Nabago kan nakakatakot na pangyayaring iyan an buhay ko dahil diyan ko pinunan na hanapon an Kaglalang. Pero bago ko iistorya an sunod na nangyari kan madiklom na bangging idto, iistorya ko nguna an mga eksperyensiya ko kan aki pa ako na nakaimpluwensiya sa kaisipan ko saka nagpahiro sako na hanapon an Diyos.

Namundag ako kan 1937 sa Guesnain, sarong banwa sa norteng parte kan France na pagmina an kabuhayan. Paramina si Tatay, asin nanudan ko saiya an kahalagahan kan pagigin mahigos sa trabaho. Habuon ni Tatay na may naaapi, asin naarog ko iyan saiya. Dahil kaiyan, pag nahihiling niyang marauton an kamugtakan kan mga minero sa trabaho, minahiro siya para sa kapakanan ninda. Para makatabang sa kamugtakan ninda, nagbabali si Tatay sa mga unyon nin mga trabahador saka mga strike. Suyaon man siya sa namamasdan niyang pagsagin-sagin kan mga padi sa lugar mi. Dakul sainda maluho an pamumuhay; pero naghahagad sinda nin kakanon saka kuwarta sa mga tios na minero. Dahil uyamon si Tatay sa paggawi kan mga padi, dai niya na ako pigtukduan nin ano man na manungod sa relihiyon. An totoo ngani, dai lamang kami nag-ulay manungod sa Diyos.

 Mantang nagdadakula ako, naaanggot na man akong marhay sa inhustisya. Saro diyan an diskriminasyon sa mga dayuhan na nakaistar sa France. Nagsa-soccer kami kan mga aki nin mga imigrante asin nauugma akong kaiba sinda. Saka si Nanay ngani Polish bako man na French. Gustong-gusto ko nang mahali an diskriminasyon sa rasa saka magin pantay-pantay an pagtrato sa gabos.

Kan 1957, puwersahan akong inapod na magserbi sa militar. Iyan an dahilan kaya yaon ako kaidto sa kabukidan nin Algeria sa madiklom na banggi na inistorya ko kasubago. Pagkatapos kong magkurahaw nin “Diyos ko! O Diyos ko!” Paghuna ko kalaban na suldados an mahihiling ko, layas na asno man sana palan! Maray na lang talaga! Dawa arog kaiyan, dahil sa pangyayaring iyan—saka sa giyera mismo—mas pinag-isipan ko na an kahulugan nin buhay. Taano ta yaon kita digdi? Nagmamalasakit daw sato an Diyos? Magkakaigwa pa daw kita nin nagdadanay na katuninungan?

Pag-abot nin panahon, kan magbakasyon ako sa harong kan mga magurang ko, may nakaulay akong Saksi ni Jehova. Tinawan niya ako nin kopya kan La Sainte Bible, sarong Katolikong traduksiyon kan Bibliya sa lengguwaheng French. Pinunan ko iyan na basahon pagbalik sa Algeria. May sarong teksto diyan na talagang nakapaisip sako—an Kapahayagan 21:3, 4. Sabi diyan: “An tolda nin Diyos yaon sa katawuhan . . . Asin papahidon niya an gabos na luha sa saindang mga mata, asin an kagadanan mawawara na. Dai na man magkakaigwa nin pagmundo, o nin pagtangis, o nin kulog.” * Nasurpresa talaga ako sa nabasa ko. Naisip ko, ‘Totoo daw ’yan?’ Kan panahon na iyan, haros mayo talaga akong aram manungod sa Diyos saka sa Bibliya.

Kan 1959, natapos an sakong serbisyo militar, dangan nabisto ko si François na sarong Saksi. Tinukduan niya ako nin dakul na katotoohan sa Bibliya. Halimbawa, ipinahiling niya sako sa Bibliya na may personal na pangaran an Diyos—Jehova. (Sal. 83:18) Ipinaliwanag man ni François na hahalion ni Jehova an inhustisya sa daga, gigibuhon na paraiso an daga, asin uutubon an mga tataramon na nasa Kapahayagan 21:3, 4.

Lohikal na marhay talaga an mga katukduan na iyan, saka naabot kaiyan an puso ko. Pero, naanggot man akong marhay sa mga padi saka gusto ko sindang kondenaron dahil sa mga katukduan ninda na mayo man palan sa Bibliya! Garo impluwensiyado pa man giraray palan ako kan kaisipan ni Tatay, saka bako akong mapasensiya. Gusto ko pag naisip ko, gibuhon na tulos!

