1. Ano an puwede niyatong magibo paagi sa pagkanta?

SARONG midbid na lyricist an minsan nagsabi: “Paagi sa mga tataramon, makakaisip ka nin mga kaisipan. Paagi sa musika, mamamatian mo an sarong pagmati. Pero paagi sa kanta, mamamatian mo an sarong kaisipan.” May mas marahay pa daw na kaisipan na puwede tang ‘mamati’ kisa sa mga kaisipan na nagpapahayag nin pag-umaw asin pagkamuot sa satuyang Ama sa langit, si Jehova? Kaya bakong makangangalas na an pagkanta sarong mahalagang marhay na kabtang kan dalisay na pagsamba, iyan man ginigibo nin solo o kaiba kan mga lingkod nin Diyos sa kongregasyon.

2, 3. (a) Ano an tibaad namamatian kan iba dapit sa pagkanta nin makusog kaiba kan kongregasyon? (b) Anong mga hapot an pag-uulayan niyato?

² Pero nasusupog ka daw na magkanta nin makusog sa kongregasyon? Sa ibang kultura, tibaad nasusupog an mga lalaki na magkanta pag dakul an tawo. An kaisipan na ini puwedeng makaapektar sa bilog na kongregasyon, lalo na kun an mga nanginginot nag-aalangan na magkanta o may ibang ginigibo mantang nagkakanta an gabos na iba pa sa kongregasyon.—Sal. 30:12.

³ Kun an pagkanta talagang ibinibilang niyato na kabtang kan satong pagsamba, siguradong dai ta gugustuhon na maghali o na mayo kita sa kabtang na iyan kan programa kan pagtiripon. Kaya, dapat na haputon ta an satong sadiri: ‘Paano ko minamansay an pagkanta sa  satong mga pagtiripon para sa pagsamba? Paano ko malalabanan an ano man na takot na puwedeng makaulang sa sako na maugmang magkanta? Asin ano an puwede kong gibuhon tanganing makanta ko nin hali sa puso an satong mga kanta?’

4, 5. Magtao nin mga halimbawa kun gurano kahalaga kaidto sa suanoy na Israel an pagkanta sa saindang pagsamba.

⁴ Haloy nang ginagamit kan maimbod na mga parasamba ni Jehova an musika bilang sarong paagi tanganing umawon siya. Interesante nanggad na kan maimbod na naglilingkod ki Jehova an suanoy na mga Israelita, an pagkanta mahalagang marhay na kabtang kan saindang pagsamba. Halimbawa, bilang pag-andam para sa paglilingkod sa templo, nag-organisar si Hading David nin 4,000 na Levita tanganing magtugtog nin mga musika nin pag-umaw. Kaiba diyan an 288 “na sinanay sa pag-awit ki Jehova . . . na gabos eksperto.”—1 Cron. 23:5; 25:7, NW.

⁵ Sa inagurasyon kan templo, mahalaga an nagin papel kan musika asin pagkanta. Ini an sabi kan Bibliya: “Kan an mga paratrumpeta asin parakanta sarabay na nag-uumaw asin nagpapasalamat ki Jehova, asin mantang nagkukusog an tanog kan mga trumpeta, kan mga simbalo, asin kan iba pang panugtog mantang inuumaw ninda si Jehova, . . . napano kan kamurawayan ni Jehova an harong kan tunay na Diyos.” Siguradong nakakapakusog nanggad sa pagtubod an okasyon na idto!—2 Cron. 5:13, 14; 7:6, NW.

6. Iistorya an espesyal na presentasyon nin pagkanta na ginibo kaidto kan namamahala si Nehemias bilang gobernador sa Jerusalem.

