1. Anong mahalagang desisyon an kaipuhan na gibuhon kan gabos na tawo?

 AN MGA tawo ngunyan igwa nin mahalagang desisyon na kaipuhan na gibuhon. Susuportaran daw ninda si Jehova bilang an lehitimong Tagapamahala kan uniberso, o makampi sinda sa saiyang maringis na kaiwal, si Satanas na Diyablo? Kaipuhan nindang pumili kun siisay sa duwa an susuportaran ninda. An magigin desisyon ninda an madeterminar kun baga mabubuhay sinda sagkod lamang o dai. (Mat. 25:31-33, 46) Sa panahon kan “dakulang kasakitan,” mamarkahan sinda magsalang para sa kaligtasan o para sa kalaglagan.—Kap. 7:14; 14:9-11; Ezek. 9:4, 6.

2. (a) Dinadagka kita kan Hebreo 10:35-39 na gibuhon an ano? (b) Paano makakatabang sa sato an libro nin Kapahayagan?

² Basahon an Hebreo 10:35-39. Kun pinili mong suportaran an pamamahala ni Jehova, madunong na desisyon iyan. Gustong-gusto mo ngunyan na tabangan an iba na iyan man an gibuhon. Para magibo iyan, puwede mong gamiton an mga impormasyon sa libro nin Kapahayagan para tabangan sinda. Ihinahayag kan pambihirang librong iyan bako lang an mga mangyayari sa mga nagkokontra ki Jehova kundi itinatampok man kaiyan an mga bendisyon na itatao sa mga maimbod na nagsusuportar sa pamamahala niya. Dapat niyatong pag-adalan an mahalagang marhay na mga katotoohan na iyan. Kun gigibuhon ta iyan, mapapakusog kaiyan an determinasyon ta na padagos na maglingkod ki Jehova. Dugang pa, magagamit niyato an mga nanudan ta para tabangan an iba na makagibo nin tamang desisyon na maglingkod ki Jehova asin padagos na gibuhon iyan.

3. Ano an pag-uulayan ta sa artikulong ini?

³ Sa artikulong ini, pag-uulayan ta an mga hapot na ini: Ano  an nakatagama para sa mga nagsusuportar sa pamamahala nin Diyos? Ano an mangyayari sa mga piniling suportaran an mabangis na hayop na mapulahon an kulor, na ilinadawan sa libro nin Kapahayagan?

4. Anong grupo an nahiling ni apostol Juan na kaibanan ni Jesus sa langit?

⁴ Sa sarong bisyon, nahiling ni apostol Juan an duwang grupo nin mga tawo na nagsusuportar sa pamamahala ni Jehova asin nag-ako kan mga bendisyon na dara kan buhay na daing katapusan. An inot na grupo may bilang na 144,000. (Kap. 7:4) Kinua sinda hali sa daga tanganing magbilog nin sarong gobyerno, o Kahadian, kaiba ni Jesus sa langit. Kaibanan niya, pinamamahalaan ninda an daga. (Kap. 5:9, 10; 14:3, 4) Sa bisyon, nahiling sinda ni Juan na nakatindog kaibanan ni Jesus sa langitnon na Bukid nin Sion.—Kap. 14:1.

5. Ano an madali nang mangyari sa mga natatada sa 144,000?

⁵ Sa laog nin mga siglo, ribo-ribo an pinili para magin kabtang kan 144,000. (Luc. 12:32; Roma 8:17) Pero sinabi ki Juan na an natatada sana, o sarong sadit na bilang, an buhay pa sa daga durante kan huring mga aldaw. An “mga natatada” na iyan mag-aako kan saindang ultimong “tatak” nin pag-uyon ni Jehova bago magpuon an dakulang kasakitan. (Kap. 7:2, 3; 12:17) Dangan sa dakulang kasakitan, kukuanon pasiring sa langit an natatadang iyan para makaibanan an iba pang kabilang sa 144,000, na nagadan na maimbod. Duman, magigin sindang kairibang tagapamahala ni Jesus sa Kahadian nin Diyos.—Mat. 24:31; Kap. 5:9, 10.

6-7. (a) Anong grupo an sunod na nahiling ni Juan, asin ano an naaraman ta manungod sa sainda? (b) Taano ta dapat na magin interesado sa Kapahayagan kapitulo 7 an mga kabilang sa natatada saka an “dakulang kadaklan”?

