1. Ano an panginot na nakakaimpluwensiya sa satong personalidad?

 KITA man bago pa sanang mabawtismuhan o haloy na, gabos kita gustong magkaigwa kan personalidad na nagugustuhan ni Jehova. Para magibo iyan, kaipuhan tang kontrulon an satong kaisipan. Taano? Huling an panginot na nakakaimpluwensiya sa satong personalidad iyo an satong kaisipan. Kun pirmi tang iniisip an mga bagay na nakakaakit sa satong makalaman na mga pagmawot, makakapagtaram kita asin makakagibo nin mga bagay na maraot. (Efe. 4:17-19) Sa ibong na lado, kun papanuon ta an satong isip nin marahay na mga kaisipan, mas posibleng marhay na an satong pagtaram asin paggawi makapaugma sa satong Ama, si Jehova.—Gal. 5:16.

2. Anong mga hapot an pag-uulayan ta sa artikulong ini?

² Arog kan sinambit sa sinundan na artikulo, dai ta mapupugulan an gabos na maraot na kaisipan na maglaog sa satong isip. Pero puwede tang pilion na dai isagibo an maraot na kaisipan na iyan. Bago kita mabawtismuhan, kaipuhan tang ipundo an pagtaram asin paggawi na ikinakaungis ni Jehova. Iyan an inot asin pinakaimportanteng lakdang sa paghuba kan lumang personalidad. Minsan siring, para lubos na mapaugma si Jehova, dapat ta man na sunudon an pagbuot na ini: “Isulot nindo an bagong personalidad.” (Col. 3:10) Sa artikulong ini, sisimbagon ta an minasunod na mga hapot: Ano an “bagong personalidad”? Paano ta maisusulot an bagong personalidad asin mapapagdanay na nakasulot iyan?

3. Uyon sa Galacia 5:22, 23, ano an “bagong personalidad,” asin paano iyan isinusulot nin sarong tawo?

³ An “bagong personalidad” iyo an paagi nin pag-iisip saka paggawi na nagpapahiling kan personalidad ni Jehova. Ipinapahiling  kan saro na nagsusulot nin bagong personalidad an bunga kan espiritu nin Diyos, na tinutugutan an banal na espiritu na giyahan an saiyang kaisipan, pagmati, saka paggawi. (Basahon an Galacia 5:22, 23.) Halimbawa, namumutan niya si Jehova saka an mga lingkod Niya. (Mat. 22:36-39) Nagdadanay siyang maugma dawa may inaagihan na mga pagbalo. (Sant. 1:2-4) Saro siyang parapatuninong. (Mat. 5:9) Mapasensiya siya saka mabuot sa iba. (Col. 3:13) Ikinakaugma niya an marahay asin naggigibo nin marahay. (Luc. 6:35) Pinapatunayan niya paagi sa saiyang mga gibo na igwa siya nin makusog na pagtubod sa saiyang Ama sa langit. (Sant. 2:18) Nagdadanay siyang kalmado pag pinoprobokar asin nagpupugol sa sadiri pag natetentaran.—1 Cor. 9:25, 27; Tito 3:2.

4. Para maisulot an bagong personalidad, puwede daw na pasaro-saro ta sanang patalubuon an mga kuwalidad na sinambit sa Galacia 5:22, 23? Ipaliwanag.

⁴ Para maisulot an bagong personalidad, kaipuhan tang patalubuon an gabos na kuwalidad na sinambit sa Galacia 5:22, 23 saka sa iba pang mga teksto sa Bibliya. * An mga kuwalidad na ini bako arog nin manlain-lain na bado na pasaro-saro tang isinusulot. Sa katunayan, an mga aspekto kan mga kuwalidad na ini mahihiling sa iba pang mga kuwalidad. Halimbawa, kun talagang namumutan mo an saimong kapwa, magigin kang mapasensiya saka mabuot sainda. Asin para magin tunay na marahay, dapat kang magin mahuyo asin magpahiling nin pagpupugol sa sadiri.

5. Paano ta maipapahiling na “yaon . . . sa sato an pag-iisip ni Cristo,” asin taano ta dapat tang pag-adalan an buhay ni Jesus? (1 Corinto 2:16)

⁵ Basahon an 1 Corinto 2:16. Para maisulot an bagong personalidad, kaipuhan na “yaon . . . sa sato an pag-iisip ni Cristo.” Sa ibang pagtaram, kaipuhan tang manudan kun paano mag-isip si Jesus dangan arugon siya. Perpektong ipinahiling ni Jesus an bunga kan espiritu nin Diyos. Arog nin sarong daing depektong salming, ipinahiling niya an mismong mga kuwalidad ni Jehova. (Heb. 1:3) Mantang mas naaarog ta an pag-iisip ni Jesus, mas maaarog ta man an paggawi niya asin mas maipapahiling ta an saiyang personalidad.—Fil. 2:5.

