1-2. Ano an sarong dahilan kaya dapat kitang magin interesado sa libro nin Kapahayagan?

 INAGDA ka na daw na maghiling nin mga ritrato sa photo album kan iba? Mantang pighihiling mo an mga ritrato, dai mo bisto an kadaklan sa mga yaon diyan. Pero may sarong partikular na ritrato na nakakua kan atensiyon mo. Taano? Yaon ka kaya diyan. Mantang pighihiling mo an ritrato, pigpupurbaran mong girumdumon kun kasuarin saka kun sain pigkua iyan. Pinurbaran mo man na girumdumon kun sairisay an nasa ritrato. Interesado kang marhay sa ritratong iyan.

² An libro nin Kapahayagan garo man sana an ritratong iyan. Taano? Huli sa kisiyera duwang dahilan. Inot, an librong ini sa Bibliya isinurat para sa sato. Sa pinakainot na bersikulo kaiyan, mababasa ta: “Sarong kapahayagan ni Jesu-Cristo, na itinao nin Diyos sa saiya, tanganing ipahiling sa mga uripon niya an mga bagay na madali nang mangyari.” (Kap. 1:1) Kaya, an nakasurat sa librong iyan bako para sa mga tawo sa pangkagabsan kundi para sato na dusay na mga lingkod nin Diyos. Bilang mga lingkod nin Diyos, dai kita nagngangalas na maaraman na nakikikabtang kita sa kautuban kan mga propesiya na yaon sa interesanteng marhay na librong ini. Kaya, garo man sana yaon kita sa ritrato.

3-4. Sigun sa libro nin Kapahayagan, nuarin mauutob an mga propesiya kaiyan, asin ano an dapat na magin epekto kaiyan sa lambang saro sato?

³ An ikaduwang dahilan konektado sa kun nuarin mauutob an mga propesiyang ini. Sinambit kan may edad nang si apostol Juan kun nuarin iyan: “Paagi sa pagpasabong, napaduman ako sa aldaw kan Kagurangnan.” (Kap. 1:10) Kan isurat ni Juan an mga tataramon na iyan kan mga 96 C.E., haloy pa bago umabot an “aldaw kan Kagurangnan.” (Mat. 25:14, 19; Luc. 19:12) Pero  sigun sa propesiya sa Bibliya, nagpuon an aldaw na iyan kan 1914 kan patukawon si Jesus bilang Hadi sa langit. Puon kan taon na iyan, nagpuon na mautob an mga propesiya sa Kapahayagan na aplikado sa banwaan nin Diyos. Iyo, nabubuhay na kita ngunyan sa “aldaw kan Kagurangnan”!

⁴ Huling nabubuhay na kita sa interesanteng marhay na panahon na ini, kaipuhan tang tawan na marhay nin atensiyon an mamumuton na sadol na mababasa sa Kapahayagan 1:3: “Maugma an nagbabasa nin makusog asin an mga nagdadangog sa mga tataramon kan propesiyang ini saka nag-uutob kan mga bagay na nakasurat digdi, huli ta an itinalaan na panahon harani na.” Iyo, kaipuhan niyato na ‘basahon nin makusog,’ na ‘dangugon an mga tataramon kan propesiyang ini,’ saka ‘utubon’ iyan. Ano an nagkapira sa mga tataramon na ini na kaipuhan tang sunudon?