⁶ Kan panginutan ni Nehemias an maimbod na mga Israelita sa pagtugdok liwat kan mga lanob kan Jerusalem, inorganisar man niya an mga parakantang Levita na sinasabayan nin manlain-lain na klase nin instrumentong panugtog. Kan idusay an naitugdok liwat na mga lanob, nakadagdag na marhay sa kaugmahan kan okasyon an espesyal na presentasyon nin musika. Sa presentasyon na iyan igwa nin “duwang dakulang koro nin [pasasalamat]” na naglalakaw sa mag-ibong na direksiyon. Dangan nagtagbuan sinda sa ibabaw kan lanob harani sa templo tanganing makagibo nin tanog na madadangog sa harayo. (Neh. 12:27, 28, 31, 38, 40, 43, An Banal na Biblia) Siguradong naugma si Jehova kan madangog niyang entusiyastiko siyang inuumaw kan saiyang mga parasamba paagi sa kanta.

7. Paano idinuon ni Jesus na mahalagang marhay an pagkanta sa Kristiyanong pagsamba?

⁷ Kan maestablisar an Kristiyanong kongregasyon, an musika padagos na nagin mahalagang marhay na kabtang kan tunay na pagsamba. Sa pinakamahalagang banggi sa kasaysayan nin tawo, nagkanta si Jesus asin an saiyang mga disipulo nin mga kanta nin pag-umaw ki Jehova pagkatapos kan inot na Pamanggihan kan Kagurangnan.—Basahon an Mateo 26:30.

8. Anong arugan an itinao kan mga Kristiyano kan inot na siglo kun dapit sa pag-umaw sa Diyos paagi sa pagkanta?

⁸ An mga Kristiyano kan inot na siglo nagtao nin arugan kun dapit sa iribang pag-umaw sa Diyos paagi sa pagkanta. Dawa sa mga harong sana sinda parating nagtitiripon, dai kaiyan nabawasan an saindang kaigutan sa pagkanta ki Jehova. Pinasabngan si apostol Pablo na itao an sadol na ini sa saiyang Kristiyanong mga tugang: “Padagos na tukduan asin pakusugon an lambang saro paagi sa mga salmo, mga pag-umaw sa Diyos, mga kantang pang-espirituwal na inawit na may pag-apresyar, asin sa saindong mga puso padagos kamong umawit ki Jehova.” (Col. 3:16) An mga kanta sa satuyang songbook talagang “mga kantang pang-espirituwal na [dapat awiton] na may pag-apresyar.” Kabtang iyan kan espirituwal na kakanon na itinatao kan “maimbod asin mapagmansay na uripon.”—Mat. 24:45.

9. (a) Ano an puwedeng makaulang sa iba na maugmang magkanta nin makusog sa satong mga pagtiripon asin asembleya? (b) Paano niyato dapat kantahon an mga kanta nin pag-umaw ki Jehova, asin sairisay an dapat na manginot? (Hilingon an ritrato sa kapinunan kan artikulo.)

⁹ Paano kun an pagkanta dai kinatudan sa saindong pamilya, kultura, o lugar? Paagi sa modernong teknolohiya, puwede mong madangog an propesyonal na mga parakanta. Alagad, tibaad masupog o madisganar ka pag ikinumparar mo an boses mo sa mga parakanta sa industriya nin musika. Pero dai iyan dapat makaulang sa saimong responsabilidad na magkanta nin mga pag-umaw ki Jehova. Imbes, kaputan nin tanos an saimong songbook, dangan entusiyastikong kumanta nin hali sa puso! (Esd. 3:11; basahon an Salmo 147:1.) Sa dakul na Kingdom Hall ngunyan, mahihiling na sa mga monitor an liriko kan mga kanta tanganing makakanta kita nin buwelo. Interesante man na kaiba na sa kurikulum na pinag-aadalan kan mga elder sa Pang-Kahadian na Paadalan sa Pagmiministro an pagkanta nin mga awit na pang-Kahadian. Idinuduon kaini na kaipuhan kan mga elder na manginot sa pagkanta sa kongregasyon.

