1. Sigun sa Mateo 24:9, taano ta dai kita dapat magngalas kun ikinakaungis kita kan kinaban?

SI Jehova linalang kita na may kakayahan na magpahiling nin pagkamuot asin may pagmawot na mamutan man. Kaya pag may nauungis sato, nakukulgan kita saka tibaad natatakot pa ngani. Halimbawa, an sister na si Georgina, na nakaistar sa Europa, nagsabi: “Kan 14 anyos ako, angguton sako si Nanay dahil sa paglilingkod ko ki Jehova. Kaya pagmati ko habo niya na sako saka inisip ko kun baga marahay na tawo pa daw ako.” * An brother na si Danylo nagsurat: “Kan kulugan ako, insultuhon, saka takuton kan mga suldados dahil sa pagigin Saksi ko, natakot talaga ako saka grabe an pagkasupog ko.” Bakong marahay sa pagmati na ikaungis, pero bako ining makangangalas dahil ihinula ni Jesus na ikakaungis kita.—Basahon an Mateo 24:9.

2-3. Taano ta ikinakaungis an mga parasunod ni Jesus?

² Nauungis an kinaban sa mga parasunod ni Jesus. Taano? Huling arog ni Jesus, ‘bako sindang kabtang kan kinaban.’ (Juan 15:17-19) Kaya dawa ngani iginagalang ta an mga gobyerno nin tawo, dai ta sinda sinasamba o an mga simbolo na nagrerepresentar sainda. Si Jehova sana an sinasamba ta. Sinusuportaran ta an deretso nin Diyos na pamahalaan an katawuhan—an deretso na pigkukuwestiyon nanggad ni Satanas asin kan saiyang “gikan.” (Gen. 3:1-5, 15) Ihinuhulit ta na an Kahadian nin Diyos sana an paglaom kan katawuhan asin na madali nang laglagon kan Kahadian na iyan an gabos na nagkokontra diyan. (Dan. 2:44; Kap. 19:19-21) An mensaheng iyan maugmang bareta sa mahuhuyo pero maraot na bareta sa mga maraot.—Sal. 37:10, 11.

 ³ Ikinakaungis man kita huling namumuhay kita uyon sa matanos na mga pamantayan nin Diyos. An pamantayan na iyan kabaliktaran nanggad kan hababaon na mga pamantayan sa moral kan kinaban. Halimbawa, hayagan na ngunyan na inaako kan dakul na tawo an makababalding imoral na mga gibo na kaagid kan mga gibong nagin dahilan kaya linaglag nin Diyos an Sodoma saka Gomora! (Jud. 7) Dahil sinusunod ta an mga pamantayan kan Bibliya manungod sa mga gibong iyan, tinutuya kita kan dakul saka inaapod kitang mga panatiko.—1 Ped. 4:3, 4.

4. Anong mga kuwalidad an makakatabang sato pag ikinakaungis kita?

⁴ Ano an makakatabang sato na makatagal pag ikinakaungis saka iniinsulto kita? Kaipuhan ta nin makusog na pagtubod na tatabangan kita ni Jehova. Arog sa kalasag, “masisigbo [kan pagtubod ta] an gabos na nagkakalayong mga pana kan saro na maraot.” (Efe. 6:16) Pero bako lang pagtubod an kaipuhan ta. Kaipuhan ta man nin pagkamuot. Taano? Huling an pagkamuot “bakong arangguton.” Kinakaya asin tinatagalan kaiyan an gabos na bagay na nakakakulog. (1 Cor. 13:4-7, 13) Hilingon ta kun paano nakakatabang sato an pagkamuot ki Jehova, an pagkamuot sa mga tugang, asin dawa an pagkamuot sa mga kaiwal na matagalan an pagkaungis.

5. Paano nakapakusog ki Jesus an pagkamuot niya sa saiyang Ama?

⁵ Kan banggi bago gadanon si Jesus kan mga kaiwal niya, sinabi niya sa saiyang maimbod na mga parasunod: “Namumutan ko an Ama, [kaya] ginigibo ko kun ano an ipinagbuot kan Ama na gibuhon ko.” (Juan 14:31) An pagkamuot ni Jesus ki Jehova nakapakusog saiya na maatubang an maabot na mga pagbalo. Magigibo man iyan sato kan pagkamuot ta ki Jehova.

