1, 2. (a) Anong premyo an hinahalat-halat kan mga lingkod nin Diyos? (b) Ano an makakatabang sa sato na magpokus sa premyo? (Hilingon an ritrato sa itaas.)

AROG ni apostol Pablo, may marahayon na paglaom an linahidan na mga Kristiyano ngunyan na mag-ako kan “premyong pag-apod nin Diyos para sa langitnon na buhay.” (Fil. 3:14) Hinahalat-halat na nindang maglingkod kaiba ni Jesu-Cristo sa saiyang Kahadian sa langit asin magtrabaho kaiba niya para ibalik sa pagkaperpekto an mga tawo. (Kap. 20:6) Pambihirang paglaom nanggad iyan na itinao sa sainda nin Diyos! May ibang paglaom man na itinao sa ibang mga karnero. Hinahalat-halat na nindang makamtan an premyo na mabuhay nin daing katapusan sa daga. Nakakaugmang paglaom nanggad iyan!—2 Ped. 3:13.

² Tanganing matabangan an mga kapwa niya linahidan na magdanay na maimbod asin makamtan an premyo, dinagka sinda ni Pablo: “Danay nindong isentro an saindong mga isip sa mga bagay na nasa itaas.” (Col. 3:2) Dapat na pirmi nindang isaisip an saindang mahalagang marhay na paglaom na mabuhay sa langit. (Col. 1:4, 5) Sa katunayan, an paghurop-hurop sa mga bendisyon na itinagama ni Jehova para sa saiyang  banwaan makakatabang sa gabos na lingkod nin Diyos na magpokus sa premyo, sa langit man o sa daga an saindang paglaom.—1 Cor. 9:24.

3. Anong mga peligro an ipinatanid ni Pablo sa mga kapwa niya Kristiyano?

³ Pinatanidan man ni Pablo an mga kapwa niya Kristiyano dapit sa mga peligro na puwedeng magin dahilan na mawara sa sainda an premyo. Halimbawa, nagsurat siya para sa kongregasyon sa Colosas mapadapit sa mga palsong Kristiyano na pinupurbaran na makamtan an pag-uyon nin Diyos paagi sa pagsunod sa Katugunan imbes na paagi sa pagtubod ki Cristo. (Col. 2:16-18) May sinambit man si Pablo na mga peligro na sagkod ngunyan napapaatubang sa mga Kristiyano asin puwedeng magin dahilan na mawara sa sato an premyo. Halimbawa, ipinaliwanag niya kun paano ta malalabanan an imoral na mga pagmawot, mareresolberan an mga dai niyato pagkakaintindihan sa satong mga kapagtubod, saka kun paano maaatubang an mga kadipisilan sa pamilya. An sadol niya dapit sa mga bagay na ini kapaki-pakinabang sa sato sagkod ngunyan. Kaya, tukaron ta an pira sa mamumuton na patanid ni Pablo sa surat niya sa mga taga Colosas.

4. Taano ta an imoral na mga pagmawot puwedeng magin dahilan na mawara sa sato an premyo?

⁴ Pagkatapos niyang ipagirumdom sa saiyang mga tugang an saindang pambihirang paglaom, si Pablo nagsurat: “Kun siring, gadanon nindo an mga kabtang kan saindong hawak na yaon digdi sa daga kun manungod sa seksuwal na imoralidad, karigsukan, daing kontrol na seksuwal na hurot, nakakadanyar na pagmawot, asin kapasluan.” (Col. 3:5) An imoral na mga pagmawot puwedeng magin makusugon asin magin dahilan na mawara sa sato an satong espirituwal na mga kayamanan. Kan makabalik na sa kongregasyon an sarong brother na nakakomiter nin imoralidad, sinabi niya, “Nadara ako nin sarong makusugon na puwersa na huli kaiyan nakapag-isip-isip lang ako kan huri na an gabos.”

