IHINULA ni Jesus na an saiyang mga parasunod magkakaigwa nin abundang ani sa panahon na ini nin katapusan. (Mat. 9:37; 24:14) Hilingon kun paano iyan nagin totoo sa kakaibang paagi sa sarong lugar sa Transcarpathia, Ukraine. Sa tulo sanang magkararaning banwaan sa lugar na iyan, igwang 50 kongregasyon asin labing 5,400 na parahayag. * Sa katunayan, Saksi ni Jehova an 1 sa 4 na tawo kan total na populasyon kan tulong banwaan na iyan!

Anong klase daw an teritoryo duman? Si Vasile, na sarong brother duman, nagsabi: “Iginagalang kan mga tawo digdi an Bibliya, mapagpahalaga sinda sa hustisya, ugos an relasyon kan magkakapamilya, asin talagang matinabang sa kada saro.” Sinabi pa niya: “Dai sinda pirming uyon sa mga tinutubod ta. Pero pag may ipinahiling ka saindang hali sa Bibliya, atentibo sindang madangog.”

Siyempre, may kakaibang mga kadipisilan na inaatubang an satong mga tugang sa arog kaiyan na lugar na may halangkaw na ratio nin parahayag sa populasyon. Halimbawa, may sarong kongregasyon na igwa nin 134 parahayag pero 50 sanang harong an nasa teritoryo ninda! Ano an ginigibo kan mga parahayag sa sitwasyon na ini?

Dakul na tugang an naghihinguwang makapaghulit kun sain dakula an pangangaipo. “Sa teritoryo kan kongregasyon mi, an ratio 2 harong sa 1 parahayag,” an sabi nin sarong 90 anyos na brother na si Ionash. “Naghuhulit ako sa baryo, pero bago nagluya an salud ko dai pa sana nahahaloy, nagbibiyahe man ako nin mga 160 kilometros pasiring sa sarong teritoryo na mayo pa nin parahayag, na diyan naghuhulit ako sa lengguwaheng Hungarian.” Kaipuhan na magsakripisyo kan mga parahayag tanganing makapaghulit sa ibang teritoryo. “Tanganing makasakay sa tren, nagmamata ako nin alas 4 nin aga asin dagos-dagos na naghuhulit sagkod alas 6 nin banggi pag mabiyahe na pabalik an tren. Ginigibo ko iyan kaidto nin duwa o tulong beses sa sarong semana,” an sabi ni Ionash. Para sa saiya, sulit daw an mga paghihinguwa niya? “Nakamati ako nin dakulang kaugmahan sa arog kaiyan na ministeryo,” an sabi niya. “Nagkapribilehiyo akong matabangan an sarong pamilyang nakaistar sa harayong lugar na manudan an katotoohan.”

Siyempre dai man kaya kan gabos sa mga kongregasyon sa lugar na ini na magbiyahe nin harayo. Pero an gabos, kaiba na an may edad na mga parahayag, naghihinguwang lubos na makobrehan an lokal na teritoryo. Bilang resulta, an total na bilang kan nag-atender sa Memoryal kan 2017 sa tulong banwaan na ini haros doble kan bilang kan mga parahayag—o kabanga kan kabilugan na populasyon. Mayong duda, sain man kita maglingkod, igwa pa man giraray nin “dakul [na gigibuhon] sa gibuhon kan Kagurangnan.”—1 Cor. 15:58.