1-2. Ipaliwanag kun paano puwedeng magkaigwa nin mas hararom na kahulugan para sa sato an mga prinsipyo sa Bibliya pag nagbago an satong kamugtakan.

 SA ALDAW kan saindang kasal, an guwapong nobyo saka an saiyang magayon na nobya nagdadangog na marhay sa pahayag na basado sa Bibliya manungod sa pag-aguman. An mga prinsipyo na pigtutukar sa pahayag na iyan bako man bago sa sainda. Pero puon ngunyan, an impormasyon na iyan magkakaigwa na nin mas hararom na kahulugan para sa sainda. Taano? Huling iaaplikar na ninda iyan bilang mag-agom.

² Arog man kaiyan pag an sarong Kristiyanong mag-agom magin magurang na. Sa pag-agi nin mga taon, posibleng nakadangog na sinda nin nagkapirang pahayag manungod sa pagpadakula nin mga aki. Pero ngunyan, mas mapapahalagahan na ninda an mga prinsipyong iyan. Magkakaigwa na sinda nin sadiri nindang aki na papadakulaon. Dakula nanggad na responsabilidad iyan! Iyo, pag nagbago an kamugtakan ta, puwede man na magbago an pagmansay ta sa pamilyar na mga prinsipyo sa Bibliya. Iyan an sarong dahilan kaya an mga parasamba ni Jehova binabasa an Kasuratan asin, arog kan ipinagbuot sa mga hadi kan Israel, hinuhurop-hurop iyan “sa bilog [nindang] buhay.”—Deu. 17:19.

3. Ano an pag-uulayan ta sa artikulong ini?

³ Mga magurang, igwa kamo kan saro sa pinakadakulang pribilehiyo na puwedeng magkaigwa an sarong Kristiyano—an tukduan an saindong mga aki manungod ki Jehova. Pero an gusto mo iyo na dai lang basta tukduan an mga aki mo nin mga impormasyon manungod sa satong Diyos. Gusto mong tabangan an saimong mga aki na kamutan siyang marhay. Ano an puwede mong gibuhon tanganing kamutan kan mga aki mo si Jehova? Sa artikulong ini, pag-uulayan niyato an apat na prinsipyo sa Bibliya na makakatabang  saindo bilang magurang. (2 Tim. 3:16) Hihilingon ta man kun paano nakinabang an nagkapirang Kristiyanong mga magurang sa pag-aplikar sa mga sadol kan Bibliya.

4. Ano an sarong prinsipyo na makakatabang sa mga magurang na maitadom sa puso kan saindang mga aki an pagkamuot ki Jehova? (Santiago 1:5)

⁴ Prinsipyo 1: Hagadon an paggiya ni Jehova. Hagadon ki Jehova na tawan ka kan kadunungan na kaipuhan mo tanganing matabangan an saimong mga aki na kamutan siya. (Basahon an Santiago 1:5.) Siya an pinakakuwalipikadong Persona para magtao nin sadol. Igwa nin nagkapirang dahilan kun taano. Pag-ulayan ta an duwa. Inot, si Jehova an pinakaeksperyensiyado sa pagigin magurang. (Sal. 36:9) Asin ikaduwa, an madunong na mga sadol na itinatao niya pirming kapaki-pakinabang.—Isa. 48:17.

5. (a) Ano an itinatao kan organisasyon ni Jehova para tabangan an mga magurang? (b) Arog kan ipinahiling sa video, ano an nanudan mo ki Brother asin Sister Amorim sa kun paano ninda pinadakula an saindang mga aki?

⁵ Paagi kan saiyang Tataramon asin organisasyon, nagtatao si Jehova nin abundang espirituwal na kakanon na basado sa Bibliya na makakatabang saimo na padakulaon an mga aki mo na may pagkamuot ki Jehova. (Mat. 24:45) Halimbawa, makakakua ka nin dakul na praktikal na sadol sa serye nin mga artikulo na “Tabang Para sa Pamilya,” na nagluwas nin nagkapirang taon sa magasin na Gumising! asin available na ngunyan sa satong website. Dakul man na video sa jw.org an nagtatampok nin mga interbiyu saka dramatization na makakatabang sa mga magurang na maiaplikar an mga sadol ni Jehova mantang pinapadakula an saindang mga aki. *—Tal. 2:4-6.