5. Paano idinuon kan libro nin Kapahayagan an pangangaipo na siguraduhon ta na akseptable ki Jehova an satong pagsamba?

⁵ Sa inot na kapitulo pa sana kan Kapahayagan, maaaraman niyato na aram na marhay ni Jesus an nangyayari sa mga kongregasyon kan saiyang mga parasunod. (Kap. 1:12-16, 20; 2:1) Pinapatunayan iyan kan mga mensahe ni Jesus para sa pitong kongregasyon sa Asia Minor. Sa mga mensaheng iyan, nagtao siya nin espesipikong instruksiyon para tabangan an mga Kristiyano kan inot na siglo na masiguradong akseptable ki Jehova an saindang pagsamba. Asin an mga mensaheng iyan aplikado man sa gabos na lingkod nin Diyos ngunyan. Ano an leksiyon para sa sato? Aram na marhay kan satong Lider, si Cristo Jesus, an satong kamugtakan sa espirituwal. Siya an nanginginot saka nagpoprotektar sato, asin nahihiling niya an gabos. Aram niya kun ano an kaipuhan tang gibuhon tanganing padagos kitang uyunan ni Jehova. Anong instruksiyon an itinao niya na kaipuhan tang sunudon ngunyan?

6. (a) Arog kan idinuduon sa Kapahayagan 2:3, 4, anong problema kan kongregasyon sa Efeso an ihinayag kan mensahe ni Jesus para sa sainda? (b) Ano an manunudan ta digdi?

⁶ Basahon an Kapahayagan 2:3, 4. Dai ta dapat maiwara an satong inot na pagkamuot ki Jehova. Ipinarisa kan mensahe ni Jesus para sa mga nasa kongregasyon sa Efeso na nagpahiling sinda nin pakatagal asin na padagos sindang naglingkod ki Jehova sa ibong nin manlain-lain na kadipisilan. Dawa arog kaiyan, naiwara ninda an inot nindang pagkamuot. Kaipuhan nindang ibalik giraray an pagkamuot na iyan—ta kun dai, magigin bakong akseptable an saindang pagsamba. Iyo man sa ngunyan, urog pa sa pagtagal an kaipuhan tang gibuhon. Kaipuhan na tama an dahilan kan pagtagal ta. Interesado an satong Diyos bako sana sa kun ano an ginigibo ta kundi pati man sa kun taano ta ginigibo ta iyan. Mahalaga saiya an satong mga motibo dahil inaasahan niya na nagsasamba kita saiya huling namumutan ta siyang marhay asin nagpapasalamat kita saiya.—Tal. 16:2; Mar. 12:29, 30.

7. (a) Arog kan mababasa sa Kapahayagan 3:1-3, anong problema an nahiling ni Jesus sa kongregasyon sa Sardis? (b) Ano an kaipuhan tang gibuhon?

⁷ Basahon an Kapahayagan 3:1-3. Dapat kitang magdanay na mata asin alerto. Iba man an problema kan mga Kristiyano sa kongregasyon sa Sardis. Dawa ngani aktibo sinda kaidto sa espirituwal, nababawasan na an kaigutan ninda sa paglilingkod sa Diyos. Kaya sinabihan sinda ni Jesus na “magmata.” Anong patanid an itinatao kaiyan sato? Siyempre, dai lilingawan ni Jehova an satong mga ginibo. (Heb. 6:10) Dawa arog kaiyan, dai ta dapat isipon na igo na an mga nagibo ta kaidto sa paglilingkod ki  Jehova. Dawa ngani tibaad mas dakul na an mga limitasyon ta ngunyan kisa kaidto, kaipuhan tang padagos na magin sibot sa “gibuhon kan Kagurangnan,” na nagdadanay na mata asin alerto sagkod sa katapusan.—1 Cor. 15:58; Mat. 24:13; Mar. 13:33.

8. Ano an manunudan ta sa sinabi ni Jesus sa mga tugang sa Laodicea, na mababasa sa Kapahayagan 3:15-17?

⁸ Basahon an Kapahayagan 3:15-17. Dapat na magin maigot kita sa satong pagsamba asin bilog na pusong gibuhon iyan. Ipinahiling kan mensahe ni Jesus sa mga taga Laodicea an saro pang problema. “Maimbong” an saindang pagsamba. Dahil sa kawaran ninda nin entusiyasmo, sinabihan sinda ni Jesus na “miserable asin kahirak-hirak” an saindang kamugtakan. Kaipuhan nindang magpahiling nin naglalaad na kaigutan para ki Jehova asin sa pagsamba saiya. (Kap. 3:19) Ano an leksiyon para sa sato? Kun medyo nabawasan an satong kaigutan, kaipuhan na hinguwahon tang pakusugon an satong pagpapahalaga sa espirituwal na mga kayamanan na igwa kita. (Kap. 3:18) Dai ta nanggad gugustuhon na madisturbo kita kan grabeng pagmawot na magkaigwa nin komportableng buhay ngunyan, na huli kaiyan ipinapanduwa ta na lang sa buhay ta an espirituwal na mga aktibidad.