10. Ano an dapat niyatong tandaan kun natatakot kitang magkanta nin makusog?

¹⁰ An sarong dahilan na nakakaulang sa dakul na magkanta nin makusog iyo an takot. Tibaad natatakot sinda na magin lataw-lataw an boses ninda o na posibleng dai magayunan diyan an iba. Pero, dapat niyatong tandaan na pag kita nagtataram, “gabos . . . kita napapasala nin dakul na beses.” (Sant. 3:2) Dawa arog kaiyan, padagos pa man giraray kitang nagtataram. Kaya, taano ta tutugutan niyatong maulang kita kan satong bakong perpektong boses na umawon si Jehova paagi sa pagkanta?

11, 12. Magtao nin pirang suhestiyon tanganing mapauswag an satong pagkanta.

¹¹ Tibaad nasusupog kitang magkanta huling dai ta aram kun paano an tamang pagkanta. Pero, puwede tang mapauswag an satong pagkanta paagi sa pagsunod sa pirang simpleng suhestiyon. *

 ¹² Manunudan mong magkanta nin may puwersa asin nin makusog paagi sa tamang paghangos. Kun paanong an kuryente an nagpapailaw sa bumbilya, an paghangos an nagsusustenir sa boses mo pag nagtataram ka o nagkakanta. Dapat kang magkanta nin arog kakusog sa boses mo pag nagtataram ka o mas makusog pa diyan. (Hilingon an mga suhestiyon na nasa Makinabang sa Edukasyon sa Teokratikong Paadalan sa Pagmiministro, pahina 181 sagkod 184, sa subtemang “Kontrolon nin Tama an Saindong Suplay na Aire.”) Sa katunayan, kun dapit sa pagkanta nin mga pag-umaw, sinasabi kun minsan kan Kasuratan sa mga parasamba ni Jehova na “kumurahaw . . . na may kaugmahan.”—Sal. 33:1-3, NW.

13. Paano niyato mapapakusog an satong kumpiyansa pag nagkakanta?

¹³ Sa pampamilyang pagsamba o dawa kun ika sana, purbaran an minasunod: Pumili nin saro sa paborito mong kanta sa satong songbook. Basahon an liriko nin makusog, may puwersa, asin may kumpiyansa. Dangan, sa parehong kusog nin boses, basahon an sarong frase kan kanta sa saro sanang paghangos. Tapos, kantahon an fraseng iyan gamit an iyo man sanang kusog nin boses. (Isa. 24:14) An boses mo sa pagkanta magigin mas bilog, asin marahay na bagay iyan. Dai ka matakot na magkanta o masupog huli sa boses mo!

14. (a) Paano makakatabang an mas pagbuka kan nguso pag nagkakanta? (Hilingon an kahon na “ Kun Paano Mo Mapapauswag an Saimong Pagkanta.”) (b) Anong mga suhestiyon mapadapit sa mga problema may koneksiyon sa boses an nahiling mong praktikal sa saimo?

¹⁴ Magigin bilog sana an boses mo sa pagkanta kun ibubuka mo an saimong nguso. Kaya an saro pang suhestiyon iyo na mas ibuka an saimong nguso pag nagkakanta kisa sa ginigibo mo pag nagtataram ka. Ano an dapat mong gibuhon kun sa hiling mo an boses mo kulang nin puwersa, o na tibaad malagtingon o matinison iyan? Makakahanap ka nin praktikal na mga suhestiyon mapadapit sa mga problemang ini sa Makinabang sa Edukasyon sa Teokratikong Paadalan sa Pagmiministro, pahina 184, sa kahon na “Pakahale kan Espesipikong mga Problema.”

15. (a) Ano an ipinaisi sa taunan na miting kan 2016? (b) Ano an nagkapirang katuyuhan kan bagong songbook?