6. Sigun sa Roma 5:3-5, ano an namamatian kan mga lingkod ni Jehova manungod sa pagtagal sa pagkaungis kan kinaban?

⁶ An pagkamuot sa Diyos pirming nakakatabang sa mga lingkod ni Jehova na matagalan an mga pagbalo. Halimbawa, kan ipagbuot kan makapangyarihan na Judiong korte suprema sa mga apostol na magpundo sa paghuhulit, nakatabang sainda an pagkamuot sa Diyos na “sunudon an Diyos bilang tagapamahala imbes na an mga tawo.” (Gibo 5:29; 1 Juan 5:3) An arog kaiyan na pagkamuot nakakapakusog man sa mga tugang ta ngunyan. An dakul sainda nagdadanay na maimbod dawa pinepersegir kan maringis asin makapangyarihan na mga gobyerno. Imbes na pangluyahan nin buot, ibinibilang tang pribilehiyo na tagalan an pagkaungis kan kinaban.—Gibo 5:41; basahon an Roma 5:3-5.

7. Ano an dapat na magin reaksiyon ta pag kinokontra kita kan satong mga kapamilya?

⁷ An pagkontra kan mga kapamilya an saro sa puwedeng magin pinakamasakit na pagbalo sato. Kun nagkakainteres na kita sa katotoohan, tibaad isipon kan pirang kapamilya ta na naloko kita. O tibaad isipon kan iba na nararaot na an isip ta. (Ikumparar an Marcos 3:21.) Tibaad kulgan pa ngani ninda kita o taraman nin maraot. Dai kita dapat magngalas sa negatibong reaksiyon ninda. Sinabi ni Jesus: “An magigin mga kaiwal nin sarong tawo iyo an mga kairiba niya sa harong.” (Mat. 10:36) Siyempre, ano man an paghiling sato kan mga kapamilya ta, dai ta sinda ibibilang na kaiwal. Sa kabaliktaran, mantang nagkukusog an pagkamuot ta ki Jehova, nagkukusog man an pagkamuot ta sa mga tawo. (Mat. 22:37-39) Pero nungka tang ikokompromiso an satong mga pamantayan paagi sa pagbaliwala sa mga pagbuot asin prinsipyo sa Bibliya tangani sanang mapauyunan an mga tawo.

8-9. Ano an nakatabang sa sarong sister na matagalan an grabeng pagkontra?

⁸ Natagalan ni Georgina, na sinambit kasubago, an grabeng pagkontra kan saiyang ina. Sinabi  ni Georgina: “Nagpuon kami ni Nanay na makipag-adal nin Bibliya sa mga Saksi. Pero pakalihis nin anom na bulan kan gusto ko nang mag-atender sa mga pagtiripon, biglang nagbago si Nanay. Nadiskubre ko na nakikipag-ulay palan siya sa mga apostata, tapos ginagamit niya an mga pangangatanusan ninda pag nakikipag-ulay siya sako. Iniinsulto niya man ako, ginugunitan, tinitilok, saka inaapon an mga literatura ko. Kan 15 anyos na ako, nagpabawtismo ako. Pinurbaran ni Nanay na papunduhon ako sa paglilingkod ki Jehova paagi sa pagpaistar sako sa sarong harong na diyan pigtatabangan an rebeldeng mga tin-edyer, na an pira nagdodroga o naggigibo nin krimen. Mas lalong dipisil atubangon an pagkontra pag hali iyan sa saro na dapat kuta namumutan ka saka nagmamalasakit saimo.”

⁹ Paano iyan nakayanan ni Georgina? Sinabi niya: “Kan aldaw na punan akong persegiron ni Nanay, katatapos ko pa lang na basahon an bilog na Bibliya. Kumbinsido na talaga ako na nahanap ko na an katotoohan asin namatian ko na dayuputon ako ki Jehova. Parati akong namimibi saiya, saka dinadangog niya ako. Kan nakaistar ako sa harong na idto, inimbitaran ako nin sarong sister sa harong niya, asin pinag-adalan mi an Bibliya. Kasabay kaiyan, pinakusog ako kan mga tugang sa Kingdom Hall. Ginibo ninda akong parte kan pamilya ninda. Naeksperyensiyahan ko mismo na mas makusog si Jehova kisa sa mga nagkokontra sato, maski siisay man sinda.”

10. Sa ano kita makakapagtiwala ki Jehova na satuyang Diyos?

¹⁰ Isinurat ni apostol Pablo na mayo nin ano man na “makakayang isuway kita sa pagkamuot nin Diyos na yaon ki Cristo Jesus na satuyang Kagurangnan.” (Roma 8:38, 39) Dawa ngani tibaad may panahon na mag-agi kita nin kasakitan, pirmi tang masasakaibanan si Jehova para rangahon asin pakusugon kita. Asin arog kan ipinapahiling kan eksperyensiya ni Georgina, tatabangan man kita ni Jehova paagi sa satong namumutan na espirituwal na pamilya.