⁶ Pagkatapos mahiling an langitnon na grupo, nahiling ni Juan an “sarong dakulang kadaklan.” Bakong arog kan 144,000, mayong espesipikong bilang an grupong ini. (Kap. 7:9, 10) Ano an maaaraman ta manungod sainda? Sinabi ki Juan: “Ini an mga nakabalyo hali sa nag-aging dakulang kasakitan, asin linabahan ninda an saindang haralabang bado saka pinaputi an mga iyan sa dugo kan Kordero.” (Kap. 7:14) Pagkatapos makaligtas sa dakulang kasakitan, an “dakulang kadaklan” na ini mabubuhay digdi sa daga asin mag-aako nin pambihirang mga bendisyon.—Sal. 37:9-11, 27-29; Tal. 2:21, 22; Kap. 7:16, 17.

⁷ Kita man pinili para magduman sa langit o magdanay sa daga, nahihiling ta daw an sadiri ta na kaiba duman sa ilinaladawan sa Kapahayagan kapitulo 7? Nagtutubod kita na mangyayari iyan. Nakakaugmang panahon nanggad iyan para sa duwang grupo nin mga lingkod nin Diyos! Mauugma kitang marhay na pinili tang suportaran an pamamahala ni Jehova. Ano pa an sinasabi sa sato kan libro nin Kapahayagan manungod sa dakulang kasakitan?—Mat. 24:21.

8. Paano mapuon an dakulang kasakitan, asin ano an magigin epekto kaiyan sa kadaklan na tawo?

⁸ Siring kan sinambit sa sinundan na artikulo, madali nang atakihon kan pulitikal na mga elemento kan kinaban na ini an Dakulang Babilonya, an pambilog na kinaban na imperyo nin palsong relihiyon. (Kap. 17:16, 17) An pangyayaring iyan an magigin tanda kan kapinunan kan dakulang kasakitan. Dahil daw kaiyan dakul an madesisyon na magsamba ki Jehova? Dai. Sa kabaliktaran, ipinapahiling kan Kapahayagan kapitulo 6 na sa kritikal na panahon na iyan, an mga tawong dai nagsasamba ki Jehova mapaili sa pulitikal saka komersiyal na sistema kan kinaban na ini, na ikinumparar sa mga bukid. Huling dai susuportaran kan mga tawong iyan  an Kahadian nin Diyos, ibibilang sinda ni Jehova na mga parakontra.—Luc. 11:23; Kap. 6:15-17.

9. Paano mapapalain nanggad an mga lingkod ni Jehova sa panahon kan dakulang kasakitan, asin ano an magigin resulta kaiyan?

⁹ Talagang mapapalain nanggad an maimbod na mga lingkod ni Jehova sa panahon na iyan nin grabeng kasakitan. Sinda pa man giraray an solamenteng grupo nin mga tawo sa daga na naglilingkod sa Diyos na Jehova asin nagsasayumang suportaran an “mabangis na hayop.” (Kap. 13:14-17) Huli sa marigon nindang paninindugan, maaanggot na marhay an mga nagkokontra ki Jehova. Bilang resulta, sarong koalisyon nin mga nasyon an maatake sa mga lingkod nin Diyos sa bilog na daga. An grabeng pag-atakeng ini ilinadawan sa propesiya bilang an pag-atake ni Gog nin Magog.—Ezek. 38:14-16.

10. Arog kan ilinadawan sa Kapahayagan 19:19-21, ano an magigin reaksiyon ni Jehova sa pag-atakeng iyan sa saiyang mga lingkod?

¹⁰ Ano an magigin reaksiyon ni Jehova sa maringis na pag-atakeng iyan? Sinasabi niya sa sato: “Malaad an grabeng kaanggutan ko.” (Ezek. 38:18, 21-23) Ilinaladawan kan Kapahayagan kapitulo 19 an sunod na mangyayari. Isusugo ni Jehova an Saiyang Aki para idepensa an Saiyang mga lingkod asin daugon an saindang mga kaiwal. Sa gigibuhon na iyan na pag-atake ni Jesus, kaibanan niya “an mga hukbo sa langit”—an maimbod na mga anghel pati na an 144,000. (Kap. 17:14; 19:11-15) Ano an magigin resulta kan giyerang ini? An biyong pagpuho sa gabos na tawo saka organisasyon na kontra ki Jehova!—Basahon an Kapahayagan 19:19-21.