Tinabangan akong kumalma ni François saka kan mga bago kong amigong Saksi. Ipinaliwanag ninda na an trabaho nin mga Kristiyano bako na maghusgar kundi magtao nin paglaom paagi sa maugmang bareta kan Kahadian nin Diyos. Iyan an trabahong ginibo ni Jesus asin an trabahong itinao niya sa mga parasunod niya. (Mat. 24:14; Luc. 4:43) Kinaipuhan ko man na makanuod na makipag-ulay sa mga tawo sa mabuot saka sa mataktikang paagi, ano man an mga paniniwala ninda. Sinasabi kan Bibliya: “An uripon kan Kagurangnan dai kaipuhan na makiiwal, kundi kaipuhan na magin mabuot sa gabos.”—2 Tim. 2:24.

Ginibo ko an kinakaipuhan na mga pagbabago asin nagpabawtismo bilang Saksi ni Jehova kan 1959  sa sarong pansirkitong asembleya. Diyan nabisto ko an hoben na sister na si Angèle. Nagustuhan ko siya. Dangan pinunan kong bisitahon an kongregasyon niya, tapos kan 1960 nagpakasal kami. Mahusayon talaga siyang babayi saka agom, asin mahalagang marhay na regalo siya hali ki Jehova.—Tal. 19:14.

Sa paglihis nin mga taon, nakanuod ako nin dakul na importanteng leksiyon sa madunong saka eksperyensiyadong mga brother. An saro sa pinakamahalagang nanudan ko iyo ini: Tanganing magin mapanggana sa ano man na dipisil na sitwasyon, kaipuhan tang magin mapakumbaba asin iaplikar an madunong na sadol na nasa Talinhaga 15:22, na an sabi: “May nahahaman kun may dakul na parakonseho.” (NWT)

Kan 1964, nahiling ko na talagang totoo an ipinasabong na mga tataramon na iyan. Kan taon na iyan, nagpuon akong maglingkod bilang paraataman nin sirkito. Nagdadalaw ako sa mga kongregasyon para pakusugon an mga tugang saka an espirituwalidad ninda. Pero, 27 anyos pa sana ako kaidto saka kulang pa sa eksperyensiya. Kaya may mga nagigibo akong sala. Pero hininguwa kong makanuod sa mga sala ko. Urog sa gabos, nakanuod ako nin dakul na mahalagang leksiyon sa mahuhusay saka eksperyensiyadong mga “parakonseho.”

Nagigirumduman ko kan baguhan pa sana akong paraataman nin sirkito, pagkatapos kong dalawon an sarong kongregasyon sa Paris, sinabi sako nin sarong maygurang sa espirituwal na brother kun puwede kaming mag-ulay na kami sanang duwa. “Iyo, mayong problema,” an sabi ko.

Hinapot niya ako, “Louis, pag nagbibista an doktor sa sarong pamilya, siisay an pighahanap niya?”

“Su may hilang,” an simbag ko

Tapos sinabi niya: “Iyo, tama. Pero narisa taka lang kaya na an haros purupirmi mong iniibanan idtong makukusog sa espirituwal, arog kan paraataman sa kongregasyon. Dakul sa kongregasyon mi nin mga tugang na pinangluluyahan nin buot, baguhan, o masusupgon. Maaapresyar nindang marhay kun tatawan mo sinda nin panahon, lalo na kun dadalawon mo sinda para makaibanan sindang magkakan.”

May punto saka mahalagang marhay su sinabi kan brother na idto. Napahiro an puso ko kan pagkamuot niya para sa mga karnero ni Jehova. Kaya hinalon ko an pride ko tapos inaplikar ko tulos su sinabi niya. Nagpapasalamat ako ki Jehova dahil sa mga brother na arog niya.

Kan 1969 asin 1973, inasignaran ako na pangatamanan an Food Service Department sa duwang internasyonal na kumbensiyon sa Colombes, Paris. Sa 1973 na kumbensiyon, mga 60,000 katawo an kaipuhan  na pakakanon sa laog nin limang aldaw. Dai mi aram kun paano mi magigibo iyan. Pero sa giraray, an solusyon iyo an sadol na nasa Talinhaga 15:22—magkonsulta sa madunong. Naghagad akong sadol sa eksperyensiyadong mga lalaki na maygurang sa espirituwal. Kaiba sainda an mga parabuno, parauma, paraluto, saka mga parasaod. Sa pagtarabangan mi, nagibo mi an dakulaon na asignasyon na iyan.

Kan 1973, inimbitaran kami ni agom na maglingkod sa Bethel sa France. Dipisilon giraray an inot kong nagin asignasyon. Kaipuhan kong makahanap nin paagi para mapadarahan nin mga literatura an mga tugang sa nasyon nin Cameroon, sa Aprika. Ipinagbawal kaidto an satong gibuhon sa nasyon na iyan puon 1970 sagkod 1993. Sa giraray, dai ko aram kun paano ko magigibo iyan. Siguro narisa iyan kan sarong brother na nangangataman sa gibuhon sa France, kaya pinakusog niya ako: “Kaipuhan na marhay kan mga tugang ta sa Cameroon an espirituwal na kakanon. Pakakanon ta sinda!” Asin iyan man nanggad an ginibo mi.

