) Gusto ni Jehova na itao an mga pangangaipo ta, asin saro nanggad siyang mamumuton saka bukas-palad na Paratao! Kan lalangon niya an daga, bako lang na panginot na mga pangangaipo ta an itinao niya sa sato para mabuhay. Mamumuton niyang pinano an daga nin mga bagay na magtatao sa sato nin dakulang kaugmahan. (Gen. 2:9) Dawa kun minsan an yaon sa sato tama sana para mabuhay, dapat na magpokus kita sa katotoohan na nakakaraos kita. Pirming itinatao ni Jehova an mga pangangaipo ta. (Mat. 6:11) Kaipuhan tang tandaan na ano man na materyal na bagay na isinasakripisyo ta ngunyan, dai nanggad maikukumparar sa itatao kan mamumuton tang Diyos, ngunyan asin sa maabot na panahon. Iyan an narealisar ni Nestor asin Maria.—Isa. 65:21, 22.

9. Ano an manunudan mo sa halimbawa ni Nestor asin Maria?

⁹ Si Nestor asin Maria igwa kaidto nin komportableng buhay sa Colombia. Sabi ninda: “Pinag-isipan mi na pasimplehon an samuyang buhay asin pahiwason an samong ministeryo, pero natakot kami na tibaad dai kami magin maugma kun dikit an samong kuwarta.” Ano an nakatabang sa sainda na mapangganahan an saindang pagkatakot? Hinurop-hurop ninda an dakul na bagay na patunay na namumutan sinda ni Jehova. Dahil kumbinsido sinda na pirmi niya sindang aatamanon, nag-resign sinda sa saindang trabaho na halangkaw an suweldo. Ipinabakal ninda an saindang harong asin nagbalyo sa sarong parte kan nasyon na mas dakula an pangangaipo para sa mga parahulit kan Kahadian. Ano an namatian ninda manungod sa saindang desisyon? Sinabi ni Nestor: “Napatunayan mi na totoong-totoo an sinasabi sa Mateo 6:33. Dai lamang kami nagkulang sa ano man na materyal na bagay. Asin mas maugma kami ngunyan.”

10. Taano ta bakong makangangalas na an mga tawo natatakot sa saindang kapwa?

¹⁰ Puon kaidto, an mga tawo dakul nang ginigibo sa ikakapahamak kan saindang kapwa. (Ecl. 8:9) Halimbawa, inaabuso kan mga tawo an saindang awtoridad, an mga kriminal naggigibo nin kadahasan, an mga bully sa eskuwelahan iniinsulto saka tinatakot an saindang mga kaklase, asin may mga tawo na daing hirak pa nganing tinatrato maski an saindang mga kapamilya. Bako nanggad makangangalas na an mga tawo natatakot sa kapwa ninda! Paano hinihinguwa ni Satanas na aprobetsaran an pagkatakot ta sa tawo?

11-12. Paano ginagamit ni Satanas laban sa sato an pagkatakot sa tawo?

¹¹ Ginagamit ni Satanas an pagkatakot sa tawo tanganing gipiton kita na makikompromiso asin  magpundo kita sa paghuhulit. Dahil sa impluwensiya ni Satanas, ipinagbawal kan mga gobyerno an satong gibuhon asin pinersegir kita. (Luc. 21:12; Kap. 2:10) Sa kinaban ni Satanas, dakul na tawo an nagpapalakop nin sala asin grabeng kaputikan manungod sa mga Saksi ni Jehova. An mga tawo na naniniwala sa mga kaputikan na ini tibaad tuya-tuyaon kita o kulgan pa ngani kita. (Mat. 10:36) Nagngangalas pa daw kita sa mga taktika ni Satanas? Dai nanggad. Ginagamit niya na iyan puon pa kan inot na siglo.—Gibo 5:27, 28, 40.

¹² An pagkatakot sa pagkontra kan mga gobyerno bako sana an solamenteng armas na ginagamit ni Satanas. Para sa nagkapira, an pagkatakot sa magigin reaksiyon kan saindang mga kapamilya dahil inako ninda an katotoohan mas labi pa kisa sa ano man na pisikal na pangungulog. Namumutan nindang marhay an saindang mga kapamilya asin gusto ninda na mamidbid asin mamutan man kan mga ini si Jehova. Namumundo sinda pag nadadangog ninda an saindang mga kapamilya na nagtataram nin daing galang manungod sa tunay na Diyos asin sa saiyang mga parasamba. Alagad, may mga sitwasyon na an dating mga nagkokontrang mga kapamilya inako an katotoohan pag-abot nin panahon. Pero paano kun isikwal kita kan satong mga kapamilya huli sa bagong mga paniniwala ta? Ano an satong magigin reaksiyon?

