1, 2. (a) Kan banggi bago siya magadan, anong impormasyon an itinao ni Jesus sa mga disipulo niya? (Hilingon an ritrato sa itaas.) (b) Taano ta mahalaga na isaisip niyato kun taano ta naghuhulit kita? (c) Ano an pag-uulayan niyato?

KAN huring banggi bago siya magadan, nakipag-ulay nin haloy si Jesus sa saiyang mga disipulo. Sinigurado niya sa sainda na namumutan niya sindang marhay. Sinambit niya man sa sainda an ilustrasyon dapit sa puon nin ubas na tinukar ta sa nakaaging artikulo. Paagi sa ilustrasyon na iyan, dinagka ni Jesus an mga disipulo niya na ‘padagos na mamunga nin dakul’—na padagos na ihulit an mensahe kan Kahadian.—Juan 15:8.

² Pero, sinabi ni Jesus bako sana kun ano an kaipuhan na gibuhon kan saiyang mga disipulo, kundi pati man kun taano ta dapat nindang gibuhon iyan. Sinabi niya sa sainda an mga dahilan kun taano ta dapat na isagibo an paghuhulit. Taano ta mahalaga na pag-isipan niyato an mga dahilan na iyan? Pag isinasaisip niyato kun taano ta kaipuhan tang padagos na maghulit, napapahiro kitang padagos na magtao nin “patotoo sa gabos na nasyon.” (Mat. 24:13, 14) Kaya, pag-ulayan ta an apat na basado sa Kasuratan na dahilan kun taano ta naghuhulit kita. Pag-uulayan ta man an apat na regalo hali ki Jehova na nakakatabang sa sato na padagos na mamunga.

3. (a) Anong dahilan kun taano ta naghuhulit kita an nasa Juan 15:8? (b) Ano an irinerepresentar kan mga ubas sa ilustrasyon ni Jesus, asin taano ta angay iyan?

³ An pinakamahalagang dahilan kun taano ta naghuhulit kita iyo na pamurawayon si Jehova asin pakangbanalon an saiyang pangaran sa gabos na tawo. (Basahon an Juan 15:1, 8.) Mangnuhon na ikinumparar ni Jesus an saiyang Ama, si Jehova, sa sarong paraataman o paratanom nin ubas. Ikinumparar ni Jesus an saiyang sadiri sa puon nin ubas, asin an saiyang mga parasunod sa mga sanga. (Juan 15:5) Kaya an ubas angay na ilustrasyon para sa bunga kan Kahadian na nagigin bunga kan mga parasunod ni Cristo. Sinabi ni Jesus sa mga apostol niya: “An sakuyang Ama napapamuraway kaini, na kamo padagos na namumunga nin dakul.” Kun paanong nagtatao nin onra sa paraataman an puon nin ubas na namumunga nin marahay na mga ubas, nagtatao man kita nin onra o kamurawayan ki Jehova pag ibinabalangibog ta an mensahe kan Kahadian sa pinakamakakaya ta.—Mat. 25:20-23.

4. (a) Sa anong mga paagi ta napapakangbanal an pangaran nin Diyos? (b) Ano an namamatian mo dapit sa pribilehiyo na pakangbanalon an pangaran nin Diyos?

⁴ Sa anong paagi napapakangbanal kan satong gibuhon na paghuhulit an pangaran nin Diyos? Dai ta na magigibong magin mas banal an pangaran nin Diyos. Dati nang lubos an pagigin sagrado o pagigin banal kaiyan. Pero pag-isipan an sinabi ni propeta Isaias: “Si Jehova nin mga hukbo—siya an Saro na dapat nindong ibilang na banal.” (Isa. 8:13, NW) An sarong paagi tanganing mapakangbanal ta an pangaran nin Diyos iyo na ibilang iyan na napapalain sa gabos na iba pang pangaran asin tabangan an iba na ibilang iyan na banal. (Mat. 6:9) Halimbawa, paagi sa pagbalangibog kan katotoohan dapit sa marahayon na mga kuwalidad ni Jehova asin kan saiyang dai maliliwat na katuyuhan para sa katawuhan, idinedepensa ta an pangaran nin Diyos sa mga kaputikan asin pagpakaraot ni Satanas. (Gen. 3:1-5) Pag hinihinguwa ta man na tabangan an mga tawo sa teritoryo na masabutan na maninigo si Jehova “na mag-ako kan kamurawayan asin kan onra asin kan kapangyarihan,” napapakangbanal ta an pangaran nin Diyos. (Kap. 4:11) Si Rune, na 16 na taon nang payunir, nagsabi: “Pag iniisip-isip ko an oportunidad na itinao sako na magin saksi kan Kaglalang kan uniberso, talagang ipinagpapasalamat ko iyan. Dahil diyan, nagkakaigwa ako nin pagmawot na padagos na maghulit.”