11. Anong espesyal na okasyon an mangyayari bilang kulminasyon kan libro nin Kapahayagan?

¹¹ Imahinara na sana an mamamatian kan mga maimbod digdi sa daga huling nakaligtas sinda sa biyong paglaglag sa mga kaiwal nin Diyos! Maugmahon nanggad na panahon iyan! Dawa ngani magkakaigwa sa langit nin makusog na kurahaw nin kaugmahan pag linaglag na an Dakulang Babilonya, may saro pang bagay na magdadara nin urog pang kaugmahan. (Kap. 19:1-3) Sa katunayan, iyan an kulminasyon kan libro nin Kapahayagan—“an kasal kan Kordero.”—Kap. 19:6-9.

12. Arog kan ipinaparisa sa Kapahayagan 21:1, 2, nuarin mangyayari an kasal kan Kordero?

¹² Nuarin mangyayari an kasal? An gabos na kabilang sa 144,000 yaon na sa langit bago mismo magpuon an ralaban nin Armagedon. Alagad, bako pa iyan an panahon para sa kasal kan Kordero. (Basahon an Kapahayagan 21:1, 2.) An kasal kan Kordero mangyayari pagkatapos kan giyera nin Armagedon pag napuho na an gabos na kaiwal nin Diyos.—Sal. 45:3, 4, 13-17.

13. Ano man nanggad an magigin kahulugan kan kasal kan Kordero para sa mga kalabot diyan?

¹³ Ano man nanggad an magigin kahulugan kan kasal kan Kordero para sa mga kalabot diyan? Buweno, kun paanong pinagsasaro nin kasal an sarong lalaki asin babayi, an simbolikong kasal na ini pagsasaruon man an Hadi, si Jesu-Cristo, saka an saiyang “nobya,” an 144,000. An mahalagang pangyayaring iyan an maestablisar kan bagong gobyerno na mamamahala sa daga sa laog nin 1,000 taon.—Kap. 20:6.

14-15. Sa ano ikinumparar kan Kapahayagan kapitulo 21 an 144,000? (Hilingon an ritrato sa cover.)

¹⁴ Sunod, ikinumparar kan Kapahayagan kapitulo 21 an 144,000 sa sarong magayunon na marhay na siyudad na inaapod na “Bagong Jerusalem.” (Kap. 21:2, 9) An siyudad igwa nin 12 gapong pundasyon na diyan nakasurat “an 12 pangaran kan 12 apostol kan Kordero.” Taano ta interesante ini para ki Juan? Huling  nahiling niyang nakasurat an pangaran niya sa saro sa mga gapong iyan. Dakulaon na pribilehiyo nanggad iyan!—Kap. 21:10-14; Efe. 2:20.

¹⁵ Mayong kaagid an itsura kan simbolikong siyudad na iyan. An siyudad igwa nin mayor na tinampo na gibo sa purong bulawan, 12 trangkahan na perlas, mga pader saka pundasyon na pinagayon paagi sa mamahalon na mga gapo—asin parareho an sukol kan laba asin lakbang saka langkaw kan siyudad na iyan. (Kap. 21:15-21) Pero garo may kulang pa man giraray! Mangnuhon an sunod na sinabi ni Juan: “Mayo akong nahiling na templo diyan, huli ta an templo kaiyan iyo an Diyos na Jehova na Makakamhan sa Gabos, asin iyo man an Kordero. Asin dai na kaipuhan kan siyudad an liwanag kan saldang o kan bulan, huli ta an kamurawayan nin Diyos an nagtataong liwanag diyan, asin an Kordero an lampara kaiyan.” (Kap. 21:22, 23) An mga minakompuwesto sa Bagong Jerusalem direktang makakadulok ki Jehova. (Heb. 7:27; Kap. 22:3, 4) Kaya, si Jehova saka si Jesus an templo sa siyudad na iyan.