6. Ano an namatian nin sarong ama manungod sa paggiya na itinatao kan organisasyon ni Jehova sa saindang mag-agom?

⁶ Dakul na magurang an nagpahayag kan saindang pasasalamat sa itinataong tabang ni Jehova paagi kan saiyang organisasyon. Sinabi kan ama na si Joe: “Tulo an aki mi, asin bakong madali na padakulaon sinda sa katotoohan. Pirmi kami ni agom na namimibi ki Jehova para sa tabang. Asin parati ming namamatian na pag may problema kami, sakto man na may maluwas na sarong artikulo o video na makakatabang samo na maatubang iyan. Pirmi kaming nagsasarig sa paggiya ni Jehova.” Nahiling ni Joe asin kan saiyang agom na an siring na mga probisyon  nakakatabang sa saindang mga aki na magin harani ki Jehova.

7. Taano ta mahalaga na magin mapagrisa an mga magurang sa halimbawang ipinapahiling ninda? (Roma 2:21)

⁷ Prinsipyo 2: Magtukdo paagi sa halimbawa. Pinagmamasdan na marhay kan mga aki an saindang mga magurang asin sa parati inaarog sinda. Siyempre, wara nin magurang na perpekto. (Roma 3:23) Dawa arog kaiyan, ginigibo kan madunong na mga magurang an saindang pinakamakakaya para magin marahay na halimbawa sa saindang mga aki. (Basahon an Roma 2:21.) Manungod sa mga aki, sarong ama an nagsabi: “Garo sinda mga espongha na pigsusupsop an gabos.” Sinabi niya pa: “Sasabihon ninda sato pag an ipinapahiling tang halimbawa bako nang kauyon kan hinihinguwa tang itukdo sa sainda.” Kaya kun gusto tang kamutan si Jehova kan mga aki ta, kaipuhan na makusog saka risang-risa an sato mismong pagkamuot sa saiya.

8-9. Ano an nanudan mo sa sinabi ni Andrew asin Emma?

⁸ Igwa nin dakul na paagi na matutukduan kan mga magurang an saindang mga aki na kamutan si Jehova. Mangnuha an sinabi kan 17 anyos na brother na si Andrew: “Pirming idinuduon kan mga magurang ko an kahalagahan nin pamibi. Kada banggi, namimibi si Papa kaiba ako, dawa kun nakapamibi na ako nin personal. Pirmi nindang ipinapagirumdom samo: ‘Puwede nindong kaulayon si Jehova gurano man kadakul na beses na gusto nindo.’ An pagduduon na iyan manungod sa pamibi nagkaigwa nin hararom na epekto sako, kaya ngunyan komportable akong marhay na mamibi ki Jehova saka na mansayon siya bilang sarong mamumuton na Ama.” Mga magurang, nungkang pagmenuson kun gurano puwedeng makaimpluwensiya sa mga aki nindo an saindong pagkamuot ki Jehova.

⁹ Pag-isipan man an halimbawa ni Emma. Kan bayaan kan saiyang ama an saindang pamilya, winalatan kaini an saiyang ina nin darakulang utang. Sinabi ni Emma: “Dakul na beses na nasakitan si Mama sa pinansiyal, pero pirmi niyang iniistorya kun paano inaataman saka tinatabangan ni Jehova an saiyang mga lingkod. Nahiling ko sa paagi kan pamumuhay niya na talagang nagtutubod siya diyan. Isinabuhay ni Mama an itinutukdo niya.” An leksiyon? Puwedeng makapagtukdo an mga magurang paagi sa halimbawa ninda dawa sa masakit na mga kamugtakan.—Gal. 6:9.

10. Anong mga oportunidad igwa an dakul na Israelitang magurang para makipag-ulay sa saindang mga aki? (Deuteronomio 6:6, 7)

¹⁰ Prinsipyo 3: Regular na makipag-ulay sa saindong mga aki. Ipinagbuot ni Jehova sa suanoy na mga Israelita na regular na tukduan an saindang mga aki manungod sa saiya. (Basahon an Deuteronomio 6:6, 7.) An mga magurang na idto igwa nin dakul na oportunidad sa bilog na aldaw para makipag-ulay sa saindang mga aki asin itadom sa puso ninda an pagkamuot ki Jehova. Halimbawa, an sarong Israelitang aking lalaki tibaad dakul na oras na nagtatabang sa saiyang ama sa pagtanom o sa pag-ani. An saiyang tugang na babayi tibaad haros bilog na aldaw na kaibanan kan saiyang ina asin tinatabangan ini sa pagtahi, paghabol, asin sa iba pang gibuhon sa harong. Mantang an mga magurang saka mga aki magkaibanan na nagtatrabaho, puwede sindang mag-istoryahan manungod sa dakul na mahalagang bagay. Halimbawa, puwede nindang pag-ulayan an kuwalidad ni Jehova na karahayan asin pag-isipan kun paano niya tinatabangan an saindang pamilya.

