1. Anong mga pagbalo an inaagihan kan mga lingkod ni Jehova?

MAY inaagihan ka daw na masakit na pagbalo? Tibaad nakulgan ka kan kakongregasyon mo. (Sant. 3:2) O tinutuya ka kan mga katrabaho o kaklase mo dahil lingkod ka ni Jehova. (1 Ped. 4:3, 4) O tibaad inuulang ka kan mga kapamilya mo na mag-atender sa mga pagtiripon o na makipag-ulay sa iba manungod sa pagtubod mo. (Mat. 10:35, 36) Kun makulugon an sarong pagbalo, tibaad maisip mo pa ngani na sumuko na lang. Pero makakapagtiwala ka na ano man na pagbalo an inaagihan mo, tatawan ka ni Jehova kan kadunungan na maatubang iyan asin kan kusog na matagalan iyan.

2. Sigun sa Roma 15:4, ano an puwedeng magin epekto sato kan pagbasa ta kan Tataramon nin Diyos?

² Sa saiyang Tataramon, detalyadong ipinahiling ni Jehova kun paano inatubang nin bakong perpektong mga tawo an masakit na mga pagbalo. Taano? Para makanuod kita sainda. Iyan an dahilan kaya pinahiro ni Jehova si apostol Pablo na magsurat. (Basahon an Roma 15:4.) Kun babasahon ta an mga istoryang ini, makakatao iyan sato nin karangahan asin paglaom. Pero bako lang basta pagbasa nin Bibliya an kaipuhan tang gibuhon. Dapat ta man na tugutan an Kasuratan na moldehon an satong kaisipan asin na mataros an satong puso. Ano an puwede tang gibuhon kun kaipuhan ta nin paggiya manungod sa inaagihan tang kadipisilan? Puwede tang gamiton an pamamaaging ini na may apat na lakdang: (1) Mamibi, (2) Mag-imahinar, (3) Maghurop-hurop, asin (4) Iaplikar. Pag-ulayan ta kun paano ta gigibuhon an kada saro kaiyan. * Tapos gagamiton ta an pamamaaging iyan para maaraman kun ano an manunudan ta sa mga pangyayari sa buhay ni Hading David asin ni apostol Pablo.

3. Ano an dapat mong gibuhon bago magpuon na magbasa nin Bibliya, asin taano?

 ³ (1) Mamibi. Bago magpuon na magbasa nin Bibliya, hagadon ki Jehova na tabangan kang mahiling kun paano ka makikinabang sa binabasa mo. Halimbawa, kun naghahanap ka nin paggiya sa kun paano aatubangon an sarong problema, hagadon ki Jehova na tabangan kang mahanap an mga prinsipyo na nasa Tataramon niya na makakagiya sa saimo.—Fil. 4:6, 7; Sant. 1:5.

4. Ano an makakatabang saimo na magin buhay na buhay an binabasa mong istorya sa Bibliya?

⁴ (2) Mag-imahinar. Tinawan kita ni Jehova kan pambihirang kakayahan na mag-imahinar. Para magin buhay na buhay saimo an sarong istorya sa Bibliya, imahinaron an eksena dangan isipon na ika an panginot na karakter sa binabasa mo. Purbaran na hilingon an mga nahiling niya, asin mation an emosyon na posibleng namatian niya.

5. Ano an paghurop-hurop, asin paano mo gigibuhon iyan?

⁵ (3) Maghurop-hurop. An paghurop-hurop iyo an pag-isip-isip na marhay sa binabasa mo asin sa kun paano iyan aplikado saimo. Makakatabang iyan saimo na makoronektar an mga ideya asin mas masabutan an sarong tema. An pagbasa sa Bibliya na mayong paghurop-hurop garo man sana paghiling sa mga pidaso nin puzzle na dai hinihinguwang bilugon iyan. Pag naghuhurop-hurop ka, garo mo man sana pigsusurugpon an mga pidasong iyan para mahiling mo an bilog na ritrato. Tanganing makatabang sa paghurop-hurop mo, puwede mong ihapot asin simbagon an mga hapot na ini: ‘Ano an ginibo kan panginot na karakter para tabangan an sadiri niya? Paano siya tinabangan ni Jehova? Paano ko gagamiton an mga nanudan ko para matagalan an mga pagbalo?’

