ARTIKULONG PAG-AADALAN 10
Makakaya Mong ‘Hubaon an Lumang Personalidad’
“Hubaon nindo an lumang personalidad kasabay an mga gibo kaiyan.”—COL. 3:9.
KANTA 29 Pag-utob sa Kahulugan kan Samong Ngaran
SUMARYO KAN PAG-AADALAN *
1. Ano an buhay mo kaidto bago ka nag-adal nin Bibliya?
ANO an buhay mo kaidto bago ka nakipag-adal nin Bibliya sa mga Saksi ni Jehova? Dakul sa sato an habo nang girumdumon iyan. An satong kaisipan asin personalidad kaidto posibleng marhay na impluwensiyado kan mga pamantayan kan sistemang ini nin mga bagay—kan mga pamantayan kan kinaban sa kun ano an tama asin sala. Kun siring dati, ‘mayo kitang paglaom asin mayong Diyos.’ (Efe. 2:12) Pero puon kan mag-adal kita nin Bibliya, nabago nanggad an gabos!
2. Ano an naaraman mo kan mag-adal ka na nin Bibliya?
2 Kan mag-adal ka na nin Bibliya, naaraman mo na igwa ka nin Ama sa langit na namumutan kang marhay. Napag-isip-isip mo na para mapaugma si Jehova asin magin parte kan saiyang pamilya nin mga parasamba, kaipuhan mong gumibo nin darakulang pagbabago sa saimong buhay, pagmansay, asin kaisipan. Kaipuhan mong manudan na mamuhay kauyon kan saiyang halangkaw na mga pamantayan.—Efe. 5:3-5.
3. Sigun sa Colosas 3:9, 10, ano an gusto ni Jehova na gibuhon ta, asin ano an pag-uulayan niyato sa artikulong ini?
3 An satong Kaglalang asin Ama sa langit, si Jehova, igwa nin deretso na magbugtak nin mga pamantayan kun ano an dapat na magin paggawi kan mga miyembro kan saiyang pamilya. Asin hinahagad niya na bago kita magpabawtismo, dapat na hinguwahon tang “hubaon . . . an lumang personalidad kasabay an mga gibo kaiyan.” * (Basahon an Colosas 3:9, 10.) Matatabangan kan artikulong ini an mga gustong magpabawtismo na maaraman an simbag sa tulong hapot: (1) Ano an “lumang personalidad”? (2) Taano ta ipinagbuot sa sato ni Jehova na hubaon iyan? (3) Paano ta iyan magigibo? Para man sa mga bawtisado na, tatabangan kita kan pag-adal sa artikulong ini na malikayan na magluwas giraray an mga ugali kan satong lumang personalidad.
ANO AN “LUMANG PERSONALIDAD”?
4. Paano minagawi an sarong tawo na may “lumang personalidad”?
4 An sarong tawo na may “lumang personalidad” sa pangkagabsan nag-iisip asin minagawi sa makalaman na paagi. Tibaad makasadiri siya, madaling maanggot, dai tataong magpasalamat, asin orgulyoso. Tibaad gustuhon niyang magparahiling nin pornograpiya asin mga pelikulang imoral o madahas. Siguradong igwa man siya nin marahay na mga ugali, asin tibaad nakokonsiyensiya man siya sa maraot na mga nasasabi o nagigibo niya. Pero mayo siya nin determinasyon na baguhon an saiyang kaisipan asin paggawi.—Gal. 5:19-21; 2 Tim. 3:2-5.
Pag hinuba ta an “lumang personalidad,” dai na kita makokontrol kan makalaman na kaisipan asin paggawi (Hilingon an parapo 5) *
5. Lubos ta daw na mahuhuba an lumang personalidad? Ipaliwanag. (Gibo 3:19)
5 Bako kitang perpekto, kaya mayo sa sato nin lubos na makakahali kan gabos na maraot na kaisipan asin pagmawot sa satong puso asin isip. Kun minsan, makakagibo talaga kita o makakataram nin mga bagay na pagbabasulan ta. (Jer. 17:9; Sant. 3:2) Pero pag hinuba ta an lumang personalidad, dai na kita makokontrol kan makalaman na kaisipan asin paggawi. Magigin ibang-iba na an pagkatawo ta.—Isa. 55:7; basahon an Gibo 3:19.