9. Arog kan ipinaparisa kan mga mensahe ni Jesus sa mga Kristiyano sa Pergamo saka sa Tiatira, anong peligro an kaipuhan tang likayan?

⁹ Dapat tang isikwal an mga tukdo kan mga apostata. Sinaway ni Jesus an nagkapira sa Pergamo huling nagkakawsa sinda nin pagkabaranga asin mga sekta. (Kap. 2:14-16) Kinomendaran niya an mga tugang sa Tiatira na linikayan an “harararom na bagay ni Satanas,” saka dinagka niya sinda na “pangaptan” an katotoohan. (Kap. 2:24-26) An nagkapirang Kristiyano diyan na maluya an espirituwalidad asin tinugutan an saindang sadiri na madara nin salang mga tukdo kaipuhan na magsulsol. Paano man kita ngunyan? Dapat tang isikwal an ano man na katukduan na kontra sa kaisipan ni Jehova. An mga apostata “nagsasagin man ngayang maki-Diyos pero dai man talaga iyan nahihiling sa buhay ninda.” (2 Tim. 3:5) Mas pasil na maaraman kun baga sala an sarong tukdo asin isikwal iyan pag maigot tang pinag-aadalan an Tataramon nin Diyos.—2 Tim. 3:14-17; Jud. 3, 4.

10. Ano pang leksiyon an manunudan ta sa sinabi ni Jesus sa kongregasyon sa Pergamo saka Tiatira?

¹⁰ Dapat na dai kita gumibo nin ano man na klase nin imoralidad o na kunsintihon iyan. May saro pang problema sa Pergamo saka sa Tiatira. Kinondenar ni Jesus an nagkapirang tugang sa mga kongregasyon na iyan dahil dai ninda isinikwal  an imoralidad. (Kap. 2:14, 20) Ano an leksiyon para sa sato? Dai ta asahan na kukunsintihon kita ni Jehova kun magibo kita nin ano man na klase nin imoralidad, dawa pa kun dakul na taon na kitang naglilingkod saiya saka dakul kitang pribilehiyo ngunyan. (1 Sam. 15:22; 1 Ped. 2:16) Inaasahan niya na danay tang susunudon an saiyang halangkaw na mga pamantayan sa moral dawa pa magparababa an mga pamantayan sa moral kan kinaban.—Efe. 6:11-13.

11. Ano an mga nanudan ta sagkod sa puntong ini? (Hilingon man an kahon na “ Mga Leksiyon Para sa Sato Ngunyan.”)

¹¹ Paano ta susumaryuhon an mga nanudan ta sagkod sa puntong ini? Nahiling ta na kaipuhan tang siguraduhon na akseptable ki Jehova an satong pagsamba. Kun naggigibo kita nin sarong bagay na magigin dahilan na dai magin akseptable an satong pagsamba, kaipuhan tang humiro tulos tanganing itanos an mga bagay-bagay. (Kap. 2:5, 16; 3:3, 16) Pero may sinambit pa si Jesus sa saiyang mga mensahe sa mga kongregasyon. Ano iyan?