6. Taano ta dapat tang iaplikar an mga nanunudan ta?

⁶ (4) Iaplikar. Sinabi ni Jesus na kun dai ta iaaplikar an mga nanunudan ta, garo kita sarong tawo na nagtutugdok nin harong sa baybay. Maigot siyang nagtatrabaho pero sayang sana an paghihinguwa niya. Taano? Dahil pag nagbagyo asin nagbaha, marurumpag an harong niya. (Mat. 7:24-27) Sa kaagid na paagi, kun namimibi kita, nag-iimahinar, asin naghuhurop-hurop pero dai ta man inaaplikar an mga nanunudan ta, masasayang sana an mga paghihinguwa ta. Pag magkaigwa nin mga pagbalo o persekusyon, dai iyan makakaya kan satong pagtubod. Pero pag nag-aadal kita asin inaaplikar an mga nanunudan ta, makakagibo kita nin mas marahay na mga desisyon, mas magkakaigwa kita nin katuninungan, asin magkakaigwa kita nin mas makusog na pagtubod. (Isa. 48:17, 18) Hilingon ta kun ano an manunudan ta sa sarong pangyayari sa buhay ni Hading David gamit an apat na lakdang na pinag-ulayan ta pa sana.

7. Anong istorya sa Bibliya an pag-uulayan ta ngunyan?

⁷ Kinulgan ka daw o trinaydor kan amigo o kapamilya mo? Kun iyo, makikinabang ka kun pag-aadalan mo an istorya kan aki ni Hading David na si Absalom, na trinaydor an saiyang ama asin pinurbaran na agawon an trono kaini.—2 Sam. 15:5-14, 31; 18:6-14.

8. Ano an puwede mong gibuhon para makua an tabang ni Jehova?

⁸ (1) Mamibi. Mantang isinasaisip an istorya, sabihon ki Jehova an namamatian mo manungod sa maraot na nagin pagtrato saimo. (Sal. 6:6-9) Magin espesipiko. Dangan hagadon ki Jehova na tabangan kang mahiling an mga prinsipyo na makakatabang saimo na maaraman kun ano an gigibuhon mo.

9. Isaysay an istorya ni David saka ni Absalom.

⁹ (2) Mag-imahinar. Pag-isipan an mga pangyayari, asin imahinaron kun paano iyan nakaapektar ki Hading David. Dakul na taon na  hininguwa kan aki ni David na si Absalom na kuanon an buot kan mga tawo. (2 Sam. 15:7) Kan sa hiling ni Absalom tamang panahon na, nagsugo siya nin mga espiya sa bilog na Israel para andamon an mga tawo na akuon siya bilang tagapamahala ninda. Nakumbinsir niya pa nganing umiba sa rebelyon si Ahitofel, na saro sa pinakadayupot na amigo asin parakonseho ni David. Idineklarar ni Absalom na siya na an hadi, tapos pinurbaran niyang dakupon asin gadanon si David, na posibleng grabe an hilang kaidto. (Sal. 41:1-9) Naaraman ni David an pakanang iyan kaya naghali siya sa Jerusalem para dumulag. Pag-abot nin panahon, naglabanan an hukbo ni Absalom saka an hukbong kampi ki David. Nadaog an hukbo kan mga rebelde, asin nagadan an aki ni David na si Absalom.

10. Ano kuta an puwedeng ginibo ni Hading David?

¹⁰ Dangan, imahinara an siguradong namatian ni David mantang nangyayari iyan gabos. Padaba niya si Absalom saka pinagtitiwalaan niya si Ahitofel, pero trinaydor ninda siya. Nakulgan nindang marhay si David saka pinurbaran pa nganing gadanon. Puwede kutang nawaran na nin tiwala si David sa iba niya pang amigo, na iniisip na kuminampi naman sinda ki Absalom. Puwede kutang sadiri na sana niya an inisip niya asin nagdulag nin solo. O puwede kutang nagsuko na lang siya sa sitwasyon niya dahil sa grabeng pangluluya nin buot. Pero dai ginibo ni David an arin man diyan. Imbes, nakayanan niya an masakit na pagbalong iyan. Paano niya iyan nagibo?

11. Ano an ginibo ni David sa inagihan niyang masakit na sitwasyon?

¹¹ (3) Maghurop-hurop. Anong mga prinsipyo an manunudan mo sa pangyayaring iyan? Simbagon an hapot na, “Ano an ginibo ni David para tabangan an sadiri niya?” Dai nataranta si David asin dai siya naggibo nin pabigla-bigla saka bakong madunong na mga desisyon. Dai man siya nagpaliman-liman sa paggibo nin desisyon na garo baga mayo na siyang magibo huli sa grabeng takot. Imbes, naghagad siya nin tabang ki Jehova paagi sa pamibi. Nagpatabang man siya sa mga amigo niya. Saka naghiro tulos siya para isagibo an mga desisyon niya. Dawa ngani nakulgan na marhay si David, dai siya nagin negatibo o napano nin kaanggutan. Padagos siyang nagtiwala ki Jehova asin sa saiyang mga amigo.