13. Paano makakatabang sa sato an pagigin kumbinsido sa pagkamuot nin Diyos pag isinikwal kita kan satong mga kapamilya? (Salmo 27:10)

¹³ Mararanga kita kan magayon na mga tataramon sa Salmo 27:10. (Basahon.) Pag ginigirumdom ta kun gurano kita namumutan ni Jehova, nagigin tiwasay kita dawa napapaatubang sa pagkontra. Asin nagtitiwala kita na babalusan niya an satong pakatagal. Itatao ni Jehova an satong mga pangangaipo sa pisikal, emosyonal, asin espirituwal sa paaging labi pa sa maitatao nin siisay man! Iyan an napatunayan ni Biniam, na sinambit kasubago.

14. Ano an manunudan mo sa halimbawa ni Biniam?

¹⁴ Si Biniam nagin saro sa mga Saksi ni Jehova dawa aram niya na puwede siyang mapaatubang sa grabeng persekusyon. Aramon ta kun paano an pakaaram ni Biniam na namumutan siya ni Jehova nakatabang sa saiya na mapangganahan an pagkatakot sa tawo. “An persekusyon mas grabe kisa inaasahan ko,” an sabi niya. “Pero mas ikinatakot ko an pagkontra kan sakong pamilya kisa sa pagpersegir kan gobyerno. Natakot ako na an sakong desisyon na magin sarong Saksi ni Jehova makapaanggot sa sakong bakong Saksing ama asin na dai na ako igalang kan sakong pamilya.” Minsan siring, kumbinsido si Biniam na pirming inaataman ni Jehova an mga namumutan Niya. Sinabi ni Biniam: “Hinurop-hurop ko kun  paano tinabangan ni Jehova an iba na matagalan an sakit sa pagbuhay, diskriminasyon, asin sururog na pag-atake. Aram ko na kun magdadanay akong maimbod ki Jehova, bebendisyunan niya ako. Kan dakul na beses akong inarestar asin pig-torture pa ngani, naeksperyensiyahan ko mismo na kun nagdadanay kitang maimbod, pirmi kitang tatabangan ni Jehova.” Si Jehova nagin tunay na Ama ki Biniam, asin an Saiyang mga lingkod nagin tunay na pamilya sa saiya.

15. Taano ta normal sana na magkaigwa nin pagkatakot sa kagadanan?

¹⁵ Sinasabi kan Bibliya na an kagadanan sarong kaiwal. (1 Cor. 15:25, 26) Tibaad mahadit kita pag naiisip ta an kagadanan, lalo na kun kita o an satong mga namumutan igwa nin malalang hilang. Taano ta natatakot kita sa kagadanan? Huling linalang kita ni Jehova na may pagmawot na mabuhay nin daing sagkod. (Ecl. 3:11) An tamang pagkatakot sa kagadanan makakatabang sa sato na maprotektaran an satong buhay. Halimbawa, mamomotibar kita kaiyan na gumibo nin marahay na mga desisyon manungod sa satuyang diet asin pag-ehersisyo, na kumonsulta sa mga doktor saka mag-inom nin bulong kun kinakaipuhan, asin na likayan an dai kinakaipuhan na pagbugtak kan satong buhay sa peligro.

16. Paano hinihinguwa ni Satanas na aprobetsaran an satong normal na pagkatakot sa kagadanan?

¹⁶ Aram ni Satanas na pinapahalagahan ta an satong buhay. Pero hinihingako niya na isasakripisyo ta an gabos na igwa kita—dawa pa an pakikipag-amigo ta ki Jehova—magdanay sana kitang buhay. (Job 2:4, 5) Sala nanggad si Satanas! Dawa arog kaiyan, huling siya “an saro na igwa kan kakayahan na magkawsa nin kagadanan,” hinihinguwa ni Satanas na aprobetsaran an normal na pagkatakot ta sa kagadanan para bayaan ta si Jehova. (Heb. 2:14, 15) Sa nagkapirang kamugtakan, an mga tawo na impluwensiyado ni Satanas pinapatakot an mga parasamba ni Jehova na gagadanon sinda kun dai ninda tatalikdan an saindang pagtubod. Sa ibang kamugtakan, tibaad aprobetsaran ni Satanas an sarong medikal na emerhensiya na nagsasapeligro nin buhay para makipagkompromiso kita. Tibaad gipiton kita kan mga doktor o kan mga kapamilya niyato na bakong Saksi na magpasalin nin dugo, na magbabalga kan pagbuot nin Diyos. O tibaad may magkumbinsir sa sato na purbaran an sarong klase nin pagbulong na bakong kauyon kan mga prinsipyo sa Kasuratan.

17. Kauyon kan sinasabi sa Roma 8:37-39, taano ta dai kaipuhan na matakot sa kagadanan?

¹⁷ Dawa ngani habo tang magadan, aram ta na dai matatapos an pagkamuot ni Jehova sa sato dawa pa magadan kita. (Basahon an Roma 8:37-39.) Pag an mga amigo ni Jehova magadan, pinapagdanay niya sinda sa saiyang memorya, na garo man sana sinda buhay. (Luc. 20:37, 38) Hinihidaw niyang buhayon niya sinda giraray. (Job 14:15) Nagbayad si Jehova nin dakulang halaga tanganing kita “magkaigwa nin buhay na daing katapusan.” (Juan 3:16) Aram ta na namumutan nanggad kita ni Jehova asin na nagmamakulog siya sa sato. Kaya imbes na bayaan ta si Jehova pag may hilang kita o namemeligrong magadan, minarani kita sa saiya para sa karangahan, kadunungan, asin kusog. Iyan mismo an ginibo ni Valerie asin kan saiyang agom.—Sal. 41:3.

18. Ano an manunudan mo sa halimbawa ni Valerie?

¹⁸ Kan 35 anyos si Valerie, na-diagnose siya na igwa siya nin bihira asin agresibong klase nin kanser. Aramon ta kun paano nakatabang sa saiya an pagkamuot para mapangganahan an saiyang pagkatakot sa kagadanan. Sinabi niya: “Kan maaraman ko na may kanser ako, biglang binago kaiyan an buhay mi. Kaipuhan kong mag-agi nin mayor na operasyon para mabuhay. Dakul na doktor an kinonsulta ko, pero gabos sinda nagsayuma na operaran ako na dai naggagamit nin dugo. Natakot ako, pero huli sa pagbuot nin Diyos, dai nanggad ako mapasalin nin dugo! Sa bilog na buhay ko, pinahilingan ako ni Jehova nin dakulang pagkamuot. Ngunyan, igwa ako nin  oportunidad na ipahiling sa saiya an sakong pagkamuot. Kada may makaabot sako na bakong magayon na bareta, mas lalo man akong nagigin determinado na paugmahon si Jehova asin dai tugutan na manggana si Satanas. Kan huri, mapanggana akong naoperaran na dai naggagamit nin dugo. Dawa ngani may mga problema pa man giraray ako sa salud, pirming itinatao ni Jehova kun ano an kaipuhan mi. Halimbawa, bago ako ma-diagnose na may kanser, sa samong pagtiripon sa kongregasyon sa weekend, tinukar an artikulo na ‘Pag-atubang sa mga Kadepisilan Ngonyan na May Kusog nin Boot.’ * Narangang marhay kami kan artikulong iyan. Pauruutro ming binasa iyan. An mga arog kaiyan na artikulo saka an pagkaigwa nin marahay na espirituwal na rutina nagtao sa sako saka sa sakong agom nin panglaog na katuninungan asin nakatabang sa samo na magdanay na timbang asin makagibo nin marahay na mga desisyon.”

19. Ano an mangyayari sa dai na mahahaloy?

¹⁹ Paagi sa tabang ni Jehova, an mga Kristiyano sa bilog na daga nagigin mapanggana sa pag-atubang sa masakit na mga sitwasyon asin nagigin mapanggana sa paglaban sa Diyablo. (1 Ped. 5:8, 9) Magigibo mo man iyan. Dai na mahahaloy, pagbubutan ni Jehova si Jesus asin an kairiba niyang tagapamahala na “rauton an mga gibo kan Diyablo.” (1 Juan 3:8) Pagkatapos kaiyan, an banwaan nin Diyos na naglilingkod sa saiya digdi sa daga ‘mayong kakatakutan asin mayong dahilan na matakot nin grabe.’ (Isa. 54:14; Mik. 4:4) Pero, mantang dai pa iyan nangyayari, kaipuhan kitang magmaigot na mapangganahan an satong mga pagkatakot.

20. Ano an makakatabang sa sato na mapangganahan an satong mga pagkatakot?

²⁰ Dapat na padagos tang pakusugon an satong pagtitiwala na namumutan asin pinoproteksiyunan ni Jehova an saiyang mga lingkod. Matatabangan kitang magibo ini paagi sa paghurop-hurop asin pakikipag-ulay manungod sa kun paano prinotektaran ni Jehova an saiyang mga lingkod kaidto. Asin puwede tang girumdumon kun paano niya kita tinabangan mismo na maatubang an masakit na mga sitwasyon. Paagi sa tabang ni Jehova, makakaya ta nanggad na mapangganahan an satong mga pagkatakot!—Sal. 34:4.