12. Ano an sinabi ni Jesus sa mga tugang sa Esmirna saka Filadelfia na dapat tang tawan nin atensiyon ngunyan? (Kapahayagan 2:10)

¹² Pag-ulayan ta ngunyan an mga mensahe ni Jesus sa kongregasyon sa Esmirna saka Filadelfia. Sinabi niya sa mga Kristiyano diyan na dai matakot na mag-agi nin persekusyon, huling babalusan an saindang kaimbudan. (Basahon an Kapahayagan 2:10; 3:10) Ano an leksiyon para sa sato ngunyan? Dapat tang asahan an persekusyon asin magin andam na tagalan iyan. (Mat. 24:9, 13; 2 Cor. 12:10) Taano ta mahalaga an pagirumdom na ini?

13-14. Ano an epekto sa mga lingkod nin Diyos kan mga pangyayaring sinambit sa Kapahayagan kapitulo 12?

¹³ Sinasabi sato kan libro nin Kapahayagan na pepersegiron an mga lingkod nin Diyos sa satong panahon—“sa aldaw kan Kagurangnan.” Sinasambit kan Kapahayagan kapitulo 12 na nagkaigwa nin giyera sa langit pakaestablisar mismo kan Kahadian nin Diyos. Si Miguel—an pinamuraway na si Jesu-Cristo—asin an saiyang hukbo nakipaglaban ki Satanas asin sa mga demonyo. (Kap. 12:7, 8) Bilang resulta, nadaog an mga kaiwal na idto nin Diyos asin ihinulog sinda digdi sa daga, na nagdara nin dakulang pagsakit sa daga asin sa mga tawo. (Kap. 12:9, 12) Paano an pangyayaring ini nakaapektar sa mga lingkod nin Diyos?

¹⁴ Sunod, sinasabi sato kan Kapahayagan kun ano an nagin reaksiyon ni Satanas. Dai na siya makakapasiring sa langit, kaya ipinokus niya an saiyang kaanggutan sa mga natatadang linahidan, na iyo an mga representante sa daga kan Kahadian nin Diyos asin “igwa kan gibuhon na pagpatotoo mapadapit ki Jesus.” (Kap. 12:17; 2 Cor. 5:20; Efe. 6:19, 20) Paano nautob an propesiyang ini?

15. Siisay an irinerepresentar kan “duwang saksi” na sinambit sa Kapahayagan kapitulo 11, asin ano an nangyari sa sainda?

 ¹⁵ Sinutsutan ni Satanas an mga kaiwal nin Diyos na atakihon an linahidan na mga brother na nanginginot kaidto sa gibuhon na paghuhulit kan Kahadian. An mga prominente sa sainda iyo an irinerepresentar kan “duwang saksi” na sinambit na ginadan. * (Kap. 11:3, 7-11) Kan 1918, walo sa responsableng mga brother an hinatulan na nagkasala base sa putik na mga akusasyon, asin an lambang saro sainda sinentensiyahan nin halawig na pagkapreso. Sa pagmansay nin tawo, garo baga “ginadan” an gibuhon kan mga linahidan na idto.

16. Ano an dai inaasahan na nangyari kan 1919, pero ano an padagos na ginigibo ni Satanas puon kan panahon na iyan?

¹⁶ Sinabi man kan propesiya sa Kapahayagan kapitulo 11 na an “duwang saksi” bubuhayon giraray pagkatapos nin halipot na panahon. Bilang kautuban, may dai inaasahan na nangyari kan mismong sunod na taon pagkapreso sainda. Kan Marso 1919, pinaluwas sa presuhan an linahidan na mga brother na idto, asin kan huri iinatras na an mga demanda laban sa sainda. An mga tugang tulos-tulos na nagbalik sa gibuhon—an gibuhon na pang-Kahadian. Pero dai iyan nakapapundo sa mga pag-atake ni Satanas sa mga lingkod nin Diyos. Puon kaiyan, nagpaabot si Satanas nin sarong “salog” nin persekusyon laban sa gabos na lingkod nin Diyos. (Kap. 12:15) Iyo, “digdi kaipuhan an pakatagal asin pagtubod” kan lambang saro sa sato.—Kap. 13:10.