6. Taano ta dinadagka kita ni Jehova na halion an salang kaisipan asin maraot na mga ugali kan satong lumang personalidad?
6 Dinadagka kita ni Jehova na halion an salang kaisipan asin maraot na mga ugali huling namumutan niya kitang marhay asin gusto niya na magin maugma kita. (Isa. 48:17, 18) Aram niya na an mga nagpapadara sa salang mga pagmawot kinukulgan an sadiri ninda asin an mga tawo sa palibot ninda. Nakukulgan siya na mahiling na kinukulgan ta an satong sadiri asin an iba.
7. Sigun sa Roma 12:1, 2, anong pagpili an kaipuhan tang gibuhon?
7 Sa primero, tibaad tuya-tuyaon kita kan satong mga amigo saka kapamilya sa mga paghihinguwa ta na baguhon an satong personalidad. (1 Ped. 4:3, 4) Tibaad sabihon ninda na deretso ta na gibuhon an ano man na gusto ta asin na dai niyato dapat pagtugutan an iba na diktahan kita kun ano an gigibuhon ta. Pero, dai man talaga nagigin independiyente an mga habong magsunod sa mga pamantayan ni Jehova. Sa katunayan, nagpapamolde sinda sa kinaban na pinapamahalaan ni Satanas. (Basahon an Roma 12:1, 2.) Kaipuhan ta gabos na magpili: Dai halion an satong lumang personalidad, na impluwensiyado nin kasalan asin kan kinaban ni Satanas, o tugutan si Jehova na baguhon kita na magin an pinakamarahay na tawo na puwede kitang magin sa ngunyan.—Isa. 64:8.
PAANO MO ‘HUHUBAON’ AN LUMANG PERSONALIDAD?
8. Ano an makakatabang sa sato para malikayan an salang kaisipan asin maraot na mga ugali?
8 Aram ni Jehova na kaipuhan nin panahon asin paghihinguwa para malikayan ta an salang kaisipan asin maraot na mga ugali. (Sal. 103:13, 14) Minsan siring, paagi sa saiyang Tataramon, sa saiyang espiritu, asin sa saiyang organisasyon, nagtatao si Jehova nin kadunungan, kusog, asin suporta na kaipuhan ta para tabangan kitang mabago an satong pagkatawo. Asin siguradong tinabangan ka na niya. Ngunyan, pag-ulayan ta an nagkapirang praktikal na mga lakdang na puwede mong gibuhon tanganing lalo mo pang mahali an lumang personalidad asin makuwalipikar para sa bawtismo.
9. Matatabangan ka kan Tataramon nin Diyos na magibo an ano?
9 Gamiton an Bibliya para masiyasat na marhay an saimong sadiri. An Tataramon nin Diyos garo salming; matatabangan ka kaiyan na siyasaton an saimong kaisipan, pagtaram, asin paggawi. (Sant. 1:22-25) An nagtutukdo saimo sa Bibliya asin an iba pang maygurang na mga Kristiyano puwedeng magtao saimo nin giya o sadol. Halimbawa, puwede nindang gamiton an Kasuratan para tabangan ka na mahiling an saimong marahay na mga kuwalidad asin kaluyahan. Puwede ka nindang tukduan kun paano makakakua nin basado sa Bibliyang mga impormasyon na igwa nin makakatabang na mga sadol kun paano hahalion an maraot na mga ugali. Saka andam pirmi si Jehova na tabangan ka. Siya an pinakamakakatabang saimo huling aram niya kun ano an nasa puso mo. (Tal. 14:10; 15:11) Kaya ugalion na mamibi sa saiya asin pag-adalan an saiyang Tataramon aroaldaw.