5. Paano ta mapoprotektaran an satong sadiri sa nakakatentar na mga sitwasyon?

⁵ Lalo nang mahalaga na mag-ingat kita pag nasa mga sitwasyon na puwedeng makasugot sa sato na ikompromiso an mga pamantayan ni Jehova sa moral. Halimbawa, sa kapinunan pa sana kan pag-ilusyunan, sarong kadunungan na magbugtak an mga magkailusyon nin malinaw na limitasyon sa pagpahiling nin kapadangatan sa kada saro arog kan pagkaputan nin kamot, paghadok, o sa mga sitwasyon na sinda sanang duwa. (Tal. 22:3) Puwede man mamugtak sa nakakatentar na sitwasyon an sarong Kristiyano pag harayo siya sa harong huli sa trabaho, o pag an makakatrabaho niya bakong kasekso. (Tal. 2:10-12, 16) Kun mapaatubang ka sa arog kaiyan na sitwasyon, magpamidbid na Saksi ni Jehova ka, gumawi nin kagalang-galang, asin tandaan na an pakipaggitilan o flirting marauton an puwedeng kaabtan. Puwede man na mas madali kitang madara sa sugot pag kita nakakamati nin depresyon. Sa mga pagkakataon na iyan, tibaad gustong-gusto niyato na may magpamati sa sato na mahalaga kita. Puwede pa nganing magin desperadong marhay kita sagkod sa punto na aakuon ta maski siisay na magpahiling sa sato nin atensiyon. Kun makamati ka nin arog kaini, maghagad nin tabang ki Jehova asin sa saimong mga kapagtubod tanganing dai mawara sa saimo an premyo.—Basahon an Salmo 34:18; Talinhaga 13:20.

6. Ano an dapat tang tandaan kun dapit sa pagpili nin libangan?

⁶ Tanganing magadan ta an satong imoral na mga pagmawot, kaipuhan niyatong isikwal an imoral na mga libangan. Dakul an pagkakaagid kan industriya nin entertainment ngunyan asin kan suanoy na Sodoma asin Gomora. (Jud. 7) Pinapaluwas kan mga produser nin entertainment na an seksuwal na imoralidad normal sanang paggawi, na mayo iyan nin makulugon na mga konsekwensiya. Kaya dapat na mag-ingat kita pirmi. Dai sana basta akuon an ano man na iinaalok kan industriya nin entertainment. Kaipuhan niyatong pilion an mga libangan na dai makakaulang sa satong pokus sa premyong buhay.—Tal. 4:23.

7. Anong mga problema an puwedeng mapaatubang sa laog kan Kristiyanong kongregasyon?

⁷ Gabos kita mauyon na sarong bendisyon an pagigin miyembro kan Kristiyanong kongregasyon. An pag-adal kan Tataramon nin Diyos sa satong mga pagtiripon asin an mabuot saka mamumuton na pagsuporta niyato sa lambang saro nakakatabang para magdanay kitang nakapokus sa premyo. Pero kun minsan, an mga dai pagkakasinabutan nagigin dahilan nin tensiyon sa mga miyembro kan kongregasyon. Kun dai niyato reresolberan an mga problemang iyan, puwede iyan pagpunan nin pagraot nin buot.—Basahon an 1 Pedro 3:8, 9.

8, 9. (a) Anong mga kuwalidad an makakatabang sa sato na makamtan an premyo? (b) Ano an makakatabang sa sato na mapagdanay an katuninungan kun may kapagtubod kitang nakakulog kan satong buot?

⁸ Dai niyato dapat pagtugutan an raot nin buot na magin dahilan na mawara sa sato an premyo. Dinagka ni Pablo an mga taga Colosas: “Bilang mga pinili nin Diyos, banal asin namumutan, isulot nindo an kapadangatan asin pagmalasakit, kabuutan, kapakumbabaan, kahuyuan, asin pagkamapasensiya. Padagos na pagpasensiyahan an lambang saro asin lubos na patawadon an lambang saro dawa pa kun an siisay man igwa nin dahilan na ireklamo an saro. Kun paanong lubos kamong pinatawad ni Jehova, iyo man an dapat nindong gibuhon. Apuwera pa kan gabos na iyan, isulot nindo an pagkamuot, huli ta iyan an bugkos nin lubos na pagkasararo.”—Col. 3:12-14.

⁹ Makakatabang sa sato an pagkamuot asin kabuutan na magin mapagpatawad. Halimbawa, kun nakulgan kita sa sinabi o ginibo kan satong kapagtubod, puwede niyatong girumdumon an mga pagkakataon na may nasabi o nagibo kita sa iba na nakakulog kan buot ninda. Bako daw na pinapahalagahan niyato an pagkamuot asin kabuutan kan satong mga tugang na pinapalampas an mga nagigibo tang sala? (Basahon an Parahulit 7:21, 22.) Lalo na kitang nagpapasalamat sa kabuutan ni Cristo huling pinagkakasararo niya an tunay na mga parasamba. (Col. 3:15) Pareho kita gabos nin namumutan na Diyos, nin mensaheng ihinuhulit, asin napapaatubang sa dakul na problemang inaatubang man kan mga kapagtubod ta. Kun mabuot asin mamumuton niyatong pinapatawad an lambang saro, makakakontribwir kita sa pagkasararo niyato bilang mga Kristiyano asin magdadanay kitang nakapokus sa premyong buhay.