17. Anong dai inaasahan na tabang an inako kan mga lingkod nin Diyos dawa ngani puntirya sinda kan mga pag-atake ni Satanas?

¹⁷ Dangan, ipinarisa kan Kapahayagan kapitulo 12 na an mga lingkod nin Diyos mag-aako nin dai inaasahan na tabang. Garo man sana hinalon “kan daga . . . an salog” nin persekusyon. (Kap. 12:16) Iyan mismo an nangyari. Kun minsan, nakakatabang sa banwaan nin Diyos an mga elemento sa kinaban ni Satanas na mas makatanusan, arog kan nagkapirang hudisyal na sistema. Dakul na beses na nanggana sa kaso an mga lingkod ni Jehova na huli kaiyan nagkamit sinda nin katalingkasan maski paano. Paano ninda ginamit an katalingkasan na iyan? Lubos nindang inaprobetsaran an ano man na oportunidad para utubon an gibuhon na itinao sainda ni Jehova. (1 Cor. 16:9) Ano an kaiba sa gibuhon na ini?

18. Ano an panginot niyatong gibuhon sa huring mga aldaw na ini?

 ¹⁸ Iprinopesiya ni Jesus na ibabalangibog kan saiyang mga parasunod “an maugmang [bareta] kan Kahadian” nin Diyos sa bilog na daga bago umabot an katapusan. (Mat. 24:14) Mantang ginigibo iyan, nakikinabang sinda sa suporta nin sarong anghel, o sarong grupo nin mga anghel, na ilinaladawan na igwa nin “daing katapusan na maugmang bareta na ipapahayag sa mga nag-iistar sa daga, sa lambang nasyon asin tribo asin lengguwahe saka banwaan.”—Kap. 14:6.

19. Ano pang mensahe an dapat na ihulit kan mga namumuot ki Jehova?

¹⁹ An maugmang bareta kan Kahadian bako sana an mensahe na kaipuhan na ipahayag kan mga lingkod nin Diyos. Kaipuhan man nindang suportaran an gibuhon kan mga anghel na ilinaladawan sa Kapahayagan kapitulo 8 sagkod 10. Ipinapaisi kan mga anghel na ini an sunod-sunod na kapahamakan para sa mga nagsisikwal sa Kahadian nin Diyos. Kaya, ipinapahayag kan mga Saksi ni Jehova an sarong mensahe nin paghatol, na iinagid sa ‘pag-uran nin yelo asin kalayo,’ na ipinapahayag an mga paghukom nin Diyos sa manlain-lain na elemento kan maraot na kinaban ni Satanas. (Kap. 8:7, 13) Kaipuhan na maaraman kan mga tawo na harani na an katapusan tanganing makagibo sinda nin dakulang mga pagbabago sa saindang buhay asin makaligtas sa aldaw kan kaanggutan ni Jehova. (Sof. 2:2, 3) Pero dai magugustuhan kan kadaklan an mensaheng ini. Kaipuhan ta nin kusog nin buot tanganing maipahayag iyan. Sa panahon kan dakulang kasakitan, an pangultimong mensahe nin paghukom magigin urog pang makulog para sa mga tawo.—Kap. 16:21.

20. Ano an pag-uulayan ta sa sunod na duwang artikulo?

²⁰ Talagang kaipuhan tang utubon an “mga tataramon kan propesiyang ini” huling kalabot kita sa kautuban kan mga nababasa ta sa libro nin Kapahayagan. (Kap. 1:3) Pero paano ta maimbod na matatagalan an persekusyon asin padagos na magibo an satong kabtang sa kusog-buot na pagpahayag kan mga mensaheng ini? Mapapakusog kita huli sa duwang bagay: inot, sa ihinahayag kan libro nin Kapahayagan manungod sa mga kaiwal nin Diyos asin, ikaduwa, sa mga bendisyon na makakamtan ta sa maabot na panahon kun magdadanay kitang maimbod. Pag-uulayan ta an mga iyan sa sunod na duwang artikulo.