10. Ano an nanudan mo sa eksperyensiya ni Elie?
10 Magin kumbinsido na an mga pamantayan ni Jehova an pinakamarahay. Puwede kitang makinabang sa gabos na ipinapagibo sa sato ni Jehova. An mga namumuhay kauyon kan saiyang mga pamantayan nagkakaigwa nin paggalang sa sadiri, katuyuhan sa buhay, asin tunay na kaugmahan. (Sal. 19:7-11) Sa kabaliktaran, sinasapar kan mga habong magsunod sa mga pamantayan ni Jehova an mga konsekwensiya na resulta nin paggibo kan mga gibo kan laman. Mangnuhon an sinabi ni Elie manungod sa dai pagsunod sa mga pamantayan nin Diyos. Pinadakula siya nin mga magurang na namumutan si Jehova. Pero kan tin-edyer na si Elie, nakiiba-iba siya sa maraot na mga pag-iriba. Nagpuon na siyang magdroga, magin imoral, asin maghabon. Narisa niya na nagigin mas arangguton siya saka bayolente. “Ginibo ko an gabos na itinukdo sa sako na dai dapat gibuhon nin sarong Kristiyano,” an sabi niya. Pero, dai man nalingawan ni Elie an mga nanudan niya kan aki pa siya. Pag-abot nin panahon, nag-adal giraray siya nin Bibliya. Pinagmaigutan niyang halion an maraot niyang mga gawi-gawi asin nabawtismuhan siya kan taon 2000. Paano siya nakinabang huli sa pamumuhay kauyon kan mga pamantayan ni Jehova? Sinabi ni Elie: “Igwa na ako ngunyan nin katuninungan nin isip asin malinig na konsiyensiya.” * Arog kan ipinapahiling kan eksperyensiyang ini, kinukulgan kan mga habong magsunod sa mga pamantayan ni Jehova an sadiri ninda. Pero andam man giraray si Jehova na tabangan sindang magbago.
11. Ano an mga ikinakaungis ni Jehova?
11 Manudan na ikaungis an mga ikinakaungis ni Jehova. (Sal. 97:10) Sinasabi kan Bibliya na nauungis si Jehova sa “mapalangkaw na mga mata, nagpuputik na dila, asin mga kamot na nagpapabulos nin dugo nin daing sála.” (Tal. 6:16, 17) “Ikinakabaldi [man] ni Jehova an mga madahas asin mapandayang tawo.” (Sal. 5:6) Ikinakaungis niyang marhay an mga ugali asin gibong iyan kaya linaglag niya an gabos na maraot kan panahon ni Noe huling pinano ninda an daga nin kadahasan. (Gen. 6:13) Pag-isipan an saro pang halimbawa. Paagi ki propeta Malakias, sinabi ni Jehova na nauungis Siya sa mga patraydor na nagpaplanong idiborsiyo an saindang inosenteng agom. Dai inaako nin Diyos an saindang pagsamba asin huhukuman niya sinda sa paggawi ninda.—Mal. 2:13-16; Heb. 13:4.
Dapat na ikabaldi ta an paggibo nin sarong bagay na sinasabi ni Jehova na maraot arog kan pagkabaldi o pagkasurang ta na magkakan nin lapang kakanon (Hilingon an parapo 11-12)
12. Ano an buot sabihon kan “kaungisan an maraot”?
12 Gusto ni Jehova na “kaungisan [ta] an maraot.” (Roma 12:9) Ilinaladawan kan tataramon na “kaungisan” an sarong makusog na emosyon; nangangahulugan iyan na ikaungis na marhay an sarong bagay, na ikabaldi o ikasurang iyan. Isipa na sana an pagkasurang mo halimbawang sabihan ka na kakanon an sarong plato nin lapang kakanon. An pag-isip pa sana ngani kaiyan tibaad malain na sa pagmati mo. Sa kaagid na paagi, dapat na ikabaldi na niyato dawa an pag-isip pa sana kan paggibo nin sarong bagay na sinasabi ni Jehova na maraot.
13. Taano ta dapat tang ingatan an satong kaisipan?
13 Ingatan an saimong kaisipan. An satong kaisipan nakakaimpluwensiya sa satong paggawi. Kaya tinukduan kita ni Jesus na halion an mga kaisipan na puwedeng magin dahilan na makagibo kita nin magabat na kasalan. (Mat. 5:21, 22, 28, 29) Gusto tang paugmahon an satong Ama sa langit, bako daw? Kaya importante nanggad na halion ta tulos an ano man na maraot na mga kaisipan na minasabong sa satong isip!