5. (a) Anong dahilan kun taano ta naghuhulit kita an nasa Juan 15:9, 10? (b) Paano idinuon ni Jesus an pangangaipo na magtagal?

⁵ Basahon an Juan 15:9, 10. An satong udok sa pusong pagkamuot ki Jehova asin ki Jesus sarong mahalagang dahilan kaya ihinuhulit ta an mensahe kan Kahadian. (Mar. 12:30; Juan 14:15) Sinabihan ni Jesus an saiyang mga disipulo na bako lang sinda dapat na nasa pagkamuot niya kundi “magdanay [sa saiyang] pagkamuot.” Taano? Huling an pamumuhay bilang tunay na disipulo ni Cristo sa pag-agi nin mga taon nangangaipo nin pakatagal. Idinuon ni Jesus an pangangaipo na magtagal paagi sa pauruutrong paggamit kan iba-ibang porma kan terminong “magdanay” sa saiyang mga tataramon na nakasurat sa Juan 15:4-10.

6. Paano ta maipapahiling na gusto tang magdanay sa pagkamuot ni Cristo?

⁶ Paano ta maipapahiling na gusto tang magdanay sa pagkamuot ni Cristo asin danay niya kitang uyunan? Paagi sa pagsunod sa mga pagbuot ni Jesus. Garo man sana sinasabi sa sato ni Jesus, ‘Magin masinunod ka sako.’ Pero, an ipinapagibo sana sa sato ni Jesus iyo an mga bagay na ginibo niya man mismo, huling sinabi pa niya: “Kun paanong ako, inuutob ko an mga tugon kan Ama asin nagdadanay ako sa saiyang pagkamuot.” Nagtao sa sato si Jesus nin arugan.—Juan 13:15.

7. Ano an koneksiyon kan pagigin masinunod asin pagkamuot?

⁷ Mapadapit sa koneksiyon kan pagigin masinunod asin pagkamuot, nainot nang sinabi ni Jesus  sa mga apostol niya: “An siisay man na minaako kan sakuyang mga tugon asin nag-uutob kaiyan iyo an namumuot sa sako.” (Juan 14:21) Saro pa, paagi sa pag-utob kan pagbuot ni Jesus na maghulit, ipinapahiling man niyato na namumutan ta an Diyos huling mababanaag sa mga pagbuot ni Jesus an kaisipan kan saiyang Ama. (Mat. 17:5; Juan 8:28) An pagkamuot na ipinapahiling ta binabalusan ni Jehova asin ni Jesus paagi sa pagpadanay sa sato sa saindang pagkamuot.

8, 9. (a) Ano pa an ibang dahilan kun taano ta naghuhulit kita? (b) Taano ta napapahiro kita na padagos na maghulit kan mga tataramon na nasa Ezequiel 3:18, 19 asin 18:23?

⁸ Igwa pa kitang dahilan tanganing padagos na maghulit. Naghuhulit kita tanganing magtao nin patanid. Sinambit sa Bibliya na si Noe “sarong parahulit.” (Basahon an 2 Pedro 2:5.) Malinaw na kaiba sa ginibo niyang paghuhulit bago an Baha an pagtao nin patanid dapit sa padangadang na kalaglagan. Taano ta nasabi ta iyan? Risahon an sinabi ni Jesus: “Huli ta kun paanong kan mga aldaw bago an Baha, an mga tawo nagkakarakan asin nag-iirinom, an mga lalaki nag-aaragom saka an mga babayi nagpapaaragom, sagkod na uminabot an aldaw na naglaog sa arka si Noe, asin dai sinda nagmangno sagkod na uminabot an Baha asin inaranod sinda gabos, magigin siring man kaiyan an presensiya kan Aki nin tawo.” (Mat. 24:38, 39) Sa ibong kan kawaran nin interes kan mga tawo, maigot na ibinalangibog ni Noe an nagpapatanid na mensahe na itinao sa saiya.