11. Paano nakatabang sa mga disipulo ni Jesus an pagkamuot na sinambit niya sa Juan 15:12, 13? Magtao nin halimbawa.

¹¹ Kan banggi bago siya magadan, ipinagirumdom ni Jesus sa mga disipulo niya na kamutan an lambang saro. (Basahon an Juan 15:12, 13.) Aram niya na makakatabang sainda an mapagsakripisyong pagkamuot para magdanay sindang nagkakasararo asin matagalan an pagkaungis kan kinaban. Pag-isipan an kongregasyon sa Tesalonica. Puon kan maestablisar iyan, pinepersegir na an mga miyembro kaiyan. Pero  nagin halimbawa an mga tugang diyan sa pagpahiling nin integridad asin pagkamuot. (1 Tes. 1:3, 6, 7) Asin dinagka sinda ni Pablo na padagos na magpahiling nin pagkamuot, “nin mas urog pa” ngani. (1 Tes. 4:9, 10) Papahiruon sinda nin pagkamuot na rangahon an mga nagmumundo nin grabe asin tabangan an mga maluya. (1 Tes. 5:14) Sinunod ninda an instruksiyon ni Pablo, huling sa ikaduwa niyang surat, na ginibo pakalihis nin mga sarong taon, sinabi ni Pablo sainda: “An pagkamuot kan gabos sa saindo para sa lambang saro lalong nagrararom.” (2 Tes. 1:3-5) Nakatabang sainda an pagkamuot na iyan na matagalan an kadipisilan asin persekusyon.

12. Sa panahon nin giyera, paano nagpahiling nin pagkamuot sa lambang saro an mga tugang sa sarong nasyon?

¹² Pag-isipan an eksperyensiya ni Danylo, na sinambit kasubago, asin kan saiyang agom. Kan magkaigwa nin giyera sa bilog na banwa ninda, padagos sindang nag-atender sa mga pagtiripon, naghulit sagkod sa pinakamakakaya ninda, asin naghiras sa mga tugang kan ano man na kakanon na igwa sinda. Dangan sarong aldaw, dinulok si Danylo nin armadong mga suldados. “Ipinagbuot ninda sako na talikdan ko an pagtubod ko,” an sabi ni Danylo. “Kan magsayuma ako, binugbog ninda ako saka pigtutukan ako nin badil tapos pinaputukan ako sa itaas kan payo ko. Bago sinda maghali, tinakot ninda ako na mabalik sinda para lupigan si agom. Pero dali-dali kaming pinasakay kan mga tugang sa tren pasiring sa ibang banwa. Nungka kong malilingawan an pagkamuot kan mga tugang na idto. Tapos kan makaabot na kami sa bagong banwa, tinawan kami kan mga tugang duman nin kakanon saka tinabangan kaming makahanap nin trabaho asin nin harong! Kaya nakakatabang na man kami sa mga Saksing refugee na nagdudulag sa giyera.” Ipinapahiling kan arog kaiyan na mga eksperyensiya na makakatabang sato an Kristiyanong pagkamuot na matagalan an pagkaungis.

13. Paano kita tinatabangan kan banal na espiritu na padagos na maglingkod ki Jehova dawa pag ikinakaungis kita kan mga tawo?

¹³ Sinabi ni Jesus sa mga parasunod niya na kamutan an mga kaiwal. (Mat. 5:44, 45) Madali daw iyan? Bako nanggad! Pero posible iyan sa tabang kan banal na espiritu nin Diyos. Kaiba man sa bunga kan espiritu nin Diyos an pagkamuot pati man an pakatios, kabuutan, pagigin kalmado, asin pagpupugol sa sadiri. (Gal. 5:22, 23) Makakatabang sato an mga kuwalidad na ini na matagalan ta an pagkaungis. Dakul na parakontra an nagbago an sabuot kan mahiling ninda an diyosnon na mga kuwalidad na iyan kan Saksi  nindang agom na lalaki, agom na babayi, aki, o kataid. Dakul na nagkokontra an nagin pa nganing mga tugang niyato. Kaya kun may mga nauungis saimo dahil sana sa paglilingkod mo ki Jehova asin nasasakitan kang kamutan sinda, mamibi para sa banal na espiritu. (Luc. 11:13) Asin magin lubos na kumbinsido na an dalan nin Diyos an pirming pinakamarahay.—Tal. 3:5-7.

14-15. Paano nakatabang ki Yasmeen an Roma 12:17-21 na magpahiling nin pagkamuot sa saiyang agom sa ibong kan grabeng pagkontra kaini?

¹⁴ Pag-isipan an halimbawa ni Yasmeen, na nakaistar sa Middle East. Kan magi siyang Saksi ni Jehova, inisip kan agom niya na naloko siya, kaya pinurbaran kaini na papunduhon siya sa paglilingkod sa Diyos. Ininsulto siya kaini asin tinugal pa ngani an mga paryente saka an sarong padi saka parakulam na takuton siya asin akusaran na pigraraot niya an pamilya niya. Pigparainsulto pa ngani kan agom niya an mga tugang sa sarong pagtiripon sa kongregasyon! Parating naghihibi si Yasmeen huli sa maraot na pagtrato kaini saiya.