6. Anong mga katunayan an dapat tang tandaan pag hinihinguwa tang isulot an bagong personalidad?

⁶ Posible daw talaga na maarog ta an halimbawa ni Jesus? Tibaad maisip ta: ‘Perpekto si Jesus. Dai ko lamang siya lubos na maaarog!’  Kun arog kaiyan an namamatian mo, tandaan an mga katunayan na ini. Inot, linalang ka na may kakayahan na maarog si Jehova saka si Jesus. Kaya puwede mong pilion na arugon sinda, asin magigibo mo iyan dawa paano. (Gen. 1:26) Ikaduwa, an banal na espiritu nin Diyos an pinakamakapangyarihan na puwersa sa uniberso. Sa tabang kaiyan, magigibo mo an mga bagay na dai mo makakaya kun ika sana. Ikatulo, dai inaasahan ni Jehova na perpekto mong maipapahiling sa ngunyan an bunga kan espiritu. Sa katunayan, 1,000 taon an itatao kan satong mamumuton na Ama sa mga may paglaom na mabuhay sa daga tanganing magin perpekto sinda. (Kap. 20:1-3) An hinahagad sato ni Jehova sa ngunyan iyo na gibuhon an satong pinakamakakaya asin na magsarig sa saiya para sa tabang.

7. Ano an pag-uulayan ta ngunyan?

⁷ Sa anong partikular na mga paagi ta maaarog si Jesus? Pag-uulayan ta sa halipot an apat na aspekto kan bunga kan espiritu nin Diyos. Sa kada saro kaiyan, hilingon niyato kun ano an manunudan ta sa kun paano ipinahiling ni Jesus an mga kuwalidad na iyan. Asin mantang ginigibo ta iyan, pag-uulayan ta an nagkapirang hapot na makakatabang sa sato na mapauswag an satong bagong personalidad.

8. Paano ipinahiling ni Jesus an pagkamuot?

⁸ Huling namumutan na marhay ni Jesus si Jehova, naggibo siya nin mga pagsasakripisyo para sa saiyang Ama saka para sa sato. (Juan 14:31; 15:13) An dakulang pagkamuot ni Jesus sa mga tawo mahihiling sa kun paano niya ginamit an saiyang buhay digdi sa daga. Pirmi siyang nagpahiling nin pagkamuot asin pagmalasakit, dawa pa kan may mga nagkokontra sa saiya. An sarong panginot na paagi na ipinahiling niya an saiyang pagkamuot sa mga tawo iyo an pagtukdo sa sainda manungod sa Kahadian nin Diyos. (Luc. 4:43, 44) Pinatunayan man ni Jesus an saiyang mapagsakripisyong pagkamuot sa Diyos asin sa mga tawo paagi sa pagigin andam na mag-agi nin makulog na kagadanan sa kamot kan mga parakasala. Paagi kaiyan, binukasan niya an dalan para sa gabos na tawo na magkaigwa nin buhay na daing katapusan.

9. Paano ta maaarog si Jesus sa pagpahiling nin pagkamuot?

⁹ Idinusay ta an satong sadiri ki Jehova asin nagpabawtismo huling namumutan ta an satong Ama sa langit. Kaya arog ni Jesus, maipapahiling ta an pagkamuot ki Jehova sa paagi kan pagtrato ta sa mga tawo. Nagsurat si apostol Juan: “Kun an saro dai namumuot sa saiyang tugang, na nahihiling niya, dai man niya magigibong mamuot sa Diyos, na dai niya nahihiling.” (1 Juan 4:20) Puwede tang ihapot sa satong sadiri: ‘Namumutan ko daw na marhay an mga tawo? Nagpapahiling daw ako nin malasakit sa iba, dawa pa kun bakong marahay an pagtrato ninda sa sako? Napapahiro daw ako nin pagkamuot na gamiton an panahon ko saka an mga bagay na igwa ako para tabangan an iba na makanuod manungod ki Jehova? Andam daw akong gibuhon ini dawa dai pinapahalagahan kan kadaklan na tawo an mga paghihinguwa ko o dawa kinokontra ako ninda? May magigibo daw ako para makatao nin mas dakul na panahon sa paggibo nin disipulo?’—Efe. 5:15, 16.