11. Ano an sarong oportunidad na makakaulay kan Kristiyanong mga magurang an saindang mga aki?

¹¹ Nagbago na an mga panahon. Sa dakul na nasyon, dai na posible para sa mga magurang saka mga aki na magkaibanan sa bilog na aldaw. An mga magurang tibaad nasa trabaho, tapos an mga aki man tibaad nasa eskuwelahan. Huli kaiyan, kaipuhan kan mga magurang na maghanap nin mga oportunidad para makaulay an saindang mga aki. (Efe. 5:15, 16; Fil. 1:10) An pampamilyang pagsamba nagtatao nin siring na oportunidad. Sinabi kan hoben na brother na si Alexander: “Pirming nag-aareglo si Papa nin pampamilyang pagsamba,  saka dai niya tinutugutan na maulang nin ano man an panahon na iyan na diyan magkairibanan kami. Pagkatapos kan pag-adal, nag-iiristoryahan na sana kami.”

12. Ano an dapat na isaisip kan payo nin pamilya mantang ginigibo an pampamilyang pagsamba?

¹² Kun saro kang payo nin pamilya, ano an puwede mong gibuhon tangani na magin nakakaugma an pampamilyang pagsamba para sa saimong mga aki? Taano ta dai gamiton an bago niyatong publikasyon na Mabuhay nin Maugma Sagkod Pa Man! sa pagkondukta nin pag-adal sa saimong mga aki? An pag-adal na iyan matao nin magayunon na oportunidad para magkaigwa nin buhay na buhay na mga pag-uulay. Gusto mo na sabihon kan saimong mga aki an mga namamatian saka ikinakahadit ninda, kaya dai paggamiton an oras na nakatagama para sa pampamilyang pagsamba tangani na sermonan o anggutan sinda. Saka hinguwahon na dai maanggot kun an saimong mga aki magpahayag nin sabuot na bakong kauyon kan mga prinsipyo sa Kasuratan. Imbes, ikaugma na sinasabi ninda an totoo nindang namamatian, saka dagkahon sinda na padagos na gibuhon iyan. Mas matatabangan mo an saimong mga aki pag aram mo kun ano talaga an namamatian ninda.

13. Sa anong iba pang mga oportunidad matatabangan kan mga magurang an mga aki ninda na rumani ki Jehova?

¹³ Mga magurang, maghanap nin mga oportunidad sa bilog na aldaw tangani na tabangan an saindong mga aki na rumani ki Jehova. Dai mo kaipuhan na halaton pa an pormal nindong sesyon nin pag-adal sa Bibliya para diyan mo sinda tukduan kan manungod sa satong mamumuton na Diyos. Mangnuha an sinabi kan inang si Lisa: “Tinabangan mi an samong mga aki na mas mabisto ninda si Jehova paagi sa mga linalang. Halimbawa, pag napapangisi an mga aki sa makangirit na mga ginigibo kan samong ayam, pigtutukdo mi sainda kun paano kaini ipinapahiling na an satong Kaglalang tatao man magngisi saka magpangisi saka ikinakaugma niya an buhay, arog ta man.”

14. Taano ta mahalaga na tabangan kan mga magurang an saindang mga aki na magin madunong sa pagpili nin mga amigo? (Talinhaga 13:20)

¹⁴ Prinsipyo 4: Tabangan an saindong mga aki na magkaigwa nin marahay na mga amigo. Malinaw na sinasabi kan Tataramon nin Diyos na an satong mga amigo igwa nin impluwensiya sa sato—magsalang marahay o maraot. (Basahon an Talinhaga 13:20.) Mga magurang, bisto daw  nindo an mga amigo kan saindong mga aki? Nakaistoryahan saka nakaibanan na daw nindo sinda? Ano an puwede nindong gibuhon para tabangan an saindong mga aki na magkaigwa nin mga amigong namumuot ki Jehova? (1 Cor. 15:33) Matatabangan nindo sinda na makagibo nin madunong na mga pagpili paagi sa pag-imbitar sa mga tugang na makusog an espirituwalidad na umiba saindo sa mga aktibidad kan saindong pamilya.—Sal. 119:63.

