1-2. Anong mga kadipisilan an napapaatubang sa dakul na Saksi?

DINAGKA ni apostol Pablo si Timoteo kaiba na an gabos na Kristiyano na lubos na utubon an saindang ministeryo. (2 Tim. 4:5) Gabos kita seryosong ginigibo an sadol ni Pablo. Pero, may mga kadipisilan. Para sa dakul sa mga tugang ta, kaipuhan talaga nin kusog nin buot para makikabtang sa paghuhulit. (2 Tim. 4:2) Halimbawa, isipa an mga tugang na nakaistar sa mga kadagaan na may restriksiyon sa satong gibuhon o ipinagbabawal pa ngani iyan. Naghuhulit sinda dawa ngani aram ninda na puwede sindang mapreso!

² Manlain-lain na problema an napapaatubang sa mga lingkod ni Jehova na puwedeng makapaluya kan buot ninda. Halimbawa, dakul an kaipuhan na magtrabaho nin dakul na oras tangani sanang maitao an panginot na mga pangangaipo kan pamilya ninda. Gusto nindang mas makikabtang sa ministeryo, pero pagal-pagal na sinda sa katapusan kan semana. An iba limitado nang marhay an nagigibo dahil sa nagdadanay na hilang o paggurang; tibaad ngani dai na ninda kayang maghali sa harong. Asin may mga tugang man na pirming nakakamati na mayo sindang halaga. Si Mary, * sarong sister na taga Middle East, nagsabi: “Masakiton labanan an negatibong mga namamatian ko—nakakapagal talaga sa emosyon. Tapos nakokonsiyensiya ako dahil nababawasan kaiyan an panahon saka kusog ko para sa ministeryo.”

3. Ano an pag-uulayan ta sa artikulong ini?

³ Ano man an sitwasyon ta, kaya kitang tawan ni Jehova kan kusog na makayanan an satong mga problema asin makapaglingkod pa man giraray saiya sagkod sa itinutugot kan kamugtakan ta. Bago ta pag-ulayan kun paano kita matatabangan ni Jehova, aramon ta nguna kun paano niya pinakusog si Pablo asin si Timoteo  para maisagibo ninda an saindang ministeryo sa ibong nin mga kadipisilan.

4. Ano an mga kadipisilan na napaatubang ki Pablo?

⁴ Napaatubang si Pablo sa dakul na kadipisilan. Kinaipuhan niya nin kusog lalo na kan hinampak siya, ginapo, saka iprineso. (2 Cor. 11:23-25) Hayagan na inadmitir ni Pablo na kaipuhan niyang maigot na labanan an negatibong mga emosyon niya. (Roma 7:18, 19, 24) May tinagalan man siyang sarong klase nin “tunok sa laman,” na ipinakimahirak niya sa Diyos na mahali.—2 Cor. 12:7, 8.

5. Ano an naisagibo ni Pablo sa ibong kan mga kadipisilan na napaatubang saiya?

⁵ Tinawan ni Jehova nin kusog si Pablo tanganing maisagibo niya an saiyang ministeryo sa ibong kan gabos na kadipisilan na napaatubang saiya. Pag-isipan an naisagibo ni Pablo. Halimbawa, kan nakapreso siya sa harong—sa kustodiya kan Roma—maigot niyang idinepensa an maugmang bareta sa atubangan kan Judiong mga lider asin tibaad sa atubangan kan mga opisyal nin gobyerno. (Gibo 28:17; Fil. 4:21, 22) Naghulit man siya sa dakul na kabilang sa Guwardiya kan Emperador, saka nagpatotoo siya sa gabos na nagbisita saiya. (Gibo 28:30, 31; Fil. 1:13) Kan panahon man na iyan, pinasabngan si Pablo na gumibo nin mga surat na pinapakinabangan kan tunay na mga Kristiyano sagkod ngunyan. Apuwera kaiyan, napakusog kan halimbawa ni Pablo an kongregasyon sa Roma, kaya an mga tugang “lalo [pang nagpahiling] nin kusog nin buot sa pagpahayag kan tataramon nin Diyos na daing takot.” (Fil. 1:14) Limitado kun minsan an kayang gibuhon ni Pablo, pero ginibo niya an pinakamakakaya niya sa sitwasyon niya, asin “nagin sarong oportunidad lugod [iyan] para maglakop an maugmang bareta.”—Fil. 1:12.