Nagkapirang beses akong nagbiyahe sa mga nasyon sa palibot kan Cameroon para makitagbuan sa mga elder hali sa nasyon na iyan. Tinabangan ako kan makusog an buot saka maingat na mga brother na iyan na magibo an kinakaipuhan na areglo tanganing regular na mapadarahan nin espirituwal na kakanon an mga tugang sa Cameroon. Binendisyunan ni Jehova an mga paghihinguwa mi. Sa katunayan, sa laog nin mga 20 taon, dai lamang naputulan an mga lingkod niya sa nasyon na iyan nin maski sarong isyu kan An Torrengbantayan asin kan bulanan na publikasyon na inaapod kaidtong Our Kingdom Service.

Kaidto pa sanang iniilusyunan ko siya, narisa ko na an marahay na mga kuwalidad sa espirituwal ni Angèle. Lalo pang nagin risang-risa an mga kuwalidad na iyan kan mag-agom na kami. Sa katunayan, kan mismong banggi pagkakasal samo, pinakiulayan niya ako na ipamibi an manungod sa pagmawot  mi na paglingkudan si Jehova nin lubos bilang mag-agom. Sinimbag ni Jehova an pamibing iyan.

Tinabangan man ako ni Angèle na mas lubos pang magtiwala ki Jehova. Halimbawa, kan imbitaran kaming maglingkod sa Bethel kan 1973, nagduwa-duwa ako ta gustong-gusto ko an pansirkitong gibuhon. Pero ipinagirumdom sako ni Angèle na idinusay mi ki Jehova an buhay mi. Kaya bako daw na dapat ming gibuhon an ano man na ipagibo samo kan organisasyon niya? (Heb. 13:17) Tama nanggad siya! Kaya inako mi an imbitasyon na maglingkod sa Bethel. Si agom saro nanggad na babaying madunong, rasonable, balanse, saka talagang namumuot ki Jehova. Napakusog kan mga kuwalidad na iyan an relasyon mi bilang mag-agom saka nakatabang iyan na makagibo kami nin marahay na mga desisyon.

Dawa ngunyan na may edad na kami, mahusay saka mapagsuportar pa man giraray na agom si Angèle. Halimbawa, para makaatender sa teokratikong mga paadalan, na an dakul diyan sa lengguwaheng Ingles, pinunan mi ni Angèle na maigot na adalan an lengguwaheng iyan. Kaya nag-iba kami sa sarong kongregasyon na Ingles an lengguwahe, dawa labi na kaming 70 anyos kan panahon na idto. Dahil sa mga paninimbagan ko bilang miyembro kan Komite kan Sangay sa France, dipisil mag-adal nin ibang lengguwahe. Pero nagtinabangan kami ni Angèle. Ngunyan na labi na kaming 80, padagos kaming nag-aandam sa mga pagtiripon sa kongregasyon sa lengguwaheng Ingles asin French. Hinihinguwa mi man na parating makikabtang sagkod sa pinakamakakaya mi sa ministeryo pati na sa kongregasyon. Binendisyunan ni Jehova an mga paghihinguwa ming makanuod na mag-Ingles.

Kan 2017, nag-ako kami nin sarong pambihirang bendisyon. Nagkapribilehiyo kami na magklase sa School for Branch Committee Members and Their Wives, na ginibo sa Watchtower Educational Center sa Patterson, New York.

Si Jehova talagang iyo an Kahuruhalangkawing Instruktor. (Isa. 30:20) Kaya bakong makangangalas na nakukua kan saiyang mga lingkod—gurang man o hoben—an pinakamarahay na edukasyon na posible! (Deut. 4:5-8) Iyo, nahiling ko na an mga hoben na nagdadangog ki Jehova saka sa mga eksperyensiyadong brother saka sister nag-uuswag talaga sa espirituwal asin nagigin mapangganang mga adulto. Ipinapagirumdom sato kan Talinhaga 9:9: “Hirasan mo an tawong madunong, asin magigin siyang mas madunong. Tukduan mo an sarong matanos, asin madudugangan niya an saiyang nanunudan.” (NWT)

Sa pana-panahon, hinuhurop-hurop ko an madiklom saka makatakot na bangging idto sa kabukidan sa Algeria mga 60 taon na an nakaagi. Dai ko lamang hunaon na marahayon na puturo palan an naghahalat sako. Kadakul kong nanudan sa iba! Talagang tinawan ako ni Jehova, pati man si Angèle, nin magayunon saka nakakaugmang buhay. Kaya determinado kami na nungkang magpundo na makanuod sa satong Ama sa langit saka sa madunong asin eksperyensiyadong mga brother saka sister na namumuot sa saiya.