10, 11. (a) Taano ta peligroso an pagigin maurihon? (b) Paano niyato malilikayan na magin maurihon tanganing dai mawara sa sato an premyo?

¹⁰ Ipinapagirumdom kan nagpapatanid na mga halimbawa sa Bibliya na an pagigin maurihon puwedeng magin dahilan na mawara sa sato an premyo. Halimbawa, nauri si Cain sa tugang niyang si Abel kaya ginadan niya ini. Nauri si Kora, Datan, asin Abiram ki Moises kaya kinontra ninda ini. Asin nauri si Hading Saul sa pagigin mapanggana ni David kaya pinurbaran niya ining gadanon. Kaya bakong makangangalas na sinasabi kan Tataramon nin Diyos: “Kun sain igwa nin pagkauri asin hilig na makipagdaugan, yaon man an kariribukan asin gabos na klase nin karatan.”—Sant. 3:16.

¹¹ Kun hihinguwahon tang magin tunay na mamumuton asin mabuot, dai tulos kita mauuri. An Tataramon nin Diyos nagsasabi: “An pagkamuot mapasensiya asin mabuot. An pagkamuot bakong maurihon.” (1 Cor. 13:4) Tanganing dai tumubo sa satong puso an pagigin maurihon, dapat tang hinguwahon na arugon an pagmansay nin Diyos sa satong mga tugang, na kita gabos kabtang nin sarong hawak, an kongregasyon. Makakatabang ini na makapahiling kita nin pakikidamay, kauyon kan ipinasabong na sadol: “Kun an sarong kabtang inuumaw, an gabos na iba pang kabtang nakikiugma diyan.” (1 Cor. 12:16-18, 26) Kaya imbes na mauri pag nag-aako nin mga bendisyon an iba, magigin maugma kita para sa sainda. Isipon an halimbawa kan aki ni Hading Saul na si Jonathan. Dai siya nauri kan lahidan si David na magin sunod na hadi. Imbes, pinakusog niya si David. (1 Sam. 23:16-18) Puwede ta man daw arugon an pagigin mabuot asin mamumuton ni Jonathan?

12. Anong maka-Kasuratan na sadol an makakatabang tanganing makamtan ta an premyo bilang pamilya?

¹² An pag-aplikar kan mga prinsipyo sa Bibliya madara nin katuninungan asin kaugmahan sa pamilya saka makakatabang na makamtan ninda an premyo. Anong maka-Kasuratan na sadol an itinao ni Pablo sa mga pamilyang Kristiyano sa Colosas? Sinabi niya: “Kamong mga agom na babayi, magpasakop kamo sa saindong mga agom na lalaki, na iyo an maninigo sa mga parasunod kan Kagurangnan. Kamong mga agom na lalaki, padagos na mamutan an saindong mga agom asin dai maanggot sa sainda na may kapaitan. Kamong mga aki, magin masinunod kamo sa saindong mga magurang sa gabos na bagay, huli ta nakakapaugma ini sa Kagurangnan. Kamong mga ama, dai nindo pag-uyamon an saindong mga aki, tanganing dai sinda pangluyahan nin buot.” (Col. 3:18-21) Siguradong mauyon kang kapaki-pakinabang sagkod ngunyan an sadol na iyan ni Pablo para sa mga agom na lalaki asin babayi, saka sa mga aki.

13. Paano puwedeng madara nin sarong Kristiyanong sister pasiring sa katotoohan an saiyang agom na bakong kapagtubod?

¹³ Paano kun saro kang agom na babayi tapos sa pagmati mo bakong tama an pagtrato sa saimo kan saimong agom na bakong kapagtubod? Magrarahay daw an sitwasyon kun makikiargumento ka dapit sa paggawi niya? Dawa kun mapasunod mo siya sa gusto mo, madadara mo daw siya kaiyan sa katotoohan? Posibleng dai. Pero kun ipapahiling mong iginagalang mo an pagkapayo kan saimong agom, makakatabang iyan na magin matuninong an saindong  pamilya, mauumaw mo si Jehova, asin tibaad madara mo pa ngani siya pasiring sa tunay na pagsamba; paagi kaiyan makakamtan nindo pareho an premyo.—Basahon an 1 Pedro 3:1, 2.