⁹ Ngunyan, ihinuhulit ta an mensahe kan Kahadian tanganing tawan nin oportunidad an mga tawo na maaraman an katuyuhan nin Diyos para sa katawuhan. Arog ni Jehova, gustong-gusto niyato na akuon kan mga tawo an mensahe tanganing padagos sindang “mabuhay.” (Ezeq. 18:23) Kasabay kaiyan, pag naghuhulit kita sa harong-harong asin sa publiko, pinapatanidan ta an pinakadakul na tawo na madatong an Kahadian nin Diyos asin tatapuson kaiyan an maraot na kinaban na ini.—Ezeq. 3:18, 19; Dan. 2:44; Kap. 14:6, 7.

10. (a) Anong dahilan kun taano ta naghuhulit kita an nasa Mateo 22:39? (b) Iistorya kun paano tinabangan ni Pablo asin Silas an bantay kan presuhan sa Filipos.

¹⁰ May saro pang mahalagang dahilan tanganing magpadagos kita sa paghuhulit: Naghuhulit kita huling namumutan ta an satong kapwa. (Mat. 22:39) Napapahiro kita kan pagkamuot na iyan na magpadagos sa gibuhon na ini huling aram tang posibleng magbago an sabuot kan mga tawo pag nagbago an saindang kamugtakan. Pag-isipan an eksperyensiya ni apostol Pablo asin kan kaiba-iba niyang si Silas. Sa siyudad nin Filipos, iprineso sinda kan mga parakontra. Dangan, sa kamatangaan nin banggi, biglang naglinog sa presuhan asin nagkaburuksan an mga pinto kaiyan. Natakot an bantay huling paghuna niya nagdurulag an mga preso kaya mahugot na kuta siya. Pero nagkurahaw si Pablo: “Dai mo iyan paggibuhon!” Naghapot an natatakot na bantay: “Ano an dapat kong gibuhon para maligtas?” Sinabi ninda sa saiya: “Magtubod ka sa Kagurangnan na Jesus, asin maliligtas ka.”—Gibo 16:25-34.

11, 12. (a) Paano magkakonektar an pangyayari dapit sa bantay asin an satong ministeryo? (b) Gusto niyato na magin andam kita para gibuhon an ano?

¹¹ Paano magkakonektar an pangyayari dapit sa bantay asin an satong gibuhon na paghuhulit? Pag-isipan ini: Saka sana nagbago an sabuot kan bantay asin naghagad nin tabang pagkatapos kan linog. Sa kaagid na paagi, may mga indibidwal ngunyan na dai nag-aako kan mensahe kan Bibliya an tibaad  magbago an sabuot asin maghanap na nin tabang pag biglang natanyog nin grabeng problema an buhay ninda. Halimbawa, tibaad may mga tawo sa satong teritoryo na biglang nahali sa haloy na nindang trabaho asin dai makapaniwala sa nangyari. An iba tibaad grabe an paghadit huli sa pagkaraot kan relasyon nindang mag-agom. Asin an iba tibaad dai aram an gigibuhon kan maaraman nindang may malala sindang hilang, o tibaad nagmumundong marhay huli sa pagkagadan nin mahal sa buhay. Pag napapaatubang sa arog kaiyan na mga problema, may mga indibidwal na tibaad maghapot na dapit sa katuyuhan nin buhay, na kaidto dai man ninda ihinahapot. Tibaad maihapot pa ngani ninda, ‘Ano an dapat kong gibuhon para maligtas?’ Pag makaulay ta sinda, tibaad gusto na nindang magdangog sa satong mensahe nin paglaom sa kainot-inuting pagkakataon sa saindang buhay.