15. Ano an puwedeng gibuhon kan mga magurang para tabangan an saindang mga aki na magkaigwa nin marahay na mga amigo?

¹⁵ Pag-isipan an eksperyensiya kan amang si Tony. Inistorya niya kun ano an ginibo nindang mag-agom para tabangan an saindang mga aki na magkaigwa nin marahay na mga amigo: “Sa naglihis na mga taon, iniimbitaran mi ni agom sa harong an mga tugang na manlain-lain an edad saka pinaghalian. Kaibanan mi sindang nagkakakan saka nag-iiba sinda sa samong pampamilyang pagsamba. Magayunon na paagi ini para mas mabisto mi an mga namumuot saka maugmang naglilingkod ki Jehova. Bendisyon samo na padaguson sa harong mi an mga paraataman nin sirkito, misyonero, saka an iba pa. An saindang mga eksperyensiya, kaigutan, saka mapagsakripisyong espiritu nagkaigwa nin dakulang epekto sa mga aki mi asin nakatabang iyan sainda na rumani ki Jehova.” Mga magurang, magin determinado na tabangan an saindong mga aki na magkaigwa nin marahay na mga pag-iriba.

16. Paano kun sabihon kan aki mo na habo niyang maglingkod ki Jehova?

¹⁶ Paano kun sa ibong kan paggibo mo kan saimong pinakamakakaya sabihon kan saro sa mga aki mo na habo niyang maglingkod ki Jehova? Dai isipon na dai ka nagin mapanggana bilang magurang. Tinawan kita gabos ni Jehova—kaiba na an saimong aki—kan regalong libertad na magdesisyon, an kakayahan na pumili kun baga maglilingkod kita sa Diyos o dai. Kun magdesisyon an saimong aki na bayaan si Jehova, dai mawaran nin paglaom na sarong aldaw mabalik siya. Girumdumon an ilustrasyon manungod sa naparaot na aki. (Luc. 15:11-19, 22-24) An hoben na lalaking iyan naparayong marhay sa dalan nin katanusan, pero kan huri, nagbalik siya. “Ilustrasyon man lang idto,” tibaad sabihon kan iba. “Puwede daw ’yan mangyari sa totoong buhay?” Iyo nanggad! Sa katunayan, iyan an nagin eksperyensiya kan hoben na lalaking si Elie.

17. Paano ka napakusog kan eksperyensiya ni Elie?

 ¹⁷ Manungod sa saiyang mga magurang, sinabi ni Elie: “Ginibo ninda an pinakamakakaya tanganing ikatadom sa sako an pagkamuot ki Jehova saka sa Tataramon niya, an Bibliya. Pero, nagpuon akong magrebelde kan tin-edyer na ako.” Nagpuon na magkaigwa nin dobleng pamumuhay si Elie, asin sinayumahan niya an gabos na paghihinguwa kan saiyang mga magurang na tabangan siya sa espirituwal. Kan maghali na siya sa harong, naimbuwelto siya sa maraot na mga gibo. Dawa arog kaiyan, kun minsan nakikipag-ulay siya manungod sa Bibliya sa saro sa mga amigo niya. Sinabi ni Elie: “Miyentras na pauruutro kong ipinapakipag-ulay sa amigo ko an dapit ki Jehova, lalo ko man na naiisip si Jehova. Luway-luway na nagtalubo an dating dai nagtutubong mga banhi nin katotoohan kan Bibliya na nasa puso ko​—mga banhi na pinagmaigutan kaidtong itanom kan mga magurang ko.” Pag-abot nin panahon, nagbalik si Elie sa katotoohan. * Imahinara kun gurano kaugma an mga magurang niya na hininguwa nindang tukduan siya puon kan aki pa siya na kamutan si Jehova!—2 Tim. 3:14, 15.

18. Ano an namamatian mo manungod sa mga magurang na nagmamaigot na tukduan an saindang mga aki na kamutan si Jehova?

¹⁸ Mga magurang, tinawan kamo nin sarong pambihirang pribilehiyo—an padakulaon an bagong henerasyon nin mga parasamba ni Jehova. (Sal. 78:4-6) Bako iyan pasil, asin sinsero mi kamong kinokomendaran sa saindong daing pundong paghihinguwa na tabangan an saindong mga aki! Kun padagos nindong gigibuhon an saindong pinakamakakaya na tabangan an saindong mga aki na kamutan si Jehova asin padakulaon sinda sa disiplina saka sadol niya, makakasigurado kamo na mauugma an satong mamumuton na Ama sa langit.—Efe. 6:4.