¹⁵ Sa taunan na miting kan Watch Tower Bible  and Tract Society of Pennsylvania kan 2016, maugmahon an gabos kan ipaisi ni Brother Stephen Lett kan Namamahalang Grupo na magkakaigwa na nin bagong songbook, na may titulong “Maugmang Magkanta” ki Jehova, na gagamiton sa mga pagtiripon. Sinabi ni Brother Lett na an sarong katuyuhan kan rebisyon iyo na maiuyon an mga kanta sa rebisadong New World Translation of the Holy Scriptures. Para magibo iyan, kinaipuhan na halion o baguhon an mga liriko na may mga terminong dai na ginamit sa 2013 na rebisyon kan New World Translation. May iiniba man na bagong mga kanta dapit sa satong paghuhulit asin mga kantang nagpapahayag kan satong pasasalamat sa pantubos. Saro pa, huling an pagkanta sarong mahalagang marhay na kabtang kan satong pagsamba, gusto kan Namamahalang Grupo na makaprodusir nin de-kalidad na libro na an cover kaagid kan sa rebisadong New World Translation.

16, 17. Anong mga pagbabago an ginibo sa bagong songbook?

¹⁶ Tanganing magin mas pasil gamiton an “Maugmang Magkanta” ki Jehova, pigpasunod-sunod an mga kanta sigun sa tema. Halimbawa, manungod ki Jehova an inot na 12 kanta, mapadapit man ki Jesus saka sa pantubos an kasunod kaiyan na 8 kanta, asin iba pa. Igwa iyan nin indise nin mga tema na makakatabang sa sato, halimbawa, kun nagpipili nin kanta para sa pampublikong pahayag.

¹⁷ Tanganing matabangan an gabos na makakanta nin hali sa puso, may mga lirikong binago tanganing magin mas malinaw an ideya asin tanganing halion an mga terminong dai na ginagamit sa aroaldaw. Halimbawa, an titulong “Pakatios” ginibo nang “Magi Kamong Mapasensiya,” asin binago man sigun diyan an liriko kaiyan. An titulong “Ingatan an Saindong Puso” ginibo na ngunyan na “Ingatan an Satong Puso” bilang pagpahiling nin konsiderasyon sa iba. Taano? Huling sa satong mga pagtiripon, asembleya, asin kumbensiyon dakul an nag-aaratender na baguhan, interesado, hoben, asin mga sister. Mamumugtak sinda sa alanganon na posisyon kun kakantahon ninda an lirikong garo baga dinidiktahan ninda an iba. Ini an dahilan kaya binago an titulo asin an liriko.

18. Taano ta dapat na magin pamilyar kita sa mga kanta sa satong bagong songbook? (Hilingon an nota sa ibaba.)

¹⁸ Dakul na kanta sa “Maugmang Magkanta” ki Jehova an nasa pormang pamibi. Paagi sa mga kantang ini, maipapahayag mo ki Jehova an nasa puso mo. An ibang kanta makakatabang tanganing “mapahiro [kita] na magpahiling nin pagkamuot asin marahay na mga gibo.” (Heb. 10:24) Siguradong gusto niyatong magin pamilyar sa tono, tiyempo, asin liriko kan satong mga kanta. Magigibo mo iyan paagi sa pagdangog sa vocal rendition kaini na nasa jw.org. Kun papraktison mo sa harong an mga kanta, manunudan mong kantahon an mga iyan nin may kumpiyansa asin nin hali sa puso. *

19. Paano magigibo kan gabos sa kongregasyon na direktang makikabtang sa pagsamba ki Jehova?

¹⁹ Tandaan na an pagkanta sarong mahalagang kabtang kan satong pagsamba. Sarong mapuwersang paagi iyan na maipapahiling niyato an satong pagkamuot asin pasasalamat ki Jehova. (Basahon an Isaias 12:5.) Pag maugma kang nagkakanta, madadagka mo man an iba na magkanta nin may kumpiyansa. Sa katunayan, gabos sa kongregasyon—mga hoben, may edad, asin mga interesado—puwedeng makikabtang sa paaging ini nin direktang pagsamba ki Jehova. Kaya dai mag-alangan na ipahayag an saimong sadiri paagi sa pagkanta. Imbes, sunudon an malinaw na paggiyang sinabi kan salmista: ‘Mag-awit kamo ki Jehova!’ Iyo, kumanta kita nin may kaugmahan!—Sal. 96:1.