KAN dekada nin 1910, nagbalyo sa Canada an mga magurang ko haling Tbilisi, Georgia, asin nag-istar sinda sa sarong sadit na farmhouse sa maduot na kahiwasan harani sa baryo nin Pelly, Saskatchewan, sa sulnupan na parte kan Canada. Namundag ako kan 1928 asin ako an nguhod sa anom na magturugang. Nagadan si Tatay anom na bulan bago ako ipangaki, asin umboy pa sana ako kan magadan man si Nanay. Dai nahaloy sa edad na 17, nagadan man si Ate Lucy, an pinakamatua ming tugang na babayi. Dangan, si Tiyo Nick na an nag-ataman sa samong magturugang.

Sarong aldaw kan mga dos anyos pa sana ako, nahiling ako kan mga kapamilya ko na binubutong an ikog kan saro sa mga lalaking kabayo sa farm. Natakot sinda na ’baad sipaon ako kan kabayo, kaya kinurahawan ninda ako na magpundo—pero dai sana ako naggirong. Nakatalikod ako sa sainda, asin dai ko nadangog an pagkurahaw ninda. Marahay na sana ta dai man ako naano, pero kan aldaw na idto naaraman kan pamilya ko na púla ako.

Sinabi kan sarong amigo kan pamilya mi na marahay kun papaeskuwelahon ako kaiba nin ibang púlang aki, kaya inenrol ako ni Tiyo Nick sa eskuwelahan para sa mga púla sa Saskatoon, Saskatchewan. An eskuwelahan na ini harayo sa harong mi, saka singko anyos pa sana ako kaidto kaya talagang natakot ako. Nakakapuli sana ako pag piyesta opisyal saka pag bakasyon. Pag-abot nin panahon, nakanuod akong mag-sign language saka nakikikawat na man ako sa ibang mga aki.

Kan 1939, ikinasal an panduwa ming tugang na si Ate Marion ki Bill Danylchuck, asin sinda na an nag-ataman sa samo ni Ate Frances. Sa pamilya mi, sinda an inot na nakipag-adal sa mga Saksi ni Jehova. Pag nagbabakasyon ako, hinihinguwa talaga nindang itukdo sako an mga nanunudan ninda sa Bibliya. An totoo, bakong madaling makikomunikar sa sainda ta dai man sinda tataong mag-sign. Pero minsan paano nahiling ninda na talagang gustong-gusto ko an mga  nanunudan ko dapit ki Jehova. Aram kong may koneksiyon an ginigibo ninda sa sinasabi kan Bibliya, kaya nag-iiba ako sa sainda pag naghuhulit sinda. Dai nahaloy, gusto ko nang magpabawtismo, kaya kan Setyembre 5, 1941, binawtismuhan ako ni Bill sa sarong dram na pano nin tubig hali sa bubon. Sobrang lipot kan tubig na iyan!

Kan bakasyon kan 1946, nagpuli ako asin nag-atender kami sa sarong kumbensiyon sa Cleveland, Ohio, U.S.A. Kan inot na aldaw kan kumbensiyon, nagsurusalida sinda Ate sa pagsurat nin nota tanganing masundan ko an programa. Pero, kan ikaduwang aldaw, ugmahon ako ta naaraman kong may grupo palan duman nin mga púla na may nag-iinterpretar. Masasabutan ko man giraray an programa saka mas magigin maliwanag na sa sako an katotoohan na nasa Bibliya!

Kan panahon na iyan, katatapos pa sana kan Giyera Mundiyal II asin gustong-gustong ipahiling kan mga tawo na maimbod sinda sa saindang nasyon. Pagkatapos kan kumbensiyon, nagbalik ako sa eskuwelahan na determinadong marhay na magdanay na maimbod ki Jehova. Kaya dai na ako nag-iba sa pagsaludo sa bandera, pagkanta kan national anthem, pagselebrar nin mga piyesta opisyal, saka sa obligatoryong mga misa sa simbahan. Dai iyan nagustuhan kan eskuwelahan, kaya hininguwa nindang baguhon an isip ko paagi sa pananakot asin pagsabi nin mga kaputikan. Narisa kan mga kaeskuwela ko an nangyayari kaya nagkaigwa ako nin mga oportunidad na magpatotoo sa sainda. Pag-abot nin panahon, an mga kaeskuwela kong si Larry Androsoff, Norman Dittrick, asin Emil Schneider inako man an katotoohan asin sagkod ngunyan maimbod na naglilingkod ki Jehova.