12. Ano an ginibo ni Jehova para tabangan si David?

¹² Ano an ginibo ni Jehova para tabangan si David? Paagi sa pag-research, maaaraman mo na tinawan ni Jehova si David kan kusog na kaipuhan niya para matagalan an pagbalong iyan. (Sal. 3:1-8, An Banal na Biblia) Binendisyunan ni Jehova an mga desisyon ni David. Saka prinotektaran niya man an maimbod na mga amigo ni David mantang nakikipaglaban an mga ini para protektaran an saindang hadi.

13. Paano mo maaarog si David kun may nakakulog na marhay saimo? (Mateo 18:15-17)

¹³ (4) Iaplikar. Haputon an sadiri, ‘Paano ko maaarog si David?’ Kaipuhan mong humiro tulos para resolberan an problema. Depende sa mga kamugtakan, puwede mong iaplikar an sadol ni Jesus na nasa Mateo kapitulo 18 nin direkta o sigun sa mga prinsipyo diyan. (Basahon an Mateo 18:15-17.) Pero dai gumibo nin pabigla-biglang mga desisyon dara nin makusog na emosyon. Dapat kang mamibi ki Jehova na tawan ka nin kalmadong puso asin kan kadunungan na kaipuhan mo para maatubang iyan. Dai mawaran nin tiwala sa mga amigo mo. Imbes, akuon an inaalok nindang tabang. (Tal. 17:17) An pinakamahalaga, sunudon an mga sadol saimo ni Jehova na nasa Tataramon niya.—Tal. 3:5, 6.

14. Sa anong mga sitwasyon makakapakusog saimo an 2 Timoteo 1:12-16; 4:6-11, 17-22?

¹⁴ Kinokontra ka daw kan mga kapamilya mo? O nakaistar ka daw sa nasyon na may grabeng  restriksiyon sa satong gibuhon o ipinagbabawal pa ngani iyan? Kun iyo, mapapakusog ka kun babasahon mo an 2 Timoteo 1:12-16 asin 4:6-11, 17-22. * Isinurat iyan ni Pablo mantang nakapreso siya.

15. Ano an puwede mong hagadon ki Jehova?

¹⁵ (1) Mamibi. Bago basahon an mga tekstong iyan, iistorya ki Jehova an problema mo asin an epekto kaiyan saimo. Magin espesipiko. Tapos hagadon ki Jehova na tabangan kang maaraman an mga prinsipyong nasa mga istorya manungod sa mga pagbalong inagihan ni Pablo na makakatabang saimo na maatubang an problemang inaagihan mo.

16. Iistorya an sitwasyon ni Pablo.

¹⁶ (2) Mag-imahinar. Imahinaron na ika an nasa sitwasyon ni Pablo. Nakakadenahan siya mantang nakapreso sa Roma. Napreso na man siya kaidto, pero sa pagkakataon na ini, aram niyang gagadanon na siya. An nagkapira sa mga kaibanan niya binarayaan na siya, tapos haros mayo na siyang kusog.—2 Tim. 1:15.

17. Ano kuta an puwedeng ginibo ni Pablo?

¹⁷ Puwede kutang inisip ni Pablo na kun iba an nagin mga desisyon niya kaidto, dai siya maaarestar. Puwede kutang naanggot siya sa mga kairiba niya sa distrito nin Asia na nagbaraya saiya, asin dai na man magtiwala sa iba niya pang mga amigo. Pero dai ginibo ni Pablo an arin man diyan. Paano niya napagdanay an pagtitiwala sa mga amigo niya asin an pagtitiwala na babalusan siya ni Jehova?

18. Ano an ginibo ni Pablo sa napaatubang saiyang pagbalo?

¹⁸ (3) Maghurop-hurop. Simbagon an hapot na, “Paano tinabangan ni Pablo an sadiri niya?” Dawa ngani aram niyang madali na siyang gadanon, dai nawara an pokus ni Pablo sa mahalagang marhay na bagay—an pagtao nin kamurawayan ki Jehova. Asin padagos niyang inisip kun paano niya mapapakusog an iba. Nanarig siya ki Jehova paagi sa regular na pagpamibi. (2 Tim. 1:3) Imbes na magparapokus sa mga nambaya saiya, nagpahiling siya nin dakulang pasasalamat sa mga amigo niya sa mamumuton na pagsuporta ninda sa praktikal na paagi. Apuwera kaiyan, padagos na pinag-adalan ni Pablo an Tataramon nin Diyos. (2 Tim. 3:16, 17; 4:13) An pinakamahalaga, lubos an pagtitiwala niya na namumutan siya ni Jehova asin ni Jesus. Dai ninda siya binayaan, asin babalusan ninda siya sa maimbod niyang paglilingkod.