6. Uyon sa 2 Corinto 12:9, 10, ano an nakatabang ki Pablo tanganing maisagibo an saiyang ministeryo?

⁶ Narealisar ni Pablo na an gabos na naisagibo niya sa paglilingkod ki Jehova nahaman niya bako sa sadiri niyang kusog, kundi sa kusog nin Diyos. Sinabi niya na “paagi sa kaluyahan mas lubos na nahihiling” an kapangyarihan nin Diyos. (Basahon an 2 Corinto 12:9, 10.) Paagi sa Saiyang banal na espiritu, tinawan ni Jehova nin kusog si Pablo tanganing lubos niyang maisagibo an saiyang ministeryo—dawa pinersegir siya, iprineso, saka napaatubang sa iba pang mga kadipisilan.

7. Anong mga kadipisilan an kinaipuhan na atubangon ni Timoteo para maisagibo niya an saiyang ministeryo?

 ⁷ Si Timoteo, an mas hoben na kaiba-iba ni Pablo, kinaipuhan man na magtiwala sa kapangyarihan nin Diyos tanganing maisagibo niya an saiyang ministeryo. Inibanan ni Timoteo si Pablo sa haralawig na pagbiyahe bilang misyonero. Isinugo man siya ni Pablo sa iba pang mga pagbiyahe para dalawon saka pakusugon an mga kongregasyon. (1 Cor. 4:17) Tibaad namatian ni Timoteo na kulang an kakayahan niya. Posibleng iyan an dahilan kaya sinabi saiya ni Pablo: “Dai mo nuarin man pagpabayaan na menuson nin siisay man an pagigin hoben mo.” (1 Tim. 4:12) Saka kan panahon na iyan, may sadiri man na tunok sa laman si Timoteo—“parati [siyang] nagkakahilang.” (1 Tim. 5:23) Pero aram ni Timoteo na an makapangyarihan na banal na espiritu ni Jehova tatawan siya kan kusog na kaipuhan niya para maihulit an maugmang bareta asin makapaglingkod sa mga tugang.—2 Tim. 1:7.

8. Paano ni Jehova pinapakusog ngunyan an mga lingkod niya?

⁸ Tinatawan ngunyan ni Jehova an mga lingkod niya nin “puwersa na urog kisa sa ordinaryo” tanganing padagos sindang makapaglingkod saiya nin may kaimbudan. (2 Cor. 4:7) Pag-ulayan ta an apat na probisyon na itinao sato ni Jehova para pakusugon kita saka tabangan na magdanay na maimbod saiya: an pamibi, Bibliya, pakikiiba-iba sa mga kapwa Kristiyano, asin an satong ministeryo.

9. Paano makakatabang sato an pamibi?

⁹ Pinapakusog paagi sa pamibi. Sa Efeso 6:18, dinadagka kita ni Pablo na mamibi sa Diyos “sa lambang kamugtakan.” Dangan, sisimbagon iyan nin Diyos paagi sa pagtao sato nin kusog. Naeksperyensiyahan ni Jonnie, na taga Bolivia, an tabang na iyan kan mag-agi siya nin sunod-sunod na pagbalo. Sabay na nagkaigwa nin malalang hilang an agom saka mga magurang niya. Nasakitan na marhay si Jonnie na maitao an mga pangangaipo ninda. Nagadan an saiyang ina, tapos haluyon bago naumayan an saiyang agom saka ama. Manungod sa mga nangyari, sinabi ni Jonnie, “Pag nahahadit na ako kaidtong marhay, pirming nakakatabang sako an pagpamibi nin espesipiko.” Tinawan ni Jehova si Jonnie kan kusog na kaipuhan niya para makatagal. Naaraman man ni Ronald, na sarong elder sa Bolivia, na may kanser an saiyang ina. Nagadan ini pagkalihis nin sarong bulan. Ano an nakatabang ki Ronald na makayanan iyan? Sinabi niya: “Pag namimibi ako ki Jehova, nasasabi ko saiya an gabos na nasa puso saka nailuluwas ko an gabos na namamatian ko. Aram ko na mas nasasabutan niya ako kisa sa siisay man. Kumpara sako, mas bisto niya pa ngani an sadiri ko.” Kun minsan, tibaad dai ta aram o dai kita sigurado sa kun ano an sasabihon ta sa pamibi. Pero gusto ni Jehova na mamibi kita saiya dawa kun nasasakitan kitang sabihon an iniisip saka namamatian ta.—Roma 8:26, 27.

10. Arog kan ipinapahiling sa Hebreo 4:12, taano ta mahalagang marhay an pagbasa nin Bibliya asin paghurop-hurop sa mga binabasa ta?