14. Ano an ihinahayag kan satong mga itinataram, asin anong mga hapot an puwede tang ihapot sa satong sadiri?
14 Kontrulon an saimong pagtaram. Sinabi ni Jesus: “An ano man na minaluwas sa nguso minagikan sa puso.” (Mat. 15:18) Iyo, dakul an ihinahayag kan satong mga itinataram manungod sa pagkatawo ta. Kaya haputon an saimong sadiri: ‘Piglilikayan ko daw na magputik, dawa pa magkaproblema ako kun sasabihon ko an totoo? Bilang may agom, nag-iingat daw ako na dai makipag-flirt sa mga bakong kasekso? Biyo ko daw na piglilikayan na makataram nin imoral na mga tataramon? Kalmado daw akong minasimbag pag may nakakulog nin buot ko?’ Makakatabang kun pag-iisipan mong marhay an mga hapot na iyan. An saimong pagtaram puwedeng iagid sa mga tahi sa bado na nagdudugtong sa mga tela kaiyan. Kun pagmamaigutan mo na halion an mapang-insulto, putik, asin imoral na mga tataramon sa saimong pakikipag-ulay, magigin mas pasil man saimo na hubaon an lumang personalidad.
15. Ano an buot sabihon kan ipako “sa harigi” an satong lumang personalidad?
15 Magin andam na gibuhon an kinakaipuhan na gibuhon. Naggamit si apostol Pablo nin mapuwersang ilustrasyon tanganing tukduan kita kun gurano kaimportante na baguhon ta an satong pamumuhay. Isinurat niya na dapat tang ipako “sa harigi” an satong lumang personalidad. (Roma 6:6) Andam si Jesus na ipako siya sa harigi para sunudon asin mapaugma si Jehova. Kaya para mapaugma ta si Jehova, dapat na andam man kitang halion an mga ugali asin paggawi na ikinakaungis niya. Magkakaigwa sana kita nin malinig na konsiyensiya asin nin paglaom na buhay na daing katapusan kun gigibuhon ta an mga iyan. (Juan 17:3; 1 Ped. 3:21) Tandaan na dai babaguhon ni Jehova an saiyang mga pamantayan para masunod an gusto ta. Imbes, kita an kaipuhan na magbago kan pagkatawo ta asin magsunod sa mga pamantayan niya.—Isa. 1:16-18; 55:9.
16. Taano ta dapat na magin determinado kang padagos na labanan an salang mga pagmawot?
16 Padagos na labanan an salang mga pagmawot. Dawa nabawtismuhan ka na, kaipuhan mong padagos na labanan an salang mga pagmawot. Pag-isipan an eksperyensiya ni Mauricio. Hoben pa siya kan magpuon na magin homoseksuwal an pamumuhay niya. Pag-abot nin panahon, nabisto niya an mga lingkod ni Jehova asin nagpuon na mag-adal nin Bibliya. Pagkatapos na gumibo nin mga pagbabago, nabawtismuhan siya kan 2002. Dawa ngani dakul na taon nang naglilingkod ngunyan si Mauricio ki Jehova, sinabi niya: “An totoo, kinakaipuhan ko pa talagang paglabanan kun minsan an salang mga pagmawot.” Pero, dai niya tinugutan na makapadisganar iyan sa saiya. Imbes, sinabi niya: “Napapakusog ako huling aram ko na napapaugma ko si Jehova pag dai ako nagpapadara sa mga pagmawot na iyan.” *
