Naihahapot iyan kan iba na madali sanang nagbasa kan salaysay na ini. Pero duwang magkalain na lalaki na may pangaran na Mefiboset an sinambit diyan, asin may manunudan kita kun babalikan ta an nangyari.

Si Hading Saul kan Israel igwa nin pitong aking lalaki asin duwang aking babayi. An pinakamatua niyang aki iyo si Jonathan. Pag-abot nin panahon, nagkaigwa si Saul nin aking lalaki sa sekondaryo niyang agom na si Rizpa na pinangaranan nin Mefiboset. Interesante nanggad, si Jonathan igwa man nin aking lalaki na Mefiboset an pangaran. Kaya, si Hading Saul igwa nin aki saka makuapo na parehong may pangaran na Mefiboset.

Naanggot kaidto si Hading Saul sa mga Gibeonita na nakaistar kaiba kan mga Israelita asin pinurbaran niyang puhuon sinda. Minalataw na dakul sa sainda an ginaradan. Malinaw nanggad na sala idto. Taano? Huling kan panahon ni Josue, an mga pamayo kan Israelita nakipagtipan para sa katuninungan sa mga Gibeonita.—Jos. 9:3-27.

An tipan na iyan balido pa man giraray kan panahon ni Hading Saul. Kontra sa ginibong tipan, hininguwa kan hadi na puhuon an mga Gibeonita. Huli kaini, nagkaigwa nin “pagkakasala sa dugo si Saul asin an saiyang pamilya.” (2 Sam. 21:1) Kan huri, nagin hadi si David. Sinabi saiya kan nagkataradang Gibeonita an manungod sa marauton na ginibo sainda. Hinapot sinda ni David kun paano mababayadan an marauton na ginibo sainda ni Saul asin tanganing bendisyunan ni Jehova an daga nin Israel. Imbes na maghagad nin kuwarta, hinagad kan mga Gibeonita na itao sa sainda para gadanon an pitong aking lalaki kan saro na “nagpakana para mayo . . . nin matada” sa sainda. (Bil. 35:30, 31) Itinao ni David an hinahagad ninda.—2 Sam. 21:2-6.

Kan panahon na iyan, gadan na si Saul saka si Jonathan huli sa ralaban, pero buhay pa an aki ni Jonathan na si Mefiboset. Nalupog siya huli sa aksidente kan aki pa siya kaya dai siya imbuwelto sa ginibong pag-atake kan saiyang lolo sa mga Gibeonita. Nakipagtipan si David ki Jonathan na magigin mag-amigo sinda, na magtataong pakinabang sa mga gikan ni Jonathan, kaiba na an aki niyang si Mefiboset. (1 Sam. 18:1; 20:42) Sinasabi kan salaysay: “Nahirak an hadi [si David] ki Mefiboset na aki ni Jonathan na aki ni Saul [huli sa] ginibong sumpaan sa atubangan ni Jehova.”—2 Sam. 21:7.

Kaya, ano an ginibo ni David para itao an hinahagad kan mga Gibeonita? Itinao niya an duwang aking lalaki ni Saul, na an saro Mefiboset an pangaran, asin an limang makuapo ni Saul. (2 Sam. 21:8, 9) Huli sa ginibo ni David, natapos an pagkakasala sa dugo sa daga nin Israel.

May mahalagang leksiyon kitang manunudan sa pangyayaring ini sa kasaysayan. Malinaw an katugunan nin Diyos. Sinasabi kaiyan: “Dai dapat gadanon an mga aki huli sa pagkakasala kan saindang mga ama.” (Deu. 24:16) Dai uuyunan ni Jehova an ginibo sa duwang aking lalaki ni Saul saka sa limang makuapo kaini kun inosente sinda. Sinasabi pa sa katugunan na iyan: “An sarong tawo dapat sanang gadanon huli sa sadiri niyang pagkakasala.” Minalataw na an pitong nagadan na gikan ni Saul imbuwelto sa ginibo niya na pagpurbar na puhuon an mga Gibeonita. Kaya, binayadan kan pito an saindang pagkakasala.

Ipinapahiling kan salaysay na ini na dai puwedeng isarahutan kan sarong tawo an ginibo niyang sala paagi sa pag-isip o pagsabing sinusunod lang niya an mga pagbuot. An madunong na talinhaga nagsasabi: “Pantayon mo an agihan kan mga bitis mo, asin an gabos mong dalan magigin sigurado.”—Tal. 4:24-27; Efe. 5:15.