¹⁰ Pinapakusog paagi sa Bibliya. Binasa ni Pablo an Kasuratan para mapakusog saka maranga siya, asin kaipuhan ta man iyan na gibuhon. (Roma 15:4) Mantang binabasa saka hinuhurop-hurop ta an Tataramon nin Diyos, puwedeng gamiton ni Jehova an saiyang espiritu para tabangan kitang mas masabutan kun paano iaaplikar an Kasuratan sa satong sitwasyon. (Basahon an Hebreo 4:12.) Si Ronald, na sinambit kasubago, nagsabi: “Nagpapasalamat ako na nagin ugali kong magbasa nin sarong porsiyon kan Bibliya kada banggi. Parati kong hinuhurop-hurop an mga kuwalidad ni Jehova saka an mamumuton na pagtrato niya sa saiyang mga lingkod. Napapakusog ako kaiyan.”

11. Paano pinakusog kan Bibliya an sarong sister na grabe an kamunduan?

 ¹¹ Kun huhurop-hurupon ta an Tataramon nin Diyos, magkakaigwa kita kan tamang kaisipan manungod sa sitwasyon ta. Pag-isipan kun paano nakatabang an Bibliya sa sarong sister na grabe an kamunduan sa pagkagadan kan agom niya. Tinawan siya nin suhestiyon nin sarong elder. Sinabi kaini na makakahanap an sister nin kapaki-pakinabang na mga leksiyon kun babasahon niya an libro nin Job. Ginibo niya iyan, pero kan inot, pigkritikar niya tulos si Job sa salang kaisipan kaini. Sa isip niya, pinatanidan niya si Job: “Job! Dai ka man magin sobra kanegatibo!” Pero narealisar niya na magkaparehong marhay sinda nin kaisipan ni Job. Nakatabang iyan saiya na itanos an kaisipan niya saka natawan siya kaiyan nin kusog na makayanan an kulog kan pagkagadan kan agom niya.

12. Paano ginagamit ni Jehova an satong mga kapagtubod para pakusugon kita?

¹² Pinapakusog paagi sa pakikiiba-iba sa mga kapwa Kristiyano. Pinapakusog man kita ni Jehova paagi sa satong mga kapagtubod. Isinurat ni Pablo na gustong-gusto na niyang ‘mapakusog siya [kan saiyang mga tugang sa espirituwal] paagi kan saindang pagtubod asin mapakusog niya man sinda paagi kan saiyang pagtubod.’ (Roma 1:11, 12) Pinapahalagahan na marhay ni Mary, na sinambit kasubago, an arog kaiyan na mga pakikiiba-iba sa mga tugang. Sinabi niya: “Ginamit ni Jehova an mga tugang na mayo lamang nganing kaaram-aram sa mga inaagihan ko. May sinasabi sindang nakakapakusog sako o kaya pinapadarahan ninda ako nin kard. Iyan talaga mismo an kaipuhan ko. Nakakatabang man iyan sako na makipag-ulay sa ibang mga sister na nag-agi man nin kaparehong mga problema saka nakanuod ako sa mga eksperyensiya ninda. Pirmi man sakong ipinapamati kan mga elder na mahalagang parte ako kan kongregasyon.”

13. Paano ta mapapakusog an lambang saro pag nasa mga pagtiripon kan kongregasyon?

¹³ An mga pagtiripon kan kongregasyon an saro sa pinakamarahay na lugar para pakusugon an lambang saro. Pag nasa pagtiripon ka, puwede mong pakusugon an iba paagi sa pagsabi sainda na padaba mo sinda asin naaapresyar mo an mga ginigibo ninda. Halimbawa, bago magpuon an pagtiripon, sinabi kan elder na si Peter sa sarong sister na an agom bakong kapagtubod: “Nakakapakusog talaga na mahiling na yaon ka. Pirmi mong inaasikaso an anom mong aki para makaatender sinda saka makakomento.” Napaluha an sister sa grabeng pasasalamat. Sinabi niya: “Aram mo tugang, iyan mismo an kaipuhan kong madangog ngunyan.”