17. Ano an nahiling mo sa eksperyensiya ni Nabiha na nakakapakusog saimo?
17 Mamibi para sa tabang ni Jehova, asin magsarig sa saiyang espiritu, bako sa sadiri mong kusog. (Gal. 5:22; Fil. 4:6) Dapat na magin determinado kita na hubaon an lumang personalidad asin dai na iyan isulot giraray. Pag-isipan an eksperyensiya ni Nabiha. Binayaan siya kan saiyang ama kan anom na taon pa sana siya. Sinabi niya na nakulgan siyang marhay kaiyan. Mantang nagdadakula, lalong nagigin arangguton asin agresibo si Nabiha. Naimbuwelto siya sa pagpabakal nin droga, naarestar, asin mga pirang taon na napreso. May mga Saksi na nagdadalaw sa presuhan na nagtukdo saiya sa Bibliya. Nagpuon na gumibo si Nabiha nin darakulang pagbabago. “Madali kong napundo an iba kong bisyo,” an sabi niya. “Pero iba pag-abot sa pagsigarilyo.” Labing sarong taon an inabot bago iyan naipundo ni Nabiha. Paano niya iyan nagibo? “Urog sa gabos,” an sabi niya, “an padagos na pamimibi ki Jehova an nakatabang sako na pumundo sa bisyo.” May kumpiyansa na sinasabi niya ngunyan sa iba: “Kun nakaya kong magbago tanganing paugmahon si Jehova, kaya man iyan kan iba!” *
PUWEDE KANG MAKUWALIPIKAR SA BAWTISMO!
18. Sigun sa 1 Corinto 6:9-11, ano an nakayang gibuhon kan dakul sa mga lingkod nin Diyos kaidto?
18 Kan inot na siglo, an nagkapira sa mga lalaki asin babayi na pinili ni Jehova para magin kairibang tagapamahala ni Cristo dating mga naggigibo nin maraot na mga bagay. Halimbawa, dati sindang mga parasambay, homoseksuwal, asin parahabon. Minsan siring, sa tabang kan banal na espiritu nin Diyos, nakaya nindang baguhon an saindang personalidad. (Basahon an 1 Corinto 6:9-11.) Siring man sa ngunyan, minilyon na tawo an natabangan na kan Bibliya na gumibo nin mga pagbabago sa saindang buhay. * Nahali ninda an maraot na mga paggawi na masakiton halion. An halimbawa ninda patunay na kaya mo man na mabago an saimong personalidad asin mahali an maraot na mga paggawi tanganing makuwalipikar ka para sa bawtismo.
19. Ano an pag-uulayan sa sunod na artikulo?
19 Apuwera sa paghinguwa na hubaon an lumang personalidad, an mga gustong magpabawtismo dapat man na maghinguwa na isulot an bagong personalidad. Pag-uulayan sa sunod na artikulo kun paano ta iyan magigibo asin kun paano kita matatabangan kan iba.
KANTA 41 Danguga Tabi an Sakong Pamibi
^ par. 5 Para makuwalipikar sa bawtismo, dapat na andam kitang gumibo nin mga pagbabago sa satong personalidad. Tatabangan kita kan artikulong ini na maaraman kun ano an mga ugali asin paggawi na kaiba sa lumang personalidad, kun taano ta kaipuhan tang halion an mga iyan, asin kun paano ta iyan magigibo. Pag-uulayan man sa sunod na artikulo kun paano ta mapapagdanay na sulot an bagong personalidad dawa nabawtismuhan na kita.
^ par. 3 PALIWANAG DAPIT SA TATARAMON: An ‘paghuba kan lumang personalidad,’ nangangahulugan nin paghali kan mga ugali asin pagmawot na nakakapamundo ki Jehova. Dapat na pinupunan ta na ining gibuhon bago pa magpabawtismo.—Efe. 4:22.
^ par. 10 Para sa dagdag pang detalye, hilingon an artikulong “Binago kan Biblia an Saindang Buhay—‘Kaipuhan Kong Bumalik ki Jehova,’” na ipinublikar sa Abril 1, 2012 na isyu kan An Torrengbantayan.
^ par. 16 Para sa dagdag pang detalye, hilingon an artikulong “The Bible Changes Lives—‘They Were Very Kind to Me,’” na ipinublikar sa Mayo 1, 2012 na isyu kan The Watchtower.
^ par. 17 Para sa dagdag pang detalye, hilingon an artikulong “Binago kan Biblia an Saindang Buhay—‘Nagin Aranggoton Asin Agresibong Daraga Ako,’” na ipinublikar sa Oktubre 1, 2012 na isyu kan An Torrengbantayan.
^ par. 18 Hilingon an kahon na “ Binago kan Bibliya an Saindang Buhay.”
^ par. 64 DESKRIPSIYON KAN RITRATO: An paghali kan maraot na mga ugali asin paggawi maiaagid sa paghuba nin maating bado.