19. Paano tinabangan ni Jehova si Pablo?

¹⁹ Pinatanidan ni Jehova si Pablo na mapapaatubang siya sa persekusyon dahil sa pagigin Kristiyano. (Gibo 21:11-13) Paano tinabangan ni Jehova si Pablo? Sinimbag niya an mga pamibi ni Pablo asin tinawan siya nin kusog sa paglihis nin panahon. (2 Tim. 4:17) Inasigurar ni Jehova ki Pablo na aakuon niya an balos na pinagmaigutan niyang marhay na makua. Pinahiro man ni Jehova an maimbod na mga amigo ni Pablo na tabangan siya sa praktikal na mga paagi.

20. Paano mo maaarog an pagtubod na ipinahiling ni Pablo sa Roma 8:38, 39?

²⁰ (4) Iaplikar. Haputon an sadiri, ‘Paano ko maaarog si Pablo?’ Arog ni Pablo, asahan ta na pepersegiron kita dahil sa pagtubod ta. (Mar. 10:29, 30) Tanganing mapagdanay ta an satong integridad pag may pagbalo, kaipuhan tang manarig ki Jehova sa pamibi asin pagdanayon an marahay na rutina sa pag-adal. Asin dapat na pirmi tang girumdumon na an saro sa pinakamahalagang magigibo ta iyo na magtao nin kamurawayan ki Jehova. Makakasigurado kita na nungka kitang papabayaan ni Jehova asin mayo nin ano man na magigibo an siisay man na makakapapundo saiya na kamutan kita.—Basahon an Roma 8:38, 39; Heb. 13:5, 6.

21. Ano an nakatabang ki Aya asin Hector na makayanan an mga kadipisilan?

²¹ Ano man an satong kamugtakan, makakakua kita nin kusog sa mga halimbawa sa Bibliya. Halimbawa, sinabi ni Aya na sarong payunir sa Japan na nakatabang saiya an istorya ni Jonas na madaog an takot sa pagpapatotoo sa publiko. Si Hector, na sarong hoben sa Indonesia na bakong lingkod ni Jehova an mga magurang, napahiro kan halimbawa ni Ruth na midbidon si Jehova asin paglingkudan siya.

22. Paano ka lubos na makikinabang sa mga drama sa Bibliya o sa seryeng “Arugon an Saindang Pagtubod”?

²² Sain ka makakahanap nin mga halimbawa sa Bibliya na makakapakusog saimo? An mga video asin audio drama saka an seryeng “Arugon an Saindang Pagtubod” makakatabang saimo na magin buhay na buhay an mga istorya sa Bibliya. * Bago hilingon, dangugon, o basahon an siniyasat na marhay na mga istoryang iyan, hagadon ki Jehova na tabangan kang mahiling an espesipikong mga punto na puwede mong iaplikar. Imahinaron na ika an panginot na karakter. Hurop-hurupon an ginibo kan maimbod na mga lingkod na ini ni Jehova asin kun paano niya sinda tinabangan na makayanan an mga kadipisilan. Dangan iaplikar iyan sa sitwasyon mo. Pasalamatan si Jehova sa tabang na itinatao niya ngunyan saimo. Asin ipahiling na pinapahalagahan mo iyan paagi sa paghanap nin mga oportunidad na pakusugon asin suportaran an iba.

23. Sigun sa Isaias 41:10, 13, ano an ipinapanuga sato ni Jehova?

²³ Masakit mamuhay sa kinaban na ini na kontrolado ni Satanas, asin haros ngani dai ta iyan makaya kun minsan. (2 Tim. 3:1) Pero dai ta kaipuhan na mahadit o matakot. Aram ni Jehova an inaagihan ta. Kun kaipuhan ta nin tabang, nanunuga siya na kakaputan niya kita kan saiyang makusog na tuong kamot. (Basahon an Isaias 41:10, 13, NWT.) Tatabangan niya nanggad kita, asin paagi sa kusog na makukua ta sa Kasuratan, makakayanan ta an ano man na kadipisilan.