14. Ano an puwedeng magin epekto sato kan ministeryo?

¹⁴ Pinapakusog paagi sa ministeryo. Pag sinasabi ta sa iba an mga katotoohan na nasa Bibliya, minagian an pagmati ta saka napapakusog kita, ano man an magin reaksiyon ninda. (Tal. 11:25) Naeksperyensiyahan kan sister na si Stacy kun gurano kanakakapakusog kan ministeryo. Kan matiwalag an saro niyang kapamilya, munduon siyang marhay, tapos sige niyang isip, ‘Nagkulang daw ako?’ Dai mawara-wara sa isip ni Stacy an problema. Ano an nakatabang saiya na makayanan iyan? An ministeryo! Pag naghuhulit siya, nakapokus siya sa mga tawo sa teritoryo na nangangaipo kan tabang niya. Sinabi niya: “Kan panahon na idto, tinawan ako ni Jehova nin sarong Bible study na marikas na nag-uswag. Nakapakusog na marhay iyan sako. An pinakanakakatabang sako iyo an ministeryo.”

15. Ano an manunudan mo sa sinabi ni Mary?

¹⁵ May mga nakakamating dikit sana an nagigibo ninda sa ministeryo dahil sa kamugtakan ninda. Kun nakakamati ka kaiyan, tandaan na nauugma si Jehova kun ginigibo mo an pinakamakakaya mo. Pag-isipan giraray an halimbawa ni Mary. Kan magbalyo siya sa lugar na iba an lengguwahe, namatian niyang dikiton an nagigibo  niya. Sinabi niya, “May panahon kaidto na an nagigibo ko lang magtao nin simpleng komento o magbasa nin teksto o magtao nin tract.” Dahil diyan namatian niyang kulang an kakayahan niya kumpara sa mga mahusay magtaram kan lengguwahe. Pero, binago niya an kaisipan niya. Narealisar niya na puwede siyang gamiton ni Jehova dawa limitado an saiyang kakayahan. Sinabi niya, “An nagliligtas-buhay na mga katotoohan simple pero magayon, asin kaya kaiyan na baguhon an buhay nin tawo.”

16. Ano an makakatabang sa mga dai na kayang maghali sa harong na magkaigwa nin kusog?

¹⁶ Nahihiling asin pinapahalagahan ni Jehova an pagmawot tang makikabtang sa ministeryo dawa kun dai ta na kayang maghali sa harong. Puwede niya kitang tawan nin mga oportunidad para makapatotoo kita sa mga caregiver, mga doktor, o nars. Kun ikukumparar ta an kaya tang gibuhon ngunyan sa kaya tang gibuhon kaidto, tibaad madisganar kita. Pero kun nasasabutan ta kun paano kita tinatabangan ngunyan ni Jehova, magkakaigwa kita kan kusog na kaipuhan para matagalan nin may kaugmahan an ano man na problema.

17. Uyon sa Parahulit 11:6, taano ta dapat kitang magpadagos sa satong ministeryo dawa kun dai ta tulos nahihiling an resulta?

¹⁷ Dai ta aram kun arin sa mga banhi nin katotoohan na itinatanom ta an matalubo. (Basahon an Parahulit 11:6, NWT.) Halimbawa, si Barbara, na sarong sister na labi nang 80 anyos, regular na nagpapatotoo paagi sa telepono saka surat. Sa saro sa mga surat niya, iiniba niya an Ang Bantayan na Marso 1, 2014, na may artikulong “Ang Ginawa ng Diyos Para sa Iyo.” An dai niya aram, an napadarahan niya palan sarong mag-agom na bako nang Saksi ni Jehova. Pauruutro nindang binasa an magasin. Namatian kan agom na lalaki na garo baga kinakaulay siya ni Jehova. Nagpuon na mag-atender sa mga pagtiripon an mag-agom asin pag-abot nin panahon—pagkalihis nin labing 27 taon—nagin aktibong mga Saksi giraray sinda. Isip-isipa na sana kun gurano napakusog si Barbara na mahiling an marahayon na resultang iyan dahil sana sa sarong surat!

18. Ano an puwede tang gibuhon para makinabang kita sa kapangyarihan nin Diyos?

¹⁸ Tinatawan kita ni Jehova nin dakul na oportunidad na mag-ako kan saiyang abundang kapangyarihan. Pag inaaprobetsaran ta an saiyang mga probisyon—arog kan pamibi, Bibliya, mga kapwa Kristiyano, saka an ministeryo—ipinapahiling ta na nagtitiwala kita sa kakayahan saka pagmawot ni Jehova na tabangan kita. Pirmi kitang magtiwala sa satong Ama sa langit, na nauugmang marhay na “ipahiling an saiyang kusog alang-alang sa mga bilog an puso para sa saiya.”—2 Cron. 16:9, NWT.