Pag nagduduman ako sa ibang siyudad, pirmi kong hinihinguwang maghulit sa mga púla. Halimbawa, kan nasa Montreal ako, nagduman ako sa sarong lugar na pigtitiripunan nin mga púla. Diyan ko napatotoohan si Eddie Tager, sarong hoben na lalaki na miyembro nin sarong gang. Nasa kongregasyon siya nin sign-language sa Laval, Quebec sagkod na magadan siya kan sarong taon. Nakapagpatotoo man ako sa hoben na si Juan Ardanez na, arog kan mga taga Berea, maingat na nagsiyasat tanganing aramon kun baga totoo an sinasabi kan Bibliya. (Gibo 17:10, 11) Inako man niya an katotoohan asin maimbod na naglingkod bilang elder sa Ottawa, Ontario, sagkod sa saiyang kagadanan.

Kan 1950, nagbalyo ako sa Vancouver. Sa mga púla ako pirming naghuhulit, pero dai ko malilingawan kaidtong may mahulitan ako sa tinampo na sarong babaying bakong púla na an pangaran Chris Spicer. Nag-subscribe siya kan satong magasin asin gusto niyang mamidbid ko an agom niyang si Gary. Kaya nagduman ako sa harong ninda, asin paagi sa pagsurat haloy kaming nag-urulay. Dai na kami nagkahirilingan puon kaidto. Pero, dai ko inaasahan, mga pirang  taon pagkatapos kaiyan nahiling ninda ako sa sarong grupo nin mga tawo sa sarong kumbensiyon sa Toronto, Ontario. Babawtismuhan si Gary kan mismong aldaw na iyan. Ipinagirumdom sa sako kan magayunon na eksperyensiyang iyan na mahalaga na padagos kitang maghulit huling dai niyato aram na tibaad pag-abot nin panahon akuon kan saro na hinulitan ta an katotoohan.

Dangan, nagbalik ako sa Saskatoon. Diyan ko namidbid an sarong ina na may aking kambal na púla—si Jean asin Joan Rothenberger. Gusto niyang tukduan ko sa Bibliya an mga aki niya. Nagkaklase sinda sa pig-eskuwelahan ko man kaidto. Dai nahaloy, iiniistorya na kan kambal sa saindang mga kaklase an mga nanunudan ninda. Pag-abot nin panahon, lima sa klase ninda an nagin mga Saksi ni Jehova. Saro diyan si Eunice Colin. Inot kong namidbid si Eunice kan huring taon ko sa eskuwelahan na iyan nin mga púla. Tinawan niya ako kaidto nin dulse tapos naghapot siya kun puwede kaming magin magbarkada. Dai ko aram kaidto na magigin siyang saro sa pinakamahalagang parte kan buhay ko—nagin agom ko siya pag-abot nin panahon!

Kan maaraman kan Nanay ni Eunice na nag-aadal ini nin Bibliya, sinabi niya sa prinsipal kan eskuwelahan na kumbinsiron si Eunice na pumundo sa pag-adal. Ginibo iyan kan prinsipal asin kinumpiskar pa ngani kaini an mga publikasyon na ginagamit ni Eunice sa pag-adal nin Bibliya. Pero, determinado si Eunice na magdanay na maimbod ki Jehova. Kan gusto na niyang magpabawtismo, sinabihan siya kan mga magurang niya, “Pag mag-Saksi ni Jehova ka, papalayason mi ika!” Sa edad na 17, naghali si Eunice sa harong ninda asin nakiistar sa sarong pamilyang Saksi na harani sa lugar ninda. Ipinagpadagos niya an pag-adal nin Bibliya asin kan huri nagpabawtismo. Kan ikasal kami kan 1960, dai nag-atender an mga magurang niya. Pero, pag-abot nin panahon, iginagalang na ninda kami huli sa samong mga tinutubod asin sa paagi mi nin pagpadakula sa samuyang mga aki.