¹² Kaya paagi sa padagos tang paghuhulit nin may kaigutan, nagigin andam kita para magtao nin karangahan sa mga tawo sa panahon na tibaad handa na sindang akuon iyan. (Isa. 61:1) Si Charlotte, na 38 taon nang nasa bilog na panahon na paglilingkod, nagsabi: “Mayong direksiyon an buhay kan mga tawo ngunyan. Kaipuhan nindang matawan nin pagkakataon na madangog an maugmang bareta.” Narisa ni Ejvor, na 34 taon nang payunir: “Urog kasuarin man, dakul na tawo ngunyan an nakakamati nin grabeng kamunduan. Gusto ko talaga sindang tabangan. Napapahiro ako kaiyan na maghulit.” Tunay nanggad, an satong pagkamuot sa kapwa sarong mahalagang dahilan na magpadagos sa satong ministeryo!

13, 14. (a) Anong regalo an sinambit sa Juan 15:11? (b) Paano ta mamamatian an kaugmahan na namatian ni Jesus? (c) Ano an epekto sa satong ministeryo kun igwa kita nin kaugmahan?

¹³ Kan huring banggi bago siya magadan, sinambit man ni Jesus sa mga disipulo niya an dapit sa nagkapirang regalo na makakatabang sa sainda na padagos na mamunga na may pakatagal. Ano an mga regalong iyan, asin paano kita nakikinabang diyan?

¹⁴ An regalong kaugmahan. Makakapagabat daw sa sato an pagsunod sa pagbuot ni Jesus na maghulit? Dai, kabaliktaran ngani. Pagkasambit kan ilustrasyon dapit sa puon nin ubas, sinabi ni Jesus na bilang mga parahulit kan Kahadian makakamati kita nin lubos na kaugmahan. (Basahon an Juan 15:11.) Sa katunayan, sinigurado niya sa sato na mamamatian ta an kaugmahan na namatian niya. Paano? Arog kan nasambit kasubago, ikinumparar ni Jesus an saiyang sadiri sa puon nin ubas asin an saiyang mga disipulo sa mga sanga. An puon an nagsusuportar sa mga sanga kaiyan. Sagkod na nakakonektar diyan an mga sanga, makakaresibi sinda nin tubig asin sustansiya na nag-aagi sa puon. Sa kaagid na paagi, sagkod na nagdadanay kitang kasaro ni Cristo paagi sa maingat na pagsunod sa saiyang mga lakad, maeeksperyensiyahan ta an kaparehong kaugmahan na namamatian niya sa paggibo kan kabutan kan saiyang Ama. (Juan 4:34; 17:13; 1 Ped. 2:21) Si Hanne, na labing 40 taon nang payunir, nagsabi: “An kaugmahan na pirmi kong namamatian pagkatapos magluwas sa ministeryo nakakapahiro sa sako na magpadagos sa paglilingkod ki Jehova.” Iyo, an nagdadanay na kaugmahan nagtatao sa sato nin kusog tanganing padagos na maghulit dawa sa masakit na mga teritoryo.—Mat. 5:10-12.

15. (a) Anong regalo an sinambit sa Juan 14:27? (b) Taano ta nakakatabang sa sato an katuninungan na padagos na mamunga?

¹⁵ An regalong katuninungan. (Basahon an Juan 14:27.) Sa nainot na pangyayari kan huring bangging idto bago siya magadan, sinabi ni Jesus sa mga apostol niya: “Itinatao ko sa saindo an sakuyang katuninungan.” Paano an regalong iyan—an saiyang katuninungan—makakatabang sa sato na mamunga? Mantang nagtatagal kita, namamatian ta sa satong puso an nagdadanay na katuninungan huling aram ta na inuuyunan kita ni Jehova asin ni Jesus. (Sal. 149:4; Roma 5:3, 4; Col. 3:15) Si Ulf, na 45 taon nang nasa pambilog na panahon na paglilingkod, nagsabi: “Mapagal an maghulit, pero  nagtatao iyan nin tunay na satispaksiyon asin kahulugan sa buhay ko.” Nagpapasalamat nanggad kita na binendisyunan kita nin nagdadanay na panglaog na katuninungan!