16. Ano an maeeksperyensiyahan kan mga tawo durante kan Sangribong Taon na Pamamahala kan Kahadian nin Diyos?

¹⁶ Nauugma nanggad an mga linahidan na hurop-hurupon an manungod sa siyudad na iyan. Pero an mga igwa nin daganon na paglaom may dahilan man na magin interesado diyan. Durante kan Sangribong Taon na Pamamahala kan Kahadian nin Diyos, an Bagong Jerusalem magdadara nin dakulon na bendisyon. Nahiling ni Juan an mga bendisyon na nagbubulos na siring sa “sarong salog nin tubig nin buhay.” Asin sa mag-ibong na gilid kan salog, igwa nin “mga kahoy nin buhay” na an mga dahon “para sa pagpaumay kan mga nasyon.” (Kap. 22:1, 2) An gabos na tawo na nabubuhay sa panahon na iyan magkakaigwa nin oportunidad na makinabang sa mga probisyon na iyan. Asin an gabos na masinunod na tawo luway-luway na magigin perpekto. Mayo na nin hilang, kulog, asin pagluha huli sa kamunduan.—Kap. 21:3-5.

17. Siring kan ipinapahiling kan Kapahayagan 20:11-13, siisay an makikinabang sa Sangribong Taon na Paghadi?

¹⁷ Siisay an makikinabang sa magayunon na mga probisyon na ini? Inot sa gabos, an dakulang kadaklan na makakaligtas sa Armagedon, pati na an mga aki na tibaad mamundag sa bagong kinaban. Pero nangangako man an Kapahayagan kapitulo 20 na bubuhayon liwat an mga gadan. (Basahon an Kapahayagan 20:11-13.) An mga nagadan kaidto na maimbod asin “matanos”  pati na an “mga bakong matanos”—na dai nagkaigwa nin igong pagkakataon na makanuod manungod ki Jehova—gabos bubuhayon liwat digdi sa daga. (Gibo 24:15; Juan 5:28, 29) Buot daw sabihon kaini gabos bubuhayon liwat sa daga durante kan Sangribong Taon na Paghadi? Dai. An mga marauton na nagsayuma sa oportunidad na maglingkod ki Jehova bago sinda nagadan dai na bubuhayon liwat. Tinawan na sinda nin pagkakataon asin napatunayan na dai sinda maninigo para mabuhay sa Paraisong daga.—Mat. 25:46; 2 Tes. 1:9; Kap. 17:8; 20:15.

18. Ano an magigin kamugtakan sa daga sa katapusan kan 1,000 taon?

¹⁸ Sa katapusan kan 1,000 taon, magigin perpekto na an gabos na nabubuhay sa daga. Dai na maaapektaran an mga tawo kan kasalan na minana ki Adan. (Roma 5:12) Biyo nang hahalion an sumpa kan kasalan na minana ki Adan. Paagi kaiyan, an gabos sa daga ‘mabubuhay’ bilang perpektong mga tawo sa katapusan kan 1,000 taon.—Kap. 20:5.

19. Taano ta kaipuhan an pangultimong pagbalo?

¹⁹ Aram ta na linabanan ni Jesus an mga paghihinguwa ni Satanas na ikompromiso niya an saiyang integridad. Nagdanay siyang maimbod sa irarom nin pagbalo. Pero arog man daw kaiyan an gigibuhon kan gabos na perpektong tawo pag tinawan si Satanas nin oportunidad na baluon sinda? Masisimbag kan lambang saro an hapot na iyan pag pinaluwas na si Satanas sa kairaruman pagkatapos kan 1,000 taon. (Kap. 20:7) An mga magdadanay na maimbod sa pangultimong pagbalong ini magkakamit nin buhay na daing katapusan asin magkakaigwa nin tunay na katalingkasan sa katapos-tapusi. (Roma 8:21) An mga marebelde lalaglagon sagkod pa man, kaibanan kan Diyablo saka kan saiyang mga demonyo.—Kap. 20:8-10.

20. Ano an pagmati mo manungod sa makangangalas na mga propesiya sa libro nin Kapahayagan?

²⁰ Ano an pagmati mo pagkatapos na pag-ulayan an halipot na sumaryong ini kan libro nin Kapahayagan? Bako daw na nakakaugmang marhay na mahiling mo mismo an kautuban kan makangangalas na mga propesiyang ini? Bako daw na napapahiro ka kaini na imbitaran an iba na umiba sa sato sa dalisay na pagsamba sa satong Diyos? (Kap. 22:17) Mantang napapahiro an satong isip asin puso kan interesanteng marhay na mga mangyayari sa maabot, gusto ta nanggad na sabihon man an mga tataramon ni apostol Juan: “Amen! Mag-abot ka na, Kagurangnan na Jesus.”—Kap. 22:20.