Púla kaming mag-agom, pero an pito ming aki gabos bakong púla, kaya bakong madali an pagpadakula sa sainda. Dawa arog kaiyan, hininguwa mi na makanuod sindang mag-sign tanganing magkaintindihan kaming marhay asin maitukdo mi sainda an katotoohan. Dakulang tabang sa samo an mga kakongregasyon mi. Halimbawa, tinawan kami nin halipot na surat kan kakongregasyon mi na may aki man asin sinabi niya na nagmumuda sa Kingdom Hall an saro sa mga aki mi. Kaya, naasikaso mi tulos an bagay na iyan. Apat sa mga aki mi—si James, Jerry, Nicholas, asin Steven—an maimbod na naglilingkod ki Jehova kaiba an agom asin pamilya ninda. Sindang apat gabos elder. Apuwera kaiyan, nagtatabang si Nicholas saka an agom niyang si Deborah sa sign-language translation sa sangang opisina sa Britania. Si Steven man saka an agom niyang si Shannan kaiba sa mga nagtatradusir nin sign-language sa sangang opisina sa Estados Unidos.

Sarong bulan bago an ika-40 anibersaryo kan samuyang kasal, nagadan si Eunice sa hilang na kanser. Sa masakit na panahon na idto na nakikipaglaban siya sa hilang niya, nagdanay siyang makusog huli sa pagtubod niya sa pagkabuhay liwat. Hinahalat-halat ko an aldaw na mahihiling ko giraray siya.

Kan Pebrero 2012, natumba ako asin nagkadiperensiya an piad ko. Narealisar kong kaipuhan ko nin tabang, kaya nag-istar ako sa harong kan saro kong aki asin kan agom kaini. Nakaasosyar na kami sa Calgary Sign-Language Congregation, na diyan padagos akong naglilingkod bilang elder. An totoo, ngunyan lang talaga ako nag-asosyar sa sarong kongregasyon nin sign-language! Puon 1946, nasa kongregasyon ako nin Ingles, kaya paano ko napagdanay na makusog an relasyon ko ki Jehova kan mga panahon na idto? Inataman ako ni Jehova, arog kan panuga niya sa mga aking ilo sa ama. (Sal. 10:14) Nagpapasalamat talaga ako sa gabos na nagtabang sako—sa mga nagsurat nin nota, saka sa mga nag-adal na mag-sign, pati sa mga nag-interpretar para sa sako sagkod sa pinakamakakaya ninda.

Totoo, may mga pagkakataon na nadidisganar ako saka gusto ko nang sumuko pag dai ko nasasabutan kun ano an mga sinasabi kan iba o pag garo dai naiintindihan an mga pangangaipo kan mga púla. Pero, pag namamatian ko iyan, ginigirumdom ko an sinabi ni Pedro ki Jesus: “Kagurangnan, kiisay pa man kami maduman? Yaon sa saimo an mga tataramon nin buhay na daing katapusan.” (Juan 6:66-68) Arog kan dakul na iba pang mga na púla na haloy na sa katotoohan, nanudan kong magin mapasensiya. Nanudan kong maghalat ki Jehova asin sa saiyang organisasyon, asin talagang nakinabang ako sa paggibo kaiyan! Ngunyan, dakulon nang espirituwal na kakanon sa lengguwahe ko, asin talagang maugma ako na mag-atender sa mga pagtiripon asin kumbensiyon sa American Sign Language. Iyo, nagkaigwa ako nin nakakaugma asin nakakakontentong buhay sa paglilingkod ki Jehova, an satong kahuruhalangkawing Diyos.