10. Paano ipinahiling ni Jesus na siya parapatuninong?

¹⁰ Si Jesus parapatuninong. Kan maraot an nagin pagtrato saiya kan mga tawo, dai siya nagbalos nin maraot sa maraot. Pero bako lang iyan an ginibo niya. Siya na an nag-inot na naggibo nin paagi para kumalma an sarong nakakatensiyon na sitwasyon asin dinagka an iba na husayon an dai pagkasinabutan. Halimbawa, tinukduan niya sinda na dapat sindang makipagkatuninungan sa saindang mga tugang kun gusto nindang akuon ni Jehova an saindang pagsamba. (Mat. 5:9, 23, 24) Asin pauruutro niyang tinabangan an saiyang mga apostol na husayon an saindang diriskutiran manungod sa kun siisay sa sainda an pinakaurog.—Luc. 9:46-48; 22:24-27.

11. Paano kita magigin parapatuninong?

 ¹¹ Tanganing magin parapatuninong, bako lang paglikay sa iwal an kaipuhan tang gibuhon. Kaipuhan na kita na an mag-inot na makipagkatuninungan sa iba asin dagkahon an satong mga tugang na husayon an saindang dai pagkasinabutan. (Fil. 4:2, 3; Sant. 3:17, 18) Puwede tang ihapot sa satong sadiri: ‘Ano an handa kong isakripisyo tanganing makipagkatuninungan sa iba? Kun nakulgan kan sarong tugang an buot ko, nagtatanom daw ako nin kulog nin buot? Naghahalat pa daw ako na siya an mag-inot na makipagkatuninungan sa sako, o ako na an nag-iinot, dawa pa siya an dahilan kan problema? Kun angay, dinadagka ko daw na makipagkatuninungan an mga may dai pagkasinabutan?’

12. Paano ipinahiling ni Jesus an kabuutan?

¹² Mabuot si Jesus. (Mat. 11:28-30) Ipinahiling niya an kabuutan paagi sa pagigin malumanay saka rasonable, dawa sa bakong magayon na mga sitwasyon. Halimbawa, kan nakimahirak sa saiya an sarong babaying taga Fenicia para paumayan an aki kaini, dai niya ini pinaonrahan kan primero, pero kan mahiling niya an makusog na pagtubod kan babayi, mabuot niyang pinaumayan an aki kaini. (Mat. 15:22-28) Pero maski mabuot si Jesus, dai man siya nagpapadara sa emosyon. Kun minsan, ipinapahiling niya an kabuutan paagi sa pagtao nin pagtatanos sa mga namumutan niya. Halimbawa, kan purbaran ni Pedro na disganaron si Jesus sa paggibo kan kabutan ni Jehova, sinaway siya ni Jesus sa atubangan kan ibang mga disipulo. (Mar. 8:32, 33) Ginibo niya ini bako para ipasupog si Pedro, kundi para tukduan siya asin patanidan an ibang mga disipulo na dai magin pangahas. Maski paano, siguradong napasupog man si Pedro, pero nakinabang siya sa disiplina.

13. Paano ta maipapahiling an tunay na kabuutan?

¹³ Tanganing maipahiling sa saimong mga namumutan an tunay na kabuutan, kaipuhan mo kun minsan na magin prangka. Pag kaipuhan mong tawan sinda nin konseho, arugon si Jesus paagi sa pagtao nin konseho na kauyon kan mga prinsipyo na yaon sa Tataramon nin Diyos. Magin malumanay. Magtiwala na gigibuhon ninda kun ano an tama asin na aakuon kan mga namumuot ki Jehova asin sa saimo an mamumuton mong konseho. Haputon an saimong sadiri: ‘May kusog nin buot daw ako na magtaram pag nahiling ko na naggigibo nin maraot an saro sa namumutan ko? Kun kinakaipuhan kong magtao nin konseho, mabuot daw an pagtaram ko, o nakakakulog? Ano an motibo ko sa pagtao nin konseho? Nagtatao daw ako nin konseho sa saro huli sa pagkairitar, o dahil gusto kong tabangan siya?’