16. (a) Anong regalo an sinambit sa Juan 15:15? (b) Paano magdadanay na amigo ni Jesus an mga apostol?

¹⁶ An regalong magin amigo ni Jesus. Pagkasambit ni Jesus kan pagmawot niyang “malubos” an kaugmahan kan saiyang mga apostol, ipinaliwanag niya sa sainda an kahalagahan kan pagpahiling nin mapagsakripisyong pagkamuot. (Juan 15:11-13) Dangan, sinabi niya: “Inapod ko na kamong mga amigo.” Mahalagang marhay nanggad na regalo iyan—an magin amigo ni Jesus! Ano an kaipuhan gibuhon kan mga apostol para magdanay na amigo niya? Kaipuhan nindang “padagos na mamunga.” (Basahon an Juan 15:14-16.) Mga duwang taon bago kaini, ininstruksiyunan ni Jesus an mga apostol niya: “Sa pagduman nindo, maghulit kamo, na nagsasabi: ‘An Kahadian kan kalangitan harani na.’” (Mat. 10:7) Kaya sa huring bangging idto, dinagka niya sinda na magtagal sa gibuhon na pinunan ninda. (Mat. 24:13; Mar. 3:14) Dipisil an pag-utob kan pagbuot ni Jesus, pero puwede sindang magin mapanggana—asin sa siring, magdanay na amigo niya. Paano? Sa tabang kan saro pang regalo.

17, 18. (a) Anong regalo an sinambit sa Juan 15:16? (b) Paano makakatabang sa mga disipulo ni Jesus an regalong iyan? (c) Anong mga regalo an nakakapakusog sa sato ngunyan?

¹⁷ An regalong mga pamibi na sinisimbag. Sinabi ni Jesus: “Ano man an hagadon nindo sa Ama sa ngaran ko, [itatao] niya iyan sa saindo.” (Juan 15:16) Siguradong napakusog kan panugang iyan an mga apostol! * Dai ninda lubos na nasabutan kaidto na madali nang magadan an saindang Lider. Pero may tabang sindang makukua. Andam si Jehova na simbagon an mga pamibi ninda para sa ano man na tabang na kaipuhan ninda tanganing maisagibo an pagbuot na ihulit an mensahe kan Kahadian. Asin dai nahaloy pagkatapos, talagang nahiling ninda kun paano sinimbag ni Jehova an saindang mga pamibi para sa tabang.—Gibo 4:29, 31.

¹⁸ Totoo man iyan ngunyan. Mantang padagos kitang namumunga na may pakatagal, nagigi kitang mga amigo ni Jesus. Dugang pa, makakasigurado kita na andam si Jehova na simbagon an satong mga pamibi para sa tabang na mapangganahan an mga ulang na puwedeng mapaatubang sa sato mantang ihinuhulit ta an maugmang bareta kan Kahadian. (Fil. 4:13) Nagpapasalamat nanggad kita huling sinisimbag ni Jehova an satong mga pamibi asin na amigo ta si Jesus! An mga regalong ini na hali ki Jehova nakakapakusog sa sato na padagos na mamunga.—Sant. 1:17.

19. (a) Taano ta padagos kitang nakikikabtang sa gibuhon na paghuhulit? (b) Ano an mga makakatabang sa sato na matapos an gibuhon na itinao nin Diyos?

¹⁹ Arog kan pinag-ulayan sa artikulong ini, padagos kitang nakikikabtang sa paghuhulit tanganing pamurawayon si Jehova asin pakangbanalon an saiyang pangaran, tanganing ipahiling na namumutan ta si Jehova asin si Jesus, tanganing lubos na magpatanid, asin tanganing ipahiling na namumutan ta an satong kapwa. Dugang pa, an mga regalong kaugmahan, katuninungan, pagigin amigo ni Jesus, asin mga pamibi na sinisimbag nakakapakusog sa sato na matapos an gibuhon na itinao nin Diyos. Mauugma nanggad si Jehova na mahiling an satong bilog na kalag na paghihinguwang ‘padagos na mamunga nin dakul’!