14. Ano an dapat gibuhon nin sarong Kristiyanong brother kun dai siya iginagalang kan saiyang agom na bakong kapagtubod?

¹⁴ Paano kun saro kang agom na lalaki tapos sa pagmati mo dai ka iginagalang kan saimong agom na bakong kapagtubod? Mapapahiro mo daw siyang mas igalang ka kun sisilyakan mo siya para ipahiling na ika an dapat masunod? Dai nanggad! Linalauman nin Diyos na ipapahiling mo an saimong pagkapayo sa mamumuton na paagi, bilang pag-arog ki Jesus. (Efe. 5:23) Ipinahiling ni Jesus an saiyang pagkapayo sa saiyang kongregasyon sa mamumuton asin mapasensiyang paagi. (Luc. 9:46-48) Paagi sa pag-arog sa halimbawa ni Jesus, puwedeng madara sa katotoohan kan agom na lalaki an saiyang agom.

15. Paano maipapahiling kan sarong Kristiyanong lalaki na namumutan niya an saiyang agom?

¹⁵ Sinabi sa mga agom na lalaki: “Padagos na mamutan an saindong mga agom asin dai maanggot sa sainda na may kapaitan.” (Col. 3:19) An sarong mamumuton na agom na lalaki tinatawan nin onra an saiyang agom paagi sa pagdangog sa mga opinyon kaini asin sa pagpahalaga sa mga sinasabi kaini. (1 Ped. 3:7) Minsan ngani dai niya man puwedeng sunudon an gabos na sabihon kan saiyang agom, pero sa parati makakagibo siya nin mas balanseng desisyon kun kokonsultahon niya ini. (Tal. 15:22) An sarong mamumuton na agom na lalaki dai pinipirit an saiyang agom na igalang siya, kundi, hinihinguwa niyang makua an paggalang kaini. An sarong agom na lalaki na namumutan an saiyang agom asin mga aki, posibleng marhay na magkaigwa nin pamilya na maugmang naglilingkod ki Jehova asin magkamit kan premyong buhay.

16, 17. Kun ika sarong hoben, paano mo malilikayan na mauyam sa saimong mga magurang?

¹⁶ Paano kun saro kang tin-edyer tapos sa pagmati mo dai ka naiintindihan asin istriktuhon an saimong Kristiyanong mga magurang? An pagkauyam mo puwede pa nganing magin dahilan na magduwa-duwa ka kun baga an paglilingkod ki Jehova an pinakamarahay na paagi nin buhay. Pero kun tutugutan mo an pagmating ini na papunduhon ka sa paglilingkod ki Jehova, dai mahahaloy marerealisar mong mayo nang ibang tunay na nagpapadangat sa saimo kundi an saimong may takot sa Diyos na mga magurang asin an kongregasyon.

¹⁷ Kun dai ka itinatanos kan saimong mga magurang, bako daw na magdududa ka kun baga talagang namumutan ka ninda? (Heb. 12:8) Pero posibleng an ikinakauyam mo iyo an paagi nin pagdisiplina kan mga magurang mo. Imbes na pagparaisipon kun paano ka dinidisiplina, hinguwahon na sabuton an posibleng dahilan kaya ginigibo ninda iyan. Kaya magdanay na kalmado saka hinguwahon na dai tulos maanggot pag kinikritika. Sinasabi kan Tataramon nin Diyos: ‘Nagpupugol kan saiyang mga sinasabi an igwa nin kadunungan, an tawong may pakamidbid [magdadanay na kalmado].’ (Tal. 17:27) Gibuhon na pasuhan na magin sarong maygurang na tawo na kalmadong nag-aako nin sadol, na iniisip an pakinabang kaiyan imbes na magparapokus sa kun paano iyan itinao. (Tal. 1:8) Sarong bendisyon na magkaigwa nin mga magurang na tunay na namumutan si Jehova. Siguradong gusto nindang tabangan ka na makamtan an premyong buhay.

18. Taano ta determinado kang magdanay na nakapokus sa premyo?

¹⁸ Marahayon nanggad hurop-hurupon an premyong makakamtan ta—iyan man imortal na buhay sa langit o buhay na daing katapusan sa paraisong daga. Sigurado an paglaom na iyan, huling basado iyan sa panuga kan mismong Kaglalang. Mapadapit sa Paraiso, sinabi nin Diyos: ‘An daga mapapano kan [kaaraman dapit] ki Jehova.’ (Isa. 11:9) Sa panahon na iyan, an gabos na nakaistar sa daga tutukduan nin Diyos. Talagang sulit na hinguwahon na makamtan an premyong iyan. Kaya pirming isaisip an panuga ni Jehova, asin dai niyato pagtugutan an ano man na magin dahilan na mawara sa sato an premyo!