14. Paano ipinahiling ni Jesus an karahayan?

¹⁴ Bako lang na aram ni Jesus kun ano an marahay kundi ginibo man niya iyan. Namumutan ni Jesus an saiyang Ama, kaya pirmi niyang ginigibo kun ano an tama na may tamang motibo. Nahihiling an karahayan sa epekto kaiyan sa iba. An sarong marahay na tawo pirming naghahanap nin mga paagi na makatabang asin makagibo nin marahay para sa iba. Bakong igo an pakaaram lang kun ano an tamang gibuhon; dapat na gibuhon ta mismo kun ano an tama na may tamang motibo. Tibaad may maghapot, ‘Posible daw na maggibo nin tama na may salang motibo?’ Iyo. Halimbawa, sinambit ni Jesus an manungod sa mga tawong nagtatao nin limos sa mga pobre pero sinisigurado man na maaraman kan iba an ginibo ninda. Dawa ngani garo baga marahay man an mga gibong iyan, dai kaiyan nauugma si Jehova.—Mat. 6:1-4.

15. Paano ta maipapahiling na tunay an satong karahayan?

¹⁵ Maipapahiling ta sana na tunay an satong karahayan kun ginigibo ta an tama huli sa bakong makasadiring mga motibo. Kaya puwede mong ihapot sa saimong sadiri: ‘Aram ko daw kun ano an tamang gibuhon asin talagang ginigibo iyan? Ano an motibo ko sa paggibo nin marahay?’

16. Ano an dapat tang gibuhon sa kada aldaw, asin taano?

¹⁶ Dai ta pag-isipon na pag nabawtismuhan na kita, tapos na an paghihinguwa tang isulot an bagong personalidad. Kaipuhan tang padagos na ingatan an satong magayon na “bagong bado.” An sarong paagi na magigibo ta iyan iyo an paghanap nin mga paagi sa kada aldaw na maipahiling an bunga kan espiritu nin Diyos. Taano? Huling si Jehova sarong aktibong Diyos, asin an saiyang espiritu sarong aktibong puwersa. (Gen. 1:2) Kun siring, kaya kitang pahiruon kan lambang aspekto kan bunga kan espiritu asin iyan an dapat na magmotibar sa sato na humiro. Halimbawa, nagsurat an disipulong si Santiago: “An pagtubod . . . na mayong mga gibo gadan.” (Sant. 2:26) Arog man kaiyan sa gabos na iba pang aspekto kan bunga kan espiritu nin Diyos. Sa kada ipinapahiling ta an mga iyan, patunay iyan na aktibong naghihiro sa sato an espiritu nin Diyos.

17. Ano an dapat tang gibuhon pag dai ta naipahiling an bunga kan espiritu?

¹⁷ Dawa an mga Kristiyano na haloy na taon nang nabawtismuhan dai nakakapahiling kun minsan nin bunga kan espiritu. Pero an mahalaga, dai kita magpundo sa pagpahiling kaiyan. Pag-isipan an ilustrasyon na ini. Kun nagisi mo an paborito mong bado, itatapok mo na daw iyan tulos? Dai. Posibleng marhay na maingat mong aayuson iyan kun puwede pa iyan ayuson. Saka magigin maingat ka na sa sunod. Sa kaparehong paagi, kun may pagkakataon na dai ka nagin mabuot, mapasensiya, o mamumuton sa iba, dai madisganar. An udok sa pusong paghagad nin tawad makakatabang tanganing maayos an problema, asin maibalik an saindong marahay na relasyon. Saka magin determinado na gibuhon an mas marahay sa sunod.

18. Sa ano kita makakasigurado?

¹⁸ Nagpapasalamat nanggad kita sa halimbawa na ipinahiling ni Jesus! Mantang mas inaarog ta an pag-iisip ni Jesus, magigin mas madali man para sa sato na gumawi arog niya. Asin mantang mas minagawi kita arog ki Jesus, magigin mas mahusay man kita sa pagsulot kan bagong personalidad. Sa artikulong ini, napag-ulayan ta an apat sana sa mga aspekto kan bunga kan espiritu nin Diyos. Marahay kun matao ka nin panahon para pag-adalan an iba pang aspekto kan bunga kan espiritu asin pag-isipan kun may kaipuhan ka pang pauswagon para urog pang maipahiling an mga kuwalidad na iyan. May mahihiling kang lista nin mga artikulo mapadapit diyan sa Giya sa Pag-research Para sa Mga Saksi ni Jehova sa irarom kan temang “Kristiyanong Pamumuhay” dangan “Bunga kan Espiritu.” Makakasigurado ka na tatabangan ka ni Jehova kun pagmamaigutan mong isulot an bagong personalidad asin papagdanayon iyan na nakasulot.