¹⁵ Sa Kingdom Hall, rinanga saka pinakusog si Yasmeen kan saiyang espirituwal na pamilya. Dinagka siya kan mga elder na isabuhay an mga tataramon na nasa Roma 12:17-21. (Basahon.) “Masakiton idto,” an sabi ni Yasmeen. “Pero naghagad ako nin tabang ki Jehova, saka ginibo ko an pinakamakakaya ko na iaplikar an sinasabi kan Bibliya. Kaya pag tuyong inaatian ni agom an kusina, linilinigan ko iyan. Pag iniinsulto niya ako, mabuot akong nagsisimbag. Asin pag may hilang siya, inaasikaso ko siya.”

16-17. Ano an nanudan mo sa halimbawa ni Yasmeen?

¹⁶ Binalusan si Yasmeen huli sa pagpahiling niya nin pagkamuot sa saiyang agom. Sinabi niya: “Mas nagtitiwala na sako ngunyan si agom dahil aram niya na pirmi akong masabi nin totoo. Magalang niya na akong dinadangog pag nag-uulay kami manungod sa relihiyon, saka matuninong na man an pakikiiba niya sako sa harong. Sinasabihan niya na ako ngunyan na mag-enjoy sa mga pagtiripon sa kongregasyon. Mas marahay na talaga an relasyon mi bilang pamilya, saka matuninong na sa harong. Hinahalat-halat ko nang buksan na ni agom an puso niya sa katotoohan para magkaiba na kaming maglingkod ki Jehova.”

¹⁷ Ipinapahiling kan halimbawa ni Yasmeen na “kinakaya [kan pagkamuot] an gabos na bagay, . . . linalauman an gabos na bagay, tinatagalan an gabos na bagay.” (1 Cor. 13:4, 7) An pagkaungis puwedeng magin makusog asin makulog, pero mas makusog nanggad an pagkamuot. Kaya kaiyan na baguhon an puso nin saro. Asin napapaugma kaiyan an puso ni Jehova. Pero dawa kun padagos kitang ikinakaungis kan mga nagkokontra,  puwede pa man giraray kitang magin maugma. Taano?

18. Taano ta puwede kitang magin maugma pag ikinakaungis kita?

¹⁸ Sinabi ni Jesus: “Maugma kamo pag nauungis sa saindo an mga tawo.” (Luc. 6:22) Habo ta man na ikaungis kita. Dai man kita nagpapakamartir. Kaya taano ta puwede kitang magin maugma pag ikinakaungis kita? Pag-isipan an tulong dahilan. Inot, pag nagtatagal kita, yaon sato an pag-uyon nin Diyos. (1 Ped. 4:13, 14) Ikaduwa, mas nadadalisay asin nagkukusog an pagtubod ta. (1 Ped. 1:7) Asin ikatulo, aakuon ta an sarong balos na daing kaagid an halaga—buhay na daing katapusan.—Roma 2:6, 7.

19. Taano ta maugma an mga apostol pagkatapos hampakon?

¹⁹ Dai nahaloy pagkatapos buhayon liwat si Jesus, naeksperyensiyahan kan mga apostol an kaugmahan na sinambit niya. Pagkatapos na hampakon asin pagbutan na magpundo sa paghuhulit, nag-ugma sinda. Taano? “Dahil para sa sainda sarong pribilehiyo an mag-agi nin kasusupgan alang-alang sa ngaran ni Jesus.” (Gibo 5:40-42) Mas makusog an pagkamuot ninda sa saindang Kagurangnan kisa sa pagkatakot na ikaungis sinda kan mga kaiwal ninda. Ipinahiling ninda an saindang pagkamuot paagi sa pagbalangibog kan maugmang bareta nin “daing pundo.” Dakul sa mga tugang ta ngunyan an padagos na maimbod na naglilingkod sa ibong nin mga kadipisilan. Aram ninda na dai lilingawan ni Jehova an saindang mga gibo asin an pagkamuot ninda para sa saiyang pangaran.—Heb. 6:10.

20. Ano an pag-uulayan ta sa sunod na artikulo?

²⁰ Ikakaungis kita kan kinaban sagkod na yaon pa an sistemang ini. (Juan 15:19) Pero dai ta kaipuhan na matakot. Arog kan mahihiling ta sa sunod na artikulo, “papakusugon . . . asin poprotektaran” ni Jehova an mga maimbod saiya. (2 Tes. 3:3) Kaya lugod na padagos tang kamutan si Jehova, an satong mga tugang, asin dawa an satong mga kaiwal. Kun susunudon ta an sadol na ini, magdadanay kitang nagkakasararo asin makusog sa espirituwal, matatawan ta nin onra si Jehova, asin mapapatunayan ta na an pagkamuot mas makusog nanggad